Zəbur

Fəsillər

GİRİŞ

«Zəbur» Müqəddəs Kitabın mədh və dualar toplusudur. Bu mədh və dualar uzun illərin məhsulu olub müxtəlif müəlliflər tərəfindən musiqi üstündə yazılmışdır. Hər fəsil ayrılıqda məzmur, yəni ruhani nəğmə adlanır. İsrail xalqı dini ibadətlərində məzmurlardan geniş istifadə edirdi.
Bu mədh və dualar poetik üslubda yazılmışdır. Onlar məzmunca müxtəlifdir: Allaha mədh ilahiləri, kömək, müdafiə, qurtuluş üçün dualar, bağışlanma yalvarışları, Allaha minnətdarlıq məzmurları, tövbə duaları və s. «Zəbur» Kitabında insan duyğuları bütün dolğunluğu ilə təsvir edilir. Kitabın ümumi ideyası budur ki, insan hansı vəziyyətə düşürsə-düşsün, Allah onunladır. Burada həyat həqiqəti və Allahın məhəbbəti sarsılmaz imanla bağlanır. Elə bir insan yoxdur ki, «Zəbur» Kitabını oxuyub orada öz duyğularının əksini tapmasın.
Bu kitab İsa Məsihə iman edənlərin cəmiyyətlərinin yaranmasından bəri istifadə etdikləri ruhani xəzinələrdən biridir.
Rus və bəzi tərcümələrdə məzmurların əksəriyyəti qədim yunan tərcüməsinə əsaslandığından sıra sayı fərqlidir. Əlinizdəki tərcümədə isə onların sıra sayı əsl ibrani mətnində, ingilis və başqa Avropa dillərində olan tərcümələrdə istifadə olunan sıra sayına uyğundur. İbrani mətni ilə qədim yunan tərcüməsində olan sıra sayının fərqi belədir:
İbrani mətni (qədim yunan tərcüməsi): 1-8(1-8), 9-10(9), 11-113(10-112), 114-115(113), 116(114-115), 117-146(116-145), 147(146-147), 148-150(148-150)Kitabın məzmunu:

«Zəbur» Kitabı ənənəvi olaraq 5 hissəyə bölünür:

1. 1-41-ci məzmurlar
2. 42-72-ci məzmurlar
3. 73-89-cu məzmurlar
4. 90-106-cı məzmurlar
5. 107-150-ci məzmurlar

Birinci hissə

Zəbur 1 | Məzmur 1

1. Pislərin məsləhəti ilə getməyən,
Günahkarların yolunda dayanmayan,
Rişxəndçilərin arasında oturmayan insan nə bəxtiyardır!
2. O ancaq Rəbbin Qanunundan zövq alar,
Gecə-gündüz bu təlimatı dərin düşünər.
3. Axar sular kənarında əkilən ağac kimi
Barını mövsümündə verər,
Yarpağı solmaz,
Etdiyi hər işdə uğur qazanar.
4. Pis adamlarsa belə deyil,
Onlar yelin sovurduğu saman çöpünə bənzəyər.
5. Buna görə pis adamlar hökm günündə,
Günahkarlar salehlərin məclisində dayana bilməz.
6. Çünki Rəbb salehlərin yolunu qoruyur,
Pislərinsə yolu onları ölümə aparır.

Zəbur 2 | Məzmur 2

1. Nə üçün millətlər belə vurnuxmaya düşür,
Ümmətlər boş şeylər düşünür?
2. Dünya şahları yığışır,
Hökmdarlar Rəbbə və
Onun məsh etdiyinə qarşı birləşir.
3. Deyirlər: «Gəlin onların buxovlarını qoparaq,Üstümüzdəki zəncirlərini ataq».
4. Göylərin sakini gülür,
Xudavənd onlara istehza edir.
5. Sonra onlara hiddəti ilə xəbərdarlıq edəcək,
Qəzəbi ilə onları dəhşətə gətirəcək.
6. O deyir: «Mən padşahımı
Müqəddəs dağım Sionda əyləşdirmişəm».
7. Rəbbin fərmanını elan edəcəyəm.
Rəbb mənə dedi: «Sən Mənim oğlumsan,
Mən bu gün sənə Ata oldum.
8. Məndən istə, onda irs olaraq millətləri,
Mülk olaraq yer üzünün qurtaracağınadək hər yeri Sənə verərəm.
9. Onları dəmir əsa ilə qıracaqsan,
Saxsı qab kimi çilik-çilik edəcəksən».
10. İndi, ey şahlar, müdrik olun!
Ey dünya hakimləri, ibrət alın!
11. Rəbdən qorxub Ona xidmət edin,
Həm titrəyin, həm sevinin.
12. Oğulu öpün ki, qəzəblənməsin,
Yoxsa tutduğunuz yolda məhv olarsınız.
Çünki qəzəbi tezliklə alovlanar.
Ona pənah gətirənlərin hamısı nə bəxtiyardır!

Zəbur 3 | Məzmur 3

Davudun məzmuru.
Oğlu Avşalomun qarşısından qaçanda.
1. Ya Rəbb, düşmənlərim nə qədər çoxalıb!
Əleyhimə qalxanlar nə qədər artıb!
2. Mənim üçün çoxları deyir:
«Allahdan ona xilas yoxdur».
Sela
3. Amma Sən, ya Rəbb, ətrafımda sipərsən,
Şərəfimsən, başımı ucaldan Sənsən!
4. Rəbbi ucadan səsləyirəm,
O, müqəddəs dağından mənə cavab verir.
Sela
5. Mən yatıram, yuxuya gedirəm,
Yenə oyanıram, çünki Rəbb mənə kömək edir.
6. Hər yandan məni mühasirəyə alan
On minlərlə xalqdan qorxmuram.
7. Qalx, ya Rəbb! Ey Allahım, məni qurtar!
Çünki Sən bütün düşmənlərimin əngindən vurursan,
Pislərin dişlərini qırırsan.
8. Qurtuluş Rəbdəndir,
Qoy Sənin xeyir-duan xalqının üzərində olsun!
Sela

Zəbur 4 | Məzmur 4

Musiqi rəhbəri üçün.
Davudun simli alətlərin müşayiəti ilə oxunan məzmuru.
1. Səni çağıranda mənə cavab ver,
Ey adil Allahım!
Dara düşən zaman məni genişə çıxar,
Mənə lütf edib duama qulaq as!
2. Ey insan övladları, nə vaxtadəkŞərəfimi rüsvayçılığa çevirəcəksiniz?
Nə vaxtadək boş şeylərə meyl göstərib
Yalan axtaracaqsınız?
Sela
3. Bilin ki, mömin insanı Rəbb Özü üçün ayırıb;
Nə vaxt Rəbbi çağırsam, məni eşidir.
4. Qorxub-titrəyin, günah etməyin,
Yatağınızda olarkən ürəyinizdə düşünün, dinməyin.
Sela
5. Salehlik qurbanları kəsin,
Rəbbə güvənin.
6. Çoxları deyir: «Kim bizə yaxşılıq edəcək?»
Ya Rəbb, üzünün nurunu üstümüzə sal.
7. Onların bol taxıl və təzə şəraba görə sevindiklərindən də çox
Mənim qəlbimə sevinc verdin.
8. Arxayın yatıb yuxuya gedirəm,
Çünki yalnız Sən, ya Rəbb, məni əmin-amanlıqda yaşadırsan!

Zəbur 5 | Məzmur 5

Musiqi rəhbəri üçün.
Davudun nəfəs alətlərinin müşayiəti ilə oxunan məzmuru.
1. Ya Rəbb, sözlərimə qulaq as,
Ah-naləmə nəzər sal.
2. Ey Padşahım, ey Allahım, fəryad səsimə qulaq as,
Çünki Sənə dua edirəm.
3. Ya Rəbb, səhər erkən səsimi eşidirsən,
Səhər erkən Sənə dua edib cavab gözləyirəm.
4. Çünki Sən pislikdən xoşlanan Allah deyilsən,
Şər Sənin yanına gəlməz.
5. Təkəbbürlülər hüzurunda dayana bilməz,
Bütün şər iş görənlərə nifrət edirsən.
6. Yalan söyləyənləri məhv edirsən,
Ya Rəbb, qaniçənlərdən, hiyləgərlərdən ikrah edirsən.
7. Fəqət mən bol məhəbbətin naminə evinə gələcəyəm,
Üz tutub müqəddəs məbədinə qorxu ilə səcdə edəcəyəm.
8. Ya Rəbb, ədalətinlə məni düz yola yönəlt,
Düşmənlərimin üzündən Ö z yolunu qarşımda düzəlt.
9. Onların dillərində düz söz yoxdur,
Ürəkləri pis niyyətlə doludur.
Boğazları açıq qəbirdir,
Dilləri yalan danışır.
10. Ey Allah, onları təqsirkar çıxar,
Qoy niyyətlərinə görə bu şər insanlar yıxılsın.
Onları saysız günahlarına görə qov,
Çünki Sənin əleyhinə qalxıblar.
11. Sənə pənah gətirənlərsə qoy sevinsin,
Qoy Səni daima mədh etsinlər,
Çünki onları Sən qoruyursan.
Səni sevənlər sevincdən cuşa gəlsin!
12. Ya Rəbb, salehə xeyir-dua verirsən,
Lütfünlə sipər kimi onları hifz edirsən.

Zəbur 6 | Məzmur 6

Musiqi rəhbəri üçün.
Davudun səkkiz simli alətlərin müşayiəti ilə oxunan məzmuru.
1. Ya Rəbb, qəzəblənib məni töhmətləndirmə,
Hiddətlənib məni tənbeh etmə.
2. Ya Rəbb, mənə rəhm et,
Çünki taqətim qalmayıb.
Mənə şəfa ver, ya Rəbb,
Sümüklərim sızlayır.
3. Canıma vəlvələ düşüb.
Ya Rəbb, bu nə vaxtadək olacaq?
4. Ya Rəbb, gəl, mənə kömək et,
Məhəbbətin naminə məni xilas et!
5. Səni ölüb-gedən insan xatırlamaz.
O necə ölülər diyarından Sənə şükür etsin?
6. Öz ah-naləmdən bezmişəm,
Hər gecə ağlamaqdan döşəyim islanır,
Göz yaşlarımdan yatağım yaş olur.
7. Qəmdən gözümün nuru sönüb,
Gözlərim düşmənləri görməkdən zəifləyib.
8. Siz ey şər iş görənlər, məndən uzaq durun!
Çünki Rəbb hönkürtümü eşitdi,
9. O, yalvarışımı dinlədi,
Rəbb duamı qəbul etdi!
10. Bütün düşmənlərim rüsvay olacaq,
Canlarına vəlvələ salınacaq,
Xəcalət içində bir andaca geri qayıdacaq.

Zəbur 7 | Məzmur 7

Davudun Binyaminli Kuşa görə Allaha oxuduğu şiqqayon.
1. Ey Rəbb Allahım, Sənə sığınmışam,
Məni bütün təqibçilərimdən qurtar,
Məni xilas et.
2. Yoxsa aslan kimi məni parçalayarlar,
Xilas edən olmasa, məni didib-dağıdarlar.
3. Ya Rəbb Allahım, əgər günah etmişəmsə,
Əllərimdən haqsızlıq gəlibsə,
4. Əgər dostuma xəyanət etmişəmsə,
Düşmənimi nahaqdan qarət etmişəmsə,
5. Qoy məni düşmən qovub tutsun,
Bədənimi təpik altına salsın,
Şərəfimi yerə vursun.
Sela
6. Qəzəblə qalx, ya Rəbb,
Düşmənlərimin hiddətinə qarşı çıxıb yüksəl!
Mənə görə oyan,
Hökmünü bəyan et!
7. Salehliyinə görə Rəbbə şükür edəcəyəm, (Ümmətlər icması Sənin ətrafına yığılsın,)
Uca Rəbbin adını tərənnüm edəcəyəm. (Sən onların başı üzərində ucal, hökmünü ver.)
8. Rəbb xalqlar üzərində hakimlik edir;
Məni mühakimə et, ya Rəbb,
Salehliyimə, kamilliyimə görə mənə haqq qazandır!
9. Pislərin pisliyi sona yetsin,
Salehlərsə möhkəmlənsin!
Ey adil Allah, çünki Sən düşüncələri, hissləri bilirsən.
10. Allah mənim sipərimdir,
Ürəyidüz olanları xilas edir.
11. Allah adil hakimdir,
Hər gün haqsızlığa görə hökm verir.
12. Pislər yolundan dönməzsə,
O, qılıncını itilər,
Ox-kamanını qurar,
13. Onlara qarşı ölüm silahları hazırlayar,
Yandırıcı oxları ilə nişan alar.
14. Pislər hiyləyə hamilə olar,
Şər üçün ağrı çəkər, yalan doğar.
15. Onlar başqasına quyu qazar, dərinləşdirər,
Qazdıqları quyuya özləri düşər.
16. Yamanlıqları öz üstlərinə dönər,
Zorakılıqları başlarına düşər.
17. Rəbbə ədalətinə görə şükür edəcəyəm,
Haqq-Taala Rəbbin ismini tərənnüm edəcəyəm!

Zəbur 8 | Məzmur 8

Musiqi rəhbəri üçün.
Davudun «Gittit» üstə oxunan məzmuru.
1. Ey Xudavəndimiz Rəbb,
İsmin bütün yer üzündə nə qədər əzəmətlidir!
Ehtişamın göylərə qalxır!
2. Düşməni və qisasçını susdurmaq üçün
Körpələrin və çağaların səsi ilə
Yağılarına qarşı qala qurdun.
3. Əllərinin işi olan göyləri,
Öz yerinə düzdüyün ay və ulduzları gördükdə deyirəm:
4. «İnsan kimdir ki, onun haqqında düşünürsən?
Bəşər oğlu kimdir ki, onun qayğısını çəkirsən?»
⁵Onu Allahdan bir az aşağı yaratdın,
İzzət və əzəmət tacını onun başına qoydun,
6. Əllərinin işləri üzərində onu hökmdar etdin.
Hər şeyi onun ayağının altına qoydun:
7. Bütün sürü və naxırları,
Çöldə yaşayan heyvanları,
8. Göydəki quşları, dənizdəki balıqları,
Dəryalarda üzənlərin hamısını.
9. Ey Xudavəndimiz Rəbb,
İsmin bütün yer üzündə nə qədər əzəmətlidir

Zəbur 9 | Məzmur 9

Musiqi rəhbəri üçün.
Davudun «Mut-labben» üstə oxunan məzmuru.

1. Bütün ürəyimlə Rəbbə şükür edəcəyəm,
Bütün xariqələrini deyəcəyəm.
2. Sənə görə fərəhimdən sevinib cuşa gələcəyəm,
Ey Haqq-Taala, ismini tərənnüm edəcəyəm!
3. Düşmənlərim geri dönəndə
Sənin önündə səndələyərək yıxılıb məhv olurlar.
4. Çünki Sən haqqımı və mübarizəmi gördün,
Taxtında oturub ədalətlə hökm etdin.
5. Sən millətləri məzəmmət, pisləri yox etdin,
Adlarını əbədilik sildin.
6. Düşmənin sonu çatdı, o əbədi viran oldu,
Şəhərlərini təməlindən qopartdın, bir nişanə qalmadı.
7. Rəbb isə əbədi olaraq hökmranlıq edir,
O, taxtını hökm üçün qurub.
8. Dünyaya ədalətlə hökm edir,
Ümmətlərə insafla hakimlik edir.
9. Rəbb məzlumların pənahgahıdır,
Sıxıntı anlarında müdafiə qalasıdır.
10. İsmini tanıyanlar Sənə güvənir,
Çünki, ya Rəbb, Səni axtaranları tərk etməzsən!
11. Sionun sakini olan Rəbbi tərənnüm edin!
Xalqlar arasında Onun işlərini bəyan edin!
12. O, tökülən qanın qisasını alır, yadda saxlayır,
Məzlumların fəryadını unutmur.
13. Ya Rəbb, rəhm et!
Ey ölüm qapılarından məni qurtaran,
Mənə nifrət edənlərin üzündən çəkdiyim dərdə bax!
14. Sion qızının darvazalarında
Qoy Sənə edilən həmdlərimdən danışım,
Səndə xilas taparaq şadlanım!
15. Millətlər qazdıqları quyuya özləri düşüb,
Qurduqları tələyə öz ayaqları ilişib.
16. Rəbb Özünü göstərib hökmünü yeritdi,
Pislər öz əməlləri ilə tora düşdü.
Hiqqayon, Sela
17. Pis adamlar ölülər diyarına düşəcək,
Allahı unudan bütün millətlər də oraya gedəcək.
18. Çünki fəqir adam həmişəlik unudulmaz,
Məzlumun ümidi əbədi olaraq boşa çıxmaz.
19. Ya Rəbb, qalx, qoy insan qalib gəlməsin,
Sənin hüzurunda millətlər məhkum edilsin.
20. Ya Rəbb, qoy millətlər Səndən qorxsunlar,
Qoy onlar bilsinlər ki, yalnız insandırlar.
Sela

Zəbur 10 | Məzmur 10

1. Ya Rəbb, nə üçün uzaqda durmusan?
Mən dara düşəndə niyə gizlənirsən?
2. Pislər təkəbbürlə məzlumları təqib edir,
Öz qurduqları fəndlərə özləri düşür.
3. Pis insan könlünün istəkləri ilə fəxr edir,
Acgöz Rəbbə xor baxır, Ona küfr edir.
4. Təkəbbürlü, pis insan Allahı axtarmaz,
«Allah yoxdur» deyə düşünər.
5. Belə insan həmişə uğur qazanar,
Bütün düşmənlərinə xor baxar.
Sənin hökmlərinsə onun dərrakəsindən çox uzaqdır.
6. Ürəyində deyir: «Sarsılmaram,
Heç zaman fəlakətə düşmərəm».
7. Onun ağzı lənətlə, hiylə ilə, hədə ilə doludur,
Dilinin altında zülm və şər var.
8. Kəndlərdə pusqu yerlərini qurar,
Günahsızları xəlvətcə öldürər.
Biçarəyə göz qoyub gizlicə güdər,
9. Yuvasında oturmuş aslan kimi gizli yerdə pusqu qurar,
Məzlumu tutmaq üçün güdər,
Toruna salıb onu tutar.
10. Biçarələrin başından basıb qəddini qırar,
Onlar bu pis adamın əlindən yıxılar.
11. Pis adam belə düşünər:
«Allah məni yaddan çıxarıb,
Heç vaxt görməz, çünki mənə göz yumub».
12. Ya Rəbb, qalx, ey Allah, onlara əl qaldır!
Unutma məzlumları!
13. Niyə pis insan Allaha küfr etsin?
Niyə ürəyində «məndən əvəzini çıxmaz» desin?
14. Amma Sən bu əzab-əziyyətə baxırsan,
Məzluma kömək əlini uzadırsan.
Biçarə özünü Sənə tapşırar,
Yetimlərin imdadı Sənsən.
16. Şər iş görənin, pis insanın qol-qanadını qır,
Axıracan pisliklərini ifşa et.
16. Rəbb sonsuzadək, əbədi padşahdır!
Onun diyarından millətlər yox olacaq.
17. Ya Rəbb, məzlumların səsini eşidəcəksən,
Onları ürəkləndirib diqqət yetirəcəksən.
18. Yetimə, fəqirə ədalət göstərəcəksən;
Belə ki torpaqdan yaradılan insan
Bir daha təhlükə yaratmasın.

Zəbur 11 | Məzmur 11

Musiqi rəhbəri üçün.
Davudun məzmuru.
1. Rəbbə pənah gətirmişəm.
Könlümə necə deyə bilərsiniz ki,
Quş kimi dağlara uç?
2. Bax pislər ox-kaman qurublar,
Oxlarını yayın üstünə qoyublar,
Qaranlıqda dayanıblar,
Ürəyidüz olanları nişan alıblar.
3. Əgər hər şey təməlindən dağılarsa,
Salehlər nə edə bilər?
4. Rəbb Öz müqəddəs məbədindədir,
Onun taxtı göylərdədir.
Rəbbin görən gözləri var, gözünü açar,
Bəşər övladlarına diqqətlə baxar.
5. Rəbb saleh adamı sınaqdan keçirir,
Pisə, zülmkarasa nifrət edir.
6. Pislərin üstünə odlu köz, kükürd yağdırır,
Onların kasalarına düşən pay səmum yeli olacaq.
7. Çünki Rəbb adildir, ədaləti sevir,
Əməlisalehlər Onun üzünü görəcək.

Zəbur 12 | Məzmur 12

Musiqi rəhbəri üçün.
Davudun səkkiz simli alətlərin müşayiəti ilə oxunan məzmuru.
1. Ya Rəbb, bizə yardım et, mömin insan qalmayıb,
Bəşər övladları arasında vəfalılar qurtarıb.
2. Hər kəs başqasına yalan söyləyir,
Ağzı yalan danışır, ikiüzlülük edir.
3.Qoy Rəbb yalan danışan hər ağzı yumsun,
Hər lovğa dili kəssin!
4. Onlar deyir ki, biz dilimizlə zəfər çalacağıq.
Bu ağız bizdədirsə, kim bizə ağalıq edə bilər?
5. Rəbb deyir: «İndi qalxacağam,
Çünki fəqirlərə zülm edilir,
Məzlumlar nalə çəkir, qurtuluş istəyir.
Mən bunu onlara verəcəyəm».
6. Rəbbin kəlamları pakdır,
Kürədə əridilən, yeddi dəfə təmizlənən gümüş kimidir.
7. Sən, ya Rəbb, onları qoru,
Bu nəsildən onların hər birini əbədilik hifz et.
8. Bəşər övladları arasında namərdlik artarkən
Hər yanda pislər gəzər.

Zəbur 13 | Məzmur 13

Musiqi rəhbəri üçün.
Davudun məzmuru.
1. Ya Rəbb, nə vaxtadək,
Yoxsa əbədilikmi məni unudacaqsan?
Nə vaxtadək məndən üzünü gizlədəcəksən?
2. Nə vaxtadək qəlbim qəmli olacaq?
Könlümdə hər günmü qubar qalacaq?
Nə vaxtadək düşmənim üstün olacaq?
3. Bax mənə, cavab ver, ey Allahım Rəbb!
Gözümə nur ver ki, əcəl yuxusuna getməyim.
4. Qoy düşmənlərim «uddum onu» deməsinlər,
Mən sarsılarkən şənlənməsinlər.
5. Sənin məhəbbətinə güvənirəm,
Qurtuluşunla qəlbim şadlanacaq.
6. Rəbbə ilahi nəğməmi oxuyacağam,
Çünki mənə comərdlik etdi.

Zəbur 14 | Məzmur 14
(Zəbur 53)

Musiqi rəhbəri üçün.
Davudun məzmuru.
1. Axmaqlar ürəyində «Allah yoxdur!» deyə düşünürlər.
İnsanlar pozulmuş, əməlləri iyrənc olmuş,
Yaxşı iş görən yoxdur.
2. Rəbb göylərdən bəşər övladına baxır.
Görəsən Allahı dərk edən, Onu axtaran varmı?
3. Hamı birgə pozulub, namus əldən gedib,
Bir nəfər də olsun yaxşı iş görən yoxdur.
4. Şər iş görənlərin hər biri məgər heç nə qanmır?
Xalqımı çörək yerinə yeyirlər, Rəbbi çağırmırlar.
5. Onlar böyük dəhşətə düşəcək,
Lakin Allah salehlərin nəslinə yar olacaq.
6. Onlar məzlumların niyyətini boşa çıxarır,
Amma Rəbb məzlumların pənahıdır.
7. Kaş İsrailin azadlığı Siondan gələydi!
Rəbb Öz xalqına bəxtəvər günlərini qaytaran zaman
Yaqub övladları şadlıq edəcək,
İsraillilər sevinəcək!

Zəbur 15 | Məzmur 15

Davudun məzmuru.
1. Ya Rəbb, çadırında kim qalar?
Müqəddəs dağında kim məskən salar?
2. Kamillik yolu ilə gedən,
Əməlisaleh olan,
Ürəkdən həqiqəti söyləyən,
3. Dilinə böhtan gəlməyən,
Dostuna yamanlıq etməyən,
Qonşusunu təhqir etməyən,
4. Şərəfsizə xor baxan,
Rəbdən qorxanlarasa hörmət edən,
Zərərinə olsa belə, andından geri dönməyən,
5. Sələmlə pul verməyən,
Təqsirsizin əleyhinə işləmək üçün rüşvət almayan.
Əsla sarsılmaz belə həyat sürən insan!

Zəbur 16 | Məzmur 16

Davudun miktamı.
1. Ey Allah, məni hifz et,
Sənə pənah gətirmişəm.
2. Rəbbə dedim: «Mənim Xudavəndim Sənsən.
Səndən başqa mənim xoşbəxtliyim yoxdur.
3. Yer üzünün müqəddəsləri isə nəcib insanlardır,
Yalnız belələrindən zövq alıram.
4. Yad allahların ardınca qaçanların dərdi artacaq,
Onlar üçün qan təqdimləri vermərəm,
Adlarını dilimə gətirmərəm.
5. Ya Rəbb, mənim qismətimsən, kasama düşən paysan,
Püşkümə düşən Səndən asılıdır.
6. Qismətimə gözəl yerlər düşdü,
Bəli, mənə nemət nəsib oldu.
7. Mənə nəsihət verən Rəbbə alqış edirəm,
Hətta gecələr də vicdanım mənə ağıl öyrədir.
8. Rəbbə əbədilik üz tutmuşam,
Sağımda olduğu üçün sarsılmaram.
9. Elə bunun üçün qəlbim sevinir, ruhum şad olur,
Cismim əmin-amanlıqda yaşayır.
10. Çünki məni ölülər diyarına atmazsan,
Mömin insanını qəbirə salmazsan.
11. Mənə həyat yolunu öyrədirsən,
Doyunca sevinc Sənin hüzurundadır,
Sağ əlində hər zaman səadət var».

Zəbur 17 | Məzmur 17

Davudun duası.
1. Ya Rəbb, haqq sözümü dinlə, fəryadımı eşit,
Yalansız dilimdən çıxan duama qulaq as.
2. Gözlərinlə həqiqəti görürsən,
Mənə haqq qazandır.
3. Gecə ikən qəlbimi yoxlayıb-araşdırdın,
Məni sınaqdan keçirtdin,
Heç nə tapmadın.
Niyyətim budur ki, ağzım öz həddini aşmasın.
4. Sənin sözünə görə zalımların tutduğu yoldan,
Bu insanların əməlindən özümü qorumuşam.
5. Sənin yolundan möhkəm tutmuşam,
Sarsılmadan addımlamışam.
6. Səni çağırıram, ey Allah, mənə cavab verirsən,
Qulağını mənə tərəf çevir, sözlərimi dinlə.
7. Məhəbbətinlə Sənə sığınanlara xariqələrini göstər,
Sağ əlinlə onları düşmənlərdən qurtar.
8. Məni göz bəbəyin kimi qoru,
Qanadlarının kölgəsində saxla
9. Məni dara salan şər insanlardan,
Ətrafımı bürüyən, canıma düşmən olanlardan.
10. Onların ürəkləri qapalıdır, harınlayıblar,
Ağızlarından lovğa-lovğa sözlər çıxarırlar.
11. İndi izimə düşüb məni mühasirəyə aldılar,
Güdürlər ki, məni yerə vursunlar.
12. Onlar parçalamağa həris bir aslan kimidir,
Pusquda duran cavan bir şir kimidir.
13. Ya Rəbb, qalx,
Onların önündə dayan,
Onları yerlə yeksan et.
Qılıncınla bu pis insanlardan canımı qurtar.
14. Ya Rəbb, məni belə insanlardan,
Nəsibi bu həyatda olanlardan
Öz əlinlə xilas et!
Qarınlarını xəzinənlə doldurursan,
Onlar övladlarını doydurur,
Nəvə-nəticələrinə də miras qoyur.
15. Amma mən salehliklə üzünə baxacağam,
Oyananda Səni görməklə doyacağam.

Zəbur 18 | Məzmur 18
(İkinci Şamuel 22:1-51)

Musiqi rəhbəri üçün.
Rəbb Öz qulu Davudu bütün düşmənlərin və Şaulun əlindən qurtaranda Davudun Ona söylədiyi ilahi.
1. O belə oxudu:
Ey mənə qüvvət verən Rəbb, Səni sevirəm.
2. Rəbb qayam, qalam, xilaskarımdır,
Allahım qayamdır, Ona pənah gətirəcəyəm,
Odur qalxanım, qüdrətli qurtarıcım, qülləm.
3. Həmdə layiq Rəbbi çağıracağam,
Düşmənlərimin əlindən qurtulacağam.
4. Ətrafımı ölüm ipləri bürümüşdü,
Məni əcəl selləri ürkütmüşdü.
5. Ölülər diyarının ipləri mənə sarılmışdı,
Ölüm kəməndləri məni qarşılamışdı.
6. Əzab içində Rəbbə yalvardım,
Allahıma fəryad qopardım.
O, məbədindən səsimi eşitdi,
Fəryadımsa hüzuruna, Onun qulağına yetdi.
7. O zaman yer üzü sarsılıb titrədi,
Dağların təməlləri lərzəyə gəldi,
Onlar sarsıldı,
Çünki O qəzəbləndi.
8. Burnundan tüstü çıxıb yüksəldi,
Ağzından yandırıb-yaxan alov püskürdü,
Bundan közlər tutuşdu.
9. O, göyləri yarıb yerədək endi,
Qatı zülmət ayaqları altında idi.
10. Bir keruva minib uçdu,
Yel qanadları üstə şığıdı.
11. Gizlənmək üçün ətrafını zülmətə bürüdü,
Tufan qoparan qara buludlardan Özünə çardaq qurdu.
12. Hüzurundan şəfəq saçdı,
Odlu közlər və dolu buludları yardı.
13. Rəbb göylərdə gurladı,
Haqq-Taala səs saldı,
Odlu közlər və dolu yağdı.
14. Oxlarını atıb düşmənləri darmadağın etdi,
Şimşəyini çaxdırıb onları dağıtdı.
15. Ya Rəbb, Sənin məzəmmətindən,
Burnundakı nəfəsinin şiddətindən
Suların dərinlikləri göründü,
Dünyanın bünövrələri açıq qaldı.
16. O, ucalardan əl uzadıb məni tutdu,
Məni dərin suların içindən çıxartdı.
17. Məni qüvvətli düşmənimdən azad etdi,
Çünki yağılarım məndən güclü idi.
18. Fəlakətli günümdə qarşıma çıxdılar,
Lakin Rəbb mənə dayaq oldu.
19. O məni genişliyə çıxardı,
Məndən razı qalıb məni qurtardı.
20. Rəbb mənə salehliyim naminə ənam verdi,
Mənə əlitəmizliyimin əvəzini verdi.
21. Çünki Rəbbin yolunu tutmuşam,
Pis olub Allahımın yolundan azmamışam.
22. Onun bütün hökmləri önümdədir,
Qaydalarından imtina etməmişəm.
23. Onunla mən kamala çatmışam,
Özümü günahdan qorumuşam.
24. Rəbb mənə salehliyimin əvəzini verdi,
Gözünün önündə əlitəmiz olmağımın əvəzini verdi.
25. Sədaqətlilərlə sədaqətlisən,
Kamillərlə kamilsən.
26. Təmizlərlə təmizsən,
Əyrilərlə əyriliyinə görə davranırsan.
27. İtaətkar insanları qurtarırsan,
Təkəbbürlü baxışları alçaldırsan.
28. Ya Rəbb, Sən çırağıma işıq verirsən!
Allahım Rəbb zülmətimi nura çevirir.
29. Səninlə qoşun üstünə hücum çəkirəm,
Allahımla sədlər keçirəm.
30. Allahın yolu kamildir,
Rəbbin kəlamı safdır,
Rəbb Ona sığınanların sipəridir.
31. Rəbdən başqa Allah kimdir ki?
Allahımızdan başqa qaya kimdir ki?
32. Allah məni qüvvəsi ilə bürüyər,
Yolumu kamil edər.
33. Ayaqlarımı maral ayaqları kimi çevik edər,
Məni zirvələrimdə saxlar.
34. Əllərimə döyüş təlimi verər,
Qollarım tunc kamanın yayını dartar.
35. Sən mənə qurtuluş qalxanını verdin,
Mənə sağ əlinlə dayaq oldun,
Köməyinlə məni yüksəltdin.
36. Geniş yer açdın ki, addımlayım,
Ayaqlarım büdrəməsin.
37. Düşmənlərimi qovub onlara çatdım,
Onlar məhv olanadək geriyə qayıtmadım.
38. Onları əzdim, qalxa bilmədilər,
Ayaqlarımın altına sərildilər.
39. Döyüş üçün məni qüvvə ilə bürüdün,
Əleyhdarlarımı ayağımın altına saldın.
40. Düşmənlərimin kürəyini mənə sarı çevirdin,
Mənə nifrət edən yağıları məhv etdim.
41. Fəryad etsələr də, onları qurtaran olmadı,
Rəbbi çağırsalar da, cavab almadılar.
42. Onları əzib külək sovuran toz etdim,
Küçələrin palçığı kimi tapdaladım.
43. Sən məni xalqın çəkişmələrindən qurtardın,
Məni millətlərə başçı qoydun,
Tanımadığım xalqları mənə tabe etdirdin.
44. Yadellilər mənə boyun əydilər,
Səsimi eşidəndə mənə itaət etdilər.
45. Yadellilərin cəsarəti qırıldı,
Titrəyərək sığınacaqlarından çıxdılar.
46. Rəbb əbədi yaşayır! Qayama alqış olsun!
Məni qurtaran Allahım ucalsın!
47. O, Allahdır, mənə görə qisas alır,
Xalqları mənə tabe etdirir.
48. O məni düşmənlərimin arasından xilas edir,
Bəli, məni yağılar üstündə ucaldır,
Məni zalımların əlindən qurtarır.
49. Buna görə, ya Rəbb,
Millətlər arasında Sənə şükür edəcəyəm,
İsminə tərənnüm söyləyəcəyəm.
50. Rəbb padşahına böyük zəfərlər verər,
Məsh etdiyi Davuda və nəslinə əbədi məhəbbət göstərər.

Zəbur 19 | Məzmur 19

Musiqi rəhbəri üçün.
Davudun məzmuru.
1. Göylər Allahın əzəmətini bəyan edir,
Göy qübbəsi əllərinin işini elan edir.
2. Hər gün ertəsi günə nəql edir,
Hər gecə o biri gecəyə bilik verir.
3. Onların nə nitqi, nə də sözləri var,
Onların səsləri eşidilmir.
4. Amma avazları bütün dünyaya yayılır,
Sözləri yerin ucqarlarına çatır.
Allah günəş üçün göylərdə çadır qurur,
5. Günəş gərdəyindən bəy kimi çıxır,
Qaçışa çıxan bir igid kimi şad olur.
6. Bir tərəfdən çıxır, göylərdə dövrə vurur,
Heç nə istisindən gizlənə bilmir.
7. Rəbbin qanunu kamildir, canı təzələyir,
Rəbbin öyüdü etibarlıdır, nadanı müdrik edir.
8. Rəbbin qayda-qanunları düzdür, ürəyi sevindirir,
Rəbbin əmrləri pakdır, gözləri aydın edir.
9. Rəbb qorxusu safdır, əbədi yaşayır,
Rəbbin hökmləri haqdır, hamısı ədalətlidir.
10. Onlar qızıldan, bol miqdarda olan saf qızıldan da çox sevilir,
Onlar baldan, şanı balından da şirindir.
11. Bəndən bunlardan nəsihət alar,
Onlara əməl edənin bol mükafatı var.
12. Kim öz səhvlərini duya bilər?
Məni gizli təqsirlərimdən təmizlə.
13. Qulunu aşkar günahlardan qoru,
Qoyma onların hökmü altında qalım.
Onda kamilliyə çataram,
Bütün itaətsizliklərdən ayrılaram.
14.Ağzımdan çıxan sözlər,
Qəlbimdəki düşüncələr
Hüzurunda qəbul olunsun.
Ya Rəbb, ey Qayam və Satınalanım!

Zəbur 20 | Məzmur 20

Musiqi rəhbəri üçün.
Davudun məzmuru.
1. Dar gündə Rəbb sənə cavab versin,
Yaqubun Allahının ismi səni hifz etsin!
2. Müqəddəs məskənindən köməyinə çatsın,
Siondan sənə dayaq olsun!
3. Bütün təqdimlərindən razı qalsın,
Yandırma qurbanların qəbul olunsun!
Sela
4. O səni ürəyinin istəyinə çatdırsın,
Hər bir niyyətini yerinə yetirsin!
5. Biz sənin zəfərlərinə mədh oxuyarıq,
Allahımız naminə bayraqlarımızı qaldırarıq!
Rəbb səni hər bir diləyinə çatdırsın!
6. İndi bildim ki, Rəbb məsh etdiyinə zəfərlər verər,
Müqəddəs səmasından ona cavab göndərər,
Sağ əlinin qüdrəti onu qalib edər.
7. Bəziləri döyüş arabaları, bəziləri atları ilə öyünür,
Bizsə Allahımız Rəbbin adı ilə öyünürük.
8. Onlar büdrəyəcəklər, yıxılacaqlar,
Bizsə qalxıb dik duracağıq.
9. Ya Rəbb, Sən padşaha zəfər ver,
Səni çağırarkən bizə cavab ver.

Zəbur 21 | Məzmur 21

Musiqi rəhbəri üçün.
Davudun məzmuru.
1. Ya Rəbb, padşah qüdrətinlə sevinir,
Zəfərinlə fərəhlənir.
2. Onu ürəyinin arzusuna çatdırmısan,
Dilindən çıxan diləyini ondan əsirgəməmisən.
Sela
3. Çünki onu yaxşı nemətlərlə qarşılamısan,
Saf qızıldan başına tac qoymusan.
4. Səndən həyat istəyəndə ona verdin,
Onun ömrünü əbədi olaraq uzatmısan.
5. Ona zəfər çaldıraraq şərəfini ucaltmısan,
Ehtişam və əzəmət bağışlamısan.
6. Əbədi olaraq başına nemətlər tökmüsən,
Hüzurundakı sevinclə Sən onu fərəhləndirmisən.
7. Çünki padşah Rəbbə güvənir,
Haqq-Taalanın məhəbbəti ilə sarsılmazdır.
8. Əlin bütün düşmənlərini tapacaq,
Sağ əlin yağıları tutacaq.
9. Ya Rəbb, onlara görünən zaman
Sən onları soba tək yandıracaqsan,
Onları qəzəbinlə yeyib, alovunla udacaqsan.
10. Övladlarını yer üzündən,
Gələcək nəsillərini insanlar arasından yox edəcəksən.
11. Çünki pis niyyətlə əleyhinə çıxdılar,
Hiylə işlətdilər, amma gücləri çatmadı.
12. Çünki Sən onları geri qovacaqsan,
Yay çəkib oxla üzlərini nişan alacaqsan.
13. Ya Rəbb, qoy Sənin uca qüdrətini görək!
Əzəmətini ilahilərlə tərənnüm edək!

Zəbur 22 | Məzmur 22

Musiqi rəhbəri üçün.
Davudun «Ayyelet haşşaxar» üstə oxunan məzmuru.

1. Ey Allahım, Allahım, niyə məni tərk etdin?
Niyə ah-zarımdan uzaq durursan, mənə imdad etmirsən?
2. Ey Allahım, gündüz çağıranda mənə cavab vermirsən,
Gecə rahatlığım yoxdur.
3. Nə qədər müqəddəssən!
İsrailin həmdləri üzərində taxt quran Sənsən!
4. Ata-babalarımız Sənə güvənmişdi,
Sənə güvənəndə onları xilas etdin.
5. Sənə yalvararkən qurtuldular,
Sənə güvənərkən rüsvay olmadılar.
6. Lakin mən torpaq qurduyam, insan deyiləm,
Adamların tənə hədəfiyəm,
Xalq mənə xor baxır.
7. Məni hər görən lağ edir,
Dodaq büzüb, başını yırğalayıb belə deyir:
8. «Qoy güvəndiyi Rəbb onu azad etsin,
Rəbb ondan razı qalıb, qoy onu xilas etsin».
9. Lakin bətndən dünyaya məni gətirən,
Ana qucağında ikən mənə əminlik verən Sənsən.
10. Doğulandan bəri Səndən asılıyam,
Ana bətnindən bəri Allahım Sənsən.
11. Məndən uzaq durma, çünki əzab yaxındır,
Köməyimə çatan yoxdur.
12. Nə qədər buğa məni dövrəyə salıb,
Güclü Başan buğaları yan-yörəmi bürüyüb.
13. Yırtıcı aslanlar kimi nərə çəkirlər,
Məni parçalamaq üçün ağızlarını açırlar.
14. Mən su kimi töküldüm,
Bütün sümüklərim oynaqlarından çıxdı,
Köksümdəki ürəyim mum kimi əridi.
15. Saxsı parçası kimi gücüm qurudu,
Dilim damağıma yapışdı,
Sən məni torpağa salıb ölüm verdin.
16. Şər insanlar dəstəsi məni dövrəyə aldı,
İt sürüsü kimi yan-yörəmi bürüdülər,
Ayaqlarımı, əllərimi deşdilər.
17. Sümüklərimi saya bilirəm,
Onlar baxırlar, gözlərini mənə zilləyirlər!
18. Aralarında paltarlarımı bölüşdürürlər,
Geyimim üçün püşk atırlar.
19. Ya Rəbb, uzaq durma,
Ey mənim Qüdrətlim, dadıma tez çat!
20. Həyatımı qılıncdan qurtar,
Canımı itlərin caynağından qurtar,
21. Məni aslanın ağzından xilas et!
Çöl öküzləri məni buynuzlayarkən mənə cavab ver.
22. İsmini qardaşlarıma elan edəcəyəm,
Camaat arasında Sənə həmd söyləyəcəyəm:
23. «Siz ey Rəbdən qorxanlar, Ona həmd edin,
Ey bütün Yaqub nəsli, Onu şərəfləndirin,
Siz ey İsrail nəsli, Ona ehtiram edin!
24. Çünki Rəbb bu məzlumun dərdinə xor baxmadı,
Ondan ikrah edərək üzünü gizlətmədi,
İmdada çağıranda səsinə cavab verdi».
25. Çoxlu camaat arasında həmd etdiyim Sənsən!
Səndən qorxanların önündə əhd etdiyim təqdimləri verəcəyəm.
26. Qoy məzlumlar doyunca yesin,
Rəbbi axtaranlar Ona həmd etsin!
Qoy canınız həmişə sağ olsun!
27. Yer üzünün qurtaracağınadək hər yerdə yaşayanlar
Rəbbi xatırlayacaq, Ona tərəf dönəcəklər.
Bütün millətlərin soyları
Onun hüzurunda səcdə qılacaq.
28. Çünki hökmranlıq Rəbbindir,
Millətlər üzərində səltənət sürən Odur!
29. Bütün dünya zənginləri yeyib-doyacaq,
Rəbbin hüzurunda səcdə qılacaq.
Torpağa düşənlərin hamısı –
Özlərini ölümdən saxlaya bilməyənlər
Onun hüzurunda diz çökəcəklər.
30. Gələcək nəsillər Ona qulluq edəcək,
Xudavənd haqqında övladlarına deyəcək;
31. Onun ədalətini, Onun əməllərini
Gələcəkdə doğulan xalqa bildirəcək.

Zəbur 23 | Məzmur 23

Davudun məzmuru.

1. Rəbb mənim çobanımdır, möhtac olmaram.
2. O məni yaşıl çəmənlərdə dincəldir,
Sakit axan sular kənarında gəzdirir.
3. Məni yenə də canlandırır,
İsmi şərəfinə salehlik yolları ilə aparır.
4. Ölüm kölgəsinin dərəsində gəzsəm belə,
Şərdən qorxmaram, çünki Sən mənimləsən,
Sənin əsan, Sənin dəyənəyin mənə təsəlli verir.
5. Düşmənlərimin qarşısında
Mənim üçün süfrə açırsan,
Başıma ətirli yağ çəkirsən,
Ağzınadək camımı doldurursan.
6. Bəli, bütün həyatım boyu
Yaxşılıq, məhəbbət məni izləyir.
Bütün ömrüm boyu
Rəbbin evində yaşayacağam!

Zəbur 24 | Məzmur 24

Davudun məzmuru.

1. Rəbbindir yer üzü və orada mövcud olanlar,
Dünya və orada yaşayanlar.
2. O, yerin təməlini dənizlər üstündə qurdu,
Dünyanı sular üzərində yaratdı.
3. Rəbbin dağına kim çıxa bilər?
Müqəddəs məskəninə kim girə bilər?
4. – Əlləri pak, qəlbi təmiz,
Hiyləyə könül verməyən,
Yalandan and içməyən insan.
5. O, Rəbdən bərəkət alacaq,
Xilaskarı Allahdan salehlik alacaq.
6. Belə adam Rəbbi soraqlayar,
Yaqubun Allahının üzünü axtarar.
Sela
7. Ey darvazalar, başlarınızı qaldırın,
Ey qədim qapılar, açılın,
Əzəmətli Padşah içəri daxil olsun!
8. Bu əzəmətli Padşah kimdir?
– Odur, güclü-qüdrətli Rəbb,
Döyüşdə qüvvətli Rəbb.
9. Ey darvazalar, başlarınızı qaldırın,
Ey qədim qapılar, açılın,
Əzəmətli Padşah içəri daxil olsun!
10. Bu əzəmətli Padşah kimdir?
– Ordular Rəbbi,
Odur əzəmətli Padşah!
Sela

Zəbur 25

Məzmur 25

Davudun məzmuru.

¹Ya Rəbb, Sənə ürəyimi təqdim edirəm,

²Ey Allahım, yalnız Sənə güvənirəm!

Məni xəcalətdə qoyma,

Qoy düşmənlərim mənə qalib gələrək sevinməsinlər.

³Sənə ümid bağlayanlar heç zaman utanmasınlar,

Haqsız xəyanətkarlarsa rüsvay olsunlar.

⁴Ya Rəbb, yollarını mənə göstər,

Öz yollarını mənə öyrət.

⁵Məni haqq yolu ilə apar,

Həqiqətini mənə öyrət.

Məni qurtaran Allah Sənsən,

Daim Səni gözləyirəm.

⁶Ya Rəbb, əzəldən bəri var olan

Mərhəmətini, məhəbbətini yada sal.

⁷Gənclikdə günahkar, üsyankar oldum,

Bunları yadına salma.

Məni məhəbbətin naminə,

Ya Rəbb, xeyirxahlığına görə yada sal!

⁸Rəbb xeyirxah və haqdır,

Ona görə günahkara düz yol göstərir,

⁹İtaətkarları ədalət yolu ilə aparır,

Öz yolunu onlara öyrədir.

¹⁰Kim Rəbbin əhdinə və göstərişlərinə bağlıdırsa,

Rəbb yolunda onun üçün xeyirxahlıq və sədaqət var.

¹¹Ya Rəbb, ismin naminə məni bağışla,

Təqsirim böyükdür.

¹²Rəbdən qorxan kimdir?

Rəbb ona yol seçməyi öyrədir.

¹³O bəxtəvər yaşayacaq,

Ölkə onun nəslinə irs olaraq qalacaq.

¹⁴Rəbb Ondan qorxanlara sirrini açar,

Onlara Öz əhdini öyrədər.

¹⁵Həmişə gözüm Rəbdədir,

Çünki O, ayaqlarımı tələdən xilas edir.

¹⁶Üzünü mənə sarı çevir və lütfkar ol,

Çünki tənhayam, zülm içindəyəm.

¹⁷Qəlbimdəki qubar artıb,

Məni dərdlərdən qurtar.

¹⁸Əzab-əziyyətimə bax,

Bütün günahlarımı bağışla.

¹⁹Düşmənlərimə bax, gör nə qədər çoxalıb,

Amansız nifrətlərinə hədəfəm.

²⁰Canımı qoru, məni qurtar,

Sənə pənah gətirdiyimə görə qoyma rüsvay olum!

²¹Qoy kamalla düzlük məni hifz etsin,

Çünki Səni gözləyirəm.

²²Ey Allah, İsraili

Bütün çətinliklərindən qurtar.

Zəbur 26

Məzmur 26

Davudun məzmuru.

¹Məni haqlı çıxar, ya Rəbb,

Çünki mən kamalla gəzmişəm,

Sarsılmadan Rəbbimə güvənmişəm.

²Ya Rəbb, məni sınaqdan keçir,

Sən məni imtahan et,

Qəlbimi, fikirlərimi saf et.

³Məhəbbətin gözümün önündə durur,

Sənin sədaqətinlə gəzirəm.

⁴Yalançı insanlarla oturmuram,

İkiüzlülərlə yoldaşlıq etmirəm,

⁵Yaramazların məclisinə nifrət edirəm,

Pislərlə oturmuram.

⁶Ya Rəbb, günahsızlıq içində əllərimi yuyuram,

Qurbangahının başına dolanıram,

⁷Şükür səsimi ucaldıram,

Bütün xariqələrini bəyan edirəm.

⁸Ya Rəbb, məskənin olan evi,

Calalının sakin olduğu yeri sevirəm.

⁹Məni günahkarlara qatıb aparma,

Qatillərlə birgə canımı alma.

¹⁰Onlar pis niyyəti əllərində tutublar,

Sağ əllərini rüşvətlə doldurublar.

¹¹Mənsə kamalla gəzirəm,

Məni qurtar, mənə lütf et!

¹²Ayağım düzlük üstündə durur,

Cəmiyyətin içində Rəbbə alqış edəcəyəm.

Zəbur 27

Məzmur 27

Davudun məzmuru.

¹Rəbdir nurum, qurtuluşum!

Mən kimdən qorxum?

Rəbdir ömrümün qalası,

Mən kimdən vahimələnim?

²Ətimi yemək üçün hücum edən şər adamlar –

Yağılarım, düşmənlərim büdrəyərək yıxılarlar.

³Bir ordu qarşımda düzülsə belə, ürəyim qorxmaz,

Mənimlə döyüşsələr də, arxayınam.

⁴Rəbdən bir arzum, bir istəyim var:

Bütün ömrüm boyu Rəbbin evində yaşayım,

Məbədində Rəbbin camalına baxım,

Ona pərəstiş edim.

⁵Dar gündə məni çardağında gizlər,

Çadırının örtüyü ilə örtər,

Qaya başındakı yüksək yerə gətirər.

⁶İndi ətrafımdakı düşmənlərimin üzərində

Qələbələr çalacağam,

Rəbbin çadırında şənlik qurub qurbanlar kəsəcəyəm,

Onu ilahilərlə tərənnüm edəcəyəm.

⁷Ya Rəbb, dinlə, Səni çağırıram,

Lütf edib mənə cavab ver.

⁸Sən dedin: «Üzümü axtarın».

Ya Rəbb, mən Sənin üzünü axtarıram.

⁹Üzünü məndən gizlətmə,

Qulunu qəzəblə qovma.

Mənə Sən kömək etmisən,

Məni atma, tərk etmə,

Ey məni qurtaran Allahım!

¹⁰Ata-anam məni atsa belə,

Rəbb məni qəbul edər.

¹¹Ya Rəbb, yolunu mənə öyrət,

Düşmənlərimdən ötrü mənə düz yolda rəhbərlik et.

¹²Məni düşmənlərin əlinə salma,

Çünki yalançı şahidlər, zorakılar əleyhimə qalxdılar.

¹³Rəbbin xeyirxahlığını dirilər arasında görəcəyəm,

Buna şübhəm yoxdur.

¹⁴Rəbbə ümid bağla!

Möhkəm və cəsarətli ol!

Rəbbə ümid bağla!

Zəbur 28

Məzmur 28

Davudun məzmuru.

¹Ya Rəbb, Səni səsləyirəm,

Ey Qayam, qulağını tıxama.

Əgər cavab verməsən,

Qəbirə düşənlərə bənzəyərəm.

²Səni yardıma çağırarkən,

Məbədinin ən müqəddəs yerinə tərəf əllərimi qaldırarkən,

Yalvarış səsimi eşit.

³Pislərlə, şər iş görənlərlə birgə

Məni dartıb aparma.

Onlar qonşuları ilə dost kimi danışır,

Lakin qəlblərində şər dolaşır.

⁴ Əməllərinə, pis işlərinə görə

Onların əvəzini ver,

Əllərindən gələn bu işlər nəyə layiqdirsə,

Onlar üçün ödə.

⁵Rəbbin əməllərinə əhəmiyyət vermədiklərinə görə,

Onun əllərinin əməllərinə fikir vermədiklərinə görə

Rəbb onları yerə vuracaq,

Bir daha qaldırmayacaq.

⁶Alqış olsun Rəbbə,

Yalvarış səsimi eşitdi!

⁷Rəbb qalam, sipərimdir!

Qəlbim Ona güvənəndə köməyimə çatır.

Sevincdən qəlbim cuşa gəlir,

İlahilərimlə Ona şükür edirəm.

⁸Rəbb Öz xalqının gücüdür,

Məsh etdiyi insanın nicat qalasıdır.

⁹Öz xalqını qurtar,

Seçdiklərinə xeyir-dua ver.

Öz sürünü otar,

Xalqının əbədilik qayğısına qal!

Zəbur 29

Məzmur 29

Davudun məzmuru.

¹Ey ilahi varlıqlar, Rəbbə verin –

İzzəti, qüdrəti Rəbbə verin!

²Adına layiq olan izzəti Rəbbə verin,

Müqəddəslik zinəti ilə Rəbbə səcdə edin!

³Rəbbin səsi suların üzərindədir,

Ehtişam Allahı gurlayar,

Rəbb ümman suların üzərindədir.

⁴Rəbbin səsi qüdrətlidir,

Rəbbin səsi əzəmətlidir,

⁵Rəbbin səsi sidr ağaclarını sındırar,

Rəbb Livan sidrlərini qırar.

⁶Livan dağlarını dana kimi,

Siryon dağını çöl buğası kimi tullandırar.

⁷Rəbbin səsi şimşəkləri çaxdırar,

⁸Rəbbin səsi çölləri lərzəyə salar,

Rəbb Qadeş çölünü lərzəyə salar.

⁹Rəbbin səsi maralları doğuzdurar,

Rəbbin səsi meşələri çılpaq qoyar.

Məbədində hamı deyər:

«Ehtişamlısan!»

¹⁰Rəbb daşan sular üstündəki taxtında oturub,

O, əbədi Padşahdır, taxtında oturub.

¹¹Rəbb Öz xalqına qüvvət verir,

O, xalqına firavanlıq və bərəkət verir.

Zəbur 30

Məzmur 30

Davudun məzmuru.

Məbədin təqdisinə aid ilahi.

¹Ya Rəbb, Səni ucaldıram,

Çünki Sən məni qurtardın,

Düşməni mənə görə sevinməyə qoymadın.

²Ya Rəbb Allahım,

Səni imdada çağırarkən

Mənə şəfa verdin.

³Ya Rəbb, canımı

Ölülər diyarından azad etdin,

Qəbirə düşməyim deyə

Sən mənə həyat verdin.

⁴Ey Rəbbin möminləri,

Onu tərənnüm edin,

Müqəddəsliyini yada salın,

Ona şükürlər edin.

⁵Çünki qəzəbi bir anlıq olur,

Lütfü isə ömür boyu qalır.

Kimin bir gecə gözündən yaş tökülərsə,

Onun üçün sübh tezdən sevinc doğar.

⁶Dinclik tapanda dedim:

«Əsla sarsılmaram».

⁷Ya Rəbb, lütfünlə məni

Bir dağ kimi möhkəm etdin.

Sonra məndən üz gizlətdin,

Canıma vəlvələ düşdü.

⁸Ya Rəbb, Səni çağırdım,

Xudavəndə belə yalvardım:

⁹«Qanımı töküb qəbirə düşsəm,

Sənə fayda verərmi?

Torpaq Sənə şükür edə bilərmi,

Sədaqətini elan edə bilərmi?

¹⁰Ya Rəbb, dinlə, mənə lütf et,

Ya Rəbb, köməyimə çat».

¹¹Yasımı şənliyə çevirdin,

Çulumu çıxarıb məni sevincə bürüdün.

¹²Ona görə susmayacağam,

Səni ucadan tərənnüm edəcəyəm.

Ya Rəbb Allahım,

Sənə daim şükür edəcəyəm!

Zəbur 31

Məzmur 31

Musiqi rəhbəri üçün. Davudun məzmuru.

¹Ya Rəbb, Sənə pənah gətirirəm!

Heç vaxt məni xəcalətdə qoyma,

Ədalətinlə məni xilas et!

²Qulağını mənə tərəf çevir,

Məni tez azad et!

Bir qaya ol, qoy sığınım,

Möhkəm bir qala ol, qoy qurtulum.

³Çünki qayam da Sən, qalam da Sənsən!

Öz ismin naminə mənə yol göstərib rəhbərlik et.

⁴Məni qarşımda qurulan gizli tordan hifz et,

Çünki Sən mənim sığınacağımsan!

⁵ Ruhumu Sənin əlinə verirəm,

Ya Rəbb, sadiq Allah, Sən məni azad et.

⁶Boş şey olan bütlərə pərəstiş edənlərə nifrət edirəm,

Mən Rəbbə güvənirəm.

⁷Mən Sənin məhəbbətində

Şad olub sevinəcəyəm,

Çünki məzlum halımı görmüsən,

Çəkdiyim əzabı bilmisən.

⁸Məni düşmənə təslim etmədin,

Genişlikdə gəzdirdin.

⁹Ya Rəbb, mənə rəhm et,

Çünki əzabdayam,

Kədərdən gözüm, qəlbim, bədənim quruyub.

¹⁰Ömrüm qüssə ilə,

İllərim ah-nalə ilə keçir.

Təqsirimə görə taqətim qalmayıb,

Sümüklərim quruyub.

¹¹Bütün düşmənlərim mənə tənə edir,

Qonşularımsa onlardan daha betərdir,

Tanışlarım məni görərkən dəhşətə düşür,

Məni küçələrdə görənlər məndən qaçır.

¹²Ölü bir adam kimi unudulmuşam,

Çilik-çilik qırılan bir qaba oxşayıram.

¹³ Çox adamların pıçıltısını eşidirəm,

Hər tərəfimi dəhşət alıb,

Hamı əleyhimə əlbir olub,

Canımı almaq üçün qəsd qurub.

¹⁴Ya Rəbb, yalnız Sənə güvənirəm,

Dedim: «Allahımsan Sən».

¹⁵Mənim hər anım Sənin əlindədir,

Düşmənlərimin, təqibçilərimin əlindən

Məni azad et.

¹⁶Bəndənin üstünə üzünün nurunu sal,

Məhəbbətinlə məni qurtar.

¹⁷Ya Rəbb, məni xəcalətdə qoyma,

Çünki Səni çağırıram.

Qoy pislər utansın,

Qoy ölülər diyarında səsləri batsın.

¹⁸Təkəbbürlə, həqarətlə yalan danışan,

Salehlərə böhtan atan dillər lal olsun!

¹⁹Xeyirxahlığın nə qədər böyükdür!

Bunu Səndən qorxanlar üçün saxladın.

Bütün bəşər övladları qarşısında

Sənə pənah gətirənlərə xeyirxahlıq etdin.

²⁰Onları insanların qəsdlərindən

Hüzurunda sığındırırsan,

Böhtançı dillərə qarşı çardağında gizlədirsən.

²¹Qoy Rəbbə alqış olsun!

Çünki mühasirəyə düşən şəhərdə

Məhəbbətini xariqələrlə mənə göstərdi!

²²Mən təlaşa düşüb demişdim:

«Sənin gözlərinin önündən kənara atıldım».

Lakin Səni imdada çağıranda

Yalvarış səsimi eşitdin.

²³Rəbbi sevin, siz ey bütün möminlər!

Rəbb həmişə Ona sadiq qalanı qoruyur,

Təkəbbürlü insana isə layiq olduğunu verir.

²⁴Ey Rəbbə ümid bağlayan bütün insanlar,

Möhkəm olun, qoy ürəyiniz cəsarətli olsun!

Zəbur 32

Məzmur 32

Davudun maskili.

¹Üsyankarlığı bağışlanan,

Günahı əfv olunan insan

Nə bəxtiyardır!

²Rəbb tərəfindən təqsirkar sayılmayan,

Qəlbində hiylə olmayan insan

Nə bəxtiyardır!

³Etiraf etməyəndə

Bütün gün nalə çəkməkdən

Sümüklərim taqətdən düşdü.

⁴Əlin üzərimdə gecə-gündüz ağırlaşdı,

Sanki yayın quraqlığı məni taqətdən saldı.

Sela

⁵ Sonra Sənə günahımı etiraf etdim,

Təqsirlərimi gizlətmədim.

Dedim: «Üsyankarlığımı Rəbbə etiraf edirəm».

Təqsirimi, günahımı bağışladın.

Sela

⁶Buna görə hər bir mömin

Səni tapan zaman Sənə dua etsin.

Azğın sellər daşsa da,

Möminə toxunmaz.

⁷Sığınacaq yerim Sənsən,

Məni dardan hifz edirsən.

Zəfər harayı ilə

Ətrafımda dövr edirsən.

Sela

⁸Dedin: «Sənə təlim verəcəyəm,

Gedəcəyin yolu öyrədəcəyəm.

Nəsihət verəcəyəm,

Gözüm sənin üstündə olacaq.

⁹At yaxud qatır kimi

Şüursuz olmayın.

Cilov, yüyən vurulmasa,

Onlar idarə edilə bilməz».

¹⁰Pislərin başına çox bəla gələr,

Rəbbə güvənənlər isə hər tərəfdən məhəbbətə bürünər.

¹¹Ey salehlər, fərəhlənin,

Rəbbə görə sevinin!

Ey ürəyidüz olanlar,

Onu mədh edin!

Zəbur 33

Məzmur 33

¹Ey salehlər, Rəbbi mədh edin,

Ürəyidüz olanlara həmd söyləmək yaraşır.

²Lira çalın, Rəbbə şükür edin,

On telli çənglə Onu tərənnüm edin,

³Ona yeni bir nəğmə oxuyun, Sevinc nidaları ilə çalın.

⁴Çünki Rəbbin sözü haqdır,

Hər işini sədaqətlə aparır.

⁵Rəbb salehliyi və ədaləti sevir,

Yer üzü Onun məhəbbəti ilə dolur.

⁶Göylər Rəbbin sözü ilə,

Səma cisimləri Onun hökmü ilə yarandı.

⁷Dənizin sularını bir yerə yığdı,

Dərin suları anbarlarda saxladı.

⁸Qoy bütün dünya Rəbdən qorxsun,

Bütün yer üzünün əhalisi Onu şərəfləndirsin.

⁹Çünki nə söylədi, mövcud oldu,

Nə əmr etdi, quruldu.

¹⁰Rəbb millətlərin məsləhətini puç edər,

Xalqların məqsədini heç edər.

¹¹Lakin Rəbbin məsləhəti əbədi olar,

Ürəyinin məqsədi nəsillər ötsə də, qalar.

¹²Nə bəxtiyardır o millət ki Allahı Rəbdir,

O xalq ki Rəbb onu irs olaraq seçmişdir.

¹³Rəbb göylərdən baxır,

Bütün bəşər övladlarını görür,

¹⁴Taxtında oturduğu yerdən

Bütün dünya əhalisini görür.

¹⁵Odur hər bir insanın ürəyini yaradan,

Əməllərini anlayan.

¹⁶Qoşunun çoxluğu ilə heç bir padşah qurtulmaz,

Qolunun gücü ilə heç bir cəngavər zəfər çalmaz.

¹⁷Qələbə üçün at boş şeydir,

Qüvvətinin çoxluğu ilə bir kimsə xilas olmaz.

¹⁸Rəbbin gözü Ondan qorxanlara,

Onun məhəbbətinə ümid bağlayanlara baxar.

¹⁹İstəyir ki, onları ölümdən qurtarsın,

Qıtlıqda belə, onlar sağ qalsın.

²⁰Könlümüz Rəbbin yolunu gözlər,

Odur köməyimiz və sipərimiz.

²¹Bizim qəlbimiz Onda sevinc tapır,

Müqəddəs isminə arxalanmışıq.

²²Ya Rəbb, ümidimizi Sənə bağlamışıq,

Məhəbbətin üzərimizdən tükənməsin.

Zəbur 34

Məzmur 34

Davudun məzmuru.

O, Avimelekin önündə özünü dəli kimi göstərib qovulanda.

¹Hər zaman Rəbbə alqış edəcəyəm,

Ona daim mənim dilim həmd edəcək.

²Rəblə könlüm fəxr edir,

Ey məzlumlar, eşidib sevinin!

³Gəlin mənimlə birgə Rəbbi müqəddəs tutaq,

Rəbbin ismini birgə ucaldaq.

⁴Rəbbə üz tutdum, O mənə cavab verdi,

O hər bir dəhşətdən məni xilas etdi.

⁵Rəbbə baxan nur saçar,

Üzü qızarmaz.

⁶Mən məzlum, Rəbbi çağırdım, O məni eşitdi,

Bütün əzablarımdan məni xilas etdi.

⁷Rəbdən qorxanları Onun mələyi müdafiə edər,

Onlara zəfər verər.

⁸ Dadın, görün Rəbb nə qədər şirindir,

Nə bəxtiyardır Ona pənah gətirənlər!

⁹Ey Rəbbin müqəddəsləri, Rəbdən qorxun,

Ondan qorxan heç nəyə möhtac qalmaz.

¹⁰Gənc aslanlar ac-yalavac qaldılar,

Lakin Rəbbi axtaranlar

Heç bir yaxşı şeydən korluq çəkməzlər.

¹¹Gəlin, ey övladlar, məni dinləyin,

Rəbb qorxusunu sizə öyrədim:

¹² Kim həyatdan kam almaq istəyirsə,

Uzun ömür sürüb xoş gün görmək istəyirsə,

¹³Qoy dilini şərdən,

Ağzını fırıldaq üçün işlətməkdən qorusun,

¹⁴Qoy şərdən çəkinib yaxşılıq etsin,

Sülhü axtarıb ardınca getsin!

¹⁵Rəbbin gözü salehlərin üzərindədir,

Qulaqları onların fəryadlarına açıqdır.

¹⁶Rəbbin üzü şər iş görənlərə qarşıdır,

Yer üzündə onlardan nişanə qoymayacaq.

¹⁷Salehlər fəryad çəkəndə Rəbb eşidir,

Onları bütün əzablarından azad edir.

¹⁸Rəbb qəlbisınıqlara yaxındır,

O, ruhən əzilmişləri qurtarır.

¹⁹Salehlər çox bəlaya düçar olar,

Lakin Rəbb onları hər birindən qurtarır.

²⁰ Rəbb onların hər bir sümüyünü qoruyur,

Heç biri zədələnməz.

²¹Pislər öz şəri ilə məhv olacaq,

Salehə nifrət edən məhkum olacaq.

²²Rəbb qullarının canını azad edir,

Rəbbə pənah gətirən məhkum olmur.

Zəbur 35

Məzmur 35

Davudun məzmuru.

¹Ya Rəbb, mənimlə çəkişənlərlə Sən çəkiş.

Mənimlə döyüşənlərlə Sən döyüş.

²Qalxan və sipərini əlinə al,

Qalx, mənim imdadıma çat.

³Nizəni tutub ardımca düşənlərin yolunu kəs,

Qəlbimə söylə: «Səni qurtaran Mənəm».

⁴Canımın qəsdinə duranlar

Qoy utanıb rüsvay olsunlar,

Mənə qarşı pis niyyəti olanlar

Geri qovulub biabır olsunlar.

⁵Saman çöpü tək olsunlar, onları yel sovursun,

Rəbbin mələyi onları silib atsın.

⁶Qoy yolları zülmət, sürüşkən olsun,

Qoy Rəbbin mələyi onları qovsun.

⁷Çünki nahaq yerə mənə tələ qurdular,

Nahaqdan canım üçün quyu qazdılar.

⁸Qoy başlarına qəfil fəlakət gəlsin,

Qurduqları tələyə özləri düşsün,

Hazırladıqları bəlaya düçar olsunlar.

⁹Onda canım Rəblə şad olacaq,

Məni qurtardığı üçün qəlbim fərəh tapacaq.

¹⁰Bütün varlığımla belə deyəcəyəm:

«Ya Rəbb, Sənin kimisi varmı?

Məzlumu ondan güclünün əlindən,

Məzlumu və fəqiri istismarçının əlindən azad edirsən».

¹¹Amansız şahidlər qalxırlar,

Yalandan üzümə dururlar.

¹²Yaxşılığımın əvəzində onlardan yamanlıq görürəm,

Əzizi ölən bir adama bənzəyirəm.

¹³Vaxtı ilə onlar xəstələnərkən

Çul geyib, oruc tutub canıma zülm edirdim,

Başımı aşağı salıb dua edirdim.

¹⁴Onları özümə dost və qardaş bilirdim.

Anası üçün yas tutan adam tək

Bükülüb hüznlə gəzirdim.

¹⁵Lakin mən büdrəyərkən

Bir yerə toplaşıb sevindilər.

Tanımadığım əclaflar mənə qarşı toplaşdılar.

Dayanmadan məni didirdilər,

¹⁶Şikəstləri təhqir edən allahsızlar kimi

Mənə dişlərini qıcayırdılar.

¹⁷Ey Xudavənd, nə vaxta qədər buna baxacaqsan?

Canımı məhv edilməkdən,

Həyatımı bu gənc aslanlardan qurtar.

¹⁸Çoxlu camaat arasında Sənə şükür edəcəyəm,

Çoxsaylı xalq arasında Sənə həmd edəcəyəm.

¹⁹ Qoyma haqsız düşmənlərim mənə görə sevinsin,

Mənə nahaqdan nifrət edənlər bir-birinə göz vursun.

²⁰Çünki onlar sülh üçün danışmırlar,

Sözləri ilə ölkənin dinc sakinlərinə fənd qururlar.

²¹Ağızlarını üstümə iri açıb belə deyirlər:

«Aha! Aha! Bax, öz gözümüzlə gördük».

²²Ya Rəbb, bunu gördün, indi susma,

Ey Xudavənd, məndən uzaq durma.

²³Ey Xudavənd Allahım, oyan, qalx,

Bu mübarizəmdən qoy mən haqlı çıxım.

²⁴Ədalətinə görə mənə bəraət qazandır,

Ya Rəbb Allahım, qoyma mənə görə sevinsinlər.

²⁵Qoyma düşünsünlər: «Aha! Muradımıza çatmışıq!»

Qoyma söyləsinlər: «Onun başını yemişik!»

²⁶Pis günümə şadlananlar

Qoy utanıb biabır olsunlar,

Qarşımda qürrələnənlər

Xəcalətə, rüsvayçılığa bürünsünlər.

²⁷Mənim haqlı çıxmağımı istəyənlər

Sevinib Səni mədh etsinlər.

Daim belə söyləsinlər:

«Öz qulunun əmin-amanlığını istəyən Rəbb ucalsın!»

²⁸Dilim Sənin salehliyindən deyəcək,

Daim Sənə həmd edəcəyəm!

Zəbur 36

Məzmur 36

Musiqi rəhbəri üçün. Rəbbin qulu Davudun məzmuru.

¹Şər pis insanın ürəyinə pıçıldayır,

Onun gözündə Allah qorxusu yoxdur.

²Öz gözündə özünü yüksək tutur,

Nə təqsirini görür, nə də ona nifrət edir.

³Dilindən fitnə-fəsad düşmür,

Müdrik, xeyirxah əməllərdən əl çəkib.

⁴Yatağında fitnələr barədə fikirləşir,

Pis yolda dayanır, şər işlərdən ikrah etmir.

⁵Ya Rəbb, məhəbbətin göylərdədir,

Sədaqətin asimanı bürüyür.

⁶Dağlar kimi salehliyin uludur,

Dərya kimi ədalətin dərindir.

Ya Rəbb, həm insanı, həm heyvanı qoruyursan.

⁷Ey Allah, məhəbbətin nə qədər qiymətlidir!

Bəşər övladları Sənin qanadlarının kölgəsinə sığınır.

⁸Evinin bolluğu ilə onları doydurursan,

Sənin xoşhal edən axar çayından onları içirirsən.

⁹Çünki həyat mənbəyi Səndədir,

Biz Sənin nurunla görə bilirik.

¹⁰Səni tanıyanlara məhəbbətini,

Ürəyidüz olanlara salehliyini daima göstər.

¹¹Qoy təkəbbürlülərin təpiyi altında qalmayım,

Pis adamların əli ilə qovulmayım.

¹²Gördüm ki, şər iş görənlər yıxılıblar,

Onlar yerə sərilib, daha qalxa bilməzlər.

Zəbur 37

Məzmur 37

Davudun məzmuru.

¹Pislik edənlərə görə narahat olma,

Fitnəkarlıq edənlərə qibtə etmə.

²Tezliklə onlar ot kimi quruyacaq,

Yaşıl çəmən kimi tez solacaq.

³Rəbbə güvən, yaxşılıq et,

Bu diyarda arxayın ömür sür.

⁴Rəbdən zövq al,

O da səni ürəyinin istəklərinə çatdıracaq.

⁵Yolunu Rəbbə ver,

Ona güvən,

O edəcək.

⁶Rəbb sənin salehliyini nur kimi aydınlaşdıracaq,

Həqiqətini gündüz günəşi tək çıxaracaq.

⁷Rəbbin hüzurunda sükut et,

Onu səbirlə gözlə.

Yolunda uğur qazanan

Hiyləgər insan üçün narahat olma.

⁸Qəzəbi at, hiddətdən çəkin,

Narahat olma, bunlar insanı şərə salar.

⁹Çünki şər adamlar kəsilib atılacaq,

Rəbbə ümid bağlayanlar ölkəni mülk olaraq alacaq.

¹⁰Bir az gözlə, pis yox olacaq,

Yerini axtarsan belə, tapılmayacaq.

¹¹ Həlimlər yer üzünü mülk olaraq alacaq,

Əmin-amanlığın bolluğundan zövq tapacaq.

¹²Şər adam salehin qəsdinə durur,

Ona qarşı dişlərini qıcayır.

¹³Amma Xudavənd şər adama gülür,

Onun dövranının az olmasını bilir.

¹⁴Məzlumu, fəqiri yerə vurmaq üçün,

Düz yolda olanı boğazlamaq üçün

Pislər qılınc çəkər, ox-kamanını qurar.

¹⁵Lakin onların qılıncları öz ürəklərinə saplanacaq,

Ox-kamanları parça-parça olacaq.

¹⁶Salehin az malı

Pislərin bütün sərvətlərindən yaxşıdır.

¹⁷Çünki pislərin qol-qanadı qırılacaq,

Rəbb isə salehlərin dayağıdır.

¹⁸Rəbbə kamillərin gündəlik qayğıları məlumdur,

Onların irsi əbədi qalacaq.

¹⁹Dar gündə utanmayacaqlar,

Qıtlıqda tox yaşayacaqlar.

²⁰Lakin pislər həlak olacaq,

Rəbbin düşmənləri çəmənin təravəti kimi solacaq,

Tüstü kimi çəkilərək yox olacaq.

²¹Pis adam borc alır, qaytarmır,

Salehlər səxavətlə paylayır.

²²Rəbdən bərəkət alan ölkəni mülk olaraq alacaq,

Lənət etdiyi kəslər kəsilib atılacaq.

²³Rəbb insana gedəcəyi yolu göstərir,

Kimdən razı qalırsa, onu möhkəmləndirir.

²⁴Bu insan büdrəsə də, yıxılmaz,

Çünki Rəbb onun əlindən tutar.

²⁵Gəncliyimdən qocalığımadək

Salehin tərk edildiyini,

Nəslinin çörək üçün diləndiyini görməmişəm.

²⁶O hər zaman səxavətlə borc verər,

Övladlarına xeyir-dua gələr.

²⁷Şərdən çəkinib yaxşılıq et ki,

Ölkədə əbədi məskən sala biləsən.

²⁸Çünki Rəbb ədaləti sevir,

Heç zaman möminlərini tərk etmir.

Salehlər daim müdafiə olunacaq,

Pislər nəsilliklə kəsilib atılacaq.

²⁹Salehlər ölkəni mülk olaraq alacaq,

Onlar orada əbədi məskən salacaq.

³⁰Salehin ağzından hikmət çıxar,

Dili haqq söz danışar.

³¹Çünki Allahın qanunu ürəyindədir,

Ayaqları büdrəmir.

³²Pis adam salehi güdür,

Onu öldürmək üçün fürsət axtarır.

³³Rəbb salehi pisin əlinə düşməyə qoymaz,

Ona ittiham oxunanda məhkum olmaz.

³⁴Rəbbi gözlə, Onun yolunu tut,

O sənə ölkəni mülk olaraq verəcək, səni yüksəldəcək.

Pislərin kəsilib atılacağı zamanı görəcəksən.

³⁵Münbit torpaqda yaşıl ağac tək bitən,

Kök salan zalım, pis adamı görmüşdüm.

³⁶O keçib-getdi, yeri boş qaldı,

Onu axtararkən tapa bilmədim.

³⁷Kamil adama bax, əməlisaleh insana nəzər yetir,

Gələcək sülhsevən adama bəxş ediləcək.

³⁸Amma bütün üsyankarlar birlikdə yox olacaq,

Pislərin kökü kəsiləcək.

³⁹Salehlərin qurtuluşu Rəbdəndir,

Dar gündə onlara pənah yeridir.

⁴⁰Rəbb onların imdadına çatır,

Onları qurtarıb pislərin əlindən alır,

Çünki onlar Rəbbə pənah aparır.

Zəbur 38

Məzmur 38

Davudun yadasalma məzmuru.

¹Ya Rəbb, qəzəblənib məni töhmətləndirmə,

Hiddətlənib məni tənbeh eləmə.

²Artıq Sənin oxların mənə saplanıb,

Əllərin üstümə ağırlıq salıb.

³Bədənimdə qəzəbindən sağ yer qalmadı,

Günahıma görə sümüklərim də xəstəlik tapdı.

⁴Çünki təqsirlərim başımdan aşır,

Ağır yük tək onlara gücüm çatmır.

⁵Ağılsızlığımın üzündən

Yaralarım iyrənc və irinlidir.

⁶Mənim qəddim əyilib, ikiqat bükülmüşəm,

Gün boyu yaslı gəzirəm.

⁷Çünki belim qızdırmadan yandı,

Bədənimdə sağ yer qalmadı.

⁸Taqətim kəsildi, çox əzilmişəm,

Ürəyimdəki iztiraba görə ah-zar edirəm.

⁹Ey Xudavənd, mənim arzu-diləyim hüzurundadır,

Mənim iniltilərim Səndən gizli qalmır.

¹⁰Ürəyim çırpınır, gücüm tükəndi,

Gözlərimin nuru da söndü.

¹¹Azarımı görüb məndən dost-yoldaşım uzaqlaşdı,

Qohumlarım məndən uzaqda qaldı.

¹²Canımın qəsdinə duranlar mənə tələ qurur,

Bədxahlarım ölümümdən danışır,

Gün boyu mənim üçün hiylə qururlar.

¹³Mən bir kar kimi eşitmirəm,

Dilsiz-ağızsız bir lal kimiyəm.

¹⁴Dilsiz-cavabsız

Bir lal-kar kimiyəm.

¹⁵Ya Rəbb, ümidim Sənə qalıb,

Ey Xudavənd Allahım, Səndən cavab gözləyirəm!

¹⁶Dedim ki, qoy halıma sevinməsinlər,

Ayağım büdrəyəndə qarşımda öyünməsinlər.

¹⁷Mən yıxılmaq üzrəyəm,

Daim əzabla üz-üzəyəm.

¹⁸Təqsirlərimi etiraf edirəm,

Günahlarım üçün nigarançılıq çəkirəm.

¹⁹Düşmənlərim qüvvətlidir, hələ sağdır,

Nahaq yerə mənə nifrət edənlər çoxdur.

²⁰Yaxşılığa yamanlıq edənlər

Yaxşılığa meyl etdiyimə görə əleyhimə durublar.

²¹Ya Rəbb, məni tərk etmə!

Ey Allahım, məndən uzaq dayanma!

²²Ey Xudavənd, tez imdadıma çat,

Mənim xilaskarım Sənsən!

Zəbur 39

Məzmur 39

Musiqi rəhbəri Yedutun üçün. Davudun məzmuru.

¹Dedim: «Hər addımıma diqqət edəcəyəm,

Dilimlə günah etməkdən çəkinəcəyəm.

Pis adam qarşımda durarkən

Dilimi yüyənləyib dinməyəcəyəm».

²Dilimi saxlayıb susdum,

Yaxşılığa belə, danışmadım.

Dərdlərim ağırlaşdı,

³Köksümdəki qəlbimə köz doldu.

Dərin düşünəndə yanıb-yaxıldım,

Dilimlə belə dedim:

⁴«Ya Rəbb, mənə bildir,

Aqibətim necə olacaq?

Ömrümün günləri nə qədər qalıb?

Qoy nə qədər fani olduğumu anlayım!

⁵Budur, günlərim ovcuna sığdı,

Ömrüm qarşında heç oldu.

Bəli, insan sadəcə bir nəfəsdir.

Sela

⁶Əlbəttə, insan kölgə kimi dolaşır,

Həqiqətən, o boş yerə çarpışır,

Var-dövlət yığır, kimə qalacağını bilmir.

⁷Ey Xudavənd, indi mən nə gözləyim?

Mənim ümidim Sənsən!

⁸Məni bütün təqsirlərimdən qurtar,

Məni axmaqların tənəsinə hədəf etmə.

⁹Susdum, ağzımı açmadım,

Çünki Sən bunu etdin!

¹⁰Göndərdiyin bəlanı mənim üstümdən götür,

Əlinin zərbəsindən gör necə əzildim.

¹¹İnsanı təqsirinə görə məzəmmət edən zaman

Arzularını güvə kimi dağıdırsan.

Bəli, insan sadəcə bir nəfəsdir.

Sela

¹²Dinlə duamı, ya Rəbb, fəryadımı eşit!

Biganə qalma göz yaşlarıma.

Çünki Sənin yanında bir qəribəm,

Ata-babam kimi bir qonağam.

¹³Bir azca nəzərini məndən çək,

Qoy köçüb getməzdən əvvəl dinc yaşayım».

Zəbur 40

Məzmur 40

Musiqi rəhbəri üçün. Davudun məzmuru.

¹Rəbbi səbir edərək gözlədim,

Mənə tərəf dönərək fəryadımı eşitdi.

²O məni çamırlı quyudan,

Lilli bataqlıqdan çıxartdı.

Ayağımı qaya üzərində bərkitdi,

Hər addımımı möhkəm etdi.

³Dilimə yeni bir nəğmə verdi,

İlahi ilə Allahımıza həmd etdim.

Bax nə qədər adam bunu görəcək,

Qorxub Rəbbə güvənəcək.

⁴Rəbbə ümidlə arxalanan,

Təkəbbürlülərə üz tutmayan,

Bütlərə aldananlara qoşulmayan

İnsan nə bəxtiyardır!

⁵Ya Rəbb Allahım, Sənə bənzəyən yoxdur!

Bizə aid xariqələrin, düşüncələrin çoxdur.

Onlardan danışmaq istəsəm,

Belə deyərdim: «Sayı-hesabı yoxdur».

⁶ Qurbandan, təqdimdən xoşun gəlmədi,

Yandırma qurbanı, günah qurbanı tələb etmədin,

Amma mənim qulağımı açdın.

⁷O zaman dedim: «Budur, gəlmişəm,

Sənin tumarında mənim haqqımda yazılıb.

⁸Ey Allahım, Sənin iradəni yerinə yetirmək

Mənə zövq verir,

Qanunun qəlbimdədir».

⁹Çoxlu camaat arasında salehliyini car çəkdim,

Ya Rəbb, Sən bilirsən ki, ağzımı yummadım.

¹⁰Salehliyini qəlbimdə gizlətmədim,

Xilaskar olduğunu, sədaqətini söylədim.

Çoxlu camaat arasından

Məhəbbətini, həqiqətini gizli saxlamadım.

¹¹Ya Rəbb, mərhəmətini məndən əsirgəmə,

Daim məni məhəbbətinlə, həqiqətinlə qoru.

¹²Çünki sonsuz bəlalar ətrafımı bürüdü,

Günahlarım mənə sarıldı.

Görə bilmirəm, çünki məndə ürək qalmadı,

Onlar başımın tükündən çoxdur.

¹³Ya Rəbb, lütfünlə məni xilas et,

Ya Rəbb, dadıma tez çat!

¹⁴Canımı almaq üçün qəsd quranlar

Qoy utanıb biabır olsunlar.

Pis günümdən zövq alanlar

Geri qovulub rüsvay olsunlar.

¹⁵Mənə «Aha! Aha!» deyənlər

Xəcalət içində çaşıb qalsınlar.

¹⁶Lakin Səni axtaranlar

Sənə görə qoy şad olub sevinsinlər.

Xilaskar olduğunu sevənlər

Daim «Qoy ucalsın Rəbb!» desinlər.

¹⁷Budur, bir məzlum, bir fəqirəm,

Lakin Xudavənd qayğıma qalır.

Köməyim, xilaskarım Sənsən,

Ey Allahım, ləngimə!

Zəbur 41

Məzmur 41

Musiqi rəhbəri üçün. Davudun məzmuru.

¹Yoxsulların qayğısına qalan nə bəxtiyardır!

Rəbb dar günündə onu qurtarar,

²Rəbb onu qoruyar, salamat saxlayar.

O, ölkədə bəxtiyar olar,

Düşmənlərinə təslim edilməz.

³Yatağa düşəndə Rəbb ona dayaq olar,

Onu bütün xəstəlikdən sağaldar.

⁴Mən dedim: «Ya Rəbb, mənə rəhm et,

Canıma şəfa ver,

Çünki Sənə qarşı günah etmişəm».

⁵Düşmənlərim məndən pis sözlər söyləyir:

«Bu nə vaxt öləcək, adı batacaq?» deyirlər.

⁶Mənə baş çəkənlər yalan danışır,

Ürəklərinə böhtan yığır,

Bayıra çıxanda bundan danışırlar.

⁷Bütün mənə nifrət edənlər mənim barəmdə pıçıldaşır,

Mənə qarşı pis fikirləri var.

⁸Deyirlər: «Bu, ölümcül bəlaya düşüb,

Budur, yatır, daha qalxmaz».

⁹ Hətta etibarlı saydığım ən yaxın dostum,

Çörəyimi yeyən mənə xəyanət etdi.

¹⁰Sən, ya Rəbb, rəhm edib məni ayağa qaldır,

Qoy onlardan bunun əvəzini çıxım!

¹¹Məndən razı qaldığını bundan bilirəm:

Düşmənlərimin mənə qalib gəlmədiyini görürəm.

¹²Kamil olduğum üçün məndən möhkəm yapışdın,

Məni hüzurunda əbədilik dayandırdın.

¹³ Alqış olsun İsrailin Allahı Rəbbə

Əzəldən sonsuza qədər!

Amin! Amin!

İkinci hissə

Zəbur 42

Məzmur 42

Musiqi rəhbəri üçün. Qorah övladlarının maskili.

¹Maral axar sulara həsrət qalan kimi,

Ey Allah, könlüm Sənin həsrətini çəkir!

²Ey var olan Allah, mənim qəlbim Sənin üçün susayıb.

Ay Allah, nə vaxt gəlib hüzurunda görünüm?

³Göz yaşlarım gecə-gündüz qidam olub,

Daim mənə deyirlər: «Bəs hanı Allahın?»

⁴Bunları yadıma salarkən ürəyim üzülür,

Necə də yüksəkdən sevinc, şükür nidalarını söyləyərək

Bayram edən xalqın qarşısında gedərdim,

Onları Allahın evinə aparardım.

⁵Mənim qəlbim, niyə qırılmısan?

Axı niyə bu köksümdə təlaşlanırsan?

Ümidini yenə Allaha bağla,

Qoy Allahıma – məni qurtarana şükür edim.

⁶Köksümdəki qəlbim qırılıb,

Ona görə İordan diyarında,

Xermon, Misar dağında

Səni düşünürəm.

⁷Dərin sular şəlalələrinin səsi ilə

Dərin suları çağırdı,

Sənin ləpələrin, dalğaların başımdan aşdı.

⁸Rəbb mənə gündüz məhəbbət göstərir,

Gecə isə həyatımın Allahına

Etdiyim dua və ilahi dilimdən düşmür.

⁹Qayama – Allahıma deyirəm: «Niyə məni unutdun?

Düşmənin zülmünə görə niyə yaslı gəzməliyəm?»

¹⁰Düşmənlərim sümüklərimi qırıb məni təhqir edirlər,

Daim mənə «Bəs hanı Allahın?» deyirlər.

¹¹Mənim qəlbim, niyə qırılmısan?

Axı niyə bu köksümdə təlaşlanırsan?

Ümidini yenə Allaha bağla,

Qoy Allahıma – məni qurtarana şükür edim.

Zəbur 43

Məzmur 43

¹Ey Allah, etibarsız millətə qarşı olan mübarizəmdən

Məni haqlı çıxart,

Məni hiyləgər, fitnəkar adamın əlindən qurtar.

²Çünki Sən pənah gətirdiyim Allahsan.

Niyə məni atmısan?

Düşmənin zülmünə görə niyə yaslı gəzməliyəm?

³Göndər Öz nurunu, həqiqətini,

Qoy yolunu mənə göstərsinlər,

Müqəddəs dağına, məskənlərinə

Qoy məni aparsınlar.

⁴Onda Allahın qurbangahına,

Sevincim, fərəhim olan Allahımın yanına gedərəm.

Lira çalıb Sənə şükür edərəm,

Ey Allah, mənim Allahım.

⁵Mənim qəlbim, niyə qırılmısan?

Axı niyə bu köksümdə təlaşlanırsan?

Ümidini yenə Allaha bağla,

Qoy Allahıma – məni qurtarana şükür edim.

Zəbur 44

Məzmur 44

Musiqi rəhbəri üçün. Qorah övladlarının maskili.

¹Ey Allah, öz qulağımızla eşitmişik ki,

Ata-babalarımızdan bizə çatıb ki,

Onların dövründə, qədim zamanda

Sən hansı işləri görmüsən.

²Öz əlinlə millətləri torpaqlarından götürdün,

Atalarımızı orada yerləşdirdin.

Xalqlara bəla verdin,

Atalarımızın soyunu şaxələndirdin.

³Onlar qılıncları ilə deyil,

Sənin sağ əlinlə torpaqlara sahib oldular.

Öz qolları deyil,

Sənin sağ qolun onlara zəfər qazandırdı.

Onlara üzündən nur verdin,

Çünki Sən onları sevirdin.

⁴Ey mənim Allahım, Sənsən Padşahım,

Əmr et, Yaqub nəsli qələbə çalsın.

⁵Köməyinlə düşmənlərimizi devirək,

İsminlə əleyhdarlarımızı əzək.

⁶Ox-kamanıma güvənmərəm,

Qılıncım məni qurtarmaz.

⁷Yalnız Sən bizi düşmənlərimizdən xilas etdin,

Bizə nifrət edənləri rüsvay etdin!

⁸Gün boyu Allahla fəxr edirik,

İsminə sonsuza qədər şükür edirik.

Sela

⁹İndi isə bizi atıb rüsvay etmisən,

Ordularımızla yürüşə çıxmırsan.

¹⁰Düşmənin qarşısından bizi geriyə qovursan,

Bizə nifrət edənlər bizi soyub-talayır.

¹¹Bizi kəsilməyə gedən qoyun kimi etdin,

Sən bizi millətlər arasına səpdin.

¹²Öz xalqını yaman ucuz satdın,

Onların dəyərindən çox qazanmadın.

¹³Bizi qonşularımıza tənə hədəfi etdin,

Ələ salıb lağ edənlərlə yan-yörəmizi doldurdun.

¹⁴Bizi millətlərin dilinə saldın,

Ümmətlərin gülüş hədəfinə döndərdin.

¹⁵Rüsvayçılığım daim qarşımı kəsir,

Bu xəcalətin üzündən,

¹⁶Təhqir, söyüş sözlərindən,

Düşməndən, qisasçıdan üzümü gizlədirəm.

¹⁷Səni unutmadığımız,

Əhdinə xəyanət etmədiyimiz halda

Bunların hamısı başımıza gəldi.

¹⁸Səndən qəlbimiz dönmədiyi,

Yolundan ayaqlarımız büdrəmədiyi halda

¹⁹Sən bizi çaqqalların diyarında əzdin,

Qatı zülmətə qərq etdin.

²⁰Allahımızın ismini unutmuş olsaydıq,

Yad allaha əl açmış olsaydıq,

²¹Allah bunu araşdırmazdımı?

Çünki qəlbin hər sirrini bilən Odur.

²² Biz gün boyu Sənin uğrunda öldürülürük,

Qurbanlıq qoyunlar sayılırıq.

²³Ey Xudavənd, oyan, niyə yatmısan?

Qalx, bizi əbədilik atma!

²⁴Niyə üzünü bizdən gizlədirsən?

Əzab-əziyyətimizi nə üçün unutdun?

²⁵Qəlbimiz palçıq kimi əzilmişdir,

Qəddimiz əyilib yerə dəyir.

²⁶Qalx, bizə kömək et,

Bizi məhəbbətin naminə xilas et!

Zəbur 45

Məzmur 45

Musiqi rəhbəri üçün. Qorah övladlarının «Şoşannim» üstə oxunan maskili.

Sevgi nəğməsi

¹Qəlbim yaxşı sözlərlə çağlayır,

Qoy şeirlərimi padşahıma söyləyim,

Dilim mahir bir xəttatın qələminə oxşayır.

²Bəşər övladlarının ən gözəli sənsən,

Dodaqlarından lətafətli sözlər tökülür,

Çünki Allah səni əbədilik xeyir-dualı edib.

³Ey cəngavər, qılıncını belinə bağla,

Əzəmətini, ehtişamını göstər.

⁴Həqiqət, itaətkarlıq və salehlik naminə

Döyüş arabasına qalx,

Əzəmətinlə uğur qazan.

Qoy sağ əlindən möhtəşəm işlər gəlsin.

⁵Nə itidir oxların,

Padşahın düşmənlərinin köksünə saplanır.

Xalqlar ayağının altına yıxılır.

⁶ Ey Allah, taxtın əbədilik, sonsuzadək qalır,

Sənin şahlıq əsan insaf əsasıdır.

⁷Salehliyi sevib pisliyə nifrət edirsən.

Ona görə Allah, sənin Allahın

Sevinc yağı ilə

Yoldaşlarından çox səni məsh edib.

⁸Bütün paltarlarından

Mirra, əzvay və Çin darçınının ətri gəlir.

Fil dişindən olan saraylarından

Səni şənləndirən simli alətlərin sədası gəlir.

⁹Şərəfə çatdırdığın qadınlar arasında

Şahzadə xanımlar da var.

Mələkə olacaq qız sağ qoluna girib,

Ofir qızıllarına bürünüb.

¹⁰Dinlə, ey qız, diqqət elə, sözümə qulaq as,

Öz xalqını, ata evini unut.

¹¹Sənin gözəlliyin padşahı məftun etsin.

O sənin ağandır, ona itaət et.

¹²Sur xalqı yanına hədiyyələr gətirəcək,

Xalqın varlıları səndən lütf istəyəcək.

¹³Bu şah qızı sarayına cah-calalla gətirilir,

Paltarları qızıl tikmələrə bürünmüş.

¹⁴Padşahın yanına əlvan libasda gətirilir,

Rəfiqələri sağdışı-soldışıdır.

¹⁵Onlar sevinclə, şadlıqla gətirilir,

Padşahın sarayına girirlər.

¹⁶Ey padşah, ata-baban kimi oğulların olacaq,

Onlara bütün yer üzünün hakimiyyətini verəcəksən.

¹⁷Adını nəsillərdən-nəsillərə çatdıracağam,

Xalqlar da sonsuza qədər sənə həmd oxuyacaq!

Zəbur 46

Məzmur 46

Musiqi rəhbəri üçün. Qorah övladlarının «Alamot» üstə oxunan ilahisi.

¹Allah bizə sığınacaqdır, qüvvətdir,

Dar gündə çox kömək edir.

²Buna görə biz qorxmuruq:

Yer üzü alt-üst olsa belə,

Dağlar uçub dənizin köksünə aşsa belə,

³Dalğalar kükrəyib qalxsa belə,

Vurub dağları yırğalasa belə,

Biz qorxmuruq.

Sela

⁴Bir çay var ki suları Allahın şəhərinə axır,

Haqq-Taalanın müqəddəs məskəninə sevinc gətirir.

⁵Allah bu şəhərin mərkəzində sarsılmaz durub,

Ona dan yeri söküləndə yardım edər.

⁶Millətlər kükrəyər, ölkələr sarsılar,

Allah səsini çıxaranda dünya əriyər.

⁷Ordular Rəbbi bizimlədir!

Yaqubun Allahı qalamızdır!

Sela

⁸Gəlin, görün Rəbbin işlərini,

Dünyada etdiyi viranəliyi.

⁹O, yerin ucqarlarınadək döyüşləri dayandırar,

Kamanları qırar, nizələri sındırar,

Döyüş arabalarını oda atar.

¹⁰«Dayanın, bilin ki, Mən Allaham,

Millətlər arasında ucayam,

Yer üzündə ucayam!»

¹¹Ordular Rəbbi bizimlədir!

Yaqubun Allahı qalamızdır!

Sela

Zəbur 47

Məzmur 47

Musiqi rəhbəri üçün. Qorah övladlarının məzmuru.

¹Ey bütün xalqlar, əl çalın,

Cuşa gəlib Allaha nida edin!

²Haqq-Taala Rəbb necə də zəhmlidir,

Bütün yer üzünün böyük Padşahıdır!

³Onun sayəsində xalqlar bizə tabe olub,

O, ümmətləri ayaqlarımızın altına salıb.

⁴Sevdiyi Yaqubun fəxri olan torpağı

Bizə mülk etmək üçün seçdi.

Sela

⁵Allah nida ilə ucaldı,

Rəbb şeypur səsi ilə yüksəldi.

⁶Tərənnüm edin Allahı, tərənnüm edin!

Tərənnüm edin Padşahımızı, tərənnüm edin!

⁷Çünki Allah bütün yer üzünün Padşahıdır,

Onu ilahilərlə tərənnüm edin.

⁸Allah Öz müqəddəs taxtında əyləşir,

Allah millətlərə padşahlıq edir.

⁹İbrahimin Allahının xalqı ilə bir yerdə olmaq üçün

Xalqların əsilzadələri yığılır,

Çünki yer üzünün sipərləri Allahındır.

O nə qədər ucadır!

Zəbur 48

Məzmur 48

Qorah övladlarının məzmuru.

Bir ilahi.

¹Allahımızın şəhərində,

Öz müqəddəs dağında

Rəbb çox əzəmətlidir,

Bol həmdlərə layiqdir.

² Şimala tərəf böyük Padşahın şəhəri –

Sion dağı ucalığı ilə gözəldir,

Dünyanın sevincidir.

³Onun qalalarında Allah Özünü

Alınmaz qala kimi göstərmişdir.

⁴Padşahlar bir yerə yığıldılar,

Siona yürüş etdilər.

⁵Onu görəndə mat qaldılar,

Qorxub tez qaçdılar.

⁶Hamilə qadının ağrısı kimi

Canlarına lərzə düşdü.

⁷Sən şərq küləyi ilə

Tarşiş gəmilərini parçaladın.

⁸Ordular Rəbbinin şəhərində –

Allahımızın şəhərində

Nə eşitmişiksə, onu gördük,

Allah oranı əbədi saxlayacaq.

Sela

⁹Ey Allah, məbədində

Məhəbbətin barədə dərindən düşünürük.

¹⁰Ey Allah, yerin ucqarlarına qədər

Adın həmdə layiqdir.

Sağ əlin ədalətinlə doludur.

¹¹Qoy Sion dağı sevinsin.

Sənin hökmlərinə görə

Qoy Yəhuda qızları şad olsun.

¹²Sionun ətrafında gəzib-dolaşın,

Onun qüllələrini sayın.

¹³Divarlarına fikir verin,

Qalalarına diqqətlə baxın.

Gələcək nəslə belə deyin:

¹⁴«Əbədi, sonsuzadək

Bu Allah bizim Allahımızdır.

Ömrümüzün sonunadək

O bizə yol göstərəcək!»

Zəbur 49

Məzmur 49

Musiqi rəhbəri üçün. Qorah övladlarının məzmuru.

¹Siz, ey bütün xalqlar,

Bunu dinləyin!

Ey dünya sakinləri,

²Ey sadə insanlar, əsilzadələr,

Ey zənginlər, fəqirlər,

Hamınız qulaq asın!

³Dilimdən hikmətli sözlər çıxacaq,

Bu müdrik fikirlər qəlbimdən gəlir.

⁴Bu məsəllərə qulaq asacağam,

Bu müəmmamı mən lira ilə açacağam:

⁵Niyə yaman günlərdən,

Ətrafımda məni təqib edənlərin pis niyyətindən qorxum?

⁶Onlar var-dövlətlərinə güvənirlər,

Bol sərvətləri ilə öyünürlər.

⁷Amma kimsə öz ömrünü satın ala bilməz,

Həyatının haqqını Allaha ödəyə bilməz.

⁸Çünki insanın canının haqqı çox dəyərlidir,

Ən üstün qiymətlər ona kifayət etmir ki,

⁹İnsan əbədi ömür sürsün,

Məzarı heç görməsin.

¹⁰Aydındır ki, həm hikmətlilər ölür,

Həm axmaqlar, həm də səfehlər tələf olur,

Hamının sərvəti başqasına nəsib olur.

¹¹Torpaqlara sahib olsalar belə,

Son mənzilləri qəbirdir,

Yenə nəsillərdən-nəsillərədək yerləri məzardır.

¹²İnsan dəyərli olsa da, qalmır,

Həlak olan heyvana oxşayır.

¹³Özünə güvənənlərin yolu ölümə aparır,

Özündən razı lovğaların sonu belədir.

Sela

¹⁴Onlar sürü kimi ölülər diyarına aparılar,

Onları ölüm otarar.

Səhər açılanda əməlisalehlər onlara hakim olar.

Yurd-yuvasından uzaq bir yerdə, ölülər diyarında

Cəsədləri çürüyüb qalar.

¹⁵Amma Allah ölülər diyarının əlindən canımı qurtaracaq,

Məni oradan alacaq.

Sela

¹⁶Qorxma bir adam varlı olanda,

Evinə sərvət yığılanda.

¹⁷Çünki öləndə heç nə apara bilməz,

Sərvəti ardınca getməz.

¹⁸Sağ ikən özünü xoşbəxt saysa da,

Uğur qazananda təriflənsə də,

¹⁹Ata-babalarının yanına gedəcək,

Sonsuzadək orada işıq görməyəcək.

²⁰İnsan dəyərli olsa da, anlamır,

Həlak olan heyvana oxşayır.

Zəbur 50

Məzmur 50

Asəfin məzmuru.

¹Güclü Rəbb Allah çağırır,

Gündoğandan günbatanadək

Bütün yer üzünü səsləyir.

²Qüsursuz, gözəl Siondan

Allah Öz nurunu saçır.

³Allahımız gəlir, sakit dayanmaz,

Önündə yandırıb-yaxan alov var,

Ətrafında şiddətli tufan qopar.

⁴O, xalqını mühakimə etmək üçün

Yuxarıdakı göyü və yeri şahid çağırır:

⁵«Hüzuruma möminlərimi,

Qurban verib Mənimlə əhd bağlayanları yığın!»

⁶Göylər ədalətini bəyan edir,

Çünki hakim Allahın Özüdür.

Sela

⁷«Danışıram, dinlə Məni, ey xalqım!

Ey İsrail, əleyhinə şəhadət edirəm.

Allaham, sənin Allahın Mənəm.

⁸Qurbanlarından ötrü səni tənbeh etmirəm,

Yandırma qurbanlarını həmişə görürəm.

⁹Tövləndəki buğanı, ağılındakı təkəni

Səndən qəbul etmirəm.

¹⁰Çünki Mənimdir bütün meşələrdə olan heyvanlar,

Minlərlə dağda otlayan mal-qaralar.

¹¹Dağlardakı bütün quşları tanıyıram,

Bütün çöl heyvanları əlimin altındadır.

¹²Acsam, sənə demərəm,

Çünki dünyaya, dünyadakı hər şeyə sahibəm!

¹³Məgər Mən buğa əti yeyirəm?

Məgər Mən təkə qanı içirəm?

¹⁴Şükür qurbanını Allaha təqdim et,

Haqq-Taalaya əhd etdiyin təqdimlərini ver.

¹⁵Dar gündə Məni çağır,

Mən səni xilas edəcəyəm,

Sən də Məni şərəfləndirəcəksən».

¹⁶Pislərəsə Allah deyir:

«Qaydalarımı əzbər söyləməyə haqqınız varmı?

Əhdimi dilə gətirməyə haqqınız varmı?

¹⁷Mənim iradıma nifrət edirsən,

Sözlərimi qulaq ardına vurursan.

¹⁸Bir oğru görəndə ona qoşulursan,

Zinakarlara yoldaş olursan.

¹⁹Ağzını şər üçün açırsan,

Dilini fırıldaq üçün işə salırsan.

²⁰Oturub qardaşından gileylənirsən,

Ananın oğlundan qeybət edirsən.

²¹Sən belə edəndə Mən dinməmişəm.

Məgər Məni özün kimi sanırsan?

İndi isə səni tənbeh edəcəyəm,

Əməllərini gözünün önünə düzəcəyəm.

²²Ey Allahı unudanlar,

Buna diqqət edin!

Yoxsa sizi parça-parça edərəm,

Heç birinizi xilas edən olmaz.

²³Kim ki şükür qurbanı təqdim edir,

Məni şərəfləndirir.

Doğru yol tutan şəxsə

Allahın xilasını göstərəcəyəm».

Zəbur 51

Məzmur 51

Musiqi rəhbəri üçün. Davudun məzmuru.

Davudun Bat-Şeva ilə olan münasibətinə görə Natan peyğəmbər onun yanına gəlib irad tutandan sonra.

¹Məhəbbətinə görə, ey Allah, mənə rəhm et,

Bol mərhəmətinə görə qanunsuzluqlarımı sil.

²Təqsirimi tamamilə yu,

Günahımdan məni təmizlə.

³Çünki qanunsuzluqlarımı bilirəm,

Günahım daim gözümün qarşısındadır.

⁴ Sənə, yalnız Sənə qarşı günah işlətmişəm,

Gözündə pis sayılanı etmişəm.

Mənə görə çıxarılan hökmündə ədalətlisən,

Məni məhkum etməkdə haqlısan.

⁵Mən doğulandan bəri günahkaram,

Ana bətnindən belə, təqsirkaram.

⁶Sənsə ürəkdə düzlüyün olmasını istəyirsən,

Mənə daxilən hikmət öyrət.

⁷Məni züfa ilə pak et, təmiz olum,

Məni yu, qardan da ağ olum.

⁸Mənə şadlıq, sevinc səsini eşitdir,

Qırdığın sümüklərim xoşhallansın.

⁹Üzünü tut, günahlarımı görmə,

Bütün təqsirlərimi sil.

¹⁰Ey Allah, məndə təmiz ürək yarat,

Daxilimə yenidən sədaqət ruhunu ver.

¹¹Məni Öz hüzurundan atma,

Müqəddəs Ruhunu məndən götürmə.

¹²Xilasının sevincini mənə qaytar,

İtaətkarlıq ruhu verib mənə dayaq ol.

¹³Qoy Sənin yollarını qanunsuzlara öyrədim,

Günahkarlar Sənə sarı dönsünlər.

¹⁴Ey Allah, məni azad et,

Qan tökmək təqsirindən məni qurtar,

Dilim ədalətini mədh etsin.

¹⁵Ey Xudavənd, Sən dilimi aç,

Ağzımla Sənə olan həmdlərimi bəyan edim.

¹⁶Sən qurbanlardan zövq almazsan,

Yoxsa kəsərdim.

Yandırma qurbanlarından razı qalmazsan,

¹⁷Allaha məqbul olan qurban sınmış ruhdur,

Sən sınan və peşman olan ürəyə xor baxmazsan, ey Allah!

¹⁸Lütfünlə Siona yaxşılıq et,

Yerusəlimin divarlarını bərpa et.

¹⁹Onda doğru yolla təqdim edilən qurbanlardan,

Bütöv yandırma qurbanlarından zövq alarsan.

O zaman qurbangahında buğalar qurban kəsilər.

Zəbur 52

Məzmur 52

Musiqi rəhbəri üçün. Davudun maskili.

Edomlu Doeq Davudun Aximelekin evinə getdiyini Şaula xəbər verəndə

¹Pisliyinlə nə üçün öyünürsən, ey cəngavər?

Sonsuzdur Allahın məhəbbəti.

²Ey hiyləgər, dilin insanı məhv edir,

İti ülgüc kimi kəsir.

³Yaxşılıqdan çox yamanı,

Doğru sözdən çox yalanı sevirsən.

Sela

⁴Ey hiyləgər dilli,

Məhvedici sözləri çox sevirsən!

⁵Allah səni əbədilik qıracaq,

Yaxandan yapışaraq evindən çölə atacaq,

Dirilər arasından kökünü qoparacaq.

Sela

⁶Salehlər buna baxıb qorxacaqlar,

Gülə-gülə belə deyəcəklər:

⁷«Bu adam Allaha pənah gətirmədi,

Öz bol sərvətinə güvəndi,

Başqalarını məhv edərək gücləndi».

⁸Amma mən Allahın evində

Yaşıl zeytun ağacına bənzərəm,

Daima, əbədilik

Allahın məhəbbətinə güvənirəm.

⁹Sənin gördüyün işlərə görə daim şükür edirəm,

Möminlərin qarşısında gözəl isminə ümid bağlayıram!

Zəbur 53

Məzmur 53

(Zəb. 14)

Musiqi rəhbəri üçün. Davudun «Maxalat» üstə oxunan maskili.

¹Axmaqlar ürəyində «Allah yoxdur!» deyə düşünürlər,

İnsanlar pozulmuş, əməlləri iyrənc olmuş,

Yaxşı iş görən yoxdur.

²Allah göylərdən bəşər övladına baxır;

Görəsən Allahı dərk edən, Onu axtaran varmı?

³Hamı birgə pozulub, namus əldən gedib,

Bir nəfər də olsun yaxşı iş görən yoxdur.

⁴Şər iş görənlərin hər biri məgər heç nə qanmırmı?

Xalqımı çörək yerinə yeyirlər, Allahı çağırmırlar.

⁵Onlar böyük dəhşətə düşəcək,

Heç görünməmiş dəhşətə düçar olacaqlar.

Allah bizi mühasirəyə salanların

Sümüklərini qırıb dağıdacaq.

Onlar qarşımızda pərt qalacaq,

Çünki Allah tərəfindən rədd olunacaqlar.

⁶Kaş İsrailin azadlığı Siondan gələydi!

Allah Öz xalqına bəxtəvər günlərini qaytaran zaman

Yaqub övladları şadlıq edəcək,

İsraillilər sevinəcək!

Zəbur 54

Məzmur 54

Musiqi rəhbəri üçün. Davudun simli alətlərin müşayiəti ilə oxunan maskili.

Ziflilər Şaulun yanına gəlib «yəqin ki Davud bizim aramızda gizlənib» deyəndə.

¹Ey Allah, isminlə məni qurtar,

Qüvvənlə mənə bəraət ver.

²Ey Allah, mənim duamı dinlə,

Dilimdən çıxan sözlərə qulaq as.

³Yadellilər əleyhimə qalxıblar,

Zalımlar canımı almaq üçün məni axtarırlar,

Heç Allaha baxmırlar.

Sela

⁴Budur, Allah mənə kömək edir,

Xudavənd ömrümə dayaq olur.

⁵O bu şəri düşmənlərimə tərəf döndərəcək.

Mənim sadiq Allahım, düşmənləri yox et!

⁶Sənə könüllü qurban kəsəcəyəm,

Ya Rəbb, gözəl isminə şükür edəcəyəm!

⁷Məni hər darlıqdan xilas etdin,

Gözüm düşmənlərimin məhvini gördü.

Zəbur 55

Məzmur 55

Musiqi rəhbəri üçün. Davudun simli alətlərin müşayiəti ilə oxunan maskili.

¹Ey Allah, duamı dinlə,

Yalvarışımdan gizlənmə!

²Yaxşı qulaq as mənə, bir cavab söylə,

Düşüncələrim məni narahat edir,

Çaş-baş qalmışam.

³Düşmənin səsindən,

Zalımların zülmündən narahatam.

Məni onların şər işləri sarsıdır,

Onlar qəzəblə mənə qəsd-qərəz qurur.

⁴Köksümdəki ürəyim sancır,

Düşdüyüm dəhşət ölümdən betərdir.

⁵Mənə qorxu və titrətmə gəlib,

Canımı vicvicə bürüyüb.

⁶Dedim: «Kaş göyərçin kimi qanadlarım olaydı,

Uçub rahatlıq tapaydım.

⁷Doğrudan da, uzaqlara qaçardım,

Çöllərdə məskən salardım.

Sela

⁸Bu sərt yellərdən, qasırğalardan

Daldalanmaq üçün tez bir yerə gedəydim».

⁹Ey Xudavənd, bu şəhəri alt-üst et,

Oradakıların dillərinə ayrılıq sal.

Orada zorakılıq, dava gördüm;

¹⁰Bunlar gecə-gündüz divarlarının üstündə dolanır,

Pislik və şər şəhərin içindədir,

¹¹Aralarında qırğın var,

Meydanlarından hədə-qorxu və fırıldaq çıxır.

¹²Əgər məni düşmən təhqir etsəydi, dözərdim,

Yağı qarşımda qürrələnsəydi, gizlənərdim.

¹³Amma bunu sən etdin, ey rəfiqim,

Ey yoldaşım, ürək həmdəmim.

¹⁴Səninlə şirin-şirin söhbət edərdik,

Allah evinə birgə gedərdik.

¹⁵Qoy düşmənlərə qəfil ölüm gəlsin,

Onlar diri-diri ölülər diyarına düşsün,

Çünki şər onların evində və qəlbindədir.

¹⁶Mənsə Allahı səsləyərəm,

Rəbb məni xilas edər.

¹⁷Səhər, günorta, axşam nalə çəkirəm,

Ah-zar edirəm, O, səsimi eşidir.

¹⁸Çoxları əleyhimə çıxır,

Amma O, canımı döyüşdən qoruyur.

¹⁹Əzəldən bəri taxtında oturan Allah

Məni eşidib onları zəlil edəcək.

Sela

Çünki onlar əsla dəyişməz,

Allahdan qorxmurlar.

²⁰Yoldaşım dostuna əl qaldırır,

Dostluq əhdini pozur.

²¹Onun dili kərə yağından da yağlıdır,

Qəlbində isə çəkişmələr yaşayır,

Sözləri zeytun yağından yumşaqdır,

Amma siyrilmiş qılınclardır.

²² Sən qayğı yükünü Rəbbə ver,

Qoy sənə dayaq olsun.

O heç vaxt salehə sarsıntı verməz.

²³Ey Allah, qanlı, hiyləgər adamları

Qəbirə endirəcəksən.

Onların ömrü yarıya çatmayacaq.

Amma mən yalnız Sənə güvənirəm!

Zəbur 56

Məzmur 56

Musiqi rəhbəri üçün. Davudun «Yonat elem rexoqim» üstə oxunan miktamı.

Filiştlilər onu Qat şəhərində yaxalayanda.

¹Rəhm et mənə, ey Allah,

İnsanlar sel kimi üstümə cumur,

Gün boyu döyüşərək məni sıxışdırırlar.

²Gün boyu düşmənlərim sel kimi üstümə cumur,

Əleyhimə qalxan məğrur döyüşçülər çoxdur.

³Bu dəhşətli gündə

Mən yalnız Sənə güvənirəm.

⁴Vədinə görə Allaha həmd edirəm,

Mən Allaha güvənirəm, qorxmuram;

Fani insan mənə nə edə bilər?

⁵Hər işimə onlar ziyan vururlar,

Həmişə mənə qəsd-qərəz qururlar.

⁶Xəlvət bir yerə yığılıb hər addımımı izləyirlər,

Pusqu qurub canımı almaq üçün gözləyirlər.

⁷Günahlarına görə onları cəzalandır,

Ey Allah, qəzəblə bu xalqları yerlə yeksan et.

⁸Dərdlərimi saydın,

Göz yaşlarımı tuluğuna yığ.

Bunlar Sənin kitabında yazılmayıbmı?

⁹Mən Səni çağıranda düşmənlərim geri dönür,

Bunu bilirəm, Allah mənim tərəfimdədir.

¹⁰Vədinə görə həmd etdiyim Allaha,

Vədinə görə həmd etdiyim Rəbbə,

¹¹Allaha güvənirəm və qorxmuram;

Fani insan mənə nə edə bilər?

¹²Ey Allah, Sənə olan əhdlərimə əməl etməliyəm,

Sənə şükür qurbanı təqdim edəcəyəm.

¹³Çünki canımı ölümdən qurtardın,

Ayaqlarımı büdrəməyə qoymadın,

Belə ki Allahın hüzurunda,

Həyatın nurunda dolanım.

Zəbur 57

Məzmur 57

Musiqi rəhbəri üçün. Davudun «Al-taşxet» üstə oxuduğu miktamı.

Şauldan qaçıb mağarada gizlənəndə.

¹Mənə rəhm et, ey Allah, mənə rəhm et!

Canımı götürüb Sənin yanına pənah gətirmişəm.

Bəlalar keçib-gedənəcən

Qanadlarının altına sığınacağam.

²Allah-Taalanı çağırıram,

Mənim üçün hər şeyi verən Allahı çağırıram.

³Göydən mənə qurtuluş göndərəcək,

Başımı yemək istəyəni rüsvay edəcək.

Sela

Allah Öz məhəbbətini və sədaqətini göndərəcək.

⁴Sanki aslanların arasındayam,

Yandırıb-yaxan adamların arasında yatıram.

Dişləri nizədir, oxdur,

Dilləri iti qılıncdır.

⁵Ey Allah, göylər üzərində ucal!

Ehtişamın bütün yer üzərində olsun!

⁶Yolumda tələ qurub canımı üzdülər,

Mənə qazdıqları quyuya özləri düşdülər.

Sela

⁷Ey Allah, qəlbim Sənə möhkəm bağlanıb, möhkəm bağlanıb,

Qoy ilahi oxuyum, Səni tərənnüm edim.

⁸Ey mənim ruhum, oyan!

Ey çəng və lira, oyan!

Qoy səhəri oyadım.

⁹Ey Xudavənd, xalqlar arasında

Sənə şükür edəcəyəm.

Ümmətlər arasında

Səni tərənnüm edəcəyəm.

¹⁰Məhəbbətin böyükdür, göylərə çatır,

Sədaqətin buludlara dəyir.

¹¹Ey Allah, göylər üzərində ucal!

Ehtişamın bütün yer üzərində olsun!

Zəbur 58

Məzmur 58

Musiqi rəhbəri üçün. Davudun «Al-taşxet» üstə oxuduğu miktamı.

¹Ey qüdrətlilər, doğrudanmı ədalətlə danışırsınız?

Bəşər övladları üçün insaflamı hökm çıxarırsınız?

²Xeyr, qəlbinizdən fitnə-fəsad çıxır,

Bu dünyada əlinizdən zorakılıq gəlir.

³Pis adamlar ana bətnindən belə, azğındırlar,

Çaşıblar, doğulan gündən belə, yalançıdırlar.

⁴Onlar əfi ilan kimi zəhərlidirlər,

Qulaqlarını tıxayan gürzəyə bənzəyirlər.

⁵Onlar ilanoynadanın səsinə gəlmir,

Usta bir ovsunçu onu ovsunlaya bilmir.

⁶Ey Allah, onların ağızlarındakı dişlərini qır,

Ya Rəbb, bu gənc aslanların dişlərini çıxar.

⁷Qoy onlar su kimi axıb yox olsun,

Kaman üstündəki oxlarının ucları qırılsın.

⁸İlbiz kimi gedərkən ərisinlər,

Ölü doğulan körpələr kimi günəş nuru görməsinlər.

⁹Ocaqda qazanlarını qızdırmazdan əvvəl kol-kosları sovrulsun,

Nə qurularından, nə də yaşlarından heç nə qalmasın.

¹⁰Pislərdən qisas alındığını görən salehlər şad olacaq,

Ayaqlarını onların qanına batıracaq.

¹¹İnsanlar belə deyəcək: «Bəli, salehlər barlı olar,

Həqiqətən, dünyanın hökmranı olan bir Allah var!»

Zəbur 59

Məzmur 59

Musiqi rəhbəri üçün. Davudun «Al-taşxet» üstə oxunan miktamı.

Şaul onu öldürmək üçün evinə adam göndərib pusqu qoyanda.

¹Ey Allahım, məni düşmənlərimdən qurtar,

Əleyhdarlarımın əlindən hifz et.

²Məni şər iş görənlərdən xilas et,

Məni qaniçənlərdən azad et.

³Canımı almaq üçün məni güdürlər,

Güclülər əleyhimə birləşiblər.

Ya Rəbb, üsyankar, günahkar,

⁴Təqsirkar olmadığım halda

Onlar mənə qarşı qəti tədbir görürlər.

Bir oyan, halımı gör, yardım et,

⁵Ya Rəbb, Ordular Rəbbi, İsrailin Allahı!

Bütün millətlərə cəza vermək üçün oyan,

Xəyanətkar pislərin heç birinə rəhm etmə.

Sela

⁶Bu pis adamlar axşamüstü qayıdırlar,

Köpək kimi mırıldayırlar,

Şəhərdə sülənib-dolaşırlar.

⁷Gör dodaqlarından nələr tökülür,

Ağızlarından qılınclar çıxır.

Onlar zənn edirlər ki, eşidən yoxdur.

⁸Lakin, ya Rəbb, Sən onlara gülürsən,

Bütün millətlərə rişxənd edirsən.

⁹Ey mənə qüvvət verən,

Səni gözləyirəm!

Ey Allahım, qalamsan,

¹⁰Mənə məhəbbətini göstərirsən!

Ey Allah, imdad etmək üçün çıxacaqsan,

Düşmənlərimin qırılmasını mənə göstərəcəksən.

¹¹Ey Xudavənd, Sənsən sipərimiz!

Xalqımın yadında qalsın deyə

Düşmənləri qırma, lakin gücünlə

Onları dağıdaraq məğlub et.

¹²Günahkar dillərinə görə,

Ağızlarının sözlərinə görə

Təkəbbürlülərin tələsinə özləri düşsünlər.

Yağdırdıqları lənətlərə görə,

Dedikləri yalanlara görə

¹³Onları qəzəbinlə məhv et,

Məhv et, qoy bir nişanə qalmasın.

Qoy insanlar bilsinlər:

Allah səltənət sürür

Yaqub nəslinin üzərində,

Ta ucqarlara qədər yer üzərində.

Sela

¹⁴Bu pis adamlar axşamüstü qayıdırlar,

Köpək kimi mırıldayırlar,

Şəhərdə sülənib-dolaşırlar.

¹⁵Avara-avara gəzib yem axtarırlar,

Doyunca tapmasalar, gecə boyu ulayırlar.

¹⁶Mən isə Sənin qüdrətini tərənnüm edəcəyəm,

Sübh tezdən məhəbbətini mədh edəcəyəm.

Çünki Sən mənə qala olmusan,

Dar günümdə mənim pənahımsan.

¹⁷Ey mənə qüvvət verən,

Səni tərənnüm edəcəyəm!

Ey Allahım, qalamsan,

Mənə məhəbbətini göstərirsən!

Zəbur 60

Məzmur 60

Musiqi rəhbəri üçün. Davudun «Şuşan-edut» üstə oxunan təlim miktamı.

Davud Naharayim və Sova Aramlıları ilə döyüşərkən Yoav gedib Duz vadisində on iki min Edomlunu öldürəndə.

¹Ey Allah, Sən bizi atmısan,

Müdafiə qüvvələrimizi dağıtmısan.

Bizə qəzəblənmisən,

Bizi əvvəlki halımıza qaytar.

²Yeri lərzəyə salmısan,

Torpağını dağıtmısan