Yeşaya | İsayya - Alov Kilsələr Birliyi

Fəsillər

GİRİŞ

«Yeşaya» Kitabının adı miladdan əvvəl VIII əsrin ikinci yarısında Yerusəlimdə yaşamış Yeşaya adlı böyük peyğəmbərin adı ilə bağlıdır. Yeşaya ibrani dilində «Rəbb xilas edir» mənasını verir. Kitabın belə adlanması müəyyən mənada kitaba bir mahiyyət verir.

Kitabı üç əsas hissəyə bölmək olar:

(1) 1-39-cu fəsillər cənub padşahlığı olan Yəhudanın qüvvətli qonşusu Aşşur ölkəsi tərəfindən təhdid edildiyi dövrə aiddir. Peyğəmbər alovlu nitqləri ilə xalqı və onun başçılarını salehliyə və doğru həyata çağırır. Yeşaya dönə-dönə xəbərdarlıq edirdi ki, Allaha itaətsizlik ölkənin dağılmasına və xalqın məhv olmasına səbəb olacaq. O həm də bütün dünyaya sülh və Davud nəslindən kamil padşah gələcəyini qabaqcadan xəbər verirdi.

(2) 40-55-ci fəsillər tarixi vəziyyətin dəyişməsini özündə əks etdirir. Bu fəsillər Yəhuda xalqının Babil əsarətində olduğu dövrə aiddir. Aşşurlulardan sonra Orta Şərqdə hakimiyyəti ələ keçirən Babillilər miladdan əvvəl 586-cı ildə Yerusəlimi zəbt edib əhalisini Babilə sürgün etdilər. Babil əsirliyi zamanı Yəhuda xalqı ümidini itirmiş və miskin hala düşmüşdü. Belə vəziyyətdə Yeşaya peyğəmbərlik edir ki, Allah Öz xalqını azad edəcək və onlar Yerusəlimdə yeni həyata başlayacaq. Bu fəsillər göstərir ki, tarixi idarə edən Allahdır və Onun Öz xalqına olan amalını başqa millətlər üçün də tətbiq etmək istəyir. Burada bütün millətlərin İsrail vasitəsilə xeyir-dua alacağından bəhs edilir.

(3) 56-66-cı fəsillərdə sürgündə olan yəhudilərin Yerusəlimdə yenidən yaşayacağı və Allahın Öz vədlərinə sadiq qalmasına əmin ola biləcəkləri bəyan edilir. Burada salehliyə və ədalətə əməl etməyə, Şənbə gününə düzgün riayət edilməsinə, qurban təqdiminə, duaya və oruca xüsusi diqqət yetirilir.

Kitabın məzmunu:

1:1–12:6 Xəbərdarlıq və vədlər

13:1–23:18 Millətlərin cəzalandırılması

24:1–27:13 Allahın dünyanı mühakimə etməsi

28:1–35:10 Sonrakı xəbərdarlıq və vədlər

36:1–39:8 Yəhuda padşahı Xizqiya və Aşşurlular

40:1–55:13 Təsəlli və ümid sözləri

56:1–66:24 Xəbərdarlıq və vədlər

Yeşaya 1

¹ Yəhuda padşahları Uzziya, Yotam, Axaz, Xizqiyanın dövründə Yəhuda və Yerusəlim barəsində Amots oğlu Yeşayaya görünən görüntü.

Rəbb xalqına xəbərdarlıq edir

²Ey göylər, eşidin,

Ey yer üzü, dinləyin!

Çünki Rəbb belə söylədi:

«Övladlar yetişdirib böyütdüm,

Amma onlar Mənə qarşı üsyankar oldular.

³Öküz yiyəsini,

Eşşək də sahibinin təknəsini tanıyır,

Lakin İsrail xalqı Məni tanımır,

Xalqım anlamır».

⁴Günah edən millətin,

Şər işlər görən xalqın,

Yolunu azmış nəslin,

Pozulmuş övladların vay halına!

Onlar Rəbbi tərk etdilər,

İsrailin Müqəddəsinə xor baxdılar,

Ondan üz döndərdilər.

⁵Siz nə üçün yenə döyüləsiniz,

Niyə üsyan etməkdə davam edirsiniz?

Xoralar başınızı tamamilə bürüyüb,

Ürəyiniz azara düşüb.

⁶Təpədən dırnağacan bədəniniz xəstədir,

Bir sağlam yeriniz yoxdur:

Yaralarınız, zədələriniz,

Yenə də vurulmuş yaralarınız

Təmizlənməmiş, sarılmamış,

Məlhəmlə yumşaldılmamışdır.

⁷Ölkəniz viran qaldı,

Şəhərləriniz alışıb-yandı,

Yadellilər gözünüzün önündəcə torpağınızı yeyib-dağıtdı.

Torpağınız kimsəsiz qalıb,

Sanki yad adamlar oranı talayıb.

⁸Sion qızı bağdakı çardaq, bostandakı koma,

Mühasirəyə alınmış şəhər kimi tək qalıb.

⁹ Əgər Ordular Rəbbi

Bizim üçün bir neçə adamı sağ qoymasaydı,

Biz Sodom kimi olardıq,

Homorraya bənzəyərdik.

¹⁰Ey Sodom başçıları,

Rəbbin sözünü eşidin!

Siz, ey Homorra xalqı,

Allahımızın təlimini dinləyin!

¹¹ Rəbb deyir:

«Qurbanlarınız çoxalıb, Mənə nə?

Yandırma qoç qurbanlarından,

Bəslənmiş heyvanların piyindən doymuşam.

Buğa, quzu, təkə qanını istəmirəm.

¹²Hüzuruma gələrkən

Əlinizdə bunları gətirməyinizi kim istədi?

Məbədimin həyətlərinə boş yerə ayaq basırsınız.

¹³Mənə artıq batil təqdimlər gətirməyin,

Buxur Məndə ikrah yaradır.

Pisliklə dolu

Təzə Ay mərasimlərinizə,

Şənbə günlərinizə,

Müqəddəs toplantılarınıza

Dözə bilmirəm!

¹⁴Təzə Ay mərasimlərinizə,

Bayram günlərinizə

Ürəkdən nifrət edirəm.

Bunlar Mənə yük oldu,

Onları daşımaqdan yoruldum.

¹⁵Siz əl açıb Mənə yalvaranda

Göz yumacağam.

Nə qədər çox dua etsəniz də,

Yenə qulaq asmayacağam.

Əlləriniz qanla doludur,

¹⁶Yuyunub təmizlənin,

Gözümün önündə işlərinizi şərdən uzaqlaşdırın,

Pislik etməkdən vaz keçin.

¹⁷Yaxşılıq etməyi öyrənin,

Ədaləti axtarın,

Məzlumları qurtarın,

Yetimin haqqını qoruyun,

Dul qadını müdafiə edin».

¹⁸Rəbb deyir:

«Gəlin indi birgə düşünək bu an,

Günahlarınız qıpqırmızı parça kimi görünsə də,

Onlar qar kimi ağ olacaq,

Tünd qırmızı rəngə çalsa da,

Onlar ağ yun kimi bəyaz olacaq.

¹⁹İtaətkar olub sözə baxsanız,

Torpağın ən gözəl bəhrələrindən yeyərsiniz.

²⁰Əgər üsyankar olub Məni rədd etsəniz,

Qılınc sizi yeyəcək».

Bu sözlər Rəbbin ağzından çıxıb.

Günahlı şəhər

²¹Rəbbə sadiq şəhər

Necə də fahişəyə bənzər oldu!

Axı o, ədalətlə dolu idi,

Orada salehlik məskunlaşmışdı,

İndi isə qatillərlə doludur!

²²Gümüşünüz tullantıya çevrildi,

Şərabınıza su qatıldı.

²³Başçılarınız üsyankar olub oğrularla əlbirdir.

Hər kəs rüşvəti sevir, bəxşiş dalınca düşür.

Yetimin haqqını qorumur,

Dul qadını müdafiə etmək haqqında düşünmür.

²⁴Buna görə də Sahibimiz, Ordular Rəbbi,

İsrailin Qadir Allahı

Belə bəyan edir:

«Yağılarımı cəzalandırıb rahatlanacağam,

Düşmənlərimdən qisas alacağam.

²⁵Ey İsrail xalqı, sənə əlimi uzadacağam,

Paxırını gilabı ilə təmizləyəcəyəm,

Bütün çirkini yuyacağam.

²⁶Hakimlərini, məsləhətçilərini

Əvvəlki kimi geri qaytaracağam.

Sənə yenidən:

“Salehlik şəhəri, sadiq şəhər” deyiləcək».

²⁷Sion ədalətlə,

Tövbə edən sakinləri salehliklə qurtulacaq.

²⁸Lakin üsyankarlarla günahkarlar

Birgə həlak olacaq,

Rəbbi tərk edənlər yox olacaq.

²⁹Palıd ağaclarına səcdə etməkdən xəcalət çəkəcəksiniz,

Seçdiyiniz bağlarda ibadət etməkdən utanacaqsınız.

³⁰Yarpaqları solmuş palıd ağacına,

Susuz bağa dönəcəksiniz.

³¹Güclü adam kətan qırıntısına oxşayacaq,

Gördüyü iş qığılcım kimi olacaq,

İkisi birlikdə yanacaq,

Onları söndürən olmayacaq.

Yeşaya 2

Rəbbin dağı

(Mik. 4:1-3)

¹Amots oğlu Yeşayanın Yəhuda və Yerusəlim barəsində gördükləri: ²Axır zamanda Rəbbin evi olan dağ

Dağların zirvəsində möhkəm duracaq,

Təpələrdən yuxarı ucalacaq.

Bütün millətlər ona sarı gələcək.

³Çox xalqlar gəlib deyəcək:

«Gəlin Rəbbin dağına,

Yaqubun Allahının evinə qalxaq,

Qoy Rəbb bizə Öz yollarını öyrətsin,

Biz Onun rizləri ilə gedək».

Siondan Rəbbin təlimi,

Yerusəlimdən Onun kəlamı yayılacaq.

⁴ Millətlər arasında Rəbb hakim olacaq,

Çox xalqlar haqqında qərar çıxaracaq.

Onlar qılınclarından kotan,

Nizələrindən isə dəryaz düzəldəcək.

Millət millətə qarşı qılınc qaldırmayacaq,

Artıq dava etməyi öyrənməyəcək.

⁵Ey Yaqub nəsli, gəlin Rəbbin nurunda gəzək.

Rəbbin günü

⁶Ya Rəbb, xalqını – Yaqub nəslini atdın,

Çünki onlar

Şərqdən gələn mövhumatlara uymuşdular,

Filiştlilər kimi falçılıq edirlər,

Əcnəbilərin adət-ənənələrinə əməl edirlər.

⁷Ölkələri qızıl-gümüşlə dolu,

Xəzinələrinin sonu yoxdur.

Ölkələrində çoxlu atlar var,

Döyüş arabaları külli miqdardadır.

⁸Ölkələri bütlərlə doludur,

Əlləri ilə düzəltdikləri,

Barmaqları ilə işlədikləri

Bütlərin qarşısında səcdə qılırlar.

⁹Buna görə də hamı yerə səriləcək,

Hər kəs diz üstə çökdürüləcək.

Ya Rəbb, onları bağışlama!

¹⁰ Rəbbin zəhmli üzündən,

Ehtişamının əzəmətindən

Qayalıqlara gedin,

Yerin altında gizlənin.

¹¹Adamların təkəbbürlü baxışları alçaldılacaq,

İnsanların qüruru qırılacaq,

O gün yalnız Rəbb yüksəldiləcək.

¹²Çünki o gün Ordular Rəbbi

Bütün qürurluları, lovğaları, məğrurları alçaldacaq.

¹³Livanın bütün hündür və vüqarlı sidr ağaclarını məhv edəcək,

Bütün Başan palıdlarını yox edəcək.

¹⁴Bütün ulu dağları, hündür təpələri,

¹⁵Bütün yüksək qüllələri,

Qala divarlarını yerlə yeksan edəcək,

¹⁶Bütün Tarşiş gəmilərini,

Bütün gözəl gəmiləri yox edəcək.

¹⁷Adamların təkəbbürü qırılacaq,

İnsanların qüruru alçaldılacaq,

O gün yalnız Rəbb ucaldılacaq.

¹⁸Bütlər tamamilə aradan götürüləcək.

¹⁹ Rəbb yeri sarsıtmağa qalxanda

Onun zəhmli üzündən, ehtişamının əzəmətindən

Hər bir insan qayalıqdakı mağaralara,

Yerin altındakı xəndəklərə qaçıb girəcək.

²⁰O gün insanlar

Səcdə etmək üçün düzəltdikləri

Qızıl və gümüş bütlərini götürüb

Köstəbək və yarasaların

Qabağına atacaqlar ki,

²¹Rəbb yeri sarsıtmağa qalxarkən

Onun zəhmli üzündən, ehtişamının əzəmətindən

Qaçmaq üçün qayalıqdakı çatlaqlara,

Uçurumlardakı yarıqlara girsinlər.

²²Nəfəsi burunda olan insandan əl çəkin,

Onun nə dəyəri var ki?

Yeşaya 3

Yerusəlimdə qarmaqarışıqlıq

¹Budur, Sahibimiz, Ordular Rəbbi

Yerusəlimdən və Yəhudadan hər bir yardımı, köməyi,

Bütün çörək, su yardımını kəsəcək.

²İgidlərlə cəngavərləri,

Hakimlərlə peyğəmbərləri,

Falçılarla ağsaqqalları,

³Əllibaşılarla adlı-sanlı adamları, məsləhətçiləri,

Mahir sehrbazlarla cadugərləri aradan qaldıracaq.

⁴Uşaqları onların üzərinə başçı qoyacağam,

Qoy körpələr onlara hökm etsin.

⁵İnsan insanla, qonşu qonşusu ilə,

Cavan yaşlı ilə, adi adam nüfuzlu insanla

Həyasızcasına rəftar edəcək.

⁶Ailədə qardaş qardaşa sarılıb deyəcək:

«Sənin heç olmasa əyninə geyməyə paltarın var.

Sən başçımız ol,

Qoy bu xarabalıqlar sənin əlinin altında olsun!»

⁷O vaxt bu adam uca səslə söyləyəcək:

«Mən yaralarınızı sarımağı bacarmaram,

Çünki evimdə nə yemək, nə də paltar var,

Məni xalqın başçısı qoymayın».

⁸Yerusəlim sarsıldı, Yəhuda dağıldı,

Çünki sözləri və əməlləri

Rəbbə qarşı oldu,

Onun əzəmətli hüzuru kimsə tərəfindən sayılmadı.

⁹Sifətlərinin ifadəsi onlara qarşı şəhadət edir,

Günahları haqda Sodomdakı kimi açıq danışırlar,

Bunu gizlətmirlər.

Vay onların halına!

Axı bu bəlanı başlarına özləri gətirdi.

¹⁰Saleh adamlara söyləyin ki,

Onlara yaxşılıq ediləcək,

Çünki onlar xeyirxahlıqlarının bəhrəsini yeyəcək.

¹¹Pis adamların vay halına!

Çünki onlara pislik olunacaq,

Elədikləri əməlləri qarşılarına çıxacaq.

¹²Uşaqlar xalqıma zülm edir,

Qadınlar üzərimizdə hökm sürür!

Ey xalqım, sənə yol göstərənlər

Səni azdırır, yolunu dolaşdırırlar!

¹³Rəbb məhkəməsini qurmaq üçün qalxır,

Xalqları mühakimə etmək üçün durur.

¹⁴Rəbb xalqının rəhbərlərini,

Başçılarını məhkəməyə gətirir:

«Sizsiniz üzüm bağını yeyib-dağıdan,

Kasıbların malı ilə evlərinizi dolduran.

¹⁵Nə haqla xalqıma zülm edib

Yoxsullara əzab verirsiniz?»

Bunu Ordular Rəbbi Xudavənd bəyan edir.

Yerusəlim qadınlarına xəbərdarlıq

¹⁶Rəbb deyir: Madam ki

Sion qızları çox təkəbbürlüdür,

Boylana-boylana gəzir, göz-qaş oynadır,

Addımlarını asta-asta atırlar,

Ayaqlarındakı xalxalları cingildədib yeriyirlər,

¹⁷Buna görə də Xudavənd

Sion qızlarının başlarına qotur salacaq.

Ayıb yerlərini açıb göstərəcək.

¹⁸O gün Xudavənd onların bəzəklərini –

Topuqlara taxılan bilərziklərini,

Araqçınlarını, aypara şəkilli boyunbağılarını,

¹⁹Sırğalarını, qolbaqlarını, örpəklərini,

²⁰Tac şəkilli başlıqlarını,

Bazubəndlərini, qurşaqlarını,

Ətirlə dolu mücrülərini,

Tilsimlənmiş bəzək əşyalarını,

²¹Üzüklərini, burun halqalarını,

²²Bayram libaslarını, paltarlarını,

Örtüklərini, əl çantalarını,

²³Güzgülərini, nəfis toxunmuş kətan libaslarını,

Çalmalarını, duvaqlarını əllərindən alacaq;

²⁴O vaxt gözəl ətir yerinə üfunət,

Kəmər əvəzinə ip,

Lülə-lülə saç əvəzinə keçəl baş,

Bəzəkli paltar əvəzinə çul bürüncək,

Gözəllik əvəzinə dağlanma olacaq.

²⁵Kişiləriniz qılıncla,

İgidləriniz döyüşdə məhv olacaq.

²⁶Yerusəlimin darvazaları

Nalə çəkib yas tutacaq,

Bu şəhərsə kimsəsiz qadın tək

Quru yerdə oturacaq.

Yeşaya 4

¹O gün yeddi qadın

Bir kişinin yaxasından tutub belə deyəcək:

«Öz çörəyimizi yeyib öz paltarımızı geyinərik,

Təki adın üstümüzdə olsun,

Bizi xəcalətdən qurtar».

Yerusəlimin gələcəyi

²O gün Rəbbin Pöhrəsi gözəl və əzəmətli olacaq, İsrail xalqından xilas olub sağ qalanlar torpağın verdiyi bəhrə ilə fəxr edib şərəflənəcəklər. ³Sionda, yəni Yerusəlimdə sağ qalanlara, orada qeyd olunub yaşayanlara «müqəddəs» deyiləcək. ⁴Xudavənd Sion qızlarının murdarlığını yuyan zaman ədalət və alov ruhu ilə Yerusəlimi günahlı qandan təmizləyəcək. ⁵ Sonra Rəbb Sion dağının hər yanını, orada toplananların üzərini gündüz bulud və tüstü, gecə isə parlaq alovla örtəcək. Həqiqətən, əzəmətli şəhərin üzərinə örtük olacaq. ⁶Bu bir çardaq olub gündüz qızmar istidə kölgə olacaq, fırtına ilə yağışa qarşı sığınacaq və daldalanma yeri olacaq.

Yeşaya 5

Üzüm bağı haqqında nəğmə

¹Sevgilimin üzüm bağı barəsində Məhəbbət nəğməsini oxuyuram:

Torpağın məhsuldar bir təpəsində

Sevgilimin bir üzüm bağı var idi.

²O, torpağı belləyib daşlardan təmizlədi,

Seçmə meynələr əkdi,

Ortada gözətçi qülləsi tikdi,

Üzümsıxan düzəltdi,

Üzümlüyün barını gözlədi,

Amma bağ cır üzüm gətirdi.

³«İndi isə xahiş edirəm, ey Yerusəlimdə yaşayanlar,

Ey Yəhuda adamları,

Mənimlə üzüm bağımın arasında hakim olun!

⁴Bağım üçün daha nə etməliyəm?

Üzümlüyün barını gözləyərkən

Axı nə üçün bağım cır üzüm gətirsin?

⁵İndi qoy mən sizə bağımla nə edəcəyimi bildirim:

Çəpərini sökəcəyəm və onu yeyib-dağıdacaqlar,

Hasarını yıxacağam və onlar tapdalanacaq.

⁶Oranı viranəliyə çevirəcəyəm,

Oranı nə budayacaqlar, nə də belləyəcəklər.

Orada tikan və qanqal bitəcək,

Buludlara əmr edəcəyəm ki,

Üzərinə yağış yağmasın».

⁷İsrail nəsli Ordular Rəbbinin üzüm bağıdır,

Yəhuda adamları isə Onun sevimli meynələridir!

O, ədalət gözləyirdi,

Budur, zorakılıq gördü,

O, salehlik gözləyirdi,

Budur, fəryadlar gördü!

İnsanların pis əməlləri

⁸Yer qalmayana qədər evi evə,

Tarlanı tarlaya birləşdirənlərin vay halına!

Yaşamağa yer qoymamısınız,

Məgər bu ölkədə tək siz yaşayırsınız?

⁹Ordular Rəbbi mənə belə eşitdirdi:

«Böyük və yaraşıqlı çoxlu evlər xaraba qalacaq,

İçində yaşayan olmayacaq.

¹⁰Üzümlüyün on sahəsindən

bir bat şərab əldə ediləcək, Bir xomer toxumdan bir efa taxıl əmələ gələcək».

¹¹Vay halına səhər erkən qalxıb içki ardınca düşənlərin,

Gecə yarısınadək şərab içib keflənənlərin!

¹²Onların ziyafətlərində

Lira, çəng, dəf və ney çalınar,

Şərab içilər,

Lakin onlar Rəbbin gördüyü işlərə

Diqqət etməzlər, əməllərinə baxmazlar!

¹³Buna görə xalqım ağılsızlığından sürgünə gedəcək,

Onun adlı-sanlı adamları acından öləcək,

Adi adamlar isə susuzluqdan yanacaq!

¹⁴Ölülər diyarı həddindən artıq ağzını açıb

Doymaq bilmir.

Yerusəlimin adlı-sanlıları,

Adi adamları, səs-küylə əylənən insanları bu diyara enəcək.

¹⁵Buna görə də hamı yerə səriləcək,

Hər kəs diz üstə çökdürüləcək,

Təkəbbürlü baxışlar alçaldılacaq.

¹⁶Amma Ordular Rəbbi

Ədaləti ilə ucaldılacaq,

Müqəddəs Allah salehliyi ilə

Müqəddəsliyini göstərəcək.

¹⁷Quzular öz otlaqlarındakı kimi otlayacaq,

Varlıların viranə qalan evlərini yadellilər alacaq.

¹⁸Pisliyi yalanla hörülmüş iplərlə,

Günahı araba kəndirləri ilə çəkənlərin vay halına!

¹⁹Onlar deyir: «Qoy Allah tələssin,

Öz əməlini tez həyata keçirsin, biz də görək.

Qoy İsrailin Müqəddəsinin niyyəti gerçək olsun ki, bunu bilək!»

²⁰Vay halına pisə yaxşı, yaxşıya pis söyləyənlərin,

Qaranlığı işıq, işığı qaranlıq sayanların,

Acıya şirin, şirinə acı deyənlərin!

²¹Vay halına özlərini müdrik zənn edənlərin, ağıllı sayanların!

²²Vay halına şərab içməkdə qəhrəman,

İçkiləri qarışdırıb içməkdə pərgar olanların!

²³Vay halına rüşvət alıb təqsirkara bəraət qazandıranların,

Haqlıların haqqını əlindən alanların!

²⁴Beləliklə, alovun dili samanı necə yeyib-qurtarırsa,

Küləş od içində necə əriyib-gedirsə,

Onlar da köklərindən elə çürüyəcək,

Tumurcuqları toz kimi havaya sovrulacaq,

Çünki Ordular Rəbbinin qanununu rədd etdilər,

İsrailin Müqəddəsinin sözünə xor baxdılar.

²⁵Buna görə də Rəbbin qəzəbi Öz xalqına qarşı alovlandı,

Əlini onlara qarşı uzadaraq onları vurdu.

Dağlar titrədi, küçələrdə meyitləri zibil kimi qaldı,

Bütün bunlara qarşı yenə də Rəbbin qəzəbi sönmədi,

Əli hələ də cəzalandırmağa hazır idi.

²⁶Rəbb uzaqda yaşayan millətləri

Bayraq işarəsi ilə,

Onları yer üzünün ucqarlarından

Fit səsi ilə səsləyəcək.

Tezliklə bu millətlər gələcək.

²⁷Aralarında yorulan, büdrəyən olmayacaq.

Onlar mürgüləməyəcək və yuxuya getməyəcək,

Belindəki kəmər açılmayacaq, ayaqqabı bağı qırılmayacaq.

²⁸Onların oxları iti, yayları da dartılmışdır.

Atların dırnaqları çaxmaq daşına bənzər,

Döyüş arabalarının təkərləri qasırğa kimidir.

²⁹Onların nərəsi bağıran şikarlarını qapıb aparan,

Kimsə onu əlindən ala bilməyən

Şirin, gənc aslanın nərəsinə bənzər.

³⁰O gün İsrailə qarşı onlar dənizin uğultusu kimi gurlayacaqlar.

Kim yerə baxarsa, budur, zülmət, dərd görəcək.

Axı işıq qara buludlarla örtülüb.

Yeşaya 6

Yeşayanın görüntüsü

¹Padşah Uzziya ölən il mən Xudavəndi gördüm. O, uca və əzəmətli taxtda oturmuş və geyimlərinin ətəyi məbədin döşəməsini örtmüşdü. ²Onun ətrafında seraflar dayanmışdı. Hər birinin altı qanadı var idi. Qanadının ikisi ilə üzlərini, ikisi ilə ayaqlarını örtmüş, ikisi ilə uçurdular. ³ Biri o birini səsləyib deyirdi: «Ordular Rəbbi müqəddəsdir, müqəddəsdir, müqəddəsdir!

Bütün yer üzü Onun əzəməti ilə doludur».

⁴ Serafların səsindən qapı çərçivələri ilə kandarları sarsıldı, məbəd tüstü ilə doldu. ⁵Mən dedim: «Vay halıma, həlak oldum!

Çünki ağzı murdar bir adamam,

Həm də murdar ağızlı adamlar arasında yaşayıram.

Buna baxmayaraq, qarşımda Padşahı –

Ordular Rəbbini gözlərimlə gördüm».

⁶Seraflardan biri mənə tərəf uçdu, əlində də maşa ilə qurbangahdan götürdüyü yanar kömür var idi. ⁷O, kömürlə dodaqlarıma toxunaraq dedi: «Budur, bu kömür dodaqlarına dəydi,

Pisliyin silindi, günahın bağışlandı».

⁸Sonra Xudavəndin səsini eşitdim: «Kimi göndərim? Bizim üçün kim gedəcək?» Mən dedim: «Mən buradayam. Məni göndər». ⁹ O dedi: «Get bu xalqa bunu çatdır: “Eşitdikcə eşidəcəksiniz, amma anlamayacaqsınız,

Gördükcə görəcəksiniz, amma qanmayacaqsınız.

¹⁰Bu xalqın ürəyini kütləşdir, qulaqlarını ağır eşidən elə, gözlərini yum ki, Gözləri ilə görməsinlər, qulaqları ilə eşitməsinlər,

Ürəkləri ilə anlamasınlar

Və Mənə sarı dönüb şəfa tapmasınlar”».

¹¹«Nə vaxtadək, ya Xudavənd?» deyə soruşdum. Rəbb cavab verdi: «Şəhərlər xarabalıqlara dönüb kimsəsiz,

Evlər adamsız, bu torpaq büsbütün viranə qalanadək.

¹²Rəbb adamları çox uzaqlara sürgün edəcək,

Ölkənin çox yerləri viran qalacaq.

¹³Xalqın onda biri qalsa belə,

Ölkə yenə dağılacaq;

Lakin kəsiləndə kötüyü qalan

Yabanı püstə və palıd ağacı kimi

Müqəddəs nəsil onun kötüyüdür».

Yeşaya 7

Padşah Axaza bir işarə: İmmanuel

¹Uzziya oğlu Yotam oğlu Yəhuda padşahı Axazın hökm sürdüyü dövrdə Aram padşahı Resinlə İsrail padşahı Remalya oğlu Peqah Yerusəlimə hücum etdilər, amma oranı ala bilmədilər. ²Davud nəslinə xəbər verildi ki, Aramlılarla Efrayimlilər birləşib ordu düzəldib. Padşahın və xalqın ürəyi meşə ağacları küləkdən titrəyən kimi titrədi. ³Rəbb Yeşayaya dedi: «Axazı qarşılamaq üçün oğlun Şear-Yaşuvla birgə yuxarı hovuzun su yolunun qurtaracağına, Mahudbasan tarlasına gedən yola çıx». ⁴Ona belə de: «Diqqətli və sakit ol, qorxma! Qoy ürəyin bu tüstülənən, yarısı yanmış iki odun parçasından – Resinin, Aramın və Remalya oğlunun qızğın qəzəbindən qorxmasın! ⁵Aram, Efrayim və Remalya oğlu sizə qarşı şər quraraq ⁶belə deyir: “Gəlin Yəhudanın əleyhinə çıxaq, vahiməyə salaraq zəbt edək və Tabel oğlunu oraya padşah qoyaq”». ⁷Xudavənd Rəbb belə deyir: «Bu iş olmayacaq, baş tutmayacaq.

⁸Çünki Aramın paytaxtı Dəməşqdir,

Dəməşqin başçısı da Resindir. Efrayim isə altmış beş ildən sonra

Darmadağın edilib xalq kimi qalmayacaq.

⁹Efrayimin paytaxtı Samariyadır,

Samariyanın başçısı isə ancaq Remalyanın oğludur.

Əgər imanda möhkəm durmasanız,

Heç dayana bilməzsiniz».

¹⁰Rəbb yenə Axaza söylədi: «Allahın Rəbdən bir işarə istə. ¹¹Qoy ya ölülər diyarı qədər dərin ya da göylər qədər uca olsun». ¹²Lakin Axaz cavab verdi: «Xeyr, Rəbbi sınamaq istəmirəm». ¹³Bunun üstündən Yeşaya belə dedi: «Eşidin, ey Davud nəsli! İnsanları bezdirməyiniz bəs deyilmi ki, mənim Allahımı da bezdirirsiniz? ¹⁴ Buna görə də Xudavənd Özü sizə işarə verəcək: budur, bakirə qız hamilə olub oğlan doğacaq, adını İmmanuel qoyacaq. ¹⁵Bu uşaq pisə pis deyib yaxşını seçə biləndə kəsmik və bal yeyəcək. ¹⁶Amma bu uşaq pisə pis deyib yaxşını seçə bilməzdən əvvəl səni dəhşətə salan o iki padşahın torpaqları boş qalacaq. ¹⁷Rəbb səni, xalqını və ata nəslini Efrayimin Yəhudadan ayrıldığı bu günə qədər görünməyən fəlakətə uğradacaq, Aşşur padşahını üstünüzə gətirəcək. ¹⁸O vaxt gələndə Rəbb fit çalacaq və

Misir çaylarının mənsəblərində yaşayanları milçəklər kimi,

Aşşur torpaqlarında yaşayanları arılar kimi səsləyəcək.

¹⁹Onlar axın-axın gəlib dərin vadilərdə,

Qaya yarıqlarında, bütün tikanlı kolluqlarda,

Otlaqlarda məskunlaşacaq.

²⁰O gün Xudavənd Fəratın o tayından muzdla tutduğu ülgüclə –

Aşşur padşahı ilə saçlarınızı,

Bədəndəki tüklərinizi və saqqallarınızı qırxacaq.

²¹O gün bir düyə ilə bir cüt qoyun bəsləyən

²²Aldığı bol süd nəticəsində kərə yağı yeyəcək.

Ölkədə sağ qalan hər kəs kərə yağı ilə bal yeyəcək.

²³O gün min gümüş dəyərində min tənək olan

Bağ tikanlı, qanqallı çölə dönəcək.

²⁴Adamlar oralardan oxlarla, kamanlarla keçəcək,

Çünki ölkənin hər yanı tikan və qanqalla örtüləcək.

²⁵Bir vaxt şumlanıb əkin əkilən təpələr

Kimsənin girə bilməyəcəyi tikanlı, qanqallı çölə dönəcək,

Mal-qaranın gəzdiyi, qoyun-keçinin tapdaladığı yerlərə çevriləcək».

Yeşaya 8

İşarə: Maher-Şalal-Xaş-Baz

¹Rəbb mənə belə dedi: «Böyük tumar götür və üstündə aydın hərflərlə Maher-Şalal-Xaş-Baz yaz. ²Kahin Uriya ilə Yeverekya oğlu Zəkəriyyəni özümə etibarlı şahid seçdim». ³Sonra mən peyğəmbər olan arvadımla yaxınlıq etdim və o hamilə olub bir oğlan doğdu. Rəbb mənə dedi: «Onun adını Maher-Şalal-Xaş-Baz qoy. ⁴Çünki körpə “anam, atam” deməyi öyrənməzdən əvvəl Dəməşqin sərvəti və Samariyanın qəniməti Aşşur padşahına aparılacaq». ⁵Rəbb mənimlə yenə danışıb belə dedi: ⁶«Bu xalq sakit axan Şiloah sularını rədd edib

Resinlə Remalyanın oğluna meyl saldıqlarına görə

⁷Mən Xudavənd, Fəratın coşan qüdrətli sularını –

Aşşur padşahı və onun qüvvətini bu xalqın üstünə gətirəcəyəm.

Bu sular öz yataqlarından yuxarı qalxaraq aşıb-daşacaq.

⁸Bu sular Yəhudanı basacaq, daşıb içindən keçəcək,

Boğaza qədər çatacaq.

Ordular qanadlarını açıb bütün ölkəyə dolacaq, ey İmmanuel!»

⁹Ey xalqlar, pis işlər görün və qırılın!

Ey yer üzünün bütün uzaq ölkələri, eşidin!

Döyüşə hazırlaşın və qırılın!

Bəli, döyüşə hazırlaşın və qırılın!

¹⁰Birlikdə məsləhətləşin, o boşa çıxacaq.

İstədiyiniz qədər danışın, heç bir söz gerçək olmayacaq,

Çünki Allah bizimlədir.

Rəbbin Öz xalqına xəbərdarlığı

¹¹Rəbb bu xalqın tutduğu yol ilə getməməyi söyləyərək məni qüdrətli əli ilə saxladı və belə xəbərdarlıq etdi: ¹²

«Bu xalqın sui-qəsd dediyi hər şeyə siz sui-qəsd deməyin, Onların qorxduqlarından qorxmayın, lərzəyə gəlməyin.

¹³Ordular Rəbbini müqəddəs sayın,

Ondan qorxun və lərzəyə gəlin!

¹⁴O, Müqəddəs məkan olacaq, Amma İsrailin iki padşahlığına büdrəmə daşı və yıxma qayası,

Yerusəlim sakinlərinə tələ və tor olacaq.

¹⁵Bir çoxları büdrəyib yıxılacaq və qırılacaq,

Tələyə düşüb əsir aparılacaq».

¹⁶Ya Rəbb, şagirdlərimin arasında

Şəhadətini qoruyub saxla, təlimini möhürlə!

¹⁷Yaqub nəslindən üzünü gizlədən Rəbbi gözləyəcəyəm, Ona ümid edəcəyəm.

¹⁸Mən və Rəbbin mənə verdiyi övladlar

Sion dağında məskunlaşan Ordular Rəbbinin

İsraildəki rəmzləri və nişanələriyik.

¹⁹Sizə bəzi adamlar deyəndə ki, «pıçıldayıb-mırtıldayan cindarlarla, ruhçağıranlarla danışın», onlara belə cavab verin: «Xalq öz Allahından məsləhət almamalıdırmı? Heç dirilər barəsində ölülərlə danışarlarmı? ²⁰Allahın təliminə, şəhadətinə sarı dönün! Əgər onlar Allahın kəlamı ilə danışmasa, onlar üçün nur şəfəqi saçmayacaq. ²¹Onlar çarəsiz və ac qalaraq oradan keçəcəklər. Ac qalanda qəzəblənəcəklər, padşahlarını və özlərinin Allahını lənətləyəcəklər. ²²Göyə də, yerə də baxsalar, əzabdan, qaranlıqdan, zülmətdən savayı heç bir şey görməyəcəklər. Qatı zülmətə atılacaqlar».

Yeşaya 9

Sülh Hökmdarı

¹Lakin əzab çəkmiş xalq qaranlıqda qalmayacaq. Keçmişdə Rəbb Zevulun və Naftali bölgələrini alçaltdı,

Gələcəkdə isə dənizkənarı yolu,

İordan çayının o biri tayını,

Müxtəlif millətlər yaşayan Qalileyanı

Şərəfə çatdıracaq.

² Zülmətdə yaşayan xalq

Möhtəşəm bir işıq gördü.

Ölüm kölgəsi diyarında məskunlaşanların

Üzərinə nur doğdu.

³Ya Rəbb, milləti çoxaldıb sevinclərini artırdın,

Əkib-biçənlərin fərəhləndiyi,

Qənimət bölənlərin sevindiyi kimi

Onlar da Sənin hüzurunda sevindilər.

⁴Çünki onlara yük olan boyunduruğunu,

Çiyinlərini döyən çomağını,

Onlara zülm edənlərin dəyənəyini çilik-çilik etmisən

Midyanlıların başlarına gətirdiyin gün kimi.

⁵Döyüşdə geyilən çəkmələri,

Qana bulanmış geyimləri yandırılacaq,

Oda yem olacaq.

⁶Çünki bizim üçün körpə doğuldu,

Bizə oğul verildi,

Hakimiyyət onun çiyinləri üzərində olacaq,

Onun adı Ecazkar Məsləhətçi, Qüdrətli Allah,

Əbədi Ata, Sülh Hökmdarı olacaq.

⁷ Hakimiyyətinin və sülhünün artmasının sonu olmayacaq,

O, Davudun taxtı və padşahlığı üzərində hökm sürəcək,

O, hakimiyyətini ədalətlə və salehliklə indidən sonsuzadək quracaq.

Ordular Rəbbinin qeyrəti bunu edəcək.

Rəbbin İsrailə qarşı qəzəbi

⁸İsrail üzərində həyata keçirilsin deyə

Rəbb Yaqub nəslinin əleyhinə xəbərdarlıq etdi.

⁹Bütün xalq,

Efrayimin, Samariyanın sakinləri

Bunu biləcək.

Bu qürurlu, təkəbbürlü xalq belə deyir:

¹⁰«Kərpic evlərimiz yıxıldı,

Amma əvəzinə yonma daşdan evlər tikərik.

Firon ənciri ağacları kəsildi,

Amma biz onların əvəzinə sidr ağacları əkərik».

¹¹Buna görə Rəbb Resinin düşmənlərini gücləndirəcək,

Yağılarını dirçəldəcək,

¹²Aramlılar şərqdən,

Filiştlilər qərbdən

Ağızlarını açıb İsraili udacaq.

Bütün bunlara qarşı yenə də Rəbbin qəzəbi sönmədi,

Əli hələ də cəzalandırmağa hazır idi.

¹³Amma xalq onu cəzalandıran Rəbbə tərəf dönmədi,

Ordular Rəbbini axtarmadı.

¹⁴Buna görə Rəbb İsraildən başı, quyruğu,

Xurma ağacının budağını, qarğını bir gündə kəsib atacaq.

¹⁵Baş – ağsaqqal və hörmətli şəxsdir,

Quyruq isə yalan təlim verən peyğəmbərdir.

¹⁶Bu xalqa yol göstərənlər onları azdırır,

Onların ardınca gedənlər qırılır.

¹⁷Buna görə də Xudavənd

Onların cavanlarına görə sevinməyəcək,

Yetimlərin və dul qadınların halına yanmayacaq.

Çünki hamı allahsızdır,

Şər işlər görür,

Hamının ağzından axmaq kəlmələr çıxır.

Bütün bunlara qarşı yenə də Rəbbin qəzəbi sönmədi,

Əli hələ də cəzalandırmağa hazır idi.

¹⁸Ona görə pislik alovlanıb-yanır,

Tikanla qanqalı yandırıb-yaxır,

Meşədəki kolluqlar məhv olur,

Tüstü sütunları qalxır.

¹⁹Ordular Rəbbinin qəzəbi

Ölkəni od kimi yandırdı,

Xalqı alov yandırıb-yaxır,

Qardaş qardaşa rəhm etmir.

²⁰Adamlar orada-burada tapdıqlarını yeyəcək,

Amma doymayıb ac qalacaq.

Hər kəs öz uşağının ətini yeyəcək.

²¹Menaşşe Efrayimi yeyəcək,

Efrayim Menaşşeni.

Sonra birlikdə Yəhudaya hücum edəcəklər.

Bütün bunlara qarşı yenə də Rəbbin qəzəbi sönmədi,

Əli hələ də cəzalandırmağa hazır idi.

Yeşaya 10

¹Haqsız qaydalar çıxaranların,

Ədalətsiz qanun qoyanların,

²Yoxsullardan ədaləti əsirgəyənlərin,

Xalqımın kasıblarının haqqını əlindən alanların,

Dul qadınları soyanların,

Yetimlərin malını ələ keçirənlərin vay halına!

³Cəza günü uzaqlardan başınıza bəla gələndə nə edəcəksiniz?

Kömək üçün kimin yanına qaçacaqsınız?

Mal-dövlətinizi harada saxlayacaqsınız?

⁴Dustaqlar arasında əyilməkdən

Yaxud öldürülənlər arasında yıxılmaqdan

Başqa bir çarə qalmayacaq.

Bütün bunlara qarşı yenə də Rəbbin qəzəbi sönmədi,

Əli hələ də cəzalandırmağa hazır idi.

Allahın Aşşura verdiyi cəza

⁵«Vay Aşşurun halına, O Mənim qəzəb əsam,

Əlindəki dəyənəksə qeyzimdir!

⁶Aşşuru göndərəcəyəm allahsız millətin üstünə,

Qəzəbləndiyim xalqın üzərinə hücum etməyə,

Qarət etməyə, talan malı götürməyə.

Onları küçələrdəki palçıq kimi

Tapdalamağa əmr verəcəyəm.

⁷Amma Aşşur padşahı

Bundan da pis niyyətlər haqda düşünür,

Bir neçə millətin kökünü kəsib məhv etməyi fikirləşir.

⁸O deyir: “Məgər sərkərdələrimin hamısı padşahlardan artıq deyilmi?

⁹Kalnonu Karkemiş kimi ələ keçirmədimmi?

Xamat və Arpad şəhərlərini süqut etdirmədimmi?

Samariya ilə Dəməşq bizə təslim olmadılarmı?

¹⁰Yerusəlimlə Samariyadakından daha çox oyma bütləri olan

Bütpərəst ölkələri necə ələ keçirdimsə,

¹¹Samariyaya və onun bütlərinə nə etdimsə,

Yerusəlimə və onun bütlərinə də elə etmərəmmi?”»

¹²Xudavənd Sion dağında və Yerusəlimdə işini bitirəndən sonra belə deyəcək:

«Aşşur padşahını qürurlu ürəyinə görə,

Təkəbbürlü baxışlarına görə cəzalandıracağam.

¹³Çünki o deyir:

“Bunu mən əlimin qüvvəti ilə, hikmətim və ağlımla etdim.

Xalqları ayıran sərhədləri yox etdim, xəzinələrini talan etdim,

Bir güclü buğa kimi padşahları taxtlarından endirdim.

¹⁴Elə bil əlimi quş yuvasına uzadıb

Xalqların var-dövlətini götürdüm.

Elə bil yiyəsiz yumurtaları yığıb

Bütün dünyanı mən beləcə zəbt etdim.

Qanad çırpan, ağzını açıb səsini çıxaran belə, olmadı”».

¹⁵Balta onu işlədənin qarşısında öyünərmi?

Mişar onu qaldıranın qarşısında qürrələnərmi?

Sanki dəyənək onu götürəni işlədir,

Elə bil ağacdan düzəlmiş əsa canlını hərəkət etdirir.

¹⁶Buna görə Sahibimiz, Ordular Rəbbi

Aşşurun güclü əsgərlərinə azar göndərəcək,

Möhtəşəm orduları od tutub yanacaq.

¹⁷İsrailin Nuru od,

İsrailin Müqəddəsi alov olacaq.

Aşşuru tikan və qanqal kimi bir gündə yandırıb yox edəcək.

¹⁸Gözəl meşələri, məhsuldar tarlaları

Tamamilə xarab olacaq,

Ağır xəstəliyə tutulan insanın canı kimi

Həlak olacaq.

¹⁹Meşələrində qalan ağaclarsa

Bir uşağın saya biləcəyi qədər az qalacaq.

İsrailin sağ qalanları

²⁰O gün İsrailin sağ qalanları,

Yaqubun nəslindən xilas olub sağ qalanlar

Onları həlak edənlərə artıq bel bağlamayacaq.

Lakin, həqiqətən, Rəbbə –

İsrailin Müqəddəsinə arxalanacaq.

²¹Sağ qalanlar,

Yaqub nəslindən sağ qalanlar

Qüdrətli Allaha tərəf dönəcək,

²²Ey İsrail, xalqın dəniz qumu qədər çox olsa belə, Onlar arasından ancaq sağ qalanlar Allaha tərəf dönəcək.

Tükənməz ədalətlə dağıdılma hökmü verilib.

²³Xudavənd, Ordular Rəbbi dağıdılma hökmünü

Bütün dünyada yerinə yetirəcək.

Rəbb Aşşuru cəzalandıracaq

²⁴Buna görə də Xudavənd, Ordular Rəbbi belə deyir:

«Ey Sionda yaşayan xalqım,

Misirlilərin sənə etdiyi kimi

Səni dəyənəklə vuran,

Üzərinə çomaq qaldıran

Aşşurlulardan qorxma.

²⁵Çünki bu yaxında qəzəbim sönəcək,

Hiddətim Aşşurluların məhvinə səbəb olacaq».

²⁶Mən Ordular Rəbbi, Midyanlıları Orev qayasında vurduğum kimi

Onları da qırmancla vuracağam,

Dəyənəyimi Misirlilərə qarşı nə cür dənizin üzərinə uzatdımsa,

İndi də elə edəcəyəm.

²⁷O gün Aşşurun yükü çiyninizdən,

Boyunduruğu boynunuzdan götürüləcək.

Dirçəldiyinizə görə boyunduruq qırılacaq.

İşğalçıların hücumu

²⁸Ayat şəhərini alıb Miqrondan keçdilər,

Mikmasda yüklərini boşaltdılar.

²⁹Onlar keçidi keçdi, Gevada gecələdi,

Rama şəhəri lərzəyə gəldi,

Şaulun şəhəri Giveada yaşayanlar qaçdı.

³⁰Ey Qallim əhli, səsini ucalt!

Ey Layşa, dinlə,

Ey zavallı Anatot!

³¹Madmena sakinləri qaçır,

Gevim sakinləri sığınacaq axtarır.

³²Bu gün işğalçılar Novda qalacaq,

Sion şəhərinin qurulduğu dağa –

Yerusəlim təpəsinə yumruq göstərəcək.

³³Budur, Sahibimiz, Ordular Rəbbi

Düşməni dəhşətli gücü ilə budaqlar kimi kəsəcək.

Ən hündür ağaclar qırılacaq,

Qürurlular alçaldılacaq.

³⁴Meşədəki kolluqları balta kimi

Kəsib yerə sərəcək.

Livan Qüdrətli Olanın önündə diz çökəcək.

Yeşaya 11

Sülh ümidi

¹Yesseyin kötüyündən yeni bir fidan çıxacaq, Kökündən çıxan bir budaq bar verəcək.

²Rəbbin Ruhu,

Hikmət və anlayış ruhu,

Öyüd-nəsihət və qüdrət ruhu,

Bilik və Rəbb qorxusu ruhu

Onun üzərində olacaq.

³O, Rəbb qorxusunda sevinc tapacaq.

Gözlərinin gördüyü ilə hökm etməyəcək,

Qulağı ilə eşitdiyinə görə qərar çıxarmayacaq.

⁴Lakin o, yoxsullara haqq ilə hökm edəcək, Yer üzündəki fəqirlərin işinə ədalətlə qərar çıxaracaq.

Dünyanı ağzının dəyənəyi ilə vuracaq.

Pis adamları ağzının nəfəsi ilə öldürəcək.

⁵O, belini salehliklə qurşayacaq, Sədaqəti kəmər kimi taxacaq.

⁶O gün qurdla quzu bir yerdə yaşayacaq, Bəbirlə çəpiş birgə yatacaq,

Dana, gənc aslan və bəslənmiş mal-qara

Yan-yana duracaq,

Onları balaca uşaq gəzdirəcək.

⁷İnəklə ayı bir yerdə otlayacaq,

Onların balaları bir yerdə yatacaq,

Şir də buğa tək saman yeyəcək.

⁸Südəmər körpə əfi ilanın

Yuvası üstündə oynayacaq,

Süddən kəsilmiş uşaq

Əlini gürzənin yuvasına salacaq.

⁹Müqəddəs dağımın heç bir yerində Heç kimə zərər dəyməyəcək,

Heç bir kəs o birisini məhv etməyəcək.

Çünki sular dənizi bürüdüyü kimi

Dünya Rəbbin biliyi ilə dolacaq.

Əsirlər geri qayıdacaq

¹⁰O gün Yesseyin kökü xalqlara bayraq olacaq, Millətlər ona tərəf yönələcək

Məskunlaşdığı yer izzətlə dolacaq.

¹¹O gün Xudavənd Aşşurdan,

Misirdən, Patrosdan, Kuşdan,

Elamdan, Şinardan, Xamatdan və uzaq diyarlardan

Xalqının sağ qalanlarını qurtarmaq üçün

İkinci dəfə əlini uzadacaq.

¹²Millətlər üçün bayraq qaldıracaq,

Əsir düşmüş İsrail övladlarını yığacaq,

Dağılmış Yəhudalıları

Dünyanın dörd bucağından bir yerə gətirəcək.

¹³Efrayimin qısqanclığı yox olacaq,

Yəhudanı sıxışdıranlar məhv olacaq.

Efrayim Yəhudaya qısqanmayacaq,

Yəhuda Efrayimi sıxışdırmayacaq.

¹⁴Onların ikisi qərbdə Filiştlilərin üstünə hücum edəcək,

Birlikdə şərqdə yaşayanların var-dövlətini qarət edəcək,

Edom və Moav torpaqlarını zəbt edəcək,

Ammonlular onlara tabe olacaq.

¹⁵Rəbb Misirdəki dənizin körfəzini Büsbütün qurudacaq.

Fərat çayının üzərində

Əlini yellədərək səmum küləyi gətirəcək,

O, çayı yeddi dərəyə böləcək,

Adamlar oradan çarıqlarla keçə biləcək.

¹⁶İsrail övladları Misir torpağından çıxdığı kimi

Rəbbin Aşşurda sağ qalan xalqı üçün

Böyük bir çıxış yolu olacaq.

Yeşaya 12

Şükür məzmuru

¹O gün sən, ey İsrail, belə deyəcəksən: «Ya Rəbb, Sənə şükür edəcəyəm!

Sən mənə qəzəblənirdin,

Lakin qəzəbin söndü,

Mənə təsəlli verdin.

²Allah xilasımdır, Ona güvənəcəyəm və qorxmayacağam,

Çünki Rəbb Allahımız qüvvətim, məzmurumdur,

O mənə xilas verdi!»

³Sevinclə xilas mənbələrindən

Su çəkəcəksiniz.

⁴O gün belə deyəcəksiniz, «Rəbbə şükür edin, Onun adını çağırın,

Xalqlar arasında Onun işlərini bəyan edin,

Onun adının ucalığını elan edin.

⁵Rəbbi tərənnüm edin,

Çünki O, möhtəşəm işlər gördü,

Qoy bütün dünya bunu bilsin!

⁶Ey Sion sakinləri, səsinizi ucaldın,

Sevinclə çığırın,

Çünki aranızdakı İsrailin Müqəddəsi böyükdür».

Yeşaya 13

Allah Babili cəzalandıracaq

¹Amots oğlu Yeşayaya Babil haqqında görüntü ilə nazil olan xəbərdarlıq: ²Çılpaq dağın zirvəsinə bayraq sancın!

Döyüşçüləri bərkdən səsləyin,

Əl edin ki, onlar

Əsilzadələr üçün ayrılan qapılardan içəri girsin.

³Mən seçdiklərimə əmr verdim,

Qəzəbimi düşmənlərə tökmək üçün

Cəsur cəngavərləri,

Ucalığımla öyünən igidləri səslədim.

⁴Dağlardakı izdihamın gurultusunu eşidin,

Bu, böyük bir xalqın səsinə bənzər.

Bir yerə toplanan millətlərin,

Padşahlıqların nidasını dinləyin!

Ordular Rəbbi bir ordunu döyüşə çağırır!

⁵Onlar uzaq ölkədən,

Üfüqlərin o biri tərəfindən gəlir.

Ölkəni tamamilə yerlə yeksan etmək üçün

Rəbb və Onun qəzəbinin silahı gəlir.

⁶Fəryad edin, çünki Rəbbin günü yaxınlaşır. O gün Külli-İxtiyarın etdiyi qırğın kimi gəlir!

⁷Buna görə hamının əlləri yanına düşəcək,

Hər kəs qorxub ürəyini yeyəcək.

⁸Hər bir adamı dəhşət bürüyəcək,

Dərd və iztirab içində boğulacaq,

Doğan qadın kimi ağrı çəkəcək,

Çaşqın-çaşqın bir-birinə baxacaq,

Üzləri qızaracaq.

⁹Budur Rəbbin günü gəlir,

Amansızlıqla, qeyzlə, qızğın qəzəblə gəlir ki,

Yeri səhraya döndərsin,

Oradakı günahkarları məhv etsin.

¹⁰Göydəki ulduzlar və bürclər işıq verməyəcək, Günəş doğarkən tutulacaq,

Ay nurunu saçmayacaq.

¹¹Rəbb deyir: «Pisliyə görə dünyanı,

Günahlarına görə pis adamları cəzalandıracağam.

Təkəbbürlülərin qürurunu qıracağam,

Zalımların məğrurluğunu alçaldacağam.

¹²İnsan saf qızıldan da az olacaq,

Adam Ofir qızılından da nadir halda tapılacaq.

¹³Buna görə də Mən Ordular Rəbbi,

Qızğın qəzəb günündə

Qeyzlə göyləri titrədəcəyəm,

Yer üzü lərzəyə gələcək.

¹⁴Hər kəs qovulan ceyrana, çobansız qoyunlara dönüb

Öz xalqının yanına qayıdacaq,

Öz vətəninə qaçacaq.

¹⁵Bütün tutulanların bədəni dəlik-deşik olacaq,

Ələ keçənlərin hamısı qılıncdan keçiriləcək.

¹⁶Onların gözləri önündə körpələri parça-parça ediləcək,

Evləri talan ediləcək,

Arvadlarının namusuna toxunulacaq.

¹⁷Gümüşə qiymət verməyən,

Qızılı sevməyən Midiyalıları

Onlara qarşı qaldıracağam.

¹⁸Ox-kamanları gəncləri parça-parça edəcək,

Körpələrə rəhm etməyəcəklər,

Uşaqları əsirgəməyəcəklər.

¹⁹Mən Allah Sodomla Homorranı necə dağıtdımsa, Padşahlıqların ən gözəli olan,

Xaldeylilərin calalı və qüruru olan

Babili də elə yıxacağam.

²⁰Orada bir daha heç kim yaşamayacaq, Nəsildən-nəslə kimsə məskunlaşmayacaq.

Ərəblər çadırlarını qurmayacaq,

Çobanlar sürülərini orada saxlamayacaq.

²¹Ora vəhşi heyvanların yaşadığı yer olacaq, Bayquşlar evlərdə qaynaşacaq,

Orada dəvəquşular məskən salacaq,

Təkələr oynaşacaq.

²²Saraylarında goreşənlər çığıracaq,

Gözəl imarətlərində çaqqallar gəzəcək.

Babilin sonu yaxınlaşır,

O günlər tez gəlib çatacaq».

Yeşaya 14

Əsirlərin qayıtması

¹Rəbb Yaqub nəslinə rəhm edəcək,

İsrail xalqını yenə seçib torpaqlarına sakin edəcək,

Yadellilər də Yaqub nəslinə qoşulacaq, onlarla birləşəcək.

²Xalqlar İsrail xalqını götürüb torpaqlarına aparacaq.

Onda İsrail xalqı Rəbbin torpağında

Onları özlərinə qul və kəniz edəcək;

Onları əsir aparanları özləri əsir edəcək,

Onlara zülm edənlərin üzərində hökm sürəcək.

Ölülər diyarına düşən Babil padşahı

³Rəbb səni ağrıdan, sıxıntıdan,

Gördüyün ağır işdən qurtaranda

⁴Babil padşahına lağ edib belə deyəcəksən:

«Zülmkarın sonu gör necə oldu!

Zorakılığın axırı gör necə oldu!

⁵Rəbb pis adamların dəyənəyini,

Hökmdarların əsasını qırdı.

⁶O əsa ki dayanmadan xalqları qəzəblə vurardı,

Millətləri qeyzlə, amansızca əzərdi.

⁷İndi isə bütün dünya

Sakitlik və rahatlıq içində sevincdən coşur.

⁸Livanın şam və sidr ağacları

Sənin fəlakətinə sevinərək deyir:

“Sənin ölümündən bəri heç kim bizi kəsməyə gəlmir”.

⁹Yerin altındakı ölülər diyarı sənə “xoş gəldin” deyib,

Səni qarşılamağa can atır, ey Babil padşahı!

Yer üzünün ölən bütün başçıları

Sənin gəlişindən həyəcanlanır,

Millətlərin bütün keçmiş padşahları

Taxtlarından ayağa qalxır.

¹⁰Hamı səni çağırıb belə deyəcək:

“Sən də bizim kimi zəif oldun, bizə bənzədin!”

¹¹Cah-calalın, çənglərinin səsi

Ölülər diyarına endirildi.

Altını qurd, üstünü həşərat bürüdü.

¹²Ey parlaq ulduz, dan oğlu, Necə də göylərdən yerə düşdün!

Ey millətləri tapdalayıb keçən,

Necə də yerə yıxıldın!

¹³Sən ürəyində dedin: “Göylərə qalxacağam,

Taxtımı Allahın ulduzları üzərində ucaldacağam,

Şimaldakı yüksək yerdə, toplantı dağında oturacağam,

¹⁴Uca buludların üzərinə çıxacağam,

Haqq-Taala kimi olacağam”.

¹⁵Ancaq ölülər diyarına,

Ölüm çuxurunun dərinliyinə endiriləcəksən.

¹⁶Səni görənlər gözlərini zilləyib

Sənin haqqında düşünüb belə deyəcək:

“Dünyanı sarsıdan, padşahlıqları lərzəyə salan,

¹⁷Yer üzünü səhraya çevirən,

Şəhərlərini yerlə yeksan edən,

Dustaqları evlərinə buraxmayan adam bu deyilmi?”

¹⁸Bütün millətlərin padşahları,

Hər biri öz əzəmətli sərdabəsində uyuyur.

¹⁹Lakin sən iyrənc budaq kimi

Qəbrindən kənara, uzağa atıldın,

Bir çuxurun dibinə tullanan,

Bədənləri qılıncla deşilən meyitlərlə örtülmüsən,

Ayaq altında qalan leş kimisən.

²⁰Ölkəni dağıdıb xalqını öldürdüyünə görə

Başqaları kimi dəfn olmayacaqsan.

Pislik edənlərin nəsli bir daha xatırlanmayacaq.

²¹Atalarının günahına görə

Övladları üçün qırğın hazırlayın ki,

Onlar qalxıb dünyanı zəbt etməsinlər,

Dünyanın üzərini şəhərləri ilə bürüməsinlər».

²²«Babil xalqına qarşı qalxacağam»

Bunu Ordular Rəbbi bəyan edir.

«Babilin adını, sağ qalanlarını, oğullarını,

Nəsillərini yox edəcəyəm» Rəbb bəyan edir.

²³«Babili bayquş yuvasına, bataqlığa çevirəcəyəm,

Qırğın süpürgəsi ilə süpürəcəyəm»

Ordular Rəbbi bəyan edir.

Rəbb Aşşurluları cəzalandıracaq

²⁴Ordular Rəbbi and içib belə deyir: «Mütləq düşündüyüm kimi olacaq,

Niyyət etdiyim kimi gerçəkləşəcək.

²⁵Ölkəmdə Aşşurluları məhv edəcəyəm,

Dağlarımda onları tapdalayacağam.

Xalqım Aşşurun boyunduruğundan,

Çiyinlərindəki yükündən qurtulacaq.

²⁶Bütün dünya üçün hazırladığım hökm budur,

Bütün millətlərə qarşı uzanan əl budur.

²⁷Ordular Rəbbinin hökmünü kim poza bilər?

Uzanan əlini kim geri qaytara bilər?»

Rəbb Filiştliləri cəzalandıracaq

²⁸ Padşah Axazın öldüyü ildə görüntü ilə nazil olan xəbərdarlıq:

²⁹«Ey bütün Filiştlilər, sevinməyin ki, sizi döyən dəyənək qırıldı, Çünki ilanın kökündən gürzə törəyəcək,

Onun törəməsi də uçan ilan olacaq.

³⁰Kasıbların ən kasıbı doyacaq,

Fəqirlər rahat dincələcək.

Amma sizin kökünüzü qıtlıqla kəsəcəyəm,

Sağ qalanlarınız da öldürüləcək.

³¹Ey darvaza, fəryad et!

Ey şəhər, ağla!

Ey bütün Filiştlilər, başdan-başa əriyin!

Çünki şimaldan tüstü gəlir,

Düşmən əsgərləri nizamı pozmadan gəlir».

³²O millətin elçilərinə nə cavab veriləcək?

«Rəbb Sionun təməlini qoyub,

Onun xalqının fəqirləri orada

Sığınacaq tapacaq» deyiləcək.

Yeşaya 15

Moavın dağılması

¹Moav barədə xəbərdarlıq: Moavın Ar şəhəri bir gecəyə xarabalığa döndü, dağıldı,

Moavın Kir şəhəri bir gecəyə viranəliyə döndü, dağıldı.

²Buna görə Divon xalqı ağlamaq üçün məbədə, Səcdəgahlara çıxdı.

Moav xalqı Nevo və Medva üçün fəryad edir.

Yas tutmaq üçün hamı saçını kəsdi,

Saqqalını qırxdı.

³Çula bürünərək küçələrdə,

Damlarda, meydanlarda hər kəs fəryad edir,

Göz yaşları sel kimi axır.

⁴Xeşbon və Elale fəryad edir,

Səsləri Yahsaya qədər eşidilir.

Buna görə Moav əsgərləri nalə çəkir,

Ürəkləri qorxu içindədir.

⁵Ürəyim Moav üçün kədərlənir,

Oranın qaçqınları Soara, Eqlat-Şelişiyaya doğru qaçdı.

Luxit yoxuşundan ağlayaraq çıxırlar.

Xoronayim yolunda məhv olduqları üçün ağlayırlar.

⁶Nimrim suları quruduğu üçün ot soldu,

Bitkilər qalmadı, artıq göy-göyərti yox oldu.

⁷Buna görə xalq qazandığı mal-dövlətini, yığdığı sərvətini

Söyüdlər vadisindən keçirir.

⁸Xalqın ağlaşması Moav torpağını bürüyür,

Fəryadı Eqlayimədək, Beer-Elimədək çatır.

⁹Çünki Dimon suları qanla doludur,

Amma Mən Dimonun başına daha betər bəla gətirəcəyəm,

Moavdan qaçıb-qurtulanların,

Ölkədə sağ qalanların üstünə şirlər göndərəcəyəm.

Yeşaya 16

¹Seladan səhra yolu ilə Sion dağına,

Ölkənin hökmdarına quzular göndərin.

²Moav qızları yuvalarından atılmış,

Ora-bura uçan quşlara bənzəyir,

Onlar Arnon çayının bərələrində dolaşır.

³«Bizə öyüd ver, ədalət göstər,

Gündüzün istisində gecə kimi üstümüzə kölgə sal,

Sürgünləri saxla, qaçqınları təslim etmə.

⁴Qoy Moavdan sürgün olanlar

Səninlə birlikdə yaşasın,

Məhv edənlərə qarşı biz Moavlıların pənahı ol».

Qarət və qırğın qurtaranda,

Ölkəni ayaqları altına salanlar yox olanda,

⁵Məhəbbət üzərində taxt qurulacaq,

Davud nəslindən bir nəfər

Sədaqətlə padşahlıq edəcək,

Hökm edərkən ədaləti axtaracaq,

Tezliklə salehliyi yerinə yetirəcək.

⁶Moavlıların nə dərəcədə Qürurlanıb lovğalandıqlarını,

Nə cür təkəbbürlü olduqlarını eşitdik,

Boş yerə öyünürlər.

⁷Buna görə Moavlılar Moav üçün fəryad edəcək;

Hamısı fəryad edəcək,

Qir-Xaresetin kişmiş kökələrini

Yada salaraq inləyib kədərlənəcək.

⁸Çünki Xeşbon tarlaları,

Sivma tənəkləri qurudu.

Başqa millətlərin başçıları seçmə budaqlarını qırdı,

O budaqları ki Yazerə qədər uzanardı,

Səhraya çatırdı, şaxələnib dənizi aşırdı.

⁹Buna görə Yazer ağlaşması ilə

Sivma tənəkləri üçün acı-acı ağlayıram.

Ey Xeşbon və Elale,

Çünki yay meyvələrinizin və biçininizin üzərinə

Döyüş nərəsi düşdü.

¹⁰Meyvə bağlarından sevinc və fərəh götürüldü,

Üzümlüklərdə nə nəğmələr, nə də sevinc nidaları səslənir.

Üzümsıxanlardan şərab götürülməyəcək,

Onların sevinc səslərini kəsdim.

¹¹Buna görə ürəyim Moav üçün lira kimi inləyir,

Qəlbim Qir-Xareset üçün sızlayır.

¹²Moav xalqı səcdəgahlarına çıxaraq

Boş yerə özünü yorur,

Dua etmək üçün Müqəddəs məkanına gedəcək,

Amma hər şey boş-boşunadır!

¹³Rəbbin Moav haqqında keçmişdə dediyi sözü budur. ¹⁴İndi isə Rəbb belə deyir: «Tam üç ilin ərzində Moavın şan-şöhrəti çoxsaylı xalqı ilə birgə alçaldılacaq, sağ qalanları azalıb zəifləyəcək».

Yeşaya 17

Aram və İsrail haqqında peyğəmbərlik

¹Dəməşq barədə xəbərdarlıq: Budur, Dəməşq daha şəhər olmayacaq,

Bir yığın xarabalığa dönəcək.

²Aroer şəhərləri tərk olunacaq.

Oralar sürülərin otlaq yeri olacaq,

Onları qorxudan olmayacaq.

³Efrayimdə qalalı şəhər qalmayacaq,

Dəməşqin hakimiyyəti yox olacaq,

Sağ qalan Aramlıların qüvvəti

İsrail övladlarının qüvvəti tək olacaq.

Bunu Ordular Rəbbi bəyan edir.

⁴O gün Yaqub nəslinin əzəməti sönəcək,

Hamısı bir dəri, bir sümük qalacaq;

⁵Biçinçi taxılı necə biçirsə,

Başaqları əli ilə necə yığırsa,

Refaim vadisində başaqları necə toplayırsa,

Onlar da elə olacaq.

⁶Zeytun ağacı silkələnəndən sonra

Təpəsində iki-üç zeytun qaldığı kimi,

Bəhərli budaqlarında dörd-beş zeytun qaldığı kimi

Çox az adam sağ qalacaq.

Bunu İsrailin Allahı Rəbb bəyan edir.

⁷O gün insan öz Yaradanına nəzər salacaq və gözləri İsrailin Müqəddəsini görəcək. ⁸Əlləri ilə yaratdığı qurbangahlara baxmayacaq, barmaqları ilə düzəltdiyi ilahə Aşeranın rəmzi olan sütunlara, buxur qurbangahlarına nəzər salmayacaq. ⁹O gün istehkamlı şəhərləri

İsrail övladlarından qaçan Hivlilərlə Emorluların tərk etdiyi

Şəhərlərə bənzəyəcək, viran qalacaq.

¹⁰Sən, ey İsrail, sənə qurtuluş verən

Allahını unutdun,

Pənahgahın olan Qayanı xatırlamadın.

Buna görə də sən əcnəbi bütlər üçün bağ əkirsən,

Özgə ağacların budaqlarından peyvənd edirsən.

¹¹Onları əkdiyin gün böyüdürsən,

Ertəsi gün çiçəkləndirirsən,

Amma kədərli, sağalmayan ağrılı gündə məhsul verməyəcəklər.

¹²Ah, çoxsaylı xalqların gurultusu

Dənizlərin gurultusuna bənzər!

Ümmətlərin nərəsi böyük suların çağlayışına oxşar!

¹³Ümmətlərin səsi böyük suların gurultusuna bənzəyəcək,

Lakin Allah onları məzəmmət edəcək,

Onlar uzaqlara qaçacaq,

Küləyin qarşısında təpəliklərdəki saman çöpü kimi,

Qasırğanın önündə yuvarlanan küləş kimi qovulacaqlar.

¹⁴Axşamçağı onlar dəhşət doğururlar,

Səhər açılmadan yox olurlar.

Bizi soyanların aqibəti budur,

Bizi qarət edənlərin sonu budur.

Yeşaya 18

Allahın Kuşa cəza verməsi

¹Kuş çaylarının o tərəfində yerləşən,

Qanad vızıltıları eşidilən ölkənin vay halına!

²Dəniz yolu ilə, qamış qayıqları ilə

Bu ölkə elçilər göndərir!

Ey sürətli qasidlər, yola düşün!

Çaylarla bölünmüş ölkəyə,

Ucaboylu, parlaq dərili millətin,

Hər yanda qorxu doğuran xalqın,

Güclü və işğalçı millətin yanına gedin!

³Ey bütün yer üzündə yaşayanlar!

Ey dünya sakinləri!

Dağların zirvəsinə bayraq dikələndə baxın!

Şeypur çalınanda eşidin!

⁴Çünki Rəbb mənə belə deyir:

«Günəş şüalarından yaranan qızmarlıq kimi,

Biçin vaxtının istisində şeh buludu kimi

Sakitcə məskənimdən baxacağam».

⁵Çiçəklənmə qurtarıb məhsul yığımından əvvəl

Üzümlər qora bağlayanda

O, bağ qayçıları ilə pöhrələri kəsəcək,

Şaxələnmiş budaqları qırıb atacaq.

⁶Hamısı dağın yırtıcı quşlarına,

Yerin vəhşi heyvanlarının qarşısına atılacaq.

Yayda yırtıcı quşlara,

Qışda bütün vəhşi heyvanlara yem olacaq.

⁷O vaxt çaylarla bölünmüş ölkə

Ucaboylu, parlaq dərili xalq,

Hər yanda qorxu doğuran xalq

Güclü və işğalçı millət

Ordular Rəbbinə,

Ordular Rəbbinin adını qoyduğu yerə –

Sion dağına xərac gətirəcək.

Yeşaya 19

Allahın Misirə cəza verməsi

¹Misir barədə xəbərdarlıq: Budur, Rəbb sürətlə gedən buludun üstünə minib Misirə gəlir.

Misir bütləri Onun qarşısında titrəyir,

Misirlilərin ürəkləri qorxudan əriyir.

²Rəbb deyir:

«Mən Misirliləri Misirlilərə qarşı qaldıracağam,

Qardaş qardaşla, qonşu qonşu ilə,

Şəhər şəhərlə, ölkə ölkə ilə vuruşacaq.

³Misirlilərin ruhu qırılacaq, niyyətlərini boşa çıxaracağam.

Onlar bütlərdən, ölü ruhlarından, cindarlardan,

Ruhçağıranlardan məsləhət istəyəcək.

⁴Misirliləri qəddar bir sahibə təslim edəcəyəm,

Qüvvətli padşah üzərlərində hökm sürəcək».

Sahibimiz, Ordular Rəbbi belə bəyan edir.

⁵Nilin suları azalacaq,

Çay çəkilib quruyacaq.

⁶Çaylar iylənəcək,

Misirin arxları boşalıb quruyacaq,

Qamışlar və qarğılar çürüyəcək.

⁷Nil kənarında, çayın qırağındakı qarğılar,

Nil boyunca əkilmiş zəmilər quruyacaq, sovrulub yox olacaq.

⁸Balıqçılar, Nilə tilov atanların hamısı ağlayaraq yas tutacaq,

Nilə tilov atanların hamısı ağlayacaq,

Suya tor salanlar kədərlənəcək.

⁹İncə kətan üzərində işləyənlər,

Ağ bez toxuyanlar ümidlərini itirəcək.

¹⁰Misirin sütunları qırılacaq,

Bütün muzdlu işçilər ruhdan düşəcək.

¹¹Soan şəhərinin başçıları necə də axmaqdır!

Fironun hikmətli vəzirləri ağılsız məsləhətlər verir.

Onlar firona necə: «Mən müdriklərin,

Qədim padşahların nəslindənəm!» deyə bilər?

¹²Ey firon, sənin hikmətli vəzirlərin indi haradadır?

Qoy sənə bildirsinlər

Ordular Rəbbi Misirə qarşı nə hazırlayıb.

¹³Soan başçıları axmaq oldu,

Nof rəisləri aldandı,

Misir qəbilələrinin başçıları Misiri yoldan azdırdı.

¹⁴Rəbb onların ağlını çaşdırdı.

Necə ki sərxoş adam öz qusduğunun ətrafında səndələyirsə,

Misir də öz əməllərində belə dolaşır.

¹⁵Misirdə heç kim heç bir iş görə bilməyəcək:

Nə baş, nə quyruq və nə xurma budağı, nə də qamış.

Misir Rəbbə tərəf dönəcək

¹⁶O gün Misirlilər qadına bənzəyəcək, Ordular Rəbbinin onlara qarşı qalxan əlinin önündə titrəyib dəhşətə gələcək. ¹⁷Yəhuda torpağı Misirliləri dəhşətə gətirəcək. Ordular Rəbbinin Misirə qarşı hazırladığı niyyətə görə Yəhudanın adını eşidən hər kəs vəlvələyə düşəcək. ¹⁸O gün Misirdə Kənan dilində danışan və Ordular Rəbbinin adına and içən beş şəhər olacaq. Onlardan biri Həlak şəhəri adlandırılacaq. ¹⁹O gün Misir ölkəsində Rəbbə qurbangah qurulacaq, sərhədində isə Ona sütun tikiləcək. ²⁰Bu, Misir torpağında Ordular Rəbbinin əlaməti və şəhadəti olacaq. Onlar zülmkarlardan qurtulmaq üçün Rəbbə fəryad edəcək. O, Misirlilərə xilaskar və müdafiəçi göndərib onları qurtaracaq. ²¹Rəbb Özünü Misirlilərə tanıtdıracaq, onlar da o gün Rəbbi tanıyacaq. Misirlilər Rəbbə qurbanlar, təqdimlər gətirəcək, nəzir-niyaz edib yerinə yetirəcək. ²²Rəbb Misirliləri vuracaq və sonra şəfa verəcək. Onlar Rəbbə tərəf dönəcək, yalvarışları qəbul olunacaq və Rəbb onlara şəfa verəcək. ²³O gün Misirdən Aşşura böyük yol olacaq.

Aşşurlu Misirə, Misirli Aşşura gedib-gələcək.

Misirlilərlə Aşşurlular birlikdə Rəbbə səcdə edəcək.

²⁴O gün İsrail Misir və Aşşurun yanında üçüncü ölkə olacaq. Dünya bunların sayəsində xeyir-dua alacaq. ²⁵Ordular Rəbbi onlara xeyir-dua verib deyəcək: «Xalqım Misir, yaratdığım Aşşur, irsim İsrail bərəkətli olsun».

Yeşaya 20

Misir və Kuş üçün əlamət

¹Aşşur padşahı Sarqonun əmri ilə ordusunun başçısı Aşdoda gəlib onu ələ keçirtdiyi ildə ²Rəbb Amots oğlu Yeşayaya belə dedi: «Get, əynindəki çulunu və ayağındakı çarıqlarını çıxar». Yeşaya elə də etdi, lüt və ayaqyalın gəzməyə başladı. ³Rəbb dedi: «Misir və Kuş üçün əlamət və ibrət olaraq qulum Yeşaya necə üç il ərzində çılpaq və ayaqyalın dolaşdısa, ⁴elə də Aşşur padşahı Misiri xəcalətli etmək üçün Misirliləri əsir, Kuşluları sürgün edib gəncləri, qocaları çılpaq və ayaqyalın, ayıb yerləri açıq aparacaq. ⁵Kuşa güvənən, Misirlə fəxr edən xalq qorxacaq və xəcalətə düşəcək. ⁶O gün bu sahil boyunca yerləşən ölkənin sakinləri deyəcək: “Aşşur padşahının əlindən qurtulmaq üçün köməyinə güvəndiyimiz, bel bağladığımız xalqların başına gör nələr gəldi! Bəs biz nə cür qurtulacağıq?”»

Yeşaya 21

Babilin düşkünlüyü haqqında görüntü

¹Dəniz sahilindəki səhra barəsində xəbərdarlıq: Cənubdan necə fırtınalar gəlirsə,

Səhradan, dəhşətli ölkədən də elə bir fəlakət gəlir.

²Dəhşətli görüntü mənə nazil oldu:

Xain xainlik edir, viranəçi viran edir.

Ey Elam, qalx! Ey Midiya, Babili mühasirəyə al!

Babilin bais olduğu bütün fəryadlara son qoyacağam.

³Gördüklərimdən belimə sancı düşdü,

Doğan qadın tək məni ağrı tutdu.

Eşitdiklərimdən sarsıldım

Gördüklərimdən məni vahimə bürüdü.

⁴Ürəyim əsir, dəhşət məni bürüyür.

Həsrətlə gözlədiyim sübh artıq məni qorxudur.

⁵Gördüyüm görüntüdə süfrə hazırlayırlar,

Xalçalar sərirlər,

Yeyib-içirlər.

Qalxın, ey sərkərdələr,

Qalxanları yağlayın!

⁶Xudavənd mənə belə dedi:

«Get, gözətçi təyin et,

Qoy o gördüklərini danışsın.

⁷Qoşa atlı döyüş arabalarına,

Atlara, eşşəklərə, dəvələrə minmiş

Adamları gördükdə çox diqqət edin».

⁸Gözətçi bağırdı: «Ey Xudavənd, gözətçi qülləsində daim duraram,

Hər gecə yerimdə növbəmdə olaram.

⁹Budur, döyüş arabalarında süvarilər cüt-cüt gəlir». Sonra o çığırdı: «Yıxıldı, Babil yıxıldı!

Onun allahlarının bütləri isə yerə düşüb parça-parça oldu».

¹⁰Ey xalqım, ey xırmanda buğda kimi döyülmüş xalqım!

İsrailin Allahı Ordular Rəbbindən eşitdiyimi sizə bildirmişəm.

Duma barəsində görüntü

¹¹Duma barəsində xəbərdarlıq: Bir nəfər Seirdən məni səsləyir:

«Ey gözətçi, gecənin qurtarmağına nə qədər qalıb?

Ey gözətçi, gecənin qurtarmağına nə qədər qalıb?»

¹²Gözətçi cavab verdi: «Səhərin açılmağına az qalıb,

Lakin yenə gecə gələcək.

Soruşmaq istəsəniz, yenə gəlin soruşun».

Ərəbistan barəsində vəhy

¹³Ərəbistan barəsində xəbərdarlıq: Ey Dedan karvanları,

Ərəbistan meşələrində gecələyəcəksiniz!

¹⁴Ey Tema sakinləri,

Susamışlara su gətirin!

Qaçıb qurtulanlara çörək verin!

¹⁵Çünki onlar qılıncdan,

Siyrilmiş qılıncdan,

Çəkilmiş ox-kamandan, ağır döyüşdən qaçıb.

¹⁶Xudavənd mənə belə dedi: «Tam bir ilin ərzində Qedarın bütün əzəməti qurtaracaq. ¹⁷Oxatanlardan, Qedar nəslinin cəngavərlərindən az qalacaq». İsrailin Allahı Rəbb belə dedi.

Yeşaya 22

Yerusəlim barəsində görüntü

¹Görüntü vadisi barəsində xəbərdarlıq: Ey şəhər xalqı, nə olub ki, hamınız damlara çıxmısınız?

²Ey səs-küylü, əylənən, gurultulu şəhər,

Öldürülənləriniz nə qılıncdan keçirildi,

Nə də döyüşlərdə öldürüldü.

³Başçılarınız birlikdə qaçdı,

Onlar kamanlarından ox atmamış yaxalandı.

Uzaqlara qaçdıqlarına baxmayaraq hamısı birgə yaxalandı.

⁴Buna görə mən belə dedim:

«Məni tənha qoyun, qoy acı-acı ağlayım,

Əziz xalqım məğlub olduğuna görə

Mənə təsəlli verməyə cəhd göstərməyin».

⁵Çünki Ordular Rəbbi Xudavəndin

Görüntü vadisində təlaş, basqın və çaşqınlıq günü var.

Divarların dağıdılması və fəryadın dağlara çatdığı gün gəlir.

⁶Elamlılar oxdanlarını tutub adamlarla dolu döyüş arabaları ilə, süvariləri ilə gəldilər.

Kir sakinləri qalxanlarını açdılar.

⁷Ən gözəl vadilərin döyüş arabaları ilə doludur,

Süvarilər şəhər darvazalarının qarşısına düzüldülər.

⁸Yəhudanın istehkamları deşik-deşik oldu,

O gün siz «Meşə» adlı evdə saxlanılan silaha nəzər saldınız.

⁹Davudun şəhərinin divarlarında çoxlu dəlik-deşik əmələ gəldiyini gördünüz,

Aşağı hovuza su yığdınız.

¹⁰Yerusəlimdəki evləri saydınız,

Şəhər divarının təmiri üçün evləri sökdünüz.

¹¹Köhnə hovuzun suları üçün

İki divar arasında su anbarı düzəltdiniz.

Lakin bu işi Görənə baxmadınız,

Bunu çoxdan hazırlayan Allaha nəzər salmadınız.

¹²O gün Ordular Rəbbi Xudavənd sizi ağlaşmağa,

Yas tutmağa, saçınızı yolmağa, çula bürünməyə çağırdı.

¹³ Fəqət bunun əvəzinə siz sevinc və şadlıq tapdınız,

«Qoy yeyib-içək, çünki sabah öləcəyik!» dediniz,

Cöngə, qoyun kəsdiniz, ət yediniz, şərab içdiniz.

¹⁴Ordular Rəbbi bunu mənə açdı:

«Bu günah sizə ölənə qədər əsla bağışlanmaz!»

Ordular Rəbbi Xudavənd belə buyurur.

¹⁵Ordular Rəbbi Xudavənd belə dedi:

Dur, saray rəisi Şevnanın yanına get və de:

¹⁶«Sənin burada nə işin var?

Kim icazə verib ki,

Burada – yüksəkdə özün üçün məzar qazasan,

Qayanın içində özünə sərdabə düzəldəsən?

¹⁷Ey güclü kişi, bax Rəbb səni var-qüvvə ilə atıb-tutacaq,

¹⁸Top kimi yuvarlayacaq,

Gen-bol ölkəyə atacaq.

Orada öləcəksən və öyündüyün arabaların orada qalacaq,

Axı öz ağanın evini biabır edən sənsən!

¹⁹Səni vəzifəndən atacağam,

Tutduğun yerindən qovacağam.

²⁰O gün qulum Xilqiya oğlu Elyaqimi çağırıb

²¹Sənin geyimini ona geyindirəcəyəm,

Sənin qurşağını onun belinə bağlayacağam,

Səlahiyyətini onun ixtiyarına verəcəyəm.

Bu adam Yerusəlim sakinlərinə,

Yəhuda xalqına ata olacaq.

²² Davud nəslinin açarını onun çiynindən asacağam,

Açdığını heç kim bağlaya bilməyəcək,

Bağladığını heç kim aça bilməyəcək.

²³Mən onu paya kimi bərk yerə vuracağam.

O, nəsli üçün fəxr olacaq.

²⁴Bütün nəslinin şöhrəti onun üzərində olacaq.

Nəslin və övladların şərəfi –

Taslardan tabaqlaradək

Bütün qab-qacaqların şöhrəti

Onun üzərində olacaq».

²⁵Ordular Rəbbi bəyan edir: «O gün bərk yerə vurulmuş paya qırılıb-düşəcək, onun üstünə asılan yük də yox olacaq». Çünki Rəbb belə söylədi.

Yeşaya 23

Sur şəhəri barəsində görüntü

¹Sur barəsində xəbərdarlıq: Ey Tarşiş gəmiləri, fəryad edin,

Çünki Sur şəhəri evləri ilə, limanları ilə birlikdə dağıldı,

Kittim torpağından onlara xəbər gəldi.

²Ey sahil sakinləri, dənizçilərin sayəsində varlanan Sidon tacirləri, susun!

³Şixorun taxılı, Nilin məhsulu

Dəniz yolundan gələn gəliriniz idi.

Bütün şəhər millətlərin alver yeri idi!

⁴Utan, ey Sidon, dəniz sahilində yerləşən qala!

Çünki dəniz belə deyir:

«Mən heç doğuş ağrısı çəkmədim, doğmadım,

Nə oğlanlar yetişdirdim, nə də qızlar böyütdüm».

⁵Sur haqqında xəbər Misirə çatanda

Misirlilərin ürəkləri üzüləcək.

⁶Ey sahil sakinləri, Tarşişə doğru gedin, fəryad edin!

⁷Uzaq ölkələri müstəmləkə etmiş,

Əylənib keflənən sakinləri olan

Qədim şəhər bu imiş?

⁸Taclar geyindirən Sura qarşı

Bunları kim hazırladı?

Axı bu şəhərin tacirləri şahzadə idi,

Ticarətçiləri dünyanın ən hörmətli adamları idi.

⁹Ordular Rəbbi bunu hazırladı ki,

Hər cür gözəlliyin qürurunu qırsın,

Yer üzünün hörmətli adamlarını utandırsın.

¹⁰Ey Tarşiş qızı, öz torpaqlarından Nil kimi keç,

Artıq maneçilik yoxdur.

¹¹Rəbb dənizin üzərinə əlini uzatdı,

Padşahlıqları titrətdi,

Kənanın istehkamlarının dağılması haqqında əmr verdi.

¹²Onda Rəbb dedi:

«Ey zorlanmış bakirə Sidon qızı,

Sən bir daha sevinməyəcəksən!

Qalx, Kittimə yollan,

Amma orada da canına rahatlıq tapmayacaqsan».

¹³Xaldey ölkəsinə bax!

O xalq artıq yoxdur.

Aşşurlular o ölkəni

Vəhşi heyvanların məskəninə döndərdi.

Onlar hücum etmək üçün qüllələri tikdi,

Sarayları dağıtdılar,

Bu diyarı viranəliyə çevirdi.

¹⁴Fəryad edin, ey Tarşiş gəmiləri, Çünki istehkamınız dağılıb.

¹⁵Bundan sonra Sur şəhəri yetmiş il ərzində bir padşahın ömrü qədər unudulacaq. Yetmiş il keçdikdən sonra Surun da başına fahişə qadın üçün bəstələdiyi nəğmədəki kimi belə gələcək: ¹⁶«Ey unudulmuş fahişə,

Əlinə bir lira al, şəhəri dolan!

Gözəl havalar çal, çoxlu nəğmələr oxu,

Qoy səni yada salsınlar!»

¹⁷ Yetmişinci ilin sonunda Rəbb Sur şəhərini yada salacaq. Bu şəhər yenə də ticarətə başlayacaq. Dünyanın bütün padşahlıqları ilə fahişəlik edəcək. ¹⁸Amma Surun ticarətdən gələn gəliri Rəbbə həsr olunacaq. Ticarətdən qazanılmış pullar xəzinələrə qoyulmayacaq, gizlədilməyəcək. Bu gəlir Rəbbin hüzurunda gəzən adamların yeməyini və gözəl geyimini təmin edəcək.

Yeşaya 24

Rəbbin dünyaya verəcəyi cəza

¹Budur, Rəbb yer üzünü boş qoyub xarabalığa çevirəcək,

Dünyanı alt-üst edəcək,

Sakinlərini dağıdacaq.

²Nə xalqla kahin arasında,

Nə nökərlə ağası arasında,

Nə qarabaşla xanımı arasında,

Nə alıcı ilə satıcı arasında,

Nə borc verənlə borc alanın arasında

Nə də sələmçi ilə borc alan arasında

Heç bir fərq qoyulmayacaq.

³Yer üzü tamamilə boş qalıb xarabalığa çevriləcək.

Çünki Rəbb bu sözü söylədi.

⁴Dünya saralıb-solur,

Yer üzü quruyub-solur.

Dünyanın məğrur insanları məyus olur.

⁵Dünyanı sakinləri murdar etdi,

Çünki Allahın qanunlarını tapdaladı,

Qaydalarına xor baxdı,

Əbədi əhdi pozdu.

⁶Bu səbəbə görə

Lənət yer üzünü məhv edir.

Yer üzünün sakinləri

Günahlarının cəzasını çəkir,

Buna görə yanır,

Çox az adam sağ qalacaq.

⁷Təzə şərab qurtarır, meynələr solur,

Nə vaxtsa fərəhlənən adamlar kədərlənir.

⁸Dəflərin şən səsi kəsilib, Sevinc nidası eşidilmir,

Liraların avazı gəlmir.

⁹Bir daha nəğmə oxuyub şərab içmirlər,

İçkinin dadı içənə acı gəlir.

¹⁰Viran qalmış şəhər xaraba qalıb,

Bütün evlər qıfıllanıb,

Heç kim ora girə bilmir.

¹¹Şərab çatmamazlığına görə küçələrdə qışqırırlar,

Fərəhdən əsər-əlamət qalmadı.

Dünyanın sevinci əsir aparıldı.

¹²Şəhər viranə qaldı,

Darvazaları darmadağın oldu.

¹³Zeytun ağacından zeytunları tökmək üçün ağacı silkələyib döyəndə necə olursa,

Üzüm məhsulu yığılandan sonra qalan salxımlar necə olursa,

Dünyadakı xalqlar da elə olacaq.

¹⁴Sağ qalanlar səslərini ucaldıb

Sevinc ilahiləri söyləyəcək,

Qərbdə yaşayanlar Rəbbin əzəmətindən nəql edəcək.

¹⁵Beləliklə, şərqdə yaşayanlar Rəbbi ucaldacaq,

Uzaq diyarların sakinləri İsrailin Allahı Rəbbin adını yüksəldəcək.

¹⁶Dünyanın ən uzaq guşələrindən tərənnüm ilahisi eşidirik:

«Saleh Olana izzət olsun!»

Amma mən dedim: «Ölürəm, ölürəm! Vay halıma!

Xainlər xainliklərini davam edir,

Bəli, xainlər xaincəsinə hərəkət edir!»

¹⁷Ey dünya sakinləri, Qarşınıza dəhşət, dərin çuxur və tələ çıxacaq!

¹⁸Dəhşətdən qaçan dərin çuxura düşəcək,

Dərin çuxurdan çıxa bilən tələyə düşəcək.

Göylərin pəncərələri açılacaq,

Dünyanın təməlləri sarsılacaq.

¹⁹Yer üzü çatlayacaq, çatlayacaq,

Dünya yarılacaq, yarılacaq,

Dünya lərzəyə gələcək, lərzəyə gələcək!

²⁰Dünya sərxoş kimi yırğalanacaq,

Külək əsəndə talvar kimi silkələnəcək,

Qanunsuzluğun ağırlığı altında yerə yatacaq,

Bir daha qalxa bilməyəcək.

²¹O gün Rəbb yuxarıda – göydəki orduları,

Aşağıda – yer üzünün padşahlarını cəzalandıracaq.

²²Onlar yeraltı zindana dustaq kimi yığılacaq,

Həbsxanada bağlı saxlanacaq,

Uzun müddət keçəndən sonra cəzalanacaq.

²³Ay qaralacaq, günəş işıq saçmayacaq.

Çünki Ordular Rəbbi Sion dağında,

Yerusəlimdə hökm sürəcək.

Xalqın başçıları Onun əzəmətini görəcək.

Yeşaya 25

Sevinc ilahisi

¹Ya Rəbb, Sən mənim Allahımsan,

Səni ucaldıram, adına həmdlər oxuyuram.

Çünki Sən qədimdən bəri möcüzələrini, niyyətlərini

Sədaqətlə həyata keçirdin.

²Çünki Sən şəhəri bir daş yığınına,

İstehkamlı şəhəri xarabalığa döndərdin.

O şəhər yadellilərin qalası idi,

Ondan əsər-əlamət qalmadı,

O bir daha bərpa olunmaz.

³Buna görə qüvvətli xalqlar Səni izzətləndirəcək.

Qəddar millətlərə mənsub şəhərlər Səndən qorxacaq.

⁴Çünki Sən yoxsula sığınacaq,

Sıxıntı içində olan fəqirə pənahgah,

Fırtına vaxtı çardaq,

İstilik vaxtı kölgəlik oldun.

Qəddarların nəfəsi divara çarpan fırtına kimidir,

⁵Quraqlıqda bürkü kimidir.

Lakin Sən, ya Rəbb,

Zülmkarların azğınlığını bulud bürkünün qarşısını alan kimi aldın,

Amansız yağıların nəğmə səslərini kəsdin.

Rəbbin hazırladığı ziyafət

⁶Bu dağda Ordular Rəbbi bütün xalqlar üçün

Zəngin yeməklərdən, gözəl şərablardan ibarət ziyafət düzəldəcək,

Orada ən ləziz yeməklər, ən dadlı şərablar olacaq.

⁷Bu dağda bütün xalqların üzərindəki duvağı,

Bütün millətlərin üstündə olan toxunma örtüyü götürəcək.

⁸Ölümü əbədi olaraq yox edəcək, Xudavənd Rəbb bütün adamların üzündən göz yaşlarını siləcək,

Bütün yer üzündən xalqının rüsvayçılığını götürəcək.

Çünki Rəbb belə söylədi.

⁹O gün deyəcəklər:

«Budur bizim Allahımız!

Ona etibar etdik, O bizi qurtardı,

Rəbb Odur, biz Ona ümid etdik.

İndi isə O bizi qurtardığına görə

Sevinib şadlanaq!»

Allahın Moava verdiyi cəza

¹⁰Rəbbin əli bu dağın üstündə olacaq, Amma Moav peyinliyə düşən saman kimi tapdaq altında qalacaq.

¹¹Üzgüçü üzərkən əl-qol atdığı kimi

Moav peyinlikdə əl-qol atacaq,

Amma Allah Moavın qürurunu əllərinin məharəti ilə alçaldacaq.

¹²O, Moavın istehkamlarını,

Yüksək divarlarını yerə endirəcək,

Dağıdıb yerlə yeksan edəcək.

Yeşaya 26

Həmd ilahisi

¹O gün Yəhuda diyarında belə ilahi oxunacaq: «Qüvvətli şəhərimiz var,

Allahın qurtuluşu şəhər üçün divarlar, səngərlər kimidir.

²Açın şəhərin darvazalarını,

Qoy sadiq qalan saleh millət içəri girsin.

³Ağlı Sənə yönəlmiş adamlara

Sən kamil sülh verirsən,

Çünki onlar Sənə güvənir.

⁴Rəbbə həmişə güvənin,

Çünki Rəbb Allah əbədi Qayadır.

⁵O, yuxarıdan gedənləri alçaldar,

Onların yaşadığı şəhəri dağıdar,

Yerlə yeksan edər.

⁶O şəhər məzlumların ayaqları,

Yoxsulların addımları altında tapdalanacaq.

⁷Saleh adamın yolu düzdür.

Ey Düz Olan, saleh adamın yolunu Sən düz edirsən.

⁸Həqiqətən, ya Rəbb, Sənin hökmlərinin yolunda biz Sənə ümid bağlayırıq,

Sənin adın, ismin ürəyimizin istəyidir.

⁹Qəlbim gecələr Sənin üçün həsrət çəkər,

Bəli, ruhum daxilimdə Səni arayar.

Hökmlərin yer üzündə həyata keçdikcə

Dünyanın sakinləri doğruluğu öyrənir.

¹⁰Pis adama rəhm etsələr də,

O, doğruluğu öyrənməz,

Doğruluq hökm sürən ölkədə də haqsızlıq edər,

Rəbbin əzəmətini görməz.

¹¹Ya Rəbb, əlini qaldırdın, Amma pis adamlar bunu görmür.

Öz xalqın üçün göstərdiyin qeyrəti görüb utansınlar.

Bəli, düşmənlərin üçün yağdırdığın od onları məhv edəcək.

¹²Ya Rəbb, bizə sülh verən Sənsən,

Bütün işlərimizi Sən bizim üçün tənzimləyirsən.

¹³Ey Allahımız Rəbb,

Səndən savayı başqa ağalar üzərimizdə hökm sürürdü,

Lakin biz yalnız Sənin adını tanıyırıq.

¹⁴O ağalar öldü, artıq yaşamır,

Onlar kölgə kimidir, dirilməyəcək,

Çünki Sən onları cəzalandırıb məhv etdin,

Onlar haqqında hər bir xatirəni yox etdin.

¹⁵Lakin Sən bu milləti çoxaltdın, ya Rəbb!

Bəli, milləti çoxaltdın,

Özünü izzətləndirdin.

Hər tərəfə ölkənin sərhədlərini genişləndirdin».

¹⁶Ya Rəbb, onlar bəlaya düşəndə Səni axtardı.

Sənin cəzan üzərlərində olanda

Sənə dua edib yalvardı.

¹⁷Hamilə qadın doğuş vaxtı gələndə

Ağrı çəkib qovrularaq necə qışqırırsa,

Biz də Sənin qarşında elə idik, ya Rəbb!

¹⁸Biz də sanki hamilə idik, ağrı çəkirdik,

Lakin küləkdən başqa bir şey doğmadıq.

Nə dünyaya qurtuluş gətirə bildik,

Nə də dünya sakinlərini həyata qovuşdurduq.

¹⁹Sənin ölənlərin həyata qovuşacaq, meyitimlə birgə diriləcəklər.

Ey torpaq altında yatanlar, oyanın,

Sevinc nəğməsini oxuyun,

Çünki şeh torpağı necə təravətləndirirsə,

Rəbb də torpaqdakı ölüləri belə dirçəldəcək.

²⁰Ey xalqım, keç içəri otaqlara,

Qapıları ört,

Rəbbin qeyzi keçənəcən

Qısa bir müddətə gizlən!

²¹Çünki budur, Rəbb yer üzünün sakinlərini

Qəbahətləri üzündən cəzalandırmaq üçün

Öz məskənindən gəlir.

Torpaq udduğu qanı üzə çıxaracaq,

Öldürülənləri artıq gizlətməyəcək.

Yeşaya 27

İsrailin qurtuluşu

¹O gün Rəbb Livyatana,

qaçan ilana, Bəli, Livyatana, qıvrılan ilana

Amansız, nəhəng və qüvvətli qılıncı ilə cəza verəcək,

Dənizdəki əjdahanı öldürəcək.

²O gün Rəbb deyəcək:

«Xoşladığım bağ üçün nəğmələr oxuyun!

³Mən Rəbb, bağı qoruyuram,

Tez-tez sulayıram,

Gecə-gündüz keşiyində dururam ki,

Heç kəs ona zərər verməsin.

⁴Mən qəzəblənmirəm,

Kaş qarşıma tikan və qanqal çıxaydı,

Onda onlara qarşı çıxıb döyüşərdim,

Hamısını odda yandırardım.

⁵Yaxud qoy Mənə pənah gətirsinlər,

Mənimlə barışsınlar,

Bəli, qoy Mənimlə barışsınlar».

⁶Yaqub nəsli gələcəkdə kök salacaq,

İsrail şaxələnəcək, çiçəklənəcək,

Yer üzünü bəhrələri ilə dolduracaq.

⁷Rəbb İsraili vuran düşmənləri kimi onu vurdumu?

Yaxud O, başqalarını öldürdüyü kimi İsraili də öldürdümü?

⁸Rəbb Öz xalqına hökm etdi,

Qovub sürgünə göndərdi.

Şərq küləyi əsən gün Rəbb onları şiddətli yeli ilə qovdu.

⁹Yaqub nəslinin qəbahəti bununla bağışlanacaq,

Günahın aradan götürülməsinin tam bəhrəsi bu olacaq:

Bütpərəst qurbangahların daşları

Tabaşir kimi ovulacaq,

İlahə Aşeranın rəmzi olan sütunlar

Ya da buxur qurbangahları

Bir daha dikəlməyəcək.

¹⁰İstehkamlı şəhər tənha, kimsəsiz yurd,

Səhra kimi boş qaldı.

Orada dana otlayıb yatacaq,

Budaqları yeyib-qurtaracaq.

¹¹Şaxələri quruyanda qoparılacaq,

Qadınlar gəlib onları yandıracaq.

Bu xalq ağılsız olduğuna görə

Yaradan onlara rəhm etməyəcək,

Xaliq onlara qarşı xeyirxah olmayacaq.

¹²O gün Rəbb Fərat çayından

Misir vadisinə qədər

Öz bəhrələrini yığacaq.

Siz bir-bir toplanacaqsınız, ey İsrail övladları!

¹³O gün böyük şeypur çalınacaq,

Aşşur torpağında itkin düşənlərlə

Misirə sürgün edilənlər gəlib

Yerusəlimdə Müqəddəs dağda

Rəbbə səcdə edəcək.

Yeşaya 28

Şimal padşahlığına xəbərdarlıq

¹Məhsuldar vadinin başında yerləşən,

Şəraba uymuşların şəhərinin –

Efrayim sərxoşlarının qürurlu tacının,

İzzətli gözəlliyin və solan çiçəyin vay halına!

²Budur, Rəbbin güclü, qüvvətli bir adamı var.

O, bərk yağan dolu,

Bəla gətirən fırtına kimi,

Hər şeyi yolunda məhv edən sel kimi gəlir,

Əlləri ilə şəhəri yerlə yeksan edəcək.

³Efrayim sərxoşlarının şəhəri, qürur tacı

Ayaq altında tapdalanacaq.

⁴Məhsuldar vadinin başında yerləşən şəhər,

İzzətli və gözəl tac,

Artıq solan çiçəyi xatırladan şəhər,

Vaxtından əvvəl yetişən əncir kimi olacaq.

Onu görən tez dərib yeyəcək.

⁵O gün Ordular Rəbbi

Sağ qalan xalqı üçün

Gözəllik tacı, izzət çələngi olacaq.

⁶Hökm kürsüsündə oturana ədalət ruhu,

Şəhər darvazalarını müdafiə edənlərə qüdrət verəcək.

Yeşaya sərxoş peyğəmbərlərə xəbərdarlıq edir

⁷Kahinlər və peyğəmbərlər də şərabdan səndələyir,

İçkidən büdrəyir,

Şərab içib xumarlanıb,

İçkidən yollarını azıb.

Onlar yanlış görüntülər görür,

Tutarsız qərarlar qəbul edir.

⁸Bütün süfrələri qusmaq və natəmizliklə doludur,

Bulanmamış yer yoxdur!

Yeşayaya edilən istehza

⁹«Bu adam kimi öyrədir? Kimə öyüd verir?

Süddən kəsilmiş, ana döşündən ayrılmış körpə uşaqlaramı?

¹⁰Bu nədir?

Əmr üstünə əmr, əmr üstünə əmr,

Sətir üstünə sətir, sətir üstünə sətir,

Bir az oradan, bir az buradan».

¹¹Onda Rəbb bu xalqla Yadellilərin ağzı ilə,

Başqa dildə danışacaq.

¹²O sizin hamınıza dedi:

«Rahatlıq budur,

Yorğunlara dinclik verin, budur istirahət».

Amma onlar eşitmək istəmədilər.

¹³Rəbbin sözü onlar üçün

«Əmr üstünə əmr, əmr üstünə əmr,

Sətir üstünə sətir, sətir üstünə sətir,

Bir az oradan, bir az buradan» olacaq ki,

Gedib arxası üstə yıxılsınlar, yaralansınlar,

Tələyə düşüb əsir aparılsınlar.

Sion üçün guşədaşı

¹⁴Buna görə də, ey rişxəndçilər,

Yerusəlimdə olan bu xalqın rəhbərləri,

Rəbbin sözünə qulaq asın!

¹⁵Madam ki siz dediniz:

«Ölümlə əhd bağladıq,

Ölülər diyarı ilə razılığa gəldik,

Ölkəyə böyük bəla gələndə

Bizə zərər verməyəcək,

Çünki yalanı özümüzə sığınacaq etdik,

Hiylənin arxasında gizləndik»,

¹⁶Buna görə də Xudavənd Rəbb belə deyir: Budur, Sionda təməl olaraq bir daş,

Sınaqdan keçirilmiş daş, qiymətli bir guşədaşı qoyuram.

Ona iman edən hər kəs narahat olmayacaq.

¹⁷Ədaləti ölçü, salehliyi şaqul edəcəyəm.

Yalan sığınacağını dolu məhv edəcək,

Gizləndiyiniz yerləri sellər yuyub-aparacaq.

¹⁸Ölümlə bağladığınız əhd ləğv olunacaq,

Ölülər diyarı ilə razılığınız qüvvədən düşəcək.

Ölkəyə böyük bəla gələndə sizi məhv edəcək.

¹⁹Bu bəla hər gələndə sizə toxunacaq.

O hər səhər, gecə-gündüz keçəcək.

Bu xəbəri anlayanda dəhşətə gələcəksiniz.

²⁰Yataq uzanmaq üçün qısa,

Yorğan bürünmək üçün dar olacaq.

²¹Çünki Rəbb Perasim dağında etdiyi kimi qalxacaq, Giveon vadisindəki kimi qəzəblənəcək.

O Öz işini, qeyri-adi işini yerinə yetirəcək!

Öz əməlini, naməlum əməlini həyata keçirəcək.

²²Buna görə də rişxənd etməyin ki,

Buxovlarınız daha da ağırlaşmasın.

Çünki Ordular Rəbbi Xudavənddən eşitmişəm ki,

Bütün ölkə məhv olacaq.

Allahın hikməti

²³Qulaq asın, səsimi eşidin, diqqət edin,

Dediyimi dinləyin.

²⁴Əkinçi əkin əkmək üçün durmadan yeri şumlayarmı,

Torpaqda şırım açıb malalayarmı?

²⁵O, torpağı hamarlayandan sonra qara çörək otunu, zirəni səpməzmi?

Buğdanı sıra ilə, arpanı ayırdığı yerə, pərinci də onun yanına əkməzmi?

²⁶Allah ona öyüd verər, onu öyrədər.

²⁷Çünki qara çörək otunu vəl ilə döyməzlər,

Zirənin üstünə araba təkərləri ilə sürməzlər.

Qara çörək otu dəyənəklə, zirə isə çubuqla döyülər.

²⁸Buğdanı çörək bişirmək üçün xırmanda döyürlər,

Amma o fasiləsiz döyülməz.

Xırmanın üstündən araba və atlar keçsə də, buğdanı əzməz.

²⁹Bu hikmət Ordular Rəbbindən gəlir.

Onun məsləhəti ecazkardır, hikməti böyükdür.

Yeşaya 29

Vay Yerusəlimin halına!

¹Ariel,

ey Ariel, Davudun ordugah qurduğu şəhər! İli ilə qat, bayramların keçirilsin.

²Amma Arielə əzab verəcəyəm,

O, fəryad, fəğan edəcək,

Mənim üçün qurbangah ocağı kimi olacaq.

³Sənə qarşı ətrafında ordugah quracağam,

Dövrəsinə istehkamlar düzəcəyəm,

Sənə hücum etmək üçün qüllələr tikəcəyəm.

⁴Alçaldılacaqsan, yerin altından danışacaqsan,

Toz-torpaq içindən səsin boğuq gələcək,

Səsin ölü səsi kimi yerdən,

Sözlərin pıçıltı kimi torpağın altından çıxacaq.

⁵Amma çoxlu düşmənlərin narın toz kimi,

Qorxunc adamların orduları sovrulmuş saman çöpü kimi olacaq.

Qəflətən bir an içində,

⁶Ordular Rəbbi göy gurultusu ilə, zəlzələ ilə,

Böyük səs-küylə, qasırğa və fırtına ilə,

Hər şeyi məhv edən od ilə sənin yanına gələcək.

⁷Sonra Arielə qarşı döyüşən bütün millətlərdən izdihamlar,

Ona və qalalarına qarşı savaşanların hamısı,

Ona zülm edənlər bir röya kimi,

Gecə görünən yuxu kimi yox olacaq.

⁸Yuxuda çörək yediyini görən ac adam

Oyananda yenə acdır.

Yuxuda su içdiyini görən susuz adam

Oyananda yenə susuzluqdan yanır.

Sion dağına qarşı döyüşən

Bütün millətlərdən izdihamlar da belə olacaq.

⁹Heyrətlənin və təəccüblənin,

Gözünüzü kor edin, qoy görməsin.

Şərab içmədən sərxoş olun,

İçki içmədən səndələyin.

¹⁰Çünki Rəbb sizi dərin yuxuya saldı. Ey peyğəmbərlər, gözlərinizi yumdu,

Ey görücülər, sizi kor elədi.

¹¹ Bütün bu görüntü sizin üçün möhürlənmiş kitabın sözlərinə bənzəyir. Oxumağı bacarana bunu verib desələr: «Rica edirəm, bunu oxu!» O isə cavab verir: «Oxuya bilmərəm, çünki möhürlüdür». ¹²Kitabı oxuya bilməyənə verib desələr: «Bunu oxu, rica edirəm», o isə cavab verir: «Mən oxuya bilmirəm». ¹³

Xudavənd deyir: «Bu xalq Mənə yaxınlaşıb

Dilləri və dodaqları ilə Mənə hörmət edir,

Amma qəlbləri Məndən uzaqdır.

Onların Mənə səcdə etmələri

İnsanlardan öyrəndikləri əmrlərdən gəlir.

¹⁴Ona görə Mən bir də bu xalq üçün Yeni möcüzə, ecazkar şeylər edəcəyəm,

Müdriklərinin müdrikliyi məhv olacaq,

Aqillərinin ağlı yox olacaq».

¹⁵Öz niyyətlərini Rəbdən gizlətməyə çalışanların vay halına!

Qaranlıqda iş görən bu adamlar

«Bizi kim görür, kim tanıyır?» deyirlər.

¹⁶Bu nə cür ağılsız düşüncədir! Heç dulusçunu gil ilə bir tutmaq olarmı?

Düzəldilən əşya onu düzəldən barədə

«O məni düzəltmədi» deyərmi?

Qab onu yaradan barədə

«O heç nə anlamır» deyərmi?

¹⁷Livan tezliklə məhsuldar tarlaya,

Məhsuldar tarla isə meşəyə dönməyəcəkmi?

¹⁸O gün karlar kitabdakı sözləri eşidəcək,

Korların gözləri zülmət qaranlıqda görəcək.

¹⁹Fəqirlər Rəbdə sevinc tapacaq,

Yoxsullar İsrailin Müqəddəsində şadlanacaq.

²⁰Çünki zülmkarlar yox olacaq,

Rişxəndçilər itib-batacaq.

Pislik etməyə hazır olanlar məhv olacaq.

²¹Onlar başqasına böhtan atanlar,

Şəhər darvazasında hakimə tələ quranlardır,

Haqlının haqqını nahaq yerə təhrif edənlərdir.

²²Buna görə də İbrahimi qurtaran Rəbb Yaqub nəslinə belə deyir:

«Yaqub nəsli artıq utanmayacaq,

Üzləri qorxudan saralmayacaq.

²³Əlimlə yaratdığım övladlarını

Aralarında görəndə

Adımı müqəddəs tutacaqlar,

Yaqubun Müqəddəsini təqdis edəcəklər,

İsrailin Allahından qorxacaqlar.

²⁴Yolunu azanlar anlayacaq,

Gileylənənlər təlim öyrənəcək».

Yeşaya 30

Misirlə bağlanan əhd puçdur

¹Rəbb bəyan edir: «Bu dikbaş övladların vay halına,

Mənim niyyətlərimi yox, öz niyyətlərini qururlar,

Ruhuma uyğun olmayan razılaşma edirlər,

Eləcə günahı günaha qatırlar.

²Məndən məsləhət almadan

Misirə gedirlər,

Fironun himayəsini axtarırlar,

Misirin kölgəsi altında sığınacaq tapırlar.

³Fəqət fironun himayəsi

Onlar üçün xəcalətə,

Misir kölgəsi altındakı

Sığınacaq rüsvayçılığa çevriləcək.

⁴Başçıları Soanda olduqlarına,

Elçiləri Xanesə yetişdiklərinə baxmayaraq,

⁵Özlərinə faydası olmayan xalqa görə hamı utanacaq.

O xalqın onlara nə köməyi, nə də faydası olacaq,

Ancaq xəcalət və rüsvayçılıq olacaq».

⁶Negev heyvanları barəsində xəbərdarlıq: Yəhudanın elçiləri erkək və dişi aslanların,

Gürzələrin, uçan ilanların yaşadığı

Narahat və təhlükəli torpaqdan keçirlər.

Mal-dövlətini eşşəklərin belinə,

Xəzinələrini dəvələrin hürgücünə yükləyib

Onlara kömək edə bilməyən xalq üçün aparırlar.

⁷Misirin köməyi boş və faydasızdır,

Buna görə də Mən Misirə

«Tənbəl Rahav»

adını qoydum. ⁸«İndi get, sənə danışdığımı

Onların qarşısında bir lövhəyə yaz, kitaba köçür ki,

Gələcəkdə, əbədiyyətdə şahid olsun.

⁹Çünki bu, üsyankar xalq,

Yalançılar nəslidir,

Rəbbin qanununa qulaq asmaq istəməyən bir soydur.

¹⁰Onlar baxıcılara “bir daha görüntü görməyin”,

Görücülərə “bizim üçün düzgün şeylər haqqında peyğəmbərlik etməyin,

Bizə xoş sözlər söyləyin,

Arzuladığımızı peyğəmbərlik edin.

¹¹Yoldan çəkilin, bizə yol verin,

İsrailin Müqəddəsini bizimlə üzləşdirməyin” deyirlər».

¹²Buna görə də İsrailin Müqəddəsi belə deyir:

«Bu sözü rədd etdiyinizə görə,

Zorakılığa və yalana güvənib bel bağladığınıza görə

¹³Bu qəbahət sizin üçün hündür divarda əmələ gələn çata bənzəyir,

Qəflətən, bir an içində dağıla bilər.

¹⁴Ölkəniz də bir gil qab kimi qırılacaq,

Elə xıncım-xıncım olacaq ki,

Ocaqdan od götürmək üçün

Yaxud hovuzdan su çəkmək üçün bir qırığı da qalmayacaq».

¹⁵Xudavənd Rəbb, İsrailin Müqəddəsi belə deyir:

«Mənə tərəf dönüb rahatlıq tapanda xilas olarsınız,

Sakitləşib inanmaqla qüdrətli olarsınız,

Lakin siz bunu istəmirsiniz.

¹⁶Siz dediniz: “Xeyr, atlara minib-qaçacağıq”,

Buna görə siz qaçmalı olacaqsınız.

“Çevik atlara minəcəyik”.

Buna görə təqibçiləriniz də çevik olacaq.

¹⁷Min nəfər bir nəfərin hədəsinə görə qaçacaq,

Beş nəfərin hədəsinə görə hamınız qaçacaqsınız;

Sağ qalanlarınız dağın zirvəsindəki bayrağın şüvülü tək,

Təpədəki bayraq tək olacaq».

¹⁸Amma Rəbb sizə lütf göstərmək üçün gözləyir,

Yenə də sizə rəhm etməyə hazırdır,

Çünki Rəbb adil Allahdır,

Onu intizarla gözləyənlər nə bəxtiyardır!

Rəbb xalqına bərəkət verəcək

¹⁹Ey Yerusəlimdə yaşayanlar, ey Sion xalqı,

Siz artıq ağlamayacaqsınız,

Fəryad etdikdə Rəbb sizin üçün lütfkar olacaq,

Fəryadınızı eşidən kimi cavab verəcək.

²⁰Rəbb çörəyi əzabla, suyu çətinliklə sizə verəcək,

Lakin O bir daha Mürəbbinizi sizdən gizlətməyəcək,

Onu gözünüzlə görəcəksiniz.

²¹Sağa ya sola azdığınız vaxt

Arxanızdan «Yol budur, gedin bu yolla»

Deyilən səsi eşidəcəksiniz.

²²Onda siz gümüşlə örtülən oyma bütlərinizi,

Qızılla örtülmüş tökmə bütlərinizi

Murdar hesab edəcəksiniz.

Murdar bir şeyi atdığınız kimi onları atıb deyəcəksiniz:

«Rədd ol!»

²³Rəbb yerə əkdiyiniz toxum üçün yağış verəcək,

Torpağın məhsulu bol və bərəkətli olacaq.

O gün mal-qaranız geniş otlaqlarda otlayacaq.

²⁴Torpağı şumlayan öküzlərlə eşşəklər

Kürəklə, yaba ilə sovrulmuş duzlu yem yeyəcək.

²⁵O böyük məğlubiyyət günündə

Qalalar yerə çökəndə

Hər hündür dağdan,

Hər uca təpədən sellər axacaq.

²⁶Rəbb Öz xalqının yaralarını sarıdığı gün,

Zərbəsi ilə açdığı yaralarına şəfa verən gün,

Ay işığı günəş işığı,

Günəşin işığı yeddi günün işığı kimi

Yeddi qat artıq parlayacaq.

Rəbb Aşşuru cəzalandıracaq

²⁷Budur, Rəbbin adı uzaqdan gəlir,

Qızğın qeyzlə qara bulud içində

Ağzı qəzəbli sözlərlə doludur,

Dili sanki hər şeyi məhv edən alovdur.

²⁸Onun nəfəsi insan boğazına çatmış daşan sel kimidir,

Millətləri ələkdən keçirəcək ki, məhv olsunlar,

Xalqların ağzına yüyən taxacaq ki, yolunu azsınlar.

²⁹Siz isə müqəddəs bayram gecəsi kimi

İlahilər oxuyacaqsınız.

Rəbbin dağına, İsrailin Qayasına tütək çalaraq çıxan tək

Ürəyiniz şadlanacaq.

³⁰Rəbb əzəmətli səsini eşitdirəcək,

Qızğın qəzəblə, hər şeyi yandıran alovla,

Fırtına ilə, güclü leysanla, dolu ilə

Qolunun qüdrətini göstərəcək.

³¹Aşşur Rəbbin səsindən vahiməyə gələcək,

Rəbb dəyənəyi ilə onları vuracaq.

³²Rəbbin onlara endirdiyi dəyənəyinin hər zərbəsini

Dəf və liralar müşayiət edəcək.

Döyüşərkən əl-qol atıb onları vuracaq.

³³Tofet çoxdan hazırdır,

Aşşur padşahı üçün də

O yer dərinləşdirilib genişləndirilmişdir.

Od çuxurunda çoxlu odun, alov var.

Rəbbin nəfəsi kükürd axını kimi onu yandırar.

Yeşaya 31

Misirə güvənməyin

¹Kömək üçün Misirə enənlərin,

Atlara güvənənlərin vay halına!

Onlar döyüş arabalarının çoxluğuna,

Süvarilərin gücünə bel bağlayır!

Amma İsrailin Müqəddəsinə baxmırlar,

Rəbbi axtarmırlar!

²Lakin Rəbb tam hikmətə malikdir,

O bəla gətirər, Öz sözlərini geri götürməz,

Pislik edən adamlara,

Günahkarlara kömək edənlərə qarşı çıxar.

³Misirlilər Allah deyil, insandır,

Atları da ətdəndir, ruhdan deyil.

Rəbb Öz əlini uzadanda

Yardım edən büdrəyəcək,

Yardım alan yıxılacaq,

Hamısı birlikdə məhv olacaq.

⁴Çünki Rəbb mənə belə dedi:

«Şir ya gənc aslan öz şikarı üstünə nərə çəkəndə

Bir dəstə çoban ona qarşı haray salsa da,

Aslan onların səslərindən qorxmur,

Qışqırıqlarına məhəl qoymur.

Ordular Rəbbi də elə enəcək,

Sion dağını, onun təpələrini

Qorumaq üçün döyüşəcək.

⁵Quş qanad açıb necə balalarını qoruyursa,

Ordular Rəbbi Yerusəlimi də belə qoruyacaq,

Müdafiə edəcək, qurtaracaq, saxlayacaq, xilas edəcək».

⁶Ey İsrail övladları, üz döndərdiyiniz Rəbbə tərəf dönün! ⁷Çünki o gün hamınız əlinizlə günahkarcasına düzəltdiyiniz qızıl və gümüş bütlərinizi tullayacaqsınız. ⁸«Aşşurlular qılıncdan məhv olacaq,

İnsan qılıncından yox.

Onlar qılıncdan keçiriləcək,

Amma bu insan qılıncı olmayacaq.

Aşşurlular döyüş meydanından qaçacaq,

Cavanları isə yaxalanıb qul olacaq.

⁹Aşşur padşahı dəhşət içində qaçacaq.

Sərkərdələri bayraqlarını atıb vəlvələyə düşəcək».

Bunu alovu Sionda,

Ocağı Yerusəlimdə olan Rəbb bəyan edir.

Yeşaya 32

Saleh padşah

¹Budur, padşah salehliklə hökm sürəcək,

Başçılar ədalətlə rəhbərlik edəcək.

²Onların hər biri

Küləyə qarşı bir pənahgah,

Fırtınaya qarşı sığınacaq,

Quraqlıqda bulaqlar,

Cansıxıcı torpaqda kölgə salan böyük qaya kimi olacaq.

³Görənlərin gözləri bir daha yumulmayacaq,

Eşidənlərin qulaqları dinləyəcək.

⁴Ağılsızların ağlı biliyə doğru yönələcək,

Pəltəklər açıq-aydın danışacaq.

⁵Artıq axmaq adama alicənab deyilməyəcək,

Alçağı ağayana insan saymayacaqlar.

⁶Çünki axmaq səfeh-səfeh danışır,

Ürəyinin niyyəti pislik etməkdir.

Onun işi küfr edib,

Rəbbə qarşı təhqiranə danışmaq,

Acları ac, susuzları susuz qoymaqdır.

⁷Alçaq adamın əməlləri pisdir.

O, hiylə işlədir ki,

Yalan sözlərlə haqlı olan yoxsula ziyan versin.

⁸Amma alicənab adam

Alicənab şeylər barəsində fikirləşər.

Elədiyi xoş əməllər ona dayaqdır.

Hökm və qurtuluş

⁹Ey qayğısız qadınlar,

Qalxın, səsimi eşidin!

Ey laqeyd qızlar, sözümü dinləyin!

¹⁰Ey laqeyd qadınlar,

Siz bir ildən sonra sarsılacaqsınız,

Çünki bağda məhsul,

Meyvə yığımı olmayacaq.

¹¹Ey qayğısızlar, əsin!

Ey laqeydlər, lərzəyə gəlin,

Geyimlərinizi çıxarın,

Soyunun, belinizə çul qurşayın.

¹²Gözəl tarlalar,

Məhsuldar meynələr üçün,

¹³Xalqımın tikanlı kollar bitən torpağı üçün,

Zövq-səfalı şəhərlərdəki şən evləriniz üçün

Sinə döyün.

¹⁴Çünki saray viranə,

İzdihamlı şəhər boş qalacaq,

Qala ilə gözətçi qülləsi

Əbədilik mağaralara çevriləcək,

Vəhşi eşşəklərin gəzdiyi,

Sürülərin otlaq yeri olacaq.

¹⁵Bunlar yuxarıdan üzərimizə Ruh tökülənədək davam edəcək.

O vaxt səhra məhsuldar tarlaya,

Məhsuldar tarla isə meşəyə dönəcək.

¹⁶Sonra ədalət səhrada məskunlaşacaq,

Salehlik məhsuldar tarlada yaşayacaq.

¹⁷Salehliyin bəhrəsi əmin-amanlıq,

Nəticəsi isə əbədi sakitlik və təhlükəsizlik olacaq.

¹⁸Xalqım əmin-amanlıq içində evlərində,

Təhlükəsiz məskəndə, rahat yerlərdə yaşayacaq.

¹⁹Dolu meşələrə düşsə də,

Şəhər yerlə yeksan olsa da,

²⁰Bütün sulu torpaqlarda toxum əkənlər,

Oraya malını, eşşəyini sərbəst buraxanlar,

Siz nə xoşbəxtsiniz!

Yeşaya 33

Kömək üçün yalvarış

¹Vay halına, ey yıxıb-dağıdan,

Amma özü yıxılmayan insan!

Vay halına, ey xain adam,

Hərçənd sənə qarşı xəyanət etməmişlər!

Sən məhv edib qurtaran zaman

Özün də yıxılacaqsan,

Sən xain əməllərindən dönəndə

Xəyanətlə rastlaşacaqsan.

²Ya Rəbb, bizə qarşı lütfkar ol,

Çünki Sənə ümid etmişik.

Hər səhər bizim qüvvətimiz ol,

Fəlakət günündə bizi qurtar.

³Sənin qüdrətli səsindən xalqlar qaçır,

Sən ayağa qalxarkən

Millətlər pərən-pərən olur.

⁴Çəyirtkələr tarlanı nə cür talan edirlərsə,

Ey millətlər, qənimətiniz də o cür talan olacaq.

Malınızın üstünə çəyirtkə yığını kimi cumacaqlar.

⁵Rəbb ucadır, yüksəklərdə oturur,

Sionu ədalətlə və salehliklə doldurur.

⁶O, yaşadığınız dövrün təməlidir,

Qurtuluşun, hikmətin, biliyin mənbəyidir,

Rəbb qorxusu sənin xəzinəndir.

⁷Budur, millətlərin igidləri küçələrdə çığırırlar.

Sülh qasidləri hönkürüb ağlayırlar.

⁸Yollar boşalıb, səyyahlar yoxdur.

Düşmən əhdi pozdu,

Şəhərləri dağıtdı, adamları alçaltdı.

⁹Ölkə yas tutur, zəifləyir,

Livan məğlub olub, solub,

Şaron səhraya dönür,

Başan və Karmelin ağacları yarpaqlarını tökür.

Rəbbin xalqlara xəbərdarlığı

¹⁰Rəbb deyir:

«İndi qalxacağam,

İndi yüksələcəyəm,

İndi ucalacağam.

¹¹Samana hamilə qalıb küləş doğacaqsınız,

Nəfəsiniz sizi məhv edən alova dönəcək.

¹²Xalqlar yanıb kül olacaq,

Kəsilib odda yandırılan tikanlı kollara oxşayacaq.

¹³Ey uzaqda yaşayanlar,

Nə elədiyimi eşidin,

Ey yaxında yaşayanlar,

Mənim gücümü bilin».

¹⁴Siondakı günahkarlar dəhşətə,

Allahsızlar lərzəyə gəldi:

«Hər şeyi məhv edən alovun yanında hansımız yaşaya bilərik?

Əbədi yanan atəşin yanında hansımız dayana bilərik?»

¹⁵Amma salehlik yolu ilə gedən,

Doğru sözlər danışan,

Zorakılıqla əldə edilən qazancı rədd edən,

Əlini rüşvətdən uzaq tutan,

Qatillərin qurduğu qəsdə fikir verməyən,

Pisliyə qarşı gözlərini yuman

¹⁶Yüksəkliklərdə yaşayacaq,

Təpələrin başındakı qalalar onun dayağı olacaq.

O, çörəklə, su ilə təmin olunacaq.

Parlaq gələcək

¹⁷Gözlərin padşahı bütün gözəlliyi ilə görəcək,

Ucsuz-bucaqsız ölkəni seyr edəcək.

¹⁸«Haradadır xərac yığan?

Haradadır qeydiyyat aparan?

Haradadır qüllələrə nəzər salan?» deyərək

Dəhşətli günlər haqqında düşünəcəksən.

¹⁹Anlaşılmaz, yad dildə danışan

Təkəbbürlü xalqı daha görməyəcəksən.

²⁰Bayramlar keçirdiyimiz şəhərə – Siona bax!

Gözlərin Yerusəlimi,

Sarsılmaz çadırı, sülh məskənini görəcək.

Onun payaları heç vaxt sökülməyəcək,

Kəndirlərinin heç biri qırılmayacaq.

²¹Lakin orada –

Geniş çayların, irmaqların olduğu yerdə

Əzəmətli Rəbb bizimlə olacaq.

Oradan avarlı qayıqlar, böyük gəmilər

Keçə bilməz.

²²Çünki Rəbdir hakim olan,

Rəbdir qanunumuzu qoyan,

Padşahımız Rəbdir, Odur bizi qurtaran.

²³Gəmilərinin ipləri boşaldı,

Dor ağacları yerində möhkəm dayanmadı,

Yelkənləri açılmadı.

O vaxt böyük talan malı paylanacaq,

Hətta topal adamlar da talan edəcək.

²⁴Heç bir Sion sakini

«Xəstəyəm» deməyəcək,

Orada yaşayan xalqın günahları bağışlanacaq.

Yeşaya 34

Allahın millətlərə cəza verməsi

¹Ey millətlər, yaxın gəlin, eşidin,

Ey ümmətlər, dinləyin!

Ey dünya və sakinləri,

Yer üzü və onun bütün yetirmələri, qulaq asın!

²Çünki Rəbb bütün millətlərə qarşı qəzəbləndi,

Onların ordularına qarşı qeyzə gəldi.

Onların hamısını məhv edəcək,

Ölümə məhkum edəcək.

³Ölüləri kənara atılacaq,

Meyitlərindən üfunət qalxacaq,

Dağlar onların qanına bulanacaq.

⁴Bütün göy cisimləri çürüyəcək, Göylər bir tumar kimi büküləcək.

Göy ulduzları meynə yarpağı kimi,

Əncir yarpağı kimi düşəcək, saralıb-solacaq.

⁵Rəbb deyir: «Çünki qılıncım göylərdə doyub,

Bax Edomun üzərinə,

Məhv etməyə qərar verdiyim xalqın üzərinə enir».

⁶Rəbbin qılıncı qanla, quzu və təkə qanı ilə doydu,

Qoç böyrəklərinin yağı ilə piy bağladı.

Çünki Rəbb Bosrada qurban,

Edomda isə böyük qırğın hazırlayıb.

⁷Onlarla birlikdə çöl öküzləri,

Buzovlar, güclü buğalar yerə səriləcək.

Onların ölkəsi qanla dolacaq, torpaqları piylə münbit olacaq.

⁸Çünki Rəbbin qisas günü var,

Siona edilən zülmlərin intiqam ili var.

⁹Edomun axar suları qatrana,

Torpağı kükürdə dönəcək,

Ölkənin hər tərəfi yanan qatrana çevriləcək;

¹⁰Gecə-gündüz sönməyəcək, tüstüsü həmişə qalxacaq, Nəsildən-nəslədək viran qalacaq,

Əsrlər boyu oradan heç kəs keçməyəcək.

¹¹Orada ancaq bayquşlarla kirpilər yurd salacaq,

Böyük bayquşlarla qarğalar orada yaşayacaq.

Rəbb oranı qarmaqarışıqlıq ipi, viranəlik şaqulu ilə ölçəcək.

¹²Orada heç bir adlı-sanlı adam qalmayacaq ki,

Onu padşah elan etsinlər.

Bütün başçıların sonu gələcək.

¹³Saraylarında tikanlar,

Qalalarında gicitkən və böyürtkən bitəcək.

Ora çaqqalların yurdu, dəvəquşuların yuvası olacaq.

¹⁴Vəhşi heyvanlarla goreşənlər orada görüşəcək,

Təkələr bir-birini səsləyəcək,

Gecə heyvanları da orada məskunlaşıb rahat yer tapacaq.

¹⁵Orada bayquş yuva quracaq, yumurtlayacaq,

Öz kölgəsi altında balalar çıxaracaq.

Çalağanlar da orada cüt-cüt yığışacaq.

¹⁶Rəbbin kitabını araşdırın, oxuyun,

Bunlardan heç biri əskik olmayacaq,

Hər bir dişi heyvan öz cütünü tapacaq,

Çünki bu əmr Onun ağzından çıxdı,

Ruhu da onları toplayacaq.

¹⁷Rəbb Özü onlar üçün püşk atdı,

Əli ilə ölkəni ölçüb, onlara payladı.

Onlar bu ölkəyə əbədi malik olacaq,

Nəsildən-nəslə burada yaşayacaq.

Yeşaya 35

Müqəddəs yol

¹Səhra və quru torpaq sevinəcək,

Çöl şadlanacaq, nərgiz kimi çiçəklənəcək.

²Hər yan gül açacaq,

Şadlanacaq, sevincdən nəğmə oxuyacaq.

Livanın gözəlliyi, şan-şöhrəti,

Karmelin və Şaronun cah-calalı ona veriləcək.

Hamı Rəbbin izzətini, Allahımızın əzəmətini görəcək.

³Zəif əllərə qüvvət verin, Əsən dizləri möhkəmləndirin.

⁴Ürəklərində qorxanlara deyin:

«Möhkəm olun, qorxmayın!

Budur, Allahınız

İntiqam almaq, düşmənlərinizdən qisas almaq üçün gəlir.

O gəlib sizə qurtuluş verəcək!»

⁵O vaxt korların gözləri, karların qulaqları açılacaq, ⁶Axsaqlar ceyran kimi hoppanacaq,

Lalların dili sevinclə nəğmə deyəcək,

Çünki səhrada bulaqlar fışqıracaq,

Quru torpaqda çaylar axacaq.

⁷Qızğın qum hovuza, susuz torpaq su bulaqlarına çevriləcək.

Çaqqalların yaşadığı yerlərdə qamış və qarğı bitəcək.

⁸Orada bir yol olacaq,

O yol «Müqəddəs yol» adlanacaq.

Murdar adam oradan keçməyəcək,

O yol qurtuluş tapanların yoludur.

Ora ilə gedənlərdən heç biri,

Hətta ağılsızlar da keçsələr,

Əsla yolunu azmayacaq.

⁹Orada şirlər olmayacaq,

Yırtıcı heyvanlar o yola çıxmayacaq,

Onlara orada rast gəlməyəcəklər.

Ancaq qurtuluş tapanlar o yol ilə gəzəcək.

¹⁰Rəbbin satın alınmış adamları qayıdacaq, Sevinclə nəğmə deyərək Siona gələcək.

Üzlərində əbədi sevinc olacaq,

Onlar fərəh və şadlıq tapacaq,

Kədər və qəm-qüssə yox olacaq!

Yeşaya 36

Aşşurluların hədələməsi

(2Pad. 18:13-27; 2Saln. 32:1-19)

¹Xizqiyanın padşahlığının on dördüncü ilində Aşşur padşahı Sanxeriv Yəhudanın bütün qalalı şəhərlərinə hücum edib onları aldı. ²Aşşur padşahı baş vəzirini böyük qoşunla Lakişdən Yerusəlimə, padşah Xizqiyanın yanına göndərdi. Baş vəzir Mahudbasan tarlası yoluna, yuxarı hovuzun su kəmərinin yanına qalxıb orada dayandı. ³Saray rəisi Xilqiya oğlu Elyaqim, mirzə Şevna və salnaməçi Asəf oğlu Yoah onun qabağına çıxdılar. ⁴Baş vəzir onlara dedi: «İndi Xizqiyaya söyləyin ki, böyük padşah – Aşşur padşahı belə deyir: “Nəyə güvənirsən? ⁵Mən deyirəm ki, sən boş şeyə güvənirsən. Müharibə üçün tədbir və güc lazımdır. İndi sən kimə güvənirsən ki, mənə qarşı çıxırsan? ⁶ Yəqin sən əzilmiş qamış çubuğuna – Misirə güvənirsən. Bil ki, kim ona söykənsə, əlinə batıb deşər. Misir padşahı firon ona güvənənlərin hamısı üçün belədir. ⁷Bəlkə mənə ‹biz Allahımız Rəbbə güvənirik› söyləyəsən. Məgər bu o Allah deyildi ki, Xizqiya Onun səcdəgahlarını və qurbangahlarını aradan qaldırdı? O, Yəhudalılara və Yerusəlimlilərə də ‹yalnız qurbangahın önündə səcdə edin› demədimi? ⁸İndi ağam Aşşur padşahı ilə mərcə gəl: əgər sən iki min süvari tapa bilsən, mən sənə o qədər at verərəm. ⁹Görək, sən ağamın kiçik qulu olan bir başçını necə məğlub edəcəksən. Sən hələ döyüş arabaları və süvarilər almaq üçün Misirə güvənirsən! ¹⁰Məgər indi mən bu torpağı viran etməyə Rəbbin istəyi ilə gəlmədimmi? Rəbb mənə ‹bu ölkəyə hücum edib onu viran et› dedi”». ¹¹Elyaqim, Şevna və Yoah baş vəzirə dedi: «Xahiş edirik, bu qullarınla Arami dilində danış, biz bu dili başa düşürük. Ancaq divar üzərindəki xalqın eşitdiyi yerdə bizimlə Yəhudi dilində danışma». ¹²Baş vəzir dedi: «Məgər ağam məni göndərib ki, bu sözləri təkcə sənin ağana və sənə, yoxsa divar üzərində oturan bu adamlara söyləyim? Axı onlar da sizinlə birgə nəcislərini yeyib, sidiklərini içəcəklər». ¹³Onda baş vəzir durub Yəhudi dilində uca səslə bağıraraq dedi: «Böyük padşahın – Aşşur padşahının sözünü eşidin! ¹⁴Padşah belə deyir: “Xizqiya sizi aldatmasın, sizi qurtara bilməyəcək. ¹⁵Qoy Xizqiya sizə ‹Rəbb bizi hökmən qurtaracaq və bu şəhər Aşşur padşahına təslim edilməyəcək› deyib Rəbbə arxayın etməsin”. ¹⁶Ona qulaq asmayın! Çünki Aşşur padşahı belə deyir: “Mənimlə sülh bağlayın və yanıma gəlin. Mən gələnə qədər hər kəs öz üzüm meynəsinin və əncir ağacının bəhrəsindən yeyib öz quyusunun suyundan içəcək. ¹⁷Sonra mən gəlib sizi ölkənizə bənzər bir ölkəyə – buğda, şərab, çörək, üzüm bağları olan bir torpağa aparacağam. ¹⁸‹Rəbb bizi qurtaracaq› deyib qoy Xizqiya sizi azdırmasın. Millətlərin allahlarından biri öz ölkəsini Aşşur padşahının əlindən qurtardımı? ¹⁹Hanı Xamatın və Arpadın allahları? Hanı Sefarvayimin allahları? Samariyanı mənim əlimdən qurtardılarmı? ²⁰Bütün bu allahlardan hansı öz ölkəsini mənim əlimdən qurtardı? Bəs Rəbb necə Yerusəlimi mənim əlimdən qurtara bilər?”» ²¹Camaat susdu və onun cavabında heç nə demədi. Çünki padşah «ona cavab verməyin» deyə əmr etmişdi. ²²Saray rəisi Xilqiya oğlu Elyaqim, mirzə Şevna və salnaməçi Asəf oğlu Yoah cırılmış paltarlarda Xizqiyanın yanına gəlib baş vəzirin sözlərini ona çatdırdılar.

Yeşaya 37

Padşah Xizqiya Yeşayadan məsləhət alır

(2Pad. 19:1-7)

¹Padşah Xizqiya bunu eşidəndə paltarını cırdı və çula bürünüb Rəbbin məbədinə girdi. ²O, saray rəisi Elyaqimi, mirzə Şevnanı və kahinlərin ağsaqqallarını çula bürünmüş halda peyğəmbər Amots oğlu Yeşayanın yanına göndərdi. ³Onlar Yeşayaya dedilər: «Xizqiya belə deyir: “Bu gün bəla, təhqir və rüsvayçılıq günüdür, çünki uşaqların doğulma vaxtı çatıb, ancaq doğmağa güc yoxdur. ⁴Bəlkə ağası Aşşur padşahının var olan Allahı təhqir etməyə göndərdiyi baş vəzirin sözlərini Allahın Rəbb eşidib buna görə məzəmmət edər. Ona görə də qalanlar üçün dua et”». ⁵Padşah Xizqiyanın adamları Yeşayanın yanına gələndə ⁶Yeşaya onlara dedi: «Ağanıza söyləyin ki, Rəbb belə deyir: “Aşşur padşahının nökərlərinin Mənə qarşı küfr edərək söylədiyi və sənin eşitdiyin sözlərdən qorxma. ⁷Mən onun daxilinə elə bir ruh göndərəcəyəm ki, bir xəbər eşidib öz ölkəsinə qayıdacaq və orada onu qılıncla öldürtdürəcəyəm”».

Aşşur padşahının məktubu

(2Pad. 19:8-19)

⁸Baş vəzir geri qayıdıb Aşşur padşahının Livna üzərinə hücum etdiyini gördü. Çünki Lakişdən geri çəkildiyini eşitmişdi. ⁹Aşşur padşahına «Kuş padşahı Tirhaqa sənin üstünə vuruşmağa gəlir» xəbəri çatdı. O bunu eşidəndə Xizqiyanın yanına qasidlər göndərib dedi: ¹⁰«Yəhuda padşahı Xizqiyaya belə söyləyin: “Qoy güvəndiyin Allahın ‹Yerusəlim Aşşur padşahına təslim edilməyəcək› deyə səni aldatmasın. ¹¹Axı sən eşitdin ki, Aşşur padşahları bütün ölkələrə nə ediblər, oraları necə viran ediblər. Sən qurtula biləcəksənmi? ¹²Atalarımın məhv etdikləri millətlərin – Qozanın, Xaranın, Resefin və Telassarda olan Edenlilərin allahları onları qurtardılarmı? ¹³Hanı Xamat padşahı, Arpad padşahı, Sefarvayim şəhərinin, Henanın və Avvanın padşahı?”» ¹⁴Xizqiya məktubu qasidlərdən alıb oxudu. O, Rəbbin məbədinə qalxıb məktubu Rəbbin önündə yerə sərdi. ¹⁵Xizqiya Rəbbə dua edib dedi: ¹⁶ «Ey keruvlar üstündə əyləşən Ordular Rəbbi olan İsrailin Allahı! Bütün dünya padşahlıqlarının Allahı yalnız Sənsən. Göyü və yeri Sən yaratmısan. ¹⁷Ya Rəbb, qulağın eşitsin, gözün görsün. Sanxerivin var olan Allaha qarşı küfr edərək göndərdiyi bütün sözlərə qulaq as. ¹⁸Ya Rəbb, doğrudur, Aşşur padşahları bütün ölkələri və onların torpaqlarını talan etdi, ¹⁹allahlarını oda atıb məhv etdi. Çünki onlar Allah deyildi, insanlar onları ağac və daşdan düzəltmişdi. ²⁰Ey Allahımız Rəbb, indi isə yalvarıram, bizi onun əlindən qurtar və bütün dünya padşahlıqları bilsin ki, Rəbb yalnız Sənsən!»

Yeşaya Aşşurluların məğlubiyyəti barədə peyğəmbərlik edir

(2Pad. 19:20-37)

²¹Amots oğlu Yeşaya Xizqiyaya xəbər göndərib dedi: «İsrail Allahı Rəbb belə deyir: “Aşşur padşahı Sanxeriv barədə Mənə dua etdin”. ²²Onun haqqında Rəbbin söylədiyi söz budur: “Bakirə Sion qızı

Sənə xor baxıb lağ edir,

Yerusəlim qızı

Sənin arxanca başını bulayır.

²³Kimi söyüb küfr etdin?

Kimə qarşı səsini qaldırdın?

Kimə lovğalıqla baxdın?

İsrailin Müqəddəsinə!

²⁴Nökərlərinin vasitəsilə Rəbbi təhqir edib dedin:

‹Çoxlu döyüş arabalarımla

Dağların zirvəsinə,

Livanın ən uca yerlərinə çıxdım.

Uca sidr ağaclarını,

Gözəl şam ağaclarını kəsdim,

Uzaq təpələrinə,

Yaşıl meşələrinə çıxdım.

²⁵Quyu qazdım və sularını içdim,

Misirin bütün çaylarını ayağımla qurutdum›.

²⁶Məgər eşitməmisən ki,

Mən çoxdan bu işi hazırladım,

Qədimdən bəri müəyyən etdiyimi

İndi yerinə yetirirəm ki,

Sən qalalı şəhərləri dağıdıb

Viranəliyə çevirəsən.

²⁷Bu şəhərlərin sakinləri zəiflədi,

Çaşqınlığa və xəcalətə düşdü.

Yetişməmişdən əvvəl yandırılan

Çöl otu, göyərti və damda bitən ot kimi oldu.

²⁸Sənin oturuşunu,

Girişini-çıxışını,

Mənə qarşı hiddətini bilirəm.

²⁹Mənə qarşı hiddətləndiyinə görə,

Lovğalığın qulağıma çatdığına görə

Halqamı burnuna və yüyənimi ağzına taxacağam,

Səni gəldiyin yolla geri qaytaracağam.

³⁰Ancaq sənin üçün əlamət budur, ey Xizqiya!

Bu il və gələn il özü yetişən barını,

Üçüncü il isə taxıl zəmilərini,

Üzüm bağları salıb onların bəhrəsini yeyin.

³¹Yəhuda nəslindən qurtulub sağ qalanlar

Yenə aşağıya doğru kök atacaq,

Yuxarıya doğru bəhrə verəcək.

³²Çünki qalanlar Yerusəlimdən,

Xilas olanlar Sion dağından çıxacaq.

Ordular Rəbbinin qeyrəti bunu edəcək”.

³³Buna görə Aşşur padşahı barədə Rəbb belə deyir:

“O bu şəhərə girməyəcək,

Oraya ox atmayacaq,

Qarşısına qalxanla çıxmayacaq,

Qala önündə torpaq qalağı qurmayacaq.

³⁴Ancaq gəldiyi yolla geri qayıdacaq,

Bu şəhərə girməyəcək”

Rəbb bəyan edir.

³⁵“Mən bu şəhəri Özüm üçün,

Qulum Davudun xatirinə qoruyub xilas edəcəyəm”».

³⁶O gecə Rəbbin mələyi çıxıb Aşşur ordugahında yüz səksən beş min nəfəri qırdı. Səhər erkən qalxıb gördülər ki, onların hamısı öldürülüb. ³⁷Aşşur padşahı Sanxeriv geri çəkilib getdi və Ninevada qaldı. ³⁸O öz allahı Nisrokun məbədində səcdə edərkən oğulları Adrammelek ilə Şareser onu qılıncla öldürdü və Urartu ölkəsinə qaçdı. Sanxerivin yerinə oğlu Esar-Xaddon padşah oldu.

Yeşaya 38

Xizqiyanın xəstələnməsi

(2Pad. 20:1-11; 2Saln. 32:24-26)

¹O günlərdə Xizqiya ölümcül xəstələndi. Peyğəmbər Amots oğlu Yeşaya onun yanına gəlib dedi: «Rəbb belə deyir: “Evin üçün vəsiyyət et, çünki xəstəlikdən sağalmayıb öləcəksən”». ²Xizqiya üzünü divara çevirdi və Rəbbə dua edib dedi: ³«Yalvarıram, ya Rəbb, yadına sal ki, necə Sənin önündə salehliklə və sidq ürəklə davranmışam, necə Sənin gözündə yaxşı olan işlər etmişəm». Xizqiya acı-acı ağladı. ⁴Sonra Rəbbin sözü Yeşayaya nazil oldu: ⁵«Qayıt, Xizqiyaya söylə ki, baban Davudun Allahı Rəbb belə deyir: “Sənin duanı eşitdim, göz yaşlarını gördüm. Bax sənin ömrünü on beş il artırıram. ⁶Səni və bu şəhəri Aşşur padşahının əlindən qurtaracağam. Bu şəhəri qoruyacağam. ⁷Söylədiyi sözə əməl edəcəyinə Rəbbin verdiyi əlamət budur: ⁸batan günəşin Axazın tikdiyi günəş saatının üstünə düşən kölgəsi on dərəcə geri çəkiləcək”». Beləliklə, günəş enmə dərəcəsindən on dərəcə geri çəkildi. ⁹Yəhuda padşahı Xizqiya xəstələnib şəfa tapdığından sonra bunu yazdı: ¹⁰«Mən öz-özümə dedim:

Ömrüm yarıya çatan zaman

Ölülər diyarının qapısından keçməliyəm,

Həyatımın qalan illərindən məhrum olmuşam.

¹¹Dedim, Rəbbi dirilər arasında,

Bəli, Rəbbi bir daha görməyəcəyəm.

Bu dünyada yaşayanlar kimi

Artıq insan üzü görməyəcəyəm.

¹²Evim çoban çadırı kimi dağıldı,

Əlimdən alındı.

Həyatım dəzgahda toxunan saplar kimi dövr edirdi,

Ya Rəbb, bu dəzgahdan məni kəsdin.

Bir günün içində əcəlimi çatdırdın.

¹³Səhərə qədər ağrılardan çığırdım,

Rəbb aslan tək bütün sümüklərimi qırır.

Bir günün içində əcəlimi çatdırdın.

¹⁴Qaranquş kimi, durna kimi çığırdım,

Mən göyərçin tək inləyirəm.

Göyə baxmaqdan gözlərim yoruldu.

Ya Xudavənd, imdadıma çat, zülmə düşmüşəm!

¹⁵Nə deyim? Mənimlə danışan, bunu edən Rəbdir.

Çəkdiyim əzablardan sonra qalan illərimi

Sakit yaşayacağam.

¹⁶Ya Xudavənd, adamları yaşadan Sənsən,

Məni də Sən yaşadırsan.

Məni yenə canlandıracaqsan,

Yaşat məni!

¹⁷Çəkdiyim əzab-əziyyətim mənim xeyrimə oldu.

Sən sevginlə canımı qəbirdən qurtardın,

Bütün günahlarımı aradan götürdün.

¹⁸Axı ölülər diyarı Sənə şükür etməz,

Ölüm həmdlər söyləməz,

Qəbirə düşənlər Sənin sədaqətinə ümid etməz.

¹⁹Bu gün Sənə etdiyim kimi

Dirilər, yalnız dirilər Sənə şükür edər.

Atalar Sənin sədaqətini övladlarına tanıtdırır.

²⁰Rəbb mənə qurtuluş verdi,

Ömrümüz boyu Rəbbin məbədində

Səni simli alətlərlə, ilahilərlə mədh edərik».

²¹Əvvəl Yeşaya demişdi: «Əncir kündəsi götürün, çibanın üstünə qoyun ki, padşah sağalsın». ²²Xizqiya dedi: «Rəbbin məbədinə qalxmağım üçün əlamət nədir?»

Yeşaya 39

Xizqiyanın ağılsızlığı

(2Pad. 20:12-19)

¹O zaman Babil padşahı Baladan oğlu Merodak-Baladan Xizqiyaya məktublar və hədiyyələr göndərdi, çünki Xizqiyanın xəstələndiyini və sağaldığını eşitmişdi. ²Bunlar Xizqiyanı sevindirdi. O, xəzinəsində olan şeyləri – qızıl-gümüşü, ətriyyatı, qiymətli yağları, silah anbarındakı bütün əşyaları elçilərə göstərdi. Xizqiyanın sarayında və bütün torpağında onlara göstərmədiyi bir şey qalmadı. ³Onda Yeşaya peyğəmbər padşah Xizqiyanın yanına gəlib, ona dedi: «Bu adamlar nə dedi? Onlar sənin yanına haradan gəldi?» Xizqiya dedi: «Uzaq bir ölkədən – Babildən gəldilər». ⁴Yeşaya dedi: «Sənin sarayında nə gördülər?» Xizqiya dedi: «Sarayımda olan bütün şeyləri gördülər. Xəzinəmdə onlara göstərmədiyim bir şey qalmadı». ⁵Onda Yeşaya Xizqiyaya dedi: «Ordular Rəbbinin sözünü dinlə: ⁶“Bir gün gələcək ki, sənin sarayında olan hər şey və atalarının bu günə qədər yığdıqları şeylər Babilə aparılacaq, heç nə qalmayacaq” deyir Rəbb. ⁷ “Sənin nəslindən olan və səndən törəyən bəzi oğullarını götürüb aparacaqlar və onlar Babil padşahının sarayında hərəmağası olacaqlar”». ⁸Xizqiya Yeşayaya dedi: «Söylədiyin Rəbbin sözü yaxşı sözdür». Sonra dedi: «Heç olmasa mənim dövrümdə sülh və əmin-amanlıq olacaq».

Yeşaya 40

Təsəlliverici sözlər

¹Allahınız deyir:

«Təsəlli verin xalqıma, təsəlli verin!

²Yerusəlim sakinlərinə təskinlik verən sözlər söyləyin!

Əsirlik dövrünün qurtarmasını,

Təqsirlərinin əvəzinin verilməsini,

Bütün günahlarına görə Rəbbin əlindən

İkiqat cəza aldıqlarını onlara bəyan edin».

³ Nida edənin səsi gəlir:

«Səhrada Rəbbin yolunu hazırlayın,

Çöldə Allahımızın keçəcəyi yerləri hamar edin.

⁴Hər dərə yüksəldiləcək,

Hər dağ və təpə aşağı endiriləcək,

Yoldakı əyriliklər düzələcək,

Kələ-kötür yerlər hamar ediləcək.

⁵Rəbbin əzəməti aşkar olunacaq,

Bütün bəşər bunu birlikdə görəcək».

Bu sözlər Rəbbin ağzından çıxıb.

⁶ Səs deyir: «Bəyan et!»

«Nəyi bəyan edim?» deyə soruşdum.

«Bütün bəşər ota bənzər,

Onun bütün gözəlliyi çöl çiçəyi kimidir.

⁷Rəbb nəfəsini üzərinə üfürəndə

Ot quruyar, çiçək solar,

Həqiqətən, bu xalq ota oxşar.

⁸Ot quruyar, çiçək solar,

Amma Allahımızın sözü əbədi qalar».

İsrail Allahı qüdrətlidir

⁹Ey Siona müjdə gətirən, yüksək dağa çıx!

Ey Yerusəlimə xoş xəbər gətirən,

Ucalt səsini, car çək,

Qaldır səsini, qorxma.

Yəhuda şəhərlərinə de:

«Budur Allahınız!»

¹⁰ Budur, Xudavənd Rəbb Öz qüvvəsi ilə gəlir,

O, qüdrətlə hökm edəcək,

Mükafatı Onunladır,

Ənamı önündədir.

¹¹ O Öz sürüsünü çoban kimi otaracaq,

Quzuları qucağına alacaq, sinəsində gəzdirəcək,

Sağmal heyvanların qayğısını çəkib otaracaq.

¹²Kim dənizləri ovcu ilə,

Göyləri qarışı ilə ölçüb?

Yerin torpağını ölçü ilə,

Dağları qapanla,

Təpələri tərəzi ilə kim çəkib?

¹³ Rəbbin Ruhuna kim yol göstərdi?

Ona kim məsləhətçi olub öyrətdi?

¹⁴Ağıl öyrənmək üçün O kimdən məsləhət alıb?

Ədalət yolunu kimdir ona göstərən?

Kimdir Rəbbə bilik verən?

Kimdir Ona dərrakə yolunu anladan?

¹⁵Rəbb üçün millətlər vedrədə bir damla su kimidir,

Tərəzidə toz zərrəsi kimi sayılar,

Budur, adaları da toz kimi göyə sovurar.

¹⁶Qurbanları yandırmaq üçün

Livan meşəsi kifayət deyil,

Yandırma qurbanlar üçün oradakı heyvanlar bəs deyil.

¹⁷Rəbbin önündə bütün millətlər heçdir,

Bu Onun önündə heçdən də az, boş sayılar.

¹⁸ Bəs onda Allahı kimə bənzədərsiniz?

Onu nəyə oxşadarsınız?

¹⁹Bütəmi? Onu usta tökür,

Zərgər qızılla örtür,

Gümüş zəncirlərlə bəzəyir.

²⁰Belə təqdimi gətirə bilməyən yoxsul adam

Çürüməyən bir ağac seçər,

Məharətli usta tapar ki,

Yerindən tərpənməyən büt düzəltsin.

²¹Məgər siz bilmirsiniz?

Məgər eşitməmisiniz?

Başlanğıcdan bəri bunu sizə bildirmədilərmi?

Dünyanın təməli qoyulduqdan bəri bunu dərk etmədinizmi?

²²Rəbb göy qübbəsinin üstündə oturur,

Yer üzündə yaşayanlar çəyirtkə kimidir.

Göyləri tül pərdə kimi açır,

Onları yaşamaq üçün çadır kimi qurur.

²³Rəbb padşahları heç edər,

Dünya hökmdarlarını heçə endirər.

²⁴Onlar yenicə basdırılan, yenicə əkilən,

Gövdələri yenicə kök salan ağaclara bənzəyər.

Üzərlərindən Rəbbin küləyi əsəndə quruyarlar,

Qasırğa onları saman çöpü kimi sovurar.

²⁵«Bəs Məni onda kimə bənzədərsiniz ki,

Mən ona oxşayım?»

Deyir Müqəddəs Olan.

²⁶ Başınızı göylərə qaldırıb baxın:

Bunları kim yaratdı?

Rəbb göy cisimlərini sıraya düzüb çıxarar,

Onların hamısını adları ilə çağırar.

Bol qüvvəsinə, böyük qüdrətinə görə

Onlardan heç biri əskik olmaz.

²⁷Ey Yaqub nəsli, ey İsrail!

Nə üçün «Rəbb başıma gələnləri bilmir,

Allahım mənim haqqıma diqqətsizlik edir?»

Deyib gileylənirsən?

²⁸Məgər sən bilmirsən?

Məgər eşitməmisən?

Rəbb əbədi Allahdır,

Odur bütün dünyanı yaradan.

Nə yorulur, nə taqətdən düşür,

Onun ağlı dərkedilməzdir.

²⁹O, yorğunlara güc verər,

Taqətsizlərin qüvvətini artırar.

³⁰Hətta cavanlar yorular, taqətdən düşər,

İgidlər əldən düşüb titrəyər.

³¹Rəbbə ümid bağlayanlarsa

Yeni qüvvət alar,

Qanad açıb qartal kimi yüksəklərə uçar,

Qaçanda taqətdən düşməzlər,

Yol gedib yorulmazlar.

Yeşaya 41

Allahın İsrailə verdiyi təminat

¹Rəbb deyir: «Susun qarşımda, ey uzaq diyarlar!

Qoy ümmətlər yeni güc alsın,

Qoy yaxınlaşıb danışsınlar,

Məhkəmə üçün birgə toplaşaq.

²Ədalətli adamı şərqdən kim ayağa qaldırdı?

Kim ona xidmət etməyi əmr etdi?

Millətləri onun ixtiyarına kim verdi?

Padşahları kim məğlub etdi?

O öz qılıncı ilə

Onları torpağın tozuna çevirir,

Yayı ilə göyə sovrulan samana döndərir.

³O onları təqib edir,

Ayaqlarını basmadığı yoldan sağ-salamat keçir.

⁴Bunları kim etdi, tamamladı?

Əzəldən bəri nəsilləri çağıran kimdir?

Mən Rəbb birinciyəm və axırda da Mən varam».

⁵Uzaq diyarlar bunu görüb qorxdu,

Dünyanın ucqar yerləri lərzəyə gəldi.

Onlar yaxınlaşıb gəldilər,

⁶Hər kəs qonşusuna kömək edir,

Qardaşına «Cəsur ol!» deyir.

⁷Usta zərgəri ürəkləndirir,

Hamarlayan zindana çəkiclə vuranı ruhlandırır,

«Lehim yaxşı oldu» deyir.

Büt yerindən laxlamasın deyə bütün mıxları bərkidirlər.

⁸Lakin sən ey qulum İsrail, Seçdiyim Yaqub nəsli,

Dostum İbrahimin övladları!

⁹Səni dünyanın ucqar yerlərindən topladım,

Ən uzaq yerlərdən səslədim:

«Sən qulumsan, səni seçdim, rədd etmədim» dedim.

¹⁰Qorxma, çünki Mən səninləyəm,

Dəhşətə gəlmə, çünki Allahın Mənəm.

Səni qüvvətləndirəcəyəm,

Sənə kömək edəcəyəm.

Sadiq sağ əlimlə Sənə dayaq olacağam.

¹¹Sənə qarşı hirslənənlər hamısı xəcalət çəkib biabır olacaq,

Sənə qarşı çıxanlar heçə çıxıb tələf olacaq.

¹²Səninlə düşmənçilik edənləri axtaracaqsan,

Amma tapa bilməyəcəksən,

Səninlə vuruşanlar heç olacaq,

¹³Çünki sənin sağ əlindən tutub

«Qorxma, sənə kömək edəcəyəm» deyən Allahın Rəbb Mənəm.

¹⁴«Ey torpaq qurdu olan Yaqub nəsli,

Ey İsrail əhli, qorxma!

Sənə kömək edəcəyəm» Rəbb bəyan edir.

Səni Satınalan İsrailin Müqəddəsidir.

¹⁵Budur, səni təzə, dişləri iti vəl edəcəyəm.

Sən dağları döyüb əzəcəksən,

Təpələri saman çöpü kimi sovuracaqsan.

¹⁶Sən onları sovurduqda külək aparacaq,

Qasırğa onları dağıdacaq,

Sənsə Rəbdə sevinəcəksən,

İsrailin Müqəddəsi ilə öyünəcəksən.

¹⁷Məzlumlar və fəqirlər

Su axtarıb tapmayanda

Dilləri susuzluqdan quruyur.

Mən Rəbb onlara cavab verəcəyəm.

Mən İsrailin Allahı onları tərk etməyəcəyəm.

¹⁸Çılpaq təpələrdən çaylar,

Vadilərdə su mənbələri açacağam.

Səhranı gölməçəyə, quraq torpağı bulaqlara çevirəcəyəm.

¹⁹Səhrada sidr, əbrişim, mərsin və zeytun əkəcəyəm.

Quru torpaqda şam, çinar və sərv ağacını bir sırada salacağam.

²⁰Beləcə insanlar görüb bilsin,

Birgə fikirləşib başa düşsün:

Bunu edən Rəbbin əlidir,

Bunu yaradan İsrailin Müqəddəsidir.

Rəbb bütlərə səcdə etməyin əleyhinədir

²¹Rəbb deyir: «İşinizi təqdim edin,

Sübutlarınızı göstərin»,

Bunu Yaqubun Padşahı söyləyir.

²²Bütlərinizi gətirin və qoy onlar sonra nə olacağını bizə bildirsin,

Olub-keçənləri bizə nəql etsin,

Biz dərindən düşünüb sonunu öyrənək.

Yaxud onlar gələcəyi bizə agah etsin.

²³Ey bütlər, bundan sonra baş verən hadisələrdən bizə danışın,

Qoy sizin allah olduğunuzu bilək!

Yaxşılıq ya pislik edin ki, hamımız qorxub vahiməyə düşək.

²⁴Amma siz heç nəsiniz, əməlləriniz də heçdir.

Sizə səcdə etməyi seçən iyrəncdir!

²⁵Şimaldan bir nəfəri hərəkətə gətirdim, o gəlir.

O, gündoğandan adımı çağıracaq.

Dulusçu gili tapdalayan kimi

O, hökmdarları palçıq kimi tapdalayacaq.

²⁶Kim bunu başlanğıcdan bəyan etdi ki, biz bilək,

Əvvəlcədən kim bildirdi ki,

Biz «O haqlıdır» deyə bilək?

Amma bunu bəyan edən yox idi,

Bildirən yox idi,

Sözlərinizi eşidən də yox idi.

²⁷İlk olaraq Siona «budur, budur onlar» deyirəm.

Yerusəlimə müjdəçini göndərəcəyəm.

²⁸Baxdım, aralarında öyüd-nəsihət verə bilən heç kim yox idi ki,

Onlardan soruşum, bir cavab alım.

²⁹Budur, hamısı puçdur,

Etdikləri işlər də heç bir şeydir,

İnsanların tökmə bütləri yalnız küləkdir, fanidir.

Yeşaya 42

Rəbbin qulu

¹Budur, Mənim saxladığım, seçdiyim qulum! Könlüm ondan razıdır!

Mən Öz Ruhumu onun üzərinə qoymuşam.

O, millətlərə ədalət gətirəcək.

²Çığırmayacaq, səsini qaldırmayacaq,

Küçələrdə heç kim onun səsini eşitməyəcək.

³Əzilmiş qamışı qırmayacaq,

Tüstülənən piltəni söndürməyəcək.

O, ədaləti sədaqətlə yayacaq.

⁴O, yer üzündə ədaləti quranadək

Ümidini, cəsarətini itirməyəcək,

Uzaq diyarlar onun qanununa etibar edəcək.

⁵Göyləri yaradıb onları sərən, Yeri və onun üzərindəkiləri düzəldən,

Dünyadakı adamlara nəfəs verən,

Yer üzündə gəzən insanlara ruh verən

Rəbb Allah belə deyir:

⁶«Mən Rəbb salehliyimlə səni çağırdım, Səni əlindən tutacağam,

Səni qoruyacağam,

Səni xalqım üçün əhd edəcəyəm,

Millətlərə nur edəcəyəm ki,

⁷Korların gözlərini açasan,

Zindandan dustaqları,

Zülmətdə, həbsxanada oturanları azad edəsən.

⁸Mən Rəbbəm, adım budur.

Öz izzətimi heç kimə vermərəm,

Həmdlərimi bütlərə bəxş etmərəm.

⁹Budur, əvvəlki işlər həyata keçdi,

İndi Mən təzə işləri bəyan edirəm,

Onlar yetişməmişdən əvvəl

Sizi xəbərdar edirəm».

Şükür ilahisi

¹⁰Ey dəniz səyyahları, dənizdəki canlılar,

Uzaq diyarlar və orada yaşayanlar,

Rəbbə yeni ilahi oxuyun!

Dünyanın ən ucqar yerlərindən

Ona həmdlər gətirin!

¹¹Qoy səhra və oradakı şəhərlər,

Qedar xalqı yaşayan kəndlər səsini ucaltsın,

Sela sakinləri tərənnüm nəğməsi söyləsin,

Dağların zirvəsindən qışqırsın.

¹²Hamı Rəbbi izzətləndirsin,

Uzaq diyarlar da Ona həmd etsin.

¹³Rəbb cəsur igid kimi çıxacaq,

Cəngavər kimi qeyrətə gələcək,

Çığırıb döyüş nərəsi çəkəcək,

Düşmənlərinə Öz qüdrətini göstərəcək.

Rəbb Öz xalqına kömək etməyi vəd verir

¹⁴Rəbb deyir:

«Xeyli vaxtdır ki, dinmirəm,

Susuram, səbir edirəm,

İndi isə doğuş ağrısı çəkən qadın kimi

Qışqıracağam, təngnəfəs olub zarıyacağam.

¹⁵Dağları, təpələri dağıdacağam,

Bütün yaşıllıqlarını qurudacağam,

Çayları adalara çevirəcəyəm, hovuzları qurudacağam.

¹⁶Korları tanımadıqları yolla aparacağam,

Onlara bilmədikləri yollarda rəhbər olacağam.

Qaranlığı qarşılarında işığa,

Kələ-kötür yolları düzənliyə çevirəcəyəm.

Bu şeyləri onlar üçün edəcəyəm,

Onları tərk etməyəcəyəm.

¹⁷Oyma bütlərə güvənənlər,

Tökmə bütlərə “Sizsiniz allahlarımız” deyənlər

Geri qaytarılıb utandırılacaq.

Kor və kar İsrail

¹⁸Ey karlar, eşidin!

Ey korlar, baxın, görün!

¹⁹Qulum qədər kor olan varmı?

Göndərdiyim qasid qədər kar olan varmı?

Özünü Mənə həsr edən, Rəbbin qulu qədər kor olan varmı?

²⁰Siz çox şey gördünüz, amma nəzərə almadınız,

Qulaqlarınız açıq idi, amma eşitmədiniz!»

²¹Rəbb Öz salehliyi naminə

Qanununu ucaldıb izzətləndirməkdən xoşlandı.

²²Lakin bu qarət olunmuş, soyulmuş xalqdır.

Hamısı qazamatlarda buxovlanıb zindanlarda saxlanılmışdır.

Onlar ovlanıb və qurtaranları yoxdur.

Onları qarət edirlər, «geri qaytarın» deyən yoxdur.

²³Sizdən kim buna qulaq asacaq,

Gələcəkdə kim diqqətlə dinləyəcək?

²⁴Yaqub nəslini, İsraili soyğunçular əlinə

Kim qarət edilmək üçün təslim etdi?

Məgər qarşısında günah işlətdiyimiz Rəbb deyilmi?

Onlar Onun yolları ilə getmək istəmədi,

Qanununa qulaq asmadı.

²⁵Buna görə alovlu qəzəbini, döyüşün şiddətini üstlərinə yağdırdı.

Od onları dövrəyə aldı,

Amma onlar anlamadılar,

Onları yandırdı,

Amma ona ciddi fikir vermədilər.

Yeşaya 43

İsrailin yeganə qurtarıcısı Rəbdir

¹İndi isə, ey Yaqub, ey İsrail, səni yaradan,

Sənə həyat verən Rəbb belə deyir:

«Qorxma, çünki Mən səni satın aldım,

Səni adınla çağırdım, sən Mənimsən.

²Dərin sulardan keçsən belə,

Mən səninlə olacağam,

Çaylardan keçəndə batmayacaqsan,

Odun içindən qaçsan belə, yanmayacaqsan,

Alov səni məhv etməyəcək.

³Çünki Mən sənin Allahın Rəbbəm,

İsrailin Müqəddəsiyəm,

Sənin Xilaskarınam.

Misiri sənin üçün fidyə,

Kuş və Seva ölkələrini

Sənin azadlığının əvəzinə verdim.

⁴Sən nəzərimdə qiymətli, çox əziz olduğuna görə

Səni sevdiyim üçün,

Sənin əvəzinə adamları, həyatın üçün ümmətləri verəcəyəm.

⁵Qorxma, Mən səninləyəm,

Nəslindən olanları şərqdən gətirəcəyəm,

Səni qərbdən toplayacağam.

⁶Şimala “ver” deyəcəyəm,

Cənuba “saxlama” söyləyəcəyəm.

Oğullarımı uzaqlardan,

Qızlarımı dünyanın ucqar yerlərindən gətir.

⁷Mənim adımla çağırılan hər insanı,

İzzətim üçün yaratdığım,

Bəli, həyat verdiyim,

Yaratdığım hər bir adamı gətir».

⁸Gözləri olan kor,

Qulaqları olan kar xalqı gətir.

⁹Bütün millətlər bir yerə yığılsın,

Ümmətlər toplansın.

Bunlardan kim bu sözü bəyan edər?

Olub-keçənləri bizə bildirər?

Qoy onların şahidləri irəli gəlib bəraət qazansın,

Dinləyib desin: «Bu düzdür».

¹⁰Rəbb bəyan edir: «Sizsiniz Mənim şahidlərim, seçdiyim qullarım,

Belə ki Məni tanıyıb, Mənə arxalanasınız,

Mənim O olduğumu anlayasınız.

Məndən əvvəl Allah mövcud olmayıb,

Məndən sonra da olmayacaq.

¹¹Mənəm Rəbb, yalnız Mənəm,

Məndən başqa qurtarıcı yoxdur.

¹²Mən dedim və Mən qurtardım,

Mən bəyan etdim,

Aranızda başqa allahlar yox idi.

Sizsiniz şahidlərim».

Rəbb bəyan edir, «Allah Mənəm.

¹³Əzəldən bəri Mən Oyam,

Mənim əlimdən qurtaran yoxdur.

Mən bir şey edəndə buna kim mane ola bilər?»

Babildən qurtuluş

¹⁴Sizi Satınalan, İsrailin Müqəddəsi,

Rəbb belə deyir:

«Sizin xatirinizə Babilə ordu göndərəcəyəm.

Onların hamısını qaçqın edəcəyəm,

Xaldeylilər də öyündükləri gəmilərlə qaçacaq.

¹⁵Mən Rəbbəm, sizin Müqəddəsinizəm,

İsraili yaradanam, Padşahınızam».

¹⁶Dənizdə və azğın sularda yol, riz açan,

¹⁷Atlarla döyüş arabalarını,

İgid cəngavərləri ilə ordunu birgə yola çıxaran Rəbb belə deyir:

«Onlar yıxılıb, qalxa bilməyəcək,

Basdırılıb piltə kimi söndürüldü.

¹⁸Əvvəlki şeyləri yada salmayın,

Köhnə hadisələr barəsində düşünməyin.

¹⁹Budur, Mən təzə bir şey edirəm,

O artıq baş verir,

Məgər siz bunu başa düşmürsünüz?

Bəli, Mən çöllükdə yol salacağam,

Quru torpaqda çaylar yaradacağam.

²⁰Mənim seçdiyim xalqıma su içirtmək üçün Çöllükdə su verdiyimə görə,

Quru torpaqda çaylar yaratdığıma görə,

Vəhşi heyvanlar, çaqqallar və dəvəquşuları Məni ucaldacaq.

²¹Bu xalqı Mən Özüm üçün yaratdım ki,

Mənə həmdlər söyləsin.

İsrailin günahı

²²Lakin sən, ey Yaqub nəsli,

Mənim adımı çağırmadın,

Ey İsrail, Məndən bezdin.

²³Yandırma qurbanı üçün Mənə quzular gətirmədin,

Qurbanlarınla Mənə ehtiram etmədin.

Sənə təqdimlərə görə əziyyət vermədim,

Kündür təqdimləri ilə bezdirmədim.

²⁴Mənim üçün pulla ətirli qamış almadın,

Qurbanların piyi ilə Məni doydurmadın.

Əksinə, sən günahlarını Mənə yüklədin,

Təqsirlərinlə Məni yordun.

²⁵Mənəm Öz xatirimə görə sənin üsyankarlığını silən,

Bəli, Mən günahlarını da yada salmaram.

²⁶Yadıma sal, gəl mühakiməyə gedək,

Bəraət qazanmaq üçün məhkəmədə işindən danış.

²⁷İlk əcdadların günaha batdı,

Rəhbərlərin Mənə qarşı üsyankar oldu.

²⁸Buna görə də Mən

İbadətgahın rəhbərlərini murdarlığa vadar etdim.

Yaqub nəslini qırğına, İsraili isə rəzalətə məhkum etdim.

Yeşaya 44

Rəbb yeganə Allahdır

¹İndi isə, ey qulum Yaqub nəsli,

Seçdiyim İsrail, qulaq as!

²Səni yaradan, ana bətnində quruluş verən,

İmdadına çatan Rəbb belə deyir:

“Qorxma, ey qulum Yaqub nəsli,

Ey seçdiyim Yeşurun!

³Susamış torpağı sulayacağam,

Quru torpağa sellər axıdacağam,

Övladlarına Ruhumu ehsan edəcəyəm,

Nəslinə xeyir-duamı verəcəyəm.

⁴Onlar otlar arasında,

Axar sular kənarında,

Söyüd ağacları kimi boy atacaq.

⁵Biri ‹Mən Rəbbinəm› deyəcək,

O birisi Yaqubun adı ilə çağırılacaq.

Digəri də əlinə ‹Rəbbin quluyam› deyə yazacaq,

İsrail adını üzərinə götürəcək”».

⁶Rəbb, İsrailin Padşahı, Satınalanı, Ordular Rəbbi belə deyir:

«Mən birinciyəm, Mən sonuncuyam,

Məndən başqa Allah yoxdur.

⁷Mənə bənzəyən varmı? Xəbər versin.

Qədim xalqımı yaratdığımdan bəri olub-keçənləri,

Bundan sonra olduqlarını danışıb nəql etsin,

Bəli, gələcək hadisələri bildirin!

⁸Qorxmayın, dəhşətə gəlməyin,

Mən sizə əzəldən bəri bunu söyləyib danışmadımmı?

Siz Mənim şahidlərimsiniz!

Məndən başqa Allah varmı?

Başqa Qaya yoxdur.

O birilərini tanımıram».

Bütlərə səcdə edənlər xəcalət çəkəcək

⁹Bütləri düzəldən adamlar puçdur,

Zövq aldıqları əşyalardan heç bir xeyir yoxdur.

Bütlərə qulluq edənlər heç bir şey görmür,

Heç bir şey bilmir,

Onlar axırda xəcalət içində olacaq.

¹⁰Kim istəyər fayda verməyən allah düzəltsin,

Tökmə büt yaratsın?

¹¹Budur, bunları düzəldənlərin hamısı xəcalət içində olacaq.

Ustalar isə özləri də insandır,

Qoy onların hamısı toplaşıb məhkəmədə dursun,

Dəhşətə düşüb birlikdə xəcalət çəksin.

¹²Dəmirçi alətini götürüb,

Kömürün odunda işləyir,

Çəkiclə dəmirə ölçü verir,

Güclü əli ilə üstündə çalışır.

Onda ac qalır, taqətdən düşür,

Susuz qalıb üzülür.

¹³Dülgər iplə ölçür,

Ağacı tabaşirlə nişanlayır,

Rəndələyir, istənilən şəklə salır,

Pərgarla dairə çəkir,

İnsan surəti verir,

İnsan gözəlliyinə bənzər düzəldərək

Evinə qoymaq üçün bir büt yaradır.

¹⁴İnsan özü üçün sidr ağacları kəsir,

Şam ağacını, palıd ağacını seçir.

Meşədə özü üçün bir ağac götürür,

Küknar ağacı əkir və yağış onu böyüdür.

¹⁵Sonra ağac oduna işlənir.

İnsan gətirdiyi odunla həm isinir,

Həm sobanı yandırır, çörək bişirir.

Həm də özünə bir allah düzəldir,

Düzəltdiyi bütün qarşısında səcdə edir,

Yerə sərilir.

¹⁶Odunun bir hissəsini yandırır,

Alovunda ət qızardır,

Qarnını doyuraraq, isinib deyir:

«Ah, isindim, odun istisini hiss etdim!»

¹⁷Ağacın qalığından özünə allah,

Bir oyma büt düzəldib

Qarşısında yerə sərilir, səcdə edir.

Bu bütə dua edib yalvarır:

«Məni xilas et, çünki sənsən mənim allahım!»

¹⁸Onlar bilmir, dərk etmir,

Çünki gözləri də, zehinləri də elə bağlıdır ki,

Görməzlər, anlamazlar.

¹⁹Buna fikir vermirlər, bilmirlər,

Dərk etmirlər ki, belə desinlər:

«Odunun bir hissəsini yandırdım,

Közündə də çörək bişirdim, ət qızartdım, yedim.

Qalığından bir murdar şey düzəldimmi?

Bir parça taxtanın qarşısında yerə sərilimmi?

²⁰Bu, kül yemək kimi boş işdir,

Aldanmış ürəkləri onları yoldan azdırır,

Canlarını qurtara bilmir və sağ əlimdəki əşya aldadıcı deyilmi?»

Rəbb Yaradan və Xilaskardır

²¹«Ey Yaqub nəsli,

Dediyim sözləri xatırla,

Çünki sən qulumsan, ey İsrail,

Mən səni yaratdım, sən Mənim qulumsan,

Səni unutmaram, ey İsrail!

²²Üsyankarlığını bulud kimi dağıtdım,

Günahlarını duman kimi sildim,

Mənə tərəf dön,

Çünki Mən səni satın aldım».

²³Tərənnüm edin, ey göylər,

Çünki bunu edən Rəbdir.

Çığırın, ey torpağın dərinlikləri,

Ey dağlar, ey meşə, ey meşədəki bütün ağaclar,

Sevincdən haray çəkin,

Çünki Rəbb Yaqub nəslini satın aldı,

İsraildə izzətini aşkar etdi.

²⁴Səni Satınalan, Ana bətnində quruluş verən Rəbb deyir:

«Bütün şeyləri yaradan, göyləri təkcə yayan,

Təkbaşına yer üzünü sərən,

²⁵Yalançı peyğəmbərlərin möcüzələrini boşa çıxaran,

Falçıları ifşa edən,

Müdrikləri geri qaytaran,

Onların biliyini heçə çevirən,

²⁶Qulunun sözlərini icra edən,

Elçilərinin sözlərini gerçək edən,

Yerusəlim üçün “burada sakinləri təzədən məskunlaşacaq”,

Yəhuda şəhərlərinə “bunlar yenidən qurulacaq,

Xarabalıqları yenidən bərpa edəcəyəm” deyən Rəbb Mənəm.

²⁷Dərin sulara “Quru! Mən çaylarını qurudacağam” söyləyən,

²⁸Kir haqqında “o, çobanımdır,

Xoşuma gələnlərin hamısını həyata keçirəcək”,

Yerusəlim haqqında “yenidən qurulacaq”,

Məbəd haqqında “təməlin qoyulacaq” deyən Rəbb Mənəm».

Yeşaya 45

Rəbb Fars padşahı Kiri seçir

¹Rəbb məsh etdiyi adama –

Sağ əlindən tutduğu Kirə belə deyir.

Onun önündə millətləri baş əydirəcəyəm,

Padşahları qüdrətindən məhrum edəcəyəm,

Önündə qapıları açacağam,

Darvazalar onun qarşısında bir daha bağlanmayacaq.

Rəbb deyir:

²«Mən qarşında gedib dağları düzəngaha çevirəcəyəm,

Tunc qapıları qırıb

Dəmir qıfılları sındıracağam.

³Qaranlıqda gizlənmiş sərvətlərini,

Gizli yerlərdə saxlanılan xəzinələri sənə verəcəyəm ki, biləsən:

Səni adınla çağıran Rəbb Mənəm, İsrailin Allahıyam Mən.

⁴Qulum Yaqub nəsli, seçdiyim İsrail naminə

Səni adınla çağırıb hörmət göstərdim,

Halbuki sən Məni tanımırdın.

⁵Rəbb Mənəm, başqası yoxdur,

Məndən başqa Allah yoxdur.

Səni Mən gücləndirəcəyəm,

Halbuki Məni tanımırdın.

⁶Beləliklə, gündoğandan günbatana qədər qoy bilsinlər ki,

Məndən savayı heç kim yoxdur,

Rəbb Mənəm, başqası yoxdur.

⁷Nuru, qaranlığı, sülhü, fəlakəti yaradan Mənəm,

Bütün bunları edən Rəbb Mənəm.

⁸Ey göylər, yuxarıdan damlayın,

Qoy buludlar salehlik yağdırsın,

Torpaq açılsın, xilas bəhrəsini yetişdirsin,

Onunla birlikdə salehlik bitsin.

Bunları yaradan Rəbb Mənəm».

Hər şeyi yaradan Allahdır

⁹Yaradanı ilə çəkişənin vay halına! Çəkişən özü də saxsı qablar arasında yalnız saxsı parçasıdır.

Gil öz dulusçusuna «Nə düzəldirsən?»

Yaxud «yaratdığın şeyin dəstəkləri yoxdur» deyə bilərmi?

¹⁰Atasına «Dünyaya məni nə üçün gətirdin?»

Anasına «Məni nə üçün doğdun?» deyənin vay halına!

¹¹İsrailin Müqəddəsi,

Onu yaradan Rəbb belə deyir:

«Övladlarımın gələcəyi haqqında

Mənə sual verə bilərsinizmi?

Gördüklərim işlər barəsində

Mənə əmr edə bilərsinizmi?

¹²Dünyanı da, yer üzündə yaşayan adamı da Mən yaratdım.

Mənim əllərim göyləri yaydı,

Əmrimlə səma cisimləri quruldu.

¹³Mən Kiri ədalətlə hərəkət etməyə vadar etdim.

Yollarını dürüst edəcəyəm.

O, şəhərimi tikəcək,

Sürgün olunmuş adamlarımı

Fidyəsiz, bəxşişsiz azad edəcək».

Bunu Ordular Rəbbi deyir.

¹⁴Rəbb belə deyir:

«Misirlilərin var-dövləti, Kuşun ticarət gəliri,

Ucaboylu Sevalılar yanınıza gəlib qulunuz olacaq.

Onlar buxovlanacaq və ardınızca gedəcək,

Qarşınızda yerə sərilib yalvaracaq:

“Allah yalnız sizinlədir və başqa birisi yoxdur.

Bundan savayı Allah yoxdur”».

¹⁵Həqiqətən, Sən Özünü gizlədən Allahsan,

Ey İsrailin Allahı, ey Qurtarıcı!

¹⁶Büt düzəldənlərin hamısı utandırılacaq,

Rüsvay olacaq, xəcalət çəkib uzaqlaşacaq.

¹⁷Amma İsrailə qurtuluşu Rəbb verəcək.

Bu qurtuluş əbədi sürəcək.

Əsrlər boyu İsrail utanmayacaq, rüsvay olmayacaq.

¹⁸Göyləri yaradan Rəbb bircə olan Allahdır!

O, dünyanı yaratdı, ona quruluş verdi,

Rəbb dünyanı qarmaqarışıq yaratmadı,

Onu yaşamaq üçün qurdu.

O deyir: «Mən Rəbbəm, başqası yoxdur!

¹⁹Mən gizlində, qaranlıq dünyasında danışmadım,

Yaqub nəslinə “Məni qarmaqarışıq yerdə axtarın” demədim.

Doğrusunu söyləyən, ədaləti bəyan edən Rəbb Mənəm.

Allah və Babilin bütləri

²⁰Yığışın, gəlin, bir yerə toplaşın, ey millətlərdən sağ qalan kəslər!

Taxta bütləri gəzdirənlər,

Xilas verməyən allahlara dua edənlər heç nə bilmir.

²¹Danışın, işinizi təqdim edin,

Qoy hamı birlikdə məsləhətləşib söyləsin:

“Bunu qədimdə kim bəyan etdi,

Keçmişdə kim bildirdi?”

Bunu Mən Rəbb, demədimmi?

Məndən başqa Allah,

Ədalətli Allah və Qurtarıcı yoxdur.

Məndən başqası yoxdur.

²²Ey yer üzünün qurtaracağınadək hər yerdə yaşayanlar,

Mənə tərəf dönün və xilas olun!

Çünki Mən Allaham və başqası yoxdur!

²³Varlığıma and içdim, Ağzımdan çıxan kəlmə doğrudur, boşa çıxmaz.

Hər diz önümdə çökəcək,

Hər dil Mənə and içəcək.

²⁴Mənim üçün belə deyəcəklər:

“Salehlik və qüvvət yalnız Rəbdədir.

Ona qarşı qəzəblənənlər hüzuruna gəlib utanacaqlar.

²⁵Bütün İsrail nəsli Rəbdə haqq qazanacaq və izzətlənəcək”».

Yeşaya 46

¹«Bel allahı diz çökdü,

Nevo allahı əyildi,

Babilin bütləri heyvanlara, öküzlərə yükləndi,

Daşınan əşyalar heyvanlara ağır yük oldu.

²Onlar birgə əyildilər, diz çökdülər,

Yük oldular, bundan qurtula bilməyib əsirliyə aparıldılar.

³Qulaq asın Mənə, ey Yaqub nəsli,

Ey bütün İsrail nəslinin sağ qalanları!

Anadan olandan sizi aparıram,

Bətndən çıxandan sizi daşıyıram.

⁴Siz qocalanacan Mən Oyam,

Saçlarınıza dən düşənəcən

Mən sizi aparacağam,

Sizi Mən yaratdım, Mən daşıyacağam.

Bəli, Mən sizi aparacağam və xilas edəcəyəm.

⁵Məni kimə bənzədəcəksiniz, kimə oxşadacaqsınız,

Kiminlə müqayisə edəcəksiniz ki, biz oxşar olaq?

⁶Kimsə pul kisəsindən qızıl çıxarır,

Tərəzidə gümüş çəkir,

Bu puldan zərgərə büt düzəltdirir,

Sonra önündə yerə sərilib səcdə edir!

⁷Onu çiyinlərinə yükləyib daşıyırlar, yerinə qoyurlar.

Beləcə büt durur, yerindən tərpənmir.

Ona yalvarırlar, o cavab vermir,

Heç bir bəladan qurtarmır.

⁸Ey üsyankar insanlar, bunu xatırlayın,

Mərd olun, yadınızdan çıxarmayın!

⁹Qədimdən bəri olan hadisələri xatırlayın,

Çünki Allah Mənəm, başqası yoxdur,

Mənəm Allah, Mənə bənzəri yoxdur!

¹⁰Axırı əvvəldən,

Baş verməmiş hadisələri əzəldən bildirən,

“Niyyətim baş tutacaq,

İstədiyim hər şeyi edəcəyəm” deyən Mənəm.

¹¹Şərqdən bir yırtıcı quşu,

Uzaq diyardan niyyətimi yerinə yetirən adamı çağıran Mənəm.

Mən bunları dedim,

Mütləq yerinə yetirəcəyəm,

Mən niyyət etmişəm, bunu icra edəcəyəm.

¹²Ey salehlikdən uzaq olan dikbaş insanlar!

Məni dinləyin!

¹³Salehliyiniz yaxındır, uzaq deyil,

Qurtuluşum ləngiməyəcək.

Siona xilası, İsrailə izzətimi bəxş edəcəyəm.

Yeşaya 47

Babilin düşkünlüyü

¹Ey bakirə Babil qızı, Düş aşağı, torpaqda otur.

Ey Xaldey qızı,

Artıq taxt yoxdur, yerdə otur.

Bundan sonra sənə

“Zərif, nazlı” deməyəcəklər.

²Bir cüt dəyirman daşı götür, unu üyüt.

Örpəyini aç, balağını qaldır,

Baldırların açıb çaylardan keç.

³Çılpaqlığın açılacaq, ayıb yerin görünəcək.

Mən intiqam alacağam,

Heç kimi əsirgəməyəcəyəm».

⁴Bizi Satınalan İsrailin Müqəddəsidir,

Onun adı Ordular Rəbbidir.

⁵Rəbb deyir: «Ey Xaldey qızı,

Qaranlığa çəkil, sakitcə otur!

Çünki bundan sonra səni daha

Padşahlıqların mələkəsi çağırmayacaqlar!

⁶Öz xalqıma qəzəbləndim,

İrsimi kiçildib sənə verdim.

Lakin sən onların halına acımadın,

Hətta yaşlılara da ağır boyunduruq yüklədin.

⁷ “Həmişə əbədi mələkə olacağam” deyə düşünürdün. Bunları ürəyinə gətirmirdin, sonu düşünmürdün.

⁸İndi isə qulaq as, ey əmin-amanlıqda yaşayan zövq düşkünü!

Sən ürəyində deyirdin: “Mən mənəm,

Məndən başqası yoxdur.

Heç vaxt dul qalmayacağam,

Övlad itirmək dərdini bilməyəcəyəm”.

⁹Bu iki bəla bir gündə,

Qəflətən başına gələcək.

Böyük cadugərliyinə, hədsiz ovsunçuluq etdiyinə baxmayaraq,

Həm övladlarını itirəcək, həm də dul qalacaqsan.

¹⁰Pisliyinə güvəndin,

Dedin: “Məni heç kim görmür”.

Sənin hikmətin və biliyin səni azdırdı.

Düşündün: “Mən mənəm,

Məndən başqası yoxdur”.

¹¹Lakin üzərinə bəla gələcək,

Sən onun qarşısını ala bilməyəcəksən,

Sən xərac versən də, bu fəlakət üstünə gələcək,

Bilmədiyin bəla qəflətən üzərinə düşəcək.

¹²Gənc yaşlarından bəri

Məşğul olduğun ovsunçuluğuna və böyük cadugərliyinə davam et.

Bəlkə onlardan bir xeyir görərsən,

Bəlkə düşmənlərini onlarla vahiməyə sala bilərsən!

¹³Aldığın çoxlu məsləhətlər səni üzdü.

Qoy ulduz falına baxanlar, münəccimlər,

Yeni ay çıxanda olacaq hadisələri bildirənlər

İndi gəlib səni

Başına gələn bəlalardan xilas etsinlər.

¹⁴Bax, onlar küləş kimidir,

Od onları yandırıb-yaxar.

Özlərini alovun gücündən xilas edə bilməyəcəklər.

Bu alov isinmək üçün kömürlü od deyil,

Qabağında oturulacaq od deyil.

¹⁵Sənin işlədiyin, cavanlığından bəri alver etdiyin adamların

Aqibəti belə olacaq.

Hər kəs öz yolu ilə gedəcək, səni xilas edən olmayacaq.

Yeşaya 48

İsrailin inadkarlığı

¹Ey Yaqub nəsli,

İsrail adı ilə çağırılan,

Yəhudanın belindən gələn,

Rəbbin adı ilə and içən,

İsrail Allahının adını etiraf edən,

Fəqət buna həqiqətlə və salehliklə əməl etməyən nəsil,

Buna qulaq as!

²Müqəddəs şəhərdən olduğunuza görə,

İsrail Allahına bel bağladığınıza görə fəxr edirsiniz.

Onun adı Ordular Rəbbidir.

³Olub-keçənləri əvvəldən Mən bəyan etdim.

Bu sözlər ağzımdan çıxdı və onları Mən bildirdim.

Sonra qəflətən bunları həyata keçirdim və onlar yerinə yetdi.

⁴Bilirdim inadkar olduğunuzu,

Dəmir boyunlusunuz, tunc alınlısınız.

⁵Bunları sizə qədimdən bəri bildirdim,

Baş verməmişdən əvvəl sizə xəbər verdim ki,

Siz “bunu bütüm etdi, oyma və tökmə bütlər

Bunları əmr etdilər” deməyəsiniz.

⁶Bunu eşitdiniz, indi isə hamısına nəzər salın.

Bəs bunu qəbul etməyəcəksiniz?

İndi isə Mən sizə yeni şeyləri,

Bilmədiyiniz gizli şeyləri bildirəcəyəm.

⁷Bunlar indi yaradılır, keçmişdə yox.

Siz bunu bu günə qədər bilmədiniz,

Ona görə “bunu bilirdik” deyə bilməzsiniz.

⁸Siz bu barədə nə eşitmisiniz,

Nə də xəbəriniz olub,

Keçmişdən bəri qulaqlarınız bağlıdır.

Nə qədər xain olduğunuzu bilirəm,

Ana bətnindən belə, sizin üsyankar çağırılacağınızdan xəbərdaram.

⁹Adım naminə qəzəbimi saxlayırdım,

Şöhrətim naminə qeyzimin qabağını alırdım ki, sizi məhv etməyim.

¹⁰Budur, Mən sizi gümüş kimi olmasa da, təmizlədim,

Sizi iztirab ocağında çəkdim.

¹¹Öz xatirimə, Öz xatirimə bunu edirəm.

Axı niyə Mənim adım küfrlə çəkilsin?

Mən Öz izzətimi heç kimə vermərəm.

Rəbb İsraili satın alır

¹²Qulaq as Mənə, ey Yaqub nəsli, çağırdığım İsrail! Mən Oyam, Mən birinciyəm, Mən sonuncuyam.

¹³Mənim əlim yerin təməlini qoydu,

Sağ əlim göyləri sərdi.

Mən onları çağıranda onlar birlikdə düzülür.

¹⁴Hamınız toplaşın, dinləyin!

Bütlərdən hansıdır bu şeyləri bəyan edən?

Rəbbin sevdiyi adam Babildə Onun məqsədini yerinə yetirəcək,

Onun əli Xaldeylilərə qarşı qalxacaq.

¹⁵Mən, bəli Mən dedim,

Onu Mən çağırdım,

Onu gətirdim,

O öz yolunda uğurlu olacaq.

¹⁶Mənə yaxın gəlin, bunu dinləyin!

Başlanğıcdan bəri Mən açıq danışdım,

O vaxtdan indiyədək oradayam.

Xudavənd Rəbb indi Məni və Ruhunu göndərdi».

¹⁷Səni Satınalan, Rəbb, İsrailin Müqəddəsi belə deyir:

«Allahın Rəbb Mənəm,

Mən sənin xeyrinə səni öyrədirəm,

Getdiyin lazım olan yolla səni aparıram.

¹⁸Ah, kaş ki sən Mənim əmrlərimə diqqət yetirəydin!

Onda əmin-amanlığın heç vaxt qurumayan çay kimi axardı,

Salehliyin dəniz dalğaları kimi olardı.

¹⁹Nəslin dəniz qumu kimi,

Övladların qum dənələri kimi olardı.

Adları qarşımda nə pozulardı, nə də silinərdi».

²⁰Babildən çıxın, Xaldeylilərin torpağından qaçın, Sevinc səsi ilə bəyan edin, bunu bildirin,

Dünyanın ən uzaq yerlərinə bu xəbəri çatdırın,

Deyin: «Rəbb qulu Yaqub nəslini satın aldı».

²¹Səhradan keçərkən susuzluq çəkmədilər.

Rəbb onlar üçün qayadan su axıtdı,

Qayanı yardı və oradan su fışqırdı.

²²«Pislərə isə sülh yoxdur» Rəbb deyir.

Yeşaya 49

Rəbbin qulu çağırışını izah edir

¹Ey uzaq diyarlar, Məni dinləyin! Ey uzaqda yaşayan ümmətlər, yaxşı qulaq asın!

Rəbb məni anadan olandan bəri çağırmışdı,

Ana bətnindən adımı yadına saldı.

²Ağzımı iti qılınc kimi etdi, O məni əlinin kölgəsində gizlətdi.

O məni iti ox edib

Öz oxdanında saxladı.

³Mənə dedi: «Qulumsan, ey İsrail,

Mən səninlə izzətlənəcəyəm».

⁴Amma mən dedim:

«Mən boş yerə çalışdım,

Gücümü hədər yerə tükətdim.

Rəbb mənə yenə haqq qazandırır,

Mükafatım Allahımdadır».

⁵Rəbb məni qulu etmək üçün

Ana bətnində mənə quruluş verdi ki,

Yaqub nəslini Ona tərəf döndərim,

İsraili Onun önünə toplayım.

Onun gözündə hörmət qazandım,

Qüdrətim Allahım oldu.

Rəbb indi belə deyir.

⁶O deyir: «Yaqub qəbilələrinin bərpası,

İsrailin sağ qalanlarının geri qayıtması üçün

Qulum olmağın kifayət deyil.

Səni millətlərə nur edəcəyəm ki,

Xilasım dünyanın ən uzaq yerlərinə yayılsın».

Allah Öz qulunu ruhlandırır

⁷Adamların nifrət etdiyi,

Millətin həqarətlə baxdığı,

Hökmdarların qulu olan şəxsə,

İsrailin Satınalanı, Müqəddəsi,

Rəbb belə deyir:

«İsrailin Müqəddəsi,

Sadiq Rəbb səni seçdiyinə görə

Padşahlar səni görüb ayağa qalxacaq,

Əmirlər qarşında yerə səriləcək».

⁸Rəbb belə deyir: «Münasib vaxtda sənə cavab verdim,

Xilas günü sənə kömək etdim.

Səni hifz edəcəyəm.

Səni xalqım üçün əhd edəcəyəm ki,

Dağılmış ölkəni bərpa edəsən,

İrs olaraq yenə sahiblərinə verəsən.

⁹Dustaqlara “çıxın”,

Zülmətdə oturanlara

“Özünüzü göstərin!” deyəsən.

Onlar yol boyunca quzu kimi bəslənəcək,

Hər çılpaq təpədə otlaq tapacaq.

¹⁰Onlar nə ac, nə də susuz qalacaq, Qızmar isti və günəş onları vurmayacaq.

Çünki onlara mərhəmət edən yol göstərəcək,

Onları bulaqlara doğru yönəldəcək.

¹¹Mən bütün dağlarımı yola döndərəcəyəm,

Yollarımı hamar edəcəyəm.

¹²Budur, xalqım uzaq yerlərdən,

Kimisi şimaldan, kimisi qərbdən,

Kimisi isə Sinim

ölkəsindən gələcək». ¹³Tərənnüm edin, ey göylər,

Ey yer üzü, fərəhlən!

Ey dağlar, sevinc nidalarına qoşulun!

Çünki Rəbb xalqına təsəlli verəcək,

İztirab çəkənlərinə rəhm edəcək.

Sionun bərpası

¹⁴Amma Sion dedi: «Rəbb məni tərk etdi,

Xudavəndim məni unutdu».

¹⁵Rəbb isə deyir: «Ana südəmər körpəsini heç unudarmı?

Bətnindən çıxan oğluna rəhm etməzmi?

Ana öz körpəsini unutsa belə,

Mən səni əsla unutmaram.

¹⁶Mən sənin adını ovuclarımda həkk etmişəm,

Ey Sion, divarların daima önümdədir.

¹⁷Oğulların tələsib yanına gələcək,

Səni qarət edənlər, soyğunçular çıxıb-gedəcək.

¹⁸Qaldır başını, bax ətrafına:

Hamı yığılıb yanına gəlir.

Mən Rəbb Varlığıma and içib bəyan edirəm ki,

Onların hamısı sənin üçün bər-bəzək olacaq,

Gəlin kimi onları taxıb fəxr edəcəksən!

Allah İsrail xalqını bərpa edib artıracaq

¹⁹Xarabalığa, viranəliyə dönmüşdün,

Ölkən yerlə yeksan olmuşdu.

Amma indi bu torpaq sakinlərin üçün dar olacaq,

Səni xaraba qoyanlar səndən uzaqda duracaq.

²⁰Sənin sürgündə doğulmuş övladların

Səsini ucaldıb belə deyəcək:

“Bu yer bizim üçün dar gəlir,

Yaşamaq üçün bizə yer ver”.

²¹Sən qəlbində deyəcəksən:

“Axı bunları mənim üçün kim doğdu?

Övladlarım itkin düşmüşdü, sonsuz oldum,

Sürgün edilmişdim, qovulmuşdum.

Belə isə bunları kim böyütdü?

Mən tək-tənha qalmışdım,

Bəs bunlar haradan gəlib-çıxdı?”»

²²Xudavənd Rəbb belə deyir:

«Budur, Mən əlimi millətlərə

Bir işarə kimi uzadacağam,

Bayrağımı xalqlar arasında qaldıracağam.

Onlar sənin oğullarını qucağında,

Qızlarını çiyinlərində gətirəcək.

²³Padşahlar sənə atalıq,

Mələkələr sənə analıq edəcək.

Üzüstə yerə sərilib sənə səcdə edəcəklər,

Ayaqlarının tozunu yalayacaqlar.

Onda biləcəksən ki, Mən Rəbbəm,

Mənə güvənənlər utanmayacaq».

²⁴Məgər güclünün əlindən qənimət alına bilərmi?

Zorakının əlindən əsirlər qurtula bilərmi?

²⁵Amma Rəbb belə deyir:

«Bəli, güclünün əlindən əsirlər də alına bilər,

Zorakının əlindən qənimət də götürülə bilər,

Səninlə çəkişənlərlə Mən çəkişəcəyəm,

Övladlarını Mən qurtaracağam.

²⁶Sənə zülm edənlərə öz ətlərini yedirəcəyəm,

Öz qanları ilə sərxoş olub

Şirin şərab içənlərin halına düşəcəklər.

Beləcə bütün bəşər biləcək ki,

Səni qurtaran Rəbb Mənəm.

Səni Satınalan, Yaqubun qüdrətli Allahı Mənəm».

Yeşaya 50

İsrailin günahına görə cəzası

¹Rəbb belə deyir:

«Boşadığım ananızın talağı haradadır?

Borc verənlərimin hansı birinə satdım sizi?

Siz şər əməllərinizə görə satıldınız,

Ananız üsyankarlığınız üzündən qovuldu.

²Bəs nə üçün Mən gələndə heç kim olmadı?

Axı niyə Mən çağıranda cavab verən olmadı?

Məgər Mənim əlim zəifləyib ki,

Xilas etməyə qadir olmasın?

Yaxud Mənim sizi qurtarmağa gücüm çatmazmı?

Mən qəzəbimlə dənizi quruduram,

Çayları səhraya çevirirəm.

Suyun çatışmazlığından balıqlar iylənir, susuzluqdan ölür.

³Mənəm göyləri zülmətə bürüyən,

Oranı çulla örtən».

Rəbbin qulunun itaəti

⁴Yorğunlara sözlə dayaq olmağı bilim deyə

Xudavənd Rəbb mənə savadlıların dilini verdi.

O hər səhər qulağımı oyadır ki,

Savadlı adamlar kimi dinləyə bilim.

⁵Xudavənd Rəbb qulağımı açdı,

Mən qarşı durmadım, geri çəkilmədim.

⁶Məni döyənlər üçün belimi açdım, Üzümü saqqalımı yolanlara tərəf uzatdım.

Təhqirlərdən, tüpürcəklərdən üzümü gizlətmədim.

⁷Xudavənd Rəbb mənə kömək etdiyinə görə utanmayacağam.

Buna görə də üzümü çaxmaq daşı kimi etdim.

Bilirəm ki, əsla xəcalət çəkməyəcəyəm.

⁸Mənə haqq qazandıran yaxındadır. Mənimlə kim mübahisə etmək istəyir?

Qoy mənimlə üz-üzə gəlsin.

Kimdir rəqibim?

Qoy yanıma gəlsin.

⁹Mənə kömək edən Xudavənd Rəbdir.

Kim məni təqsirkar çıxara bilər?

Rəqiblərimin hamısı paltar kimi köhnələcək,

Onları güvə yeyib məhv edəcək.

¹⁰Aranızda Rəbdən qorxan,

Qulunun sözünə qulaq asan varmı?

Qaranlıqda gəzən, nurdan məhrum olan

Rəbbin adına güvənsin, Allahına arxalansın.

¹¹Ey sizlər, od qalayıb, qığılcımı qoruyanlar,

Hamınız öz odunuza, yandırdığınız qığılcımın içinə atılın.

Mənim əlimdən aldığınız pay bu olacaq:

Əzab içində qalacaqsınız.

Yeşaya 51

Yerusəlimə təsəlliverici sözlər

¹Ey salehliyi arayanlar, Rəbbi axtaranlar,

Məni dinləyin!

Yonulduğunuz qayaya,

Çıxarıldığınız çuxurun dərinliyinə baxın.

²Atanız İbrahimə, sizi doğan Saraya baxın!

Mən onu tək çağırdım, xeyir-dua verdim,

Nəslini artırdım.

³Həqiqətən, Rəbb Siona və onun xarabalıqlarına təsəlli verəcək.

Səhralarını Edenə, çöllərini Rəbbin bağına döndərəcək.

Orada sevinc və şadlıq tapacaqlar,

Şükürlər, ilahilər oxunacaq.

⁴Ey xalqım, Məni dinlə,

Ey ümmətim, Məni eşit!

Qanun Məndən çıxacaq,

Ədalətimi nur tək

Xalqlara ehsan edəcəyəm.

⁵Salehliyim yaxındır, qurtuluşum gəlir,

Xalqları Öz gücümlə mühakimə edəcəyəm.

Uzaq diyarlar Mənə bel bağlayır,

Qüvvətimə ümid edir.

⁶Başınızı qaldırıb göylərə nəzər salın,

Aşağıya, yer üzünə baxın.

Çünki göylər dağılacaq tüstü kimi,

Yer üzü paltar kimi köhnələcək.

Beləcə yer üzünün sakinləri də qırılacaq.

Lakin Mənim xilasım əbədidir,

Salehliyim sonsuzdur.

⁷Ey salehlikdən xəbərdar olanlar,

Qanunumu qəlblərində saxlayan xalq,

Mənə qulaq asın!

Adamların məzəmmətindən qorxmayın,

Onların söyüşlərindən dəhşətə düşməyin.

⁸Onlar güvənin yediyi paltar kimi məhv olacaq,

Qurdun yediyi yun kimi məhv olacaq.

Lakin Mənim salehliyim əbədidir,

Qurtuluşum nəsillər boyu duracaqdır.

⁹Qalx, qalx, güclən, ey Rəbbin qolu!

Qədim zamanlardakı kimi

Qalx əvvəlki nəsillərin vaxtında olduğu kimi!

Sən Rahavı

parça-parça etmədinmi? Sən əjdahanın bədənini deşmədinmi?

¹⁰Dənizi, dərin suları Sən qurutmadınmı?

Satın alınan xalqının keçməsindən ötrü

Dənizin dərinliklərini yola çevirən

Sən deyildinmi?

¹¹Rəbbin satın alınmış adamları qayıdacaq, Sevinclə nəğmə deyərək Siona gələcək.

Üzlərində əbədi sevinc olacaq,

Onlar sevinc və şadlıq tapacaq,

Kədər və qəm-qüssə yox olacaq.

¹²Rəbb deyir: «Sizə təsəlli verən Mənəm, Mən!

Fani insandan, ot kimi solan bəşər oğlundan qorxan

Gör sən kimsən?

¹³Səni yaradan, göyləri sərən,

Dünyanın təməlini qoyan Rəbbi necə unudursan?

Səni məhv etmək niyyətində olan

Zülmkarın qəzəbindən gün boyu, dayanmadan qorxursan.

Bəs hanı zülmkarın qəzəbi?

¹⁴Zəncirlərlə buxovlanmış dustaqlar

Tezliklə azadlığa çıxacaq.

Ölüm çuxuruna düşməyəcək,

Çörəkləri əskik olmayacaq.

¹⁵Allahınız Rəbb Mənəm.

Mənəm dənizi gur dalğalarla çalxalayan.

Ordular Rəbbidir Onun adı!

¹⁶Mən sözlərimi sənin ağzına qoydum,

Əlimin kölgəsində səni gizlətdim ki,

Göyləri qurum, dünyanın təməlini qoyum,

Siona “Xalqım sənsən” deyim».

Yerusəlimin əzabının sonu

¹⁷Oyan, oyan, qalx ayağa, ey Yerusəlim! Sən ki Rəbbin əlindən

Qəzəb kasasını alıb içdin.

Sərxoşluq kasasını axıra qədər boşaltdın.

¹⁸Doğduğu bütün oğullardan ona yol göstərən,

Böyütdüyü bütün oğullardan ona əl tutan olmadı.

¹⁹Bu iki bəla sənin başına gəldi,

Dərdinə kim şərik olacaq?

Qarət, dağıntı, qıtlıq və qılınc!

Sənə necə təsəlli verim?

²⁰Övladların taqətdən düşüb,

Rəbbin qəzəbi, Allahının məzəmməti üzərlərindədir.

Onlar tələyə düşmüş cüyür kimi

Hər küçə başında uzanıb.

²¹Buna görə də, ey yaralı Yerusəlim,

Şərabsız sərxoş xalq, bunu eşit!

²²Xudavəndin Rəbb, Öz xalqını müdafiə edən

Allahın belə deyir:

«Budur, sərxoşluq kasasını əlindən almışam.

Qəzəbimin kasasından artıq içməyəcəksən.

²³Bu kasanı sənin zülmkarlarının əlinə verəcəyəm.

Axı onlar sənə belə dedi:

“Uzan yerə, üstündən keçək”.

Sən də kürəyini torpaq kimi, yol kimi etdin ki, üstündən keçsinlər».

Yeşaya 52

Yerusəlimin sevinci

¹Qalx, qalx, ey Sion, qüdrətinə qurşan! Ey müqəddəs şəhər, ey Yerusəlim,

Gözəl paltarlarını geyin!

Çünki sünnətsizlər, murdarlar

Sənin darvazalarından əsla keçməyəcək.

²Üst-başındakı tozu çırp,

Qalx, ey Yerusəlim, taxtına otur,

Zənciri boynundan qır,

Ey əsir aparılan Sion qızı!

³Rəbb belə deyir:

«Siz müftə satılmışdınız,

Müftə də satın alınacaqsınız».

⁴Xudavənd Rəbb belə deyir:

«Xalqım qürbətdə yaşamaq üçün

Əvvəllər Misirə enmişdi.

Sonra Aşşurlular onlara boş yerə zülm etdi.

⁵Xalqım nahaq yerə götürülüb aparıldı, İndi bundan Mənə nə qaldı?» Rəbb bəyan edir.

Bu, Rəbbin sözüdür:

«Onların başçıları ah-zar edir,

Həmişə, gün boyu adım küfrlə çəkilir.

⁶Buna görə xalqım

Mənim adımı tanıyacaq,

O gün “budur, Mənəm” deyənin Mən olduğunu başa düşəcək».

⁷Sülh xəbəri gətirən, Dağları aşıb-gələn

Müjdəçinin qədəmləri necə də gözəldir!

O, xoş müjdə gətirir,

Qurtuluş xəbəri verir,

Sion xalqına

«Allahınız hökm sürür!» bəyan edir.

⁸Qulaq asın! Gözətçilər səslərini ucaldır,

Birlikdə mədh oxuyur,

Çünki Rəbbin Siona qayıdışını

Öz gözləri ilə görür.

⁹Ey Yerusəlim xarabalıqları,

Şənlik edin, birlikdə mədh oxuyun,

Çünki Rəbb xalqına təsəlli verdi,

Yerusəlimi satın aldı.

¹⁰Rəbb bütün millətlərin gözləri önündə

Müqəddəs qolunu çırmaladı,

Yer üzünün qurtaracağınadək hər yer

Allahımızın gətirdiyi xilası görəcək.

¹¹Çəkilin, çəkilin, oradan çıxın, Murdar şeylərə toxunmayın,

Oradan çıxıb təmizlənin,

Ey Rəbbin əşyalarını daşıyanlar!

¹²Axı siz tələsmədən çıxacaqsınız,

Qaça-qaça getməyəcəksiniz,

Çünki Rəbb qarşınızda gedəcək,

İsrailin Allahı arxanızda olacaq.

Rəbbin qulunun iztirab çəkməsi və qələbəsi

¹³Budur, Mənim qulum uğur qazanacaq,

O yüksəldiləcək, ucaldılacaq, çox izzətlənəcək.

¹⁴Çoxları onun qarşısında mat qalacaq.

Bəli, onun görkəmi çox dəyişmişdi,

Zahirən insan surətindən çıxmışdı.

¹⁵Lakin o, çox millətləri heyrətə salacaq, Onun qarşısında padşahlar ağzını yumacaq,

Çünki onlar bilmədiklərini görəcək,

Eşitmədiklərini anlayacaq.

Yeşaya 53

¹ Xəbərimizə kim inandı,

Rəbbin gücü kimə zahir oldu?

²O, Rəbbin önündə bir fidan kimi,

Quru torpaqda bitən kök kimi böyüdü.

Baxanda onun nə görkəmi, nə gözəlliyi var idi,

Gözümüzü oxşayan zahiri siması da yox idi.

³Adamlar ona həqarətlə baxıb rədd etdi.

O, dərdli, xəstəlikləri görən insan idi,

Adamlar ondan üz döndərdi, xor baxdı.

Biz ona qiymət vermədik.

⁴ Əslində xəstəliklərimizi o çəkdi,

Dərdlərimizi öz üzərinə götürdü.

Biz isə onun Allah tərəfindən cəzalandırıldığını,

Vurulub iztirab çəkdiyini zənn etdik.

⁵ Bizim üsyankarlığımıza görə onun bədəni deşildi,

Şər əməllərimiz naminə əzildi,

Bizim əmin-amanlığımız üçün o cəza aldı,

Onun yaraları ilə biz şəfa tapdıq.

⁶ Hamımız qoyun kimi yolu azmışdıq,

Hər birimiz öz yolumuzla gedirdik.

Rəbb hamımızın şər əməllərinin yükünü onun üzərinə qoydu.

⁷ Ona zülm etdilər,

O iztirab çəkdi, amma ağzını açmadı.

Kəsilməyə aparılan quzu kimi,

Qırxımçıların qabağında dilsiz qoyun kimi

Ağzını açmadı.

⁸Ədalətsizliklə məhkum olunaraq ölümə aparıldı.

Onun nəsli haqqında kim düşünə bilərdi?

Axı xalqımın üsyankarlığına görə

O edam olundu, dirilər arasından atıldı.

⁹ O heç bir zorakılıq etmədiyi,

Ağzından yalan söz çıxmadığı halda

Qəbri pis adamların yanında quruldu,

Dövlətli adamın yanında dəfn olundu.

¹⁰Amma Rəbb Özü onun bu iztirablarını istədi,

Çəkdiyi əziyyətlər Onun iradəsi idi.

Öz canını təqsir qurbanı təqdim edərsə,

Nəsil görəcək, ömür uzadacaq.

Rəbbin istəyi onun əli ilə uğur qazanacaq.

¹¹O çəkdiyi iztirablarının bəhrəsini görüb qane olacaq,

Mənim saleh qulum öz biliyi ilə çoxlarına bəraət qazandıracaq,

Onların şər əməllərinin yükünü üzərinə götürəcək.

¹² Buna görə Mən ona böyük adamların arasında pay verəcəyəm.

O, qəniməti güclülərlə böləcək.

Çünki o, canını fəda etdi,

Üsyankarlara tay tutuldu.

Çox adamların günahını üzərinə götürdü,

Üsyankarlardan ötrü yalvardı.

Yeşaya 54

Rəbbin İsrailə məhəbbəti

¹«Şənlən, ey sonsuz, qısır qadın! Sevinclə mahnı oxu,

Ey doğuş ağrısı çəkməyən qadın!

Çünki atılmış qadının övladları

Ərli qadının övladlarından çox olacaq»,

Bunu Rəbb deyir.

²«Çadırının yerini genişləndir,

Məskənlərinin örtüklərini uzat,

Çəkinmə, ipləri uzat, payaları vur.

³Çünki sağa və sola səpələnəcəksən,

Nəslin millətlərə yiyələnəcək,

Viran qalmış şəhərlərdə məskunlaşacaq.

⁴Qorxma, çünki utanmayacaqsan,

Ruhdan düşmə, çünki rüsvay olmayacaqsan.

Cavanlığın xəcalətini unudacaqsan,

Bir daha dulluğun rüsvayçılığını

Yadına salmazsan».

⁵Çünki sənin ərin səni Yaradandır,

Onun adı Ordular Rəbbidir.

Səni Satınalan İsrailin Müqəddəsidir,

O bütün dünyanın Allahı adlanır.

⁶Allahın deyir:

«Rəbb səni çağırır

Atılmış və ruhu əzilmiş,

Gənc yaşında ərə getmiş,

Sonra isə rədd olunmuş bir qadın kimi.

⁷Bir anlığa səni tərk etdim,

Amma böyük rəhmlə geri qəbul edəcəyəm.

⁸Bir anlığa qızğın qəzəblə səndən üzümü döndərdim,

Lakin əbədi məhəbbətimlə sənə rəhm edəcəyəm».

Bunu səni Satınalan, Rəbb deyir.

⁹«Bu Mənim üçün sanki Nuhun dövründə baş verən daşqındır, Nuhun dövründəki daşqının suları

Bir daha yer üzünü örtməyəcəyi barədə necə and içmişdimsə,

İndi də and içirəm ki,

Sənə qəzəblənməyəcəyəm, səni məzəmmət etməyəcəyəm.

¹⁰Dağlar yerini dəyişsə də,

Təpələr sarsılsa da,

Sənə olan məhəbbətim dəyişməz,

Sülh əhdim sarsılmaz».

Bunu sənə rəhm edən Rəbb deyir.

Yeni Yerusəlimin xoşbəxtliyi

¹¹«Ey tufana düşmüş, Təsəlli tapmamış yazıq şəhər!

Sənin daşlarını əqiqlərlə,

Təməlini göy yaqutlarla qoyacağam.

¹²Qüllələrini yaqutdan,

Darvazalarını ləl-cəvahirdən,

Divarlarını qiymətli daşlardan hörəcəyəm.

¹³Bütün övladlarını Mən Rəbb öyrədəcəyəm, Onlar tam sülh içində olacaq.

¹⁴Salehliyində möhkəmlənəcəksən,

Zülmdən uzaq olacaqsan, qorxmayacaqsan.

Qorxu hissi səndən uzaq olacaq, sənə yaxınlaşmayacaq.

¹⁵Sənə hücum edən olsa, bil ki, bu Məndən deyil,

Sənə hücum edən hər kəs

Qarşında yerə yıxılacaq.

¹⁶Budur, odda kömürü körükləyən,

Öz məqsədi üçün silah hazırlayan

Dəmirçini Mən yaratdım.

Məhv etmək üçün qırıcını da Mən yaratdım.

¹⁷Sənə qarşı işlənən

Heç bir silah işə yaramayacaq.

Məhkəmədə səni təqsirləndirən

Hər kəsi təqsirkar çıxaracaqsan.

Rəbbə qulluq edənlərin irsi belədir.

Onların salehliyi Məndən gəlir».

Bunu Rəbb bəyan edir.

Yeşaya 55

Rəbbin çağırışı

¹Ey bütün susamışlar, gəlin su başına!

Ey pulu olmayanlar, gəlin, alın, yeyin!

Gəlin, şərabı və südü pulsuz, havayı alın!

²Nə üçün pulunuzu çörək olmayan şeylərə,

Qazandığınızı sizi doydurmayan şeylərə xərcləyirsiniz?

Məni diqqətlə dinləyin ki,

Yaxşı şeylər yeyəsiniz, nemətlərdən dadasınız.

³ Qulaq asın, Mənim yanıma gəlin,

Dinləyin ki, sağ qalasınız.

Mən sizinlə əbədi əhd,

Davuda vəd etdiyim sadiq məhəbbət əhdi kəsəcəyəm.

⁴Budur, onu ümmətlərə şahid,

Xalqlara başçı və hökmdar etdim.

⁵Tanımadığınız millətləri çağıracaqsınız.

Sizi tanımayan millətlər qaça-qaça yanınıza gələcək.

Allahınız Rəbbə görə,

İsrailin Müqəddəsindən ötrü onlar gələcək,

Çünki Rəbb sizi ucaltdı.

⁶Tapmaq fürsəti olarkən Rəbbi axtarın,

O yaxın ikən Onu çağırın.

⁷Qoy pis adam öz yolunu,

Şər adam öz fikirlərini atsın.

Qoy Rəbbə sarı dönsün ki, Onda mərhəmət tapsın.

Qoy Allahımıza tərəf dönsün,

Çünki Onun əfvi boldur.

⁸«Çünki Mənim fikirlərim sizin fikirləriniz deyil,

Sizin yollarınız Mənim yollarım deyil»

Rəbb belə bəyan edir.

⁹«Çünki göylər yer üzündən nə qədər yüksəkdirsə,

Yollarım da sizin yollarınızdan,

Fikirlərim də sizin fikirlərinizdən o qədər yüksəkdir.

¹⁰ Yağış və qar necə göylərdən yağıb oraya qayıtmırsa,

Ancaq torpağı sulayıb yeri məhsuldar edirsə,

Əkinçiyə toxum, yeyənə çörək verirsə,

¹¹Ağzımdan çıxan kəlmə də belədir:

Boş yerə yanıma qayıtmaz,

Ancaq istədiyimi yerinə yetirər,

Onu göndərdiyim iş icra olunsun deyə həyata keçirər.

¹²Sevinclə çıxacaqsınız,

Sülhlə müşayiət olunacaqsınız,

Dağlar, təpələr önünüzdə sevinclə nəğmə deyəcək,

Çöldəki bütün ağaclar əl çalacaq.

¹³Tikanlı kol əvəzinə şam ağacı,

Qanqal əvəzinə mərsin ağacı bitəcək.

Bu, Rəbb üçün şöhrət,

Pozulmaz əbədi əlamət olacaq».

Yeşaya 56

Rəbb bütün xalqları qəbul edəcək

¹Rəbb belə deyir: «Ədaləti qoruyun, salehliyə əməl edin.

Çünki xilasım yaxındadır,

Salehliyim tezliklə aşkar olunacaq.

²Bunu edən insan,

Buna itaət edən bəşər oğlu nə bəxtiyardır!

Şənbə gününü tutar, murdarlamaz,

Hər cür şərdən qorunar.

³Qoy Rəbbə bel bağlayan heç bir yadelli deməsin:

“Əlbəttə, Rəbb məni Öz xalqından ayıracaq”.

Qoy heç bir xədim deməsin:

“Mən quru bir ağacam”».

⁴Çünki Rəbb belə deyir:

«Şənbə günlərimə riayət edən,

Mənə xoş gələni seçən,

Əhdimə itaət edən xədimlərə

⁵Evimdə, divarlarımın arasında

Oğul və qızlardan daha da yaxşı olan

Xatirə və ad verəcəyəm.

Onlara silinməz, əbədi bir ad verəcəyəm.

⁶Rəbbə xidmət etmək, Onun adını sevmək,

Onun qulu olmaq üçün Şənbə gününə riayət edən, o günü murdarlamayan,

Əhdimə itaət edən,

Rəbbə bel bağlayan bütün yadelliləri

⁷Müqəddəs dağıma gətirib Dua evimdə sevindirəcəyəm.

Onların gətirdikləri

Yandırma qurbanları, bütün qurbanlar

Qurbangahımda qəbul olunacaq.

Çünki Mənim evim bütün xalqlar üçün

Dua evi adlandırılacaq».

⁸İsrailin əsir düşmüş övladlarını toplayan

Xudavənd Rəbb belə bəyan edir:

«Mən hələ toplanmışların yanına başqalarını da yığacağam».

İsrailin pis başçıları mühakimə olunur

⁹Ey bütün çöl heyvanları,

Ey bütün meşə heyvanları,

Gəlin yeməyə!

¹⁰Xalqımın bütün gözətçiləri kordur, cahildir!

Onların hamısı hürə bilməyən lal itlərdir,

Yuxu görürlər, uzanırlar,

Yatmağı sevirlər!

¹¹Acgöz, azğın köpəklərdir bunlar,

Axmaq çobanlardır bunlar!

Hər kəs öz yolu ilə gedir,

Hər biri öz xeyrini güdür!

¹²Bir-birlərinə deyirlər:

«Gəlin, şərab gətirək,

Bol-bol kefləndirici içki içək!

Sabahkı gün də bu gün kimi,

Hətta bundan da çox yaxşı olacaq!»

Yeşaya 57

Vəfasız xalq

¹«Saleh adam ölür və bunu vecinə alan yoxdur.

Mömin adamlar da köçüb gedir,

Amma heç kim anlamır ki,

Bəla gəlməmiş saleh adam canını qurtarır.

²Saleh adam sülhə qovuşur,

Doğru yolla gedən son yatağında rahat yatır.

³Amma siz, ey cadugər qadının övladları,

Fahişə və zinakarlar nəsli, bura, yaxın gəlin!

⁴Siz kimi məsxərəyə qoyursunuz?

Kimə ağız əyirsiniz?

Kimə dil göstərirsiniz?

Məgər siz itaətsiz övladlar,

Yalançı nəsil deyilsiniz?

⁵Palıd ağacları arasında,

Hər kölgəli ağacın altında

Şəhvətlə alışıb-yanan,

Vadilərdə, qaya oyuqlarında,

Övladlarınızı qurban gətirən

Siz deyilmisiniz?

⁶Sizin payınız

Vadinin hamar daşlarından düzələn bütlərdir.

Onlardır, bəli, onlardır sizə nəsib olan.

Onların qarşısında içmə təqdimi tökdünüz,

Taxıl təqdimi gətirdiniz.

Bunlara görə Mən təsəlli taparammı?

⁷Yatağınızı yüksək, uca dağda salmısınız,

Qurbanlarınızı kəsmək üçün də oraya çıxırsınız.

⁸Qapılarınıza, qapıların yan taxtalarının arxasına

İyrənc işarələr düzmüsünüz.

Məni tərk edib yatağınızı geniş açdınız,

Orada uzandınız, oynaşlarınızla sövdələşdiniz,

Birlikdə yatmağa can atdınız,

Onların çılpaqlığına tamaşa etdiniz!

⁹Ətirləri bol-bol vurandan sonra

Molek allahına sarı getdiniz.

Elçilərinizi uzaqlara göndərdiniz,

Özünüzü ölülər diyarına qədər endirdiniz.

¹⁰Uzun yollar sizi taqətdən saldı.

Lakin siz “daha bəsdir” demədiniz.

Gücünüzü təzələyib qalxdınız,

Buna görə yorulmadınız.

¹¹Kim sizi qorxudub dəhşətə saldı ki,

Məni aldatdınız?

Məni yada salmadınız,

Ürəyinizdə Mənə yer vermədiniz?

Mən xeyli vaxt susduğuma görə,

Siz Məndən qorxmursunuz?

¹²Mən sizin salehliyinizi,

Etdiyiniz əməlləri aşkara çıxaracağam,

Bunların sizə xeyri olmayacaq.

¹³Siz fəryad edəndə

Bu yığdığınız bütlər

Görək sizi nə cür qurtaracaq!

Onların hamısını külək sovurub atacaq,

Bir nəfəs onları yerindən tərpədib aparacaq.

Lakin Mənə sığınan torpağı irs olaraq alacaq,

Müqəddəs dağımı mülk edəcək».

Rəbb xalqına şəfa verəcək

¹⁴Rəbb deyir:

«Tikin, tikin, yol hazırlayın!

Xalqımın yolundakı əngəlləri götürün!»

¹⁵Uca və əzəmətli,

Əbədi yaşayan, adı müqəddəs Olan

Belə deyir:

«Mən yüksək və müqəddəs yerdə yaşadığım halda

Ruhu əzilənlərlə, özünü aşağı tutanlarla birlikdəyəm ki,

Özünü aşağı tutanların ruhunu dirildim,

Əzilmişlərin ürəyini dirçəldim.

¹⁶Həmişə çəkişib qəzəblənməyəcəyəm,

Yoxsa yaratdığım canlı insan qarşımda dura bilməz.

¹⁷Tamahkarlıq günahına görə

Qəzəblənib xalqı cəzalandırdım,

Hiddətlənib üzümü ondan döndərdim.

O da inad edib öz yolu ilə getdi.

¹⁸Əməllərini gördüm,

Amma bu xalqa şəfa verəcəyəm.

Ona rəhbərlik edəcəyəm,

Ona və onun yas tutanlarına təsəlli verəcəyəm.

¹⁹Ağızları ilə həmdlər söyləyəcəyəm. Uzaqdakılara və yaxındakılara qoy sülh, sülh olsun».

Rəbb belə deyir: «Mən onlara şəfa verəcəyəm».

²⁰Pislər isə sanki dalğalanan dənizdir,

Bu dəniz sakit dura bilməz,

Onun suları palçıq və kir çıxarar.

²¹«Pislərə isə sülh yoxdur» deyir mənim Allahım.

Yeşaya 58

Düzgün oruc

¹«Avazla çığırın, çəkinməyin,

Səsinizi şeypur səsi kimi ucaldın,

Xalqıma üsyankarlığını,

Yaqub nəslinə günahlarını bildirin!

²Onlar hər gün Məni axtarır,

Mənim yolumu öyrənməkdən zövq alır.

Sanki bu əməlisaleh,

Allahının hökmündən ayrılmayan millət imiş.

Onlar Məndən düzgün hökmlər diləyirdi,

Allaha yaxınlaşmaqdan zövq alırdı.

³Onlar belə deyir:

“Oruc tutduğumuzu nə üçün görmürsən,

Özümüzü aşağı tutanda,

Sən niyə fikir vermirsən?”

Baxın, oruc tutduğunuz gün

Siz istədiyinizi edirsiniz,

Bütün işçilərinizi sıxışdırırsınız.

⁴Baxın, orucunuzu savaşma ilə,

Dava ilə, yumruqla, döyməklə keçirirsiniz.

Səsinizi ucalara çatdırmaq üçün

Bugünkü kimi sizə oruc tutmaq olmaz.

⁵İstədiyim oruc, insanın özünü aşağı tutduğu gün belə olmalı idimi?

Bu, qamış kimi başınızı əyib,

Əyninizə çul geyib, kül üstündə oturmağınızdırmı?

Bunamı oruc və Rəbbə məqbul olan gün deyirsiniz?

⁶Mənim istədiyim orucsa

Haqsızlığın buxovlarını qırmaq,

Boyunduruğun iplərini açmaq,

Sıxıntı içində olanları azad etmək,

Hər cür boyunduruğu məhv etmək deyilmi?

⁷Yediyiniz çörəyi acla bölüşdürmək,

Yurdsuz kasıbları evinizə gətirmək deyilmi?

Mənim istədiyim oruc bu deyilmi?

Çılpaq görəndə geyindirmək,

Yaxınlarınızdan köməyinizi əsirgəməmək deyilmi?

⁸Onda nurunuz şəfəq kimi saçacaq,

Tezliklə şəfa tapacaqsınız,

Qarşınızda salehliyiniz gedəcək,

Rəbbin izzəti sizə arxa olacaq.

⁹O vaxt Rəbbi köməyə çağıracaqsınız, Rəbb cavab verəcək.

Fəryad edəcəksiniz, O sizə “buradayam” deyəcək.

Əgər siz boyunduruğu,

Yəni başqalarına zülm etməyinizi

Aranızdan rədd etsəniz,

Barmaq uzadıb şər sözlər söyləməyə yol verməsəniz,

¹⁰Can-dildən acların qayğısına qalsanız,

Fəqirlərin ehtiyaclarını ödəsəniz,

Nurunuz qaranlıqda parlayacaq,

Qaranlığınız günorta işığı kimi nur saçacaq.

¹¹Rəbb həmişə sizə yol göstərəcək,

Quru torpaqlarda sizi doyuzduracaq, güc verəcək.

Siz də sulanmış bağça kimi,

Suları heç vaxtı əskilməyən

Bulaq kimi olacaqsınız.

¹²Sizdən törənənlər qədim dağıntıları tikəcək,

Nəsillərdən qalma təməllərin üstünü

Siz bərpa edəcəksiniz.

Sizə xarabalıqları bərpa edənlər,

Camaatın yaşaması üçün

Küçələri yenidən quranlar deyiləcək.

Şənbə gününə riayət edənlər üçün mükafat

¹³Şənbə günündə büdrəməsəniz,

Müqəddəs günümdə istədiyinizi etməsəniz,

Şənbə gününü “şən gün”,

Rəbbin müqəddəs gününü

“Şərəfli gün” adlandırsanız,

Öz yolunuzla getməməklə,

İstədiyinizi əldə etməməklə,

Boşboğazlıqla məşğul olmamaqla,

O günü əziz tutsanız,

¹⁴Rəblə ünsiyyətdən zövq alacaqsınız.

O zaman Mən sizi yer üzünün

Yüksək yerlərinə çıxaracağam,

Atanız Yaqubun payından dadacaqsınız».

Bu sözlər Rəbbin ağzından çıxıb.

Yeşaya 59

Günah və etiraf

¹Ah, Rəbbin əli qısa deyil ki, xilas edə bilməsin,

Qulağı kar deyil ki, eşidə bilməsin.

²Lakin şər əməlləriniz

Allahınızla sizin aranızda ayrılıq saldı.

Günahlarınıza görə Onun üzü sizdən döndü,

O səsinizi eşitmir.

³Çünki əlləriniz qanla,

Barmaqlarınız şər əməllərlə murdarlanıb.

Dodaqlarınız yalan danışır,

Diliniz pislik söyləyir.

⁴Məhkəmədə ədalətlə işə baxan yoxdur, Doğruluqla özünü müdafiə edən yoxdur,

Boş sözlərə güvənirlər, aldadırlar,

Əziyyətə hamilə olub pislik doğurlar.

⁵Gürzə yumurtaların üstündə qırt yatıb

Hörümçək toru toxuyurlar.

O yumurtalardan yeyən ölür,

Qırılan yumurtalardan əfi ilan çıxır.

⁶Onların toxuduğu hörümçək torundan paltar çıxmaz,

Toxuduqları parça ilə özlərini örtə bilmirlər.

Elədikləri əməllər şər əməllərdir,

Əllərində zorakılıq işləri var.

⁷Ayaqları pis işlər etməyə tələsir, Günahsız qan tökməyə cəlddir.

Fikirləri, niyyətləri şər əməllərdir,

Yollarında viranəlik, qırğın var.

⁸Əmin-amanlıq yolu nədir, onlar bilmirlər,

Getdikləri yolda ədalət yoxdur,

Özlərinə əyri yol seçdilər,

O yoldan gedənlərin heç biri

Əmin-amanlıq nədir bilmir.

⁹Buna görə ədalət bizdən uzaqlaşıb,

Salehliyə çata bilmirik.

İşıq ümidindəyik, lakin qaranlıqdayıq,

Aydınlıq gözləyirik, zülmətdə yeriyirik.

¹⁰Kor kimi əllərimizlə divarı yoxlayırıq,

Gözü görməyənlər tək yol axtarırıq.

Günorta çağı gecə vaxtı olduğu kimi büdrəyirik,

Güclülər arasında ölülər kimiyik.

¹¹Hamımız ayı kimi nərildəyirik,

Göyərçin tək inildəyirik.

Ədalət gözləyirik, lakin heç bir şey yoxdur.

Qurtuluş gözləyirik, amma bizdən uzaqdır.

¹²Çünki Önündə üsyankarlığımız böyükdür,

Günahlarımız bizə qarşı şəhadət edir.

Üsyankarlığımız bizi dövrəyə alıb,

Şər əməllərimizdən xəbərdarıq.

¹³Üsyankar olub Rəbbi rədd etdik,

Allahımızın ardınca getmədik,

Zorakılıq, xəyanətlə dolu sözlər danışdıq,

Yalan kəlmələri ürəyimizdə gizlətdik,

Sonra aşkara çıxartdıq.

¹⁴Ədalət geri çəkildi,

Salehlik uzaqda durdu,

Çünki həqiqət şəhər meydanında yıxıldı,

Dürüstlük aramıza daxil ola bilmir.

¹⁵Həqiqət heç bir yerdə yoxdur,

Şərdən uzaq duran talan olunur.

Rəbb xalqını qurtaracaq

Rəbb bunları gördü,

Ədalətin yoxluğu Onun xoşuna gəlmədi.

¹⁶Rəbb gördü ki, heç kim yoxdur, Havadarın olmadığına görə O mat qaldı.

Onda Onun qolu Ona zəfər gətirdi,

Salehliyi Ona dayaq oldu.

¹⁷O, salehliyi zireh kimi geydi, Qurtuluş dəbilqəsini başına taxdı.

Qisas geyimlərini geydi,

Qeyrət libasına büründü.

¹⁸O hər kəsə əməllərinə görə əvəz verəcək.

Düşmənlərinə qəzəblə, yağılarına,

Uzaq diyarlara qisasla əvəz verəcək.

¹⁹Beləcə qərbdən şərqədək adamlar

Rəbbin adından və əzəmətindən qorxacaq.

Çünki düşmən azğın bir çay kimi gəldikdə

Rəbbin nəfəsi onu qovacaq.

²⁰Rəbb bəyan edir: «Satınalan Siona gələcək, Yaqub nəslinin üsyankarlıqdan dönənlərinin yanına gələcək».

²¹«Mənim onlarla bağladığım əhd budur: üzərindəki Ruhum, ağzına qoyduğum sözlərim indidən sonsuzadək sənin, övladlarının, nəvə-nəticələrinin ağzından düşməyəcək». Bunu Allah deyir.

Yeşaya 60

Sionun şərəfli gələcəyi

¹Qalx, işıqlan, çünki nurun gəldi,

Rəbbin izzəti üzərinə gəldi!

²Budur, dünyanı qaranlıq, ümmətləri zülmət bürüyəcək.

Amma Rəbb üzərinə nur saçacaq,

İzzəti səni əhatə edəcək.

³Millətlər sənin nuruna, Padşahlar üzərinə çökən aydınlığa doğru gələcək.

⁴Qaldır başını, bax ətrafına,

Hamı yığılıb yanına gəlir!

Oğulların uzaqdan gəlir,

Qızların qucaqda gətirilir.

⁵O vaxt bunu görüb üzün nur saçacaq,

Ürəyin sevincdən tez-tez çırpınacaq.

Çünki uzaq ölkələrin var-dövləti sənə gətiriləcək,

Millətlərin sərvəti sənə gələcək.

⁶Dəvə sürüləri, Midyan və Efa köşəkləri

Torpaqlarını dolduracaq.

Bütün Səba xalqı gəlib

Qızıl və kündür gətirəcək,

Rəbbə həmdlər söyləyəcək.

⁷Qedarın bütün qoyun sürüləri yanına yığılacaq,

Nevayotun qoçları sənin əlinin altında olacaq,

Qurbangahıma Mənə məqbul olan qurbanlar gətiriləcək.

Şərəfli evimi daha da izzətləndirəcəyəm.

⁸Kimdir bunlar, bulud kimi,

Yuvalarına yaxınlaşan göyərçin tək uçub gələnlər?

⁹Uzaq diyarlar Mənə ümid bağladıqlarına görə

Tarşiş gəmiləri başda olmaqla

Allahın Rəbbin şərəfinə,

Səni ucaldan İsrailin Müqəddəsi üçün

Sənin övladlarını qızıl-gümüşü ilə

Uzaqdan gətirən gəmilərdir bunlar.

¹⁰Əcnəbilər divarlarını tikəcək,

Padşahları sənə xidmət edəcək.

Qəzəbimdə səni vurdumsa da,

Lütfümlə sənə mərhəmət edəcəyəm.

¹¹Darvazaların həmişə açıq qalacaq, Nə gecə, nə də gündüz qıfıllanmayacaq ki,

Millətlərin sərvəti sənə təqdim olunsun,

Padşahları yanına gətirilsin.

¹²Çünki sənə xidmət etmək istəməyən

Millət ya padşahlıq məhv olacaq,

Bəli, o millətlər tamamilə yox olacaq.

¹³Livanın şan-şöhrəti olan şam ağacı, çinar və sərv ağacları

Müqəddəs məkanımdakı yeri gözəlləşdirmək üçün

Birgə yanına gətiriləcək,

Qədəm qoyduğum yeri şərəfləndirəcəyəm.

¹⁴Sənə zülm edənlərin övladları Gəlib önündə təzim edəcək.

Sənə həqarətlə baxanların hamısı

Ayaqlarına düşüb səcdə edəcək.

Sənə Rəbbin şəhəri,

İsrailin Müqəddəsinin Sionu deyəcəklər.

¹⁵Səni tərk edib nifrət etdilər,

Yanından heç kim keçmirdi,

İndi isə Mən səni əbədi fəxr,

Nəsillər boyu sevinc edəcəyəm.

¹⁶Millətlər və padşahlar

Bir ana kimi sənə süd verəcəklər.

O vaxt biləcəksən ki, səni qurtaran Rəbb,

Səni Satınalan, Yaqubun qüdrətli Allahı Mənəm.

¹⁷Sənə tunc əvəzinə qızıl,

Dəmir yerinə gümüş,

Ağac yerinə tunc,

Daş əvəzinə dəmir gətirəcəyəm.

Əmin-amanlığı başçın,

Salehliyi hökmdarın təyin edəcəyəm.

¹⁸Ölkəndən zorakılıq,

Sərhədlərindən viranəlik,

Qırğın xəbəri gəlməyəcək.

Divarlarını «Xilas»,

Darvazalarını «Həmd» adlandıracaqsan.

¹⁹Artıq gündüz günəş sənin işığın olmayacaq, Gecə ay sənə aydınlıq verməyəcək.

Çünki Rəbb əbədi nurun,

Allahın sənin şöhrətin olacaq.

²⁰Günəşin batmayacaq, ayın gizlənməyəcək,

Çünki Rəbb əbədi nurun olacaq,

Sənin yaslı günlərin qurtaracaq.

²¹Bütün xalqın saleh olacaq,

Torpağı əbədi mülk olaraq alacaq.

Onlar əkdiyim fidandır,

Şöhrətimi göstərmək üçün əlimin işidir.

²²Ən kiçik ailədən böyük nəsil törəyəcək,

Azsaylı nəsil qüdrətli millət olacaq.

Mən Rəbb bunu öz vaxtında tez edəcəyəm.

Yeşaya 61

Rəbbin lütf ili

¹Xudavənd Rəbbin Ruhu üzərimdədir, Çünki fəqirlərə müjdəni bildirmək üçün

O məni məsh etdi.

Qəlbi sınıq olanlar üçün, yaralarını sarımaq üçün,

Əsirlərə azadlıq,

Dustaqlara sərbəstlik elan etmək üçün,

²Rəbbin lütf ilini,

Allahımızın qisas gününü bəyan etmək üçün,

Yaslıların hamısına təsəlli vermək üçün,

³Sionda yas tutanları təmin etmək,

Kül yerinə çələng,

Yas yerinə sevinc gətirən məsh yağı,

Kədərli ruh əvəzinə

Həmd libasını bəxş etmək üçün

Rəbb məni göndərdi.

Rəbbin şöhrətini aşkar etmək üçün

Onlara Rəbbin əkdiyi salehlik palıdları deyiləcək.

⁴Onlar qədim dağıntıları inşa edəcək,

Əvvəlki xarabalıqları bərpa edəcək,

Nəsillər boyu viranə qalmış şəhərləri yenidən quracaq.

⁵Yadellilər gəlib sürülərinizi otaracaq,

Əcnəbilər sizə əkinçilik və bağbanlıq edəcək.

⁶Sizsə Rəbbin kahinləri,

Allahımızın xidmətçiləri adlanacaqsınız.

Millətlərin sərvəti ilə bəslənəcəksiniz,

Var-dövlətləri ilə fəxr edəcəksiniz.

⁷Çəkdiyiniz xəcalət yerinə ikiqat şərəf,

Rüsvayçılıq əvəzinə payınızı alıb sevinəcəksiniz.

İndi isə torpağınızda ikiqat mülk alacaqsınız,

Sevinciniz əbədi olacaq.

⁸Çünki Mən Rəbb ədaləti sevirəm.

Soyğunçuluğa, haqsızlığa nifrət edirəm.

Əlbəttə, əməllərinə görə onlara haqqını verəcəyəm,

Onlarla əbədi əhd kəsəcəyəm.

⁹Nəsillərindən törəyənlər millətlər içində,

Övladları xalqlar arasında tanınacaq.

Onları görən hər kəs biləcək ki,

Rəbb nəsillərinə xeyir-dua verdi.

¹⁰Rəbdə böyük sevinc tapacağam, Allahımda ürəyim şadlıqdan coşacaq,

Çünki çələnglə bəzənmiş bəy kimi,

Bər-bəzək taxmış gəlin kimi

Mənə qurtuluş paltarı geyindirdi,

Salehlik libası ilə bürüdü.

¹¹Torpaq zoğlarını necə cücərdirsə,

Bağ əkilən toxumları necə yetişdirirsə,

Xudavənd Rəbb də bütün millətlər qarşısında

Salehliyi və həmdi belə yetişdirəcək.

Yeşaya 62

Sionun yeni adı

¹Salehliyi nur kimi saçanadək,

Qurtuluşu məşəl tək yananadək

Sion naminə susmayacağam,

Yerusəlim naminə sakit durmayacağam.

²Millətlər salehliyini, Bütün padşahlar əzəmətini görəcək.

Rəbbin ağzı ilə deyəcəyi,

Sənə verəcəyi yeni bir adla çağırılacaqsan.

³Sən Rəbbin əlində gözəllik tacı,

Allahının ovcunda padşahlıq çələngi olacaqsan.

⁴Artıq sənə «atılmış»,

Ölkənə «viranə qalmış» deməyəcəklər.

Əvəzinə sənə «sevdiyim»,

Ölkənə isə «ərli» deyiləcək.

Çünki Rəbb səni sevəcək,

Ölkən də ərli sayılacaq.

⁵Bir gənc bakirə qızla evləndiyi kimi

Səni Yaradan da səninlə evlənəcək.

Bəy gəlindən zövq aldığı kimi

Allahın da səndən zövq alacaq.

⁶Ey Yerusəlim, divarlarının üstünə

Mən qarovulçular qoydum.

Gecə-gündüz onlar susmayacaq.

Ey Rəbbə sözünü xatırladan sizlər, susmayın,

⁷Rəbb Yerusəlimi bərpa edənədək,

Onu yer üzünün tərifə layiq şəhərinə döndərənədək

Ona rahatlıq verməyin!

⁸Rəbb sağ əlini, güclü qolunu

Qaldırıb and içdi:

«Düşmənlərinə sənin taxılını bir daha yedirtməyəcəyəm,

Yadellilər sənin əziyyətlə sıxdığın şərabını içməyəcək.

⁹Taxılı yığan yeyəcək,

Rəbbə həmdlər edəcək.

Üzümü toplayan şərabını

Məbədimin həyətlərində içəcək».

¹⁰Keçin, keçin şəhər darvazalarından,

Xalq üçün yol hazırlayın!

Tikin, yol salın,

Daşları kənara atın,

Xalqlar üçün bayraq qaldırın!

¹¹Rəbb yer üzünün ən uzaq yerlərinə bəyan etdi: «Sion qızına deyin:

“Budur, qurtuluşun gəlir,

Rəbbin mükafatı onunladır,

Ənamı önündədir”».

¹²Sion xalqına

«Rəbbin satın aldığı, müqəddəs xalq» deyəcəklər.

Sən, ey Yerusəlim,

«Allahın axtardığı, tərk olmamış şəhər» adlanacaqsan.

Yeşaya 63

Rəbbin qüdrəti

¹Edomdan, Bosradan al geyimlər geyib Bu gələn kimdir?

Təmtəraqlı libas içində,

Böyük qüdrətlə gələn kimdir?

«O Mənəm, həqiqətlə danışan,

Qurtarmağa qadir olan».

²Nə üçün geyimlərin qırmızıdır,

Nə üçün libasın al rəngdədir,

Sanki sən üzümsıxanda üzüm sıxırdın?

³«Üzümsıxanda üzümü tək sıxdım, Yanımda xalqlardan heç kim olmadı.

Qəzəb içində onları tapdaladım,

Qeyzlə təpiyimin altına saldım.

Qanları geyimlərimə sıçradı,

Bütün libaslarımı bulaşdırdım.

⁴Çünki qisas günü qəlbimdə idi,

Xalqımı satın aldığım il gəldi.

⁵Mən baxdım, kömək edən bir kəs yox idi, Mənim tərəfimi saxlayan olmadığına məəttəl qaldım,

Onda qolum mənə zəfər gətirdi,

Qeyzim mənə dayaq oldu.

⁶Qəzəb içində xalqları tapdaladım,

Qeyzimi onlara içirtdim,

Qanlarını yerə axıtdım».

Rəbbin xeyirxahlığı

⁷Rəbbin lütfkar işlərindən,

Həmdlərə layiq əməllərindən nəql edəcəyəm.

Böyük mərhəməti və məhəbbəti naminə,

İsrail nəslinə etdiyi böyük xeyirxahlığına görə,

Rəbbin bizə etdiyi bütün işlərinə görə

Onu xatırlayacağam.

⁸Rəbb dedi:

«Əlbəttə, onlar Mənim xalqımdır,

Məni aldatmayan övladlarımdır».

Beləcə onlara Qurtarıcı oldu.

⁹Onlar əziyyət çəkdikdə

O da əziyyət çəkdi.

Hüzurundan gələn mələk onları xilas etdi.

Məhəbbəti və mərhəməti ilə

Onları satın aldı.

Bütün keçmiş günlərdə onları götürüb apardı.

¹⁰Lakin İsrail üsyankar olaraq Onun Müqəddəs Ruhunu kədərləndirdi.

Rəbb də düşməni olub

Onlara qarşı döyüşdü.

¹¹Sonra xalq keçmiş günləri – Rəbbin qulu Musanın dövrünü yada saldı.

Onları sürüsünün çobanları ilə birgə

Dənizdən keçirən haradadır?

Onların daxilinə

Müqəddəs Ruhunu ehsan edən,

¹²Öz əzəmətli gücü ilə Musanın sağ əlindən tutub,

Özünə əbədi ad qazandırmaq üçün

Suları qarşılarında yaran Rəbb haradadır?

¹³Bir at çöldə yıxılmadan çapan kimi

Onları da dərinliklərdən elə keçirən Rəbb haradadır?

¹⁴Rəbbin Ruhu onlara elə rahatlıq verdi ki,

Elə bil naxır otu bol olan dərədə otarılır.

Bəli, Sən adını şərəfləndirmək naminə

Xalqına belə yol göstərdin.

Rəhm və imdad haqqında yalvarış

¹⁵Ya Rəbb, göylərdən bax,

Müqəddəs, izzətli, uca məskənindən bizə nəzər sal!

Haradadır Sənin qeyrətin, gücün?

Qəlbindəki həsrəti, rəhmi bizdən əsirgədin.

¹⁶Sənsən Atamız.

İbrahim bizi tanımasa da,

İsrail bizim kim olduğumuzu bilməsə də,

Atamız Sənsən, ya Rəbb,

Əzəldən bəri adın «Bizi Satınalan»dır.

¹⁷Nə üçün, ya Rəbb,

Bizi yolundan azdırırsan,

Səndən qorxmayaq deyə

Qəlblərimizi inadkar edirsən?

Qullarının xatirinə,

İrsin olan qəbilələrinin xatirinə geri dön.

¹⁸Müqəddəs xalqın qısa müddətə Sənin Müqəddəs məkanına sahib oldu.

İndi isə oranı düşmənlərimizin ayağı tapdalayır.

¹⁹Əzəldən bəri heç vaxt

Hakimlik etmədiyin xalqa bənzədik,

Sanki Sənin adına bağlı xalq olmamışıq.

Yeşaya 64

¹Ya Rəbb, kaş göyləri yarıb enəydin,

Dağlar hüzurunda sarsılardı!

²Alov kolluğu yandıran kimi,

Od suyu qaynadan kimi

Adını yağılarına tanıtdıraydın,

Millətlər önündə lərzəyə gələrdi!

³Sən gözləmədiyimiz əzəmətli işlər edəndə

Endin yer üzünə, dağlar önündə sarsıldı.

⁴Ona etibar edənlər üçün belə işlər edən Allahı, Əzəldən bəri Səndən başqasını nə göz görüb, nə də qulaq eşidib.

⁵Sevinə-sevinə salehlik edəni,

Yollarında Səni xatırlayanları qarşılayırsan.

Amma biz günaha batdıq, Sən qəzəbləndin.

Beləcə xeyli vaxt yaşadıq,

Bəs biz necə xilas ola bilərik?

⁶Hamımız elə bil ki murdarlandıq,

Bütün saleh əməllərimiz murdar əskiyə bənzəyir.

Hamımız yarpaq kimi soluruq,

Şər əməllərimiz bizi külək tək sovurub-aparır.

⁷Sənin adını çəkən yoxdur,

Sənə bağlanmaq üçün can atan yoxdur.

Çünki bizdən üz döndərdin,

Şər əməllərimizə görə bizi yox etdin.

⁸Yenə də, ya Rəbb, Sənsən Atamız:

Biz gilik, Sən isə dulusçu,

Biz hamımız Sənin əlinin işiyik.

⁹Ya Rəbb, çox qəzəblənmə,

Şər əməllərimizi heç vaxt xatırlama,

Hamımız Sənin xalqınıq, bunu nəzərə al.

¹⁰Müqəddəs şəhərlərin səhraya,

Sion çöllüyə döndü,

Yerusəlim viran qaldı.

¹¹Atalarımızın Sənə həmd etdikləri yer –

Müqəddəs, şanlı məbədimiz yandı,

Gözəl binalarımız xaraba qaldı.

¹²Bütün bunlardan sonra,

Ya Rəbb, yenə də Özünü saxlayacaqsanmı?

Susub bizi nə qədər alçaldacaqsan?

Yeşaya 65

Dikbaşlar cəza çəkəcək

¹«Məni soruşmayanlara Mən zühur etdim, Məni axtarmayanlar tərəfindən tapıldım.

Adımla çağırılmayan millətə dedim:

“Buradayam! Buradayam!”

²Pis yolla gedən,

Öz düşüncələri ilə hərəkət edən

Dikbaş xalqa gün boyu əllərimi uzadıb durdum.

³O xalq ki bağlarda qurban kəsərək,

Kərpiclərin üstündə buxur yandırıb

Gözüm önündə daima Məni təhqir edir,

⁴Qəbiristanlıqda oturub

Gizli yerlərdə gecələyir,

Donuz əti yeyir,

Qablarında haram ət qaynadır.

⁵Onlar bir-birinə deyir: “Uzaq dur,

Mənə yaxınlaşma, çünki mən səndən müqəddəsəm”.

Belələri burnuma tüstü,

Bütün gün yanan alovdur.

⁶Budur, qarşımda bunlar yazılıb:

Mən susmayacağam,

Ancaq onların əvəzini verəcəyəm,

Əməllərini başlarına çevirəcəyəm.

⁷Onların da, atalarının da qəbahətlərinin cəzasını

Onlara çəkdirəcəyəm».

Rəbb deyir.

«Dağların başında buxur yandırdıqlarına görə,

Təpələrin başında Mənə küfr etdiklərinə görə

Mən əvvəlki əməllərini ölçüb onların əvəzini onlara çəkdirəcəyəm».

⁸Rəbb deyir:

«Üzüm salxımında şirə tapıldığına görə deyirlər:

“Salxımı xarab etməyin, içində bərəkət var”.

Mən də qullarımın xatirinə belə edərəm ki,

Onların hamısı məhv olmasın.

⁹Yaqubdan törəyənlərin sayını artıracağam,

Yəhuda nəslindən dağlarıma varis çıxacaq,

Seçilmiş xalqım oranı irs alacaq.

Mənim qullarım orada məskunlaşacaq.

¹⁰Məni axtaran xalqım üçün Şaron sürülərin otlağı,

Akor vadisi mal-qaranın rahatlandığı yer olacaq.

¹¹Lakin sizlər – Rəbbi tərk edənlər,

Müqəddəs dağımı unudanlar,

Tale allahına süfrə açanlar,

Qismət allahına camlarda şərab təqdim edənlər,

¹²Mən də sizi qılınca qismət edəcəyəm,

Hamınız qırılmaq üçün diz çökəcəksiniz.

Çünki Mən çağıranda sizdən cavab almadım,

Danışanda qulaq asmadınız.

Gözümdə pis olanı etdiniz,

Mənə məqbul olmayanı seçdiniz».

¹³Buna görə də Xudavənd Rəbb belə deyir:

«Qullarım yeyəcək, sizsə ac qalacaqsınız,

Qullarım içəcək, sizsə susayacaqsınız,

Qullarım sevinəcək, sizsə utanacaqsınız.

¹⁴Qullarım şadlanıb mədhiyyələr söyləyəcək,

Sizsə ürək ağrısından qışqıracaqsınız,

Kədərli ruhla fəryad edəcəksiniz.

¹⁵Sizin adınız seçilmiş xalqımın Ağzında ancaq lənət kimi qalacaq.

Xudavənd Rəbb sizi öldürəcək,

Öz qullarına isə başqa ad verəcək.

¹⁶Ölkədə kim xeyir-dua istəsə,

Sadiq Allahdan diləyəcək.

Ölkədə kim and içsə,

Sadiq Allahın adı ilə and içəcək.

Çünki keçmiş əziyyətlər unudulub

Gözümün önündən yox olacaq.

Yeni yer, yeni göylər

¹⁷Budur, Mən yeni göylər və yeni yer yaradıram. Əvvəlki işlər bir daha xatırlanmayacaq,

Heç yada düşməyəcək.

¹⁸Yaratdığımla əbədilik sevinin, şadlanın.

Çünki sevinc üçün yeni Yerusəlimi,

Sakinlərini xoşbəxtlik üçün yaradacağam.

¹⁹Mən Yerusəlim üçün sevinəcəyəm, Xalqım üçün şadlanacağam.

Orada nə ağlaşma, nə fəryad səsi

Bir daha eşidilməyəcək.

²⁰Uşaqlar artıq körpə çağlarında ölməyəcək,

Uzun ömür sürməyən qoca olmayacaq,

Yüz yaşında ölənlər cavan sayılacaq,

Yüz yaşına çatmayanlar lənətli sayılacaq.

²¹Onlar evlər tikib orada məskunlaşacaq,

Üzüm bağları salacaq, bəhrələrindən yeyəcək.

²²Tikdikləri evdə özgələr yaşamayacaq,

Əkdikləri bağın meyvələrini başqaları yeməyəcək.

Çünki xalqım ağaclar tək uzun ömür sürəcək,

Seçilmişlərim əllərinin işlərindən zövq alacaq.

²³Onlar boş yerə əlləşməyəcək,

Övladları bəlalarla üzləşməyəcək.

Çünki özləri də, övladları da,

Rəbbin xeyir-dualı nəsli olacaq.

²⁴Onlar Məni çağırmamışdan

Mən onlara cavab verəcəyəm,

Onlar hələ danışarkən Mən eşidəcəyəm.

²⁵Qurdla quzu bir yerdə otlayacaq, Şir buğa tək saman yeyəcək,

İlanın yediyi torpaq olacaq.

Müqəddəs dağımın heç bir yerində

Heç kimə zərər dəyməyəcək,

Heç bir kəs o birisini məhv etməyəcək».

Rəbb belə deyir.

Yeşaya 66

Mühakimə və ümid

¹Rəbb belə deyir: «Göylər Mənim taxtımdır,

Yer ayaqlarımın altındakı kətildir.

Mənim üçün harada ev tikəcəksiniz,

Dincələcəyim yer harada olacaq?

²Çünki bütün bunları Mənim əlim yaratdı,

Hər şey beləcə əmələ gəldi» Rəbb bəyan edir.

«Ancaq Mən özünü aşağı tutan və ruhu əzilmiş insana,

Sözümün önündə titrəyənə nəzər salaram.

³Buğa kəsən şəxs adam öldürən kimidir,

Quzunu qurban verən şəxs itin boynunu qıran kimidir,

Taxıl təqdimi gətirən şəxs donuz qanını təqdim edən kimidir,

Kündür yandıraraq təqdim edən şəxs bütə pərəstiş edən kimidir.

Onlar öz yolları ilə gedir,

İyrənc işlərindən həzz alır.

⁴Mən də onları çətinliyə düçar edəcəyəm,

Qorxduqları bəlanı başlarına gətirəcəyəm.

Çünki Mən çağıranda onlardan cavab almadım,

Danışanda qulaq asmadılar,

Gözümdə pis olanı etdilər,

Mənə məqbul olmayanı seçdilər».

⁵Ey Rəbbin sözü önündə titrəyənlər,

Onun dediklərini eşidin:

«Mənim adıma görə sizə nifrət edib təqib edən soydaşlarınız

“Qoy Rəbb izzətini göstərsin,

Biz də görək, necə sevinərsiniz” deyirdilər.

Amma onlar rüsvay olacaq.

⁶Şəhərdən nərələr,

Məbəddən bir səs eşidilir!

Bu, düşmənlərindən qisas alan Rəbbin səsidir.

⁷ Bir qadın ağrı çəkmədən,

Sancısı tutmadan bir oğlan uşağı doğdu.

⁸Belə bir şey eşidən olubmu?

Belə şeyləri kim görüb?

Bir gündə ölkə yarana bilərmi?

Bir anda millət doğula bilərmi?

Sion isə ağrısı tutan kimi övladlarını doğdu.

⁹Mən doğuş anınadək gətirib

Doğmağa güc vermərəmmi?» deyir Rəbb.

«Doğuş üçün güc verən Mən

Bətni bağlayarammı?» deyir Allahın.

¹⁰«Yerusəlimlə birgə sevinin,

Ey onu sevənlər, hamınız onun üçün şadlanın.

Ey Yerusəlim üçün yas tutanlar,

Onunla birgə cuşa gəlin, fərəhlənin!

¹¹Siz ananız Yerusəlimin döşlərini əmib

Təsəlli tapacaqsınız, doyacaqsınız,

Onun bol nemətlərindən dadıb zövq alacaqsınız».

¹²Rəbb belə deyir:

«Budur, Mən əmin-amanlığı bir çay tək,

Millətlərin sərvətini daşqın sel kimi

Ona sarı axıdacağam.

Siz ondan bəslənəcəksiniz,

Qucağında daşınacaqsınız,

Dizlərində oxşanacaqsınız.

¹³Övladına təsəlli verən bir ana tək

Mən sizə təsəlli verəcəyəm.

Yerusəlimdə təsəlli tapacaqsınız.

¹⁴Bunları görüb ürəyiniz sevinəcək;

Bədənləriniz yaşıl ot kimi qüvvətlənəcək.

Hər kəs biləcək ki,

Rəbbin qoruyucu əli qullarının,

Qəzəbi isə düşmənlərinin üstündədir».

¹⁵Budur, Rəbb odla gəlir,

Onun döyüş arabaları qasırğa tək gəlir.

Şiddətli qəzəbini, məzəmmətini

Alov kimi tökməyə hazırdır.

¹⁶Rəbb bütün bəşəri odla,

Qılıncı ilə mühakimə edəcək,

Çoxlarını məhv edəcək.

¹⁷«Bağlara girmək üçün

Özlərini təqdis edib pak edənlər,

Mərkəzdə duranın ardınca gedərək

Donuz, siçan və digər murdar heyvanların

Ətini yeyənlərin hamısı məhv olacaq»

Rəbb bəyan edir.

¹⁸«Çünki Mən onların əməllərini də, fikirlərini də bilirəm. Bütün millətləri və dilləri bir yerə topladığım vaxt gəlir. Onlar gəlib Mənim əzəmətimi görəcək. ¹⁹Mən aralarında bir əlamət qoyacağam. Onlardan qaçıb-qurtulanları Mən millətlərə – Tarşişə, Pula, mahir oxatanların vətəni Luda, Tuvala, Yavana, şöhrətimi eşitməyən, əzəmətimi görməyən uzaq diyarlara göndərəcəyəm. Onlar Mənim əzəmətimi bu millətlər arasında bəyan edəcək. ²⁰İsrail övladları Rəbbin məbədinə pak qablarda təqdimlərini necə gətirirlərsə, onlar da bütün millətlərdən soydaşlarını atlarla, arabalarla, taxt-rəvanlarla, qatırlarla, dəvələrlə müqəddəs dağıma, Yerusəlimə, Rəbbə elə təqdim edəcək. ²¹Onlardan bəzisini Mən kahin və Levili seçəcəyəm» Rəbb bəyan edir. ²² «Yaradacağım yeni göylər və yeni yer önümdə necə qalacaqsa,

Nəsliniz və adınız da elə qalacaq»

Rəbb bəyan edir.

²³«Hər Təzə Ay mərasimində, hər Şənbə günündə

Bütün bəşər gəlib qarşımda səcdə edəcək».

Rəbb deyir.

²⁴ «Onlar eşiyə çıxanda

Mənə qarşı üsyankar olanların meyitlərini görəcək.

Meyitləri yeyən qurd ölməyəcək,

Onları yandıran alov sönməyəcək.

Bütün bəşər onlardan iyrənəcək».

Yeşaya | İsayya

Fəsillər

GİRİŞ

PEYĞƏMBƏRLƏR

MÜNDƏRİCAT

You May Also Like

Sefanya

Daniel Fəsillər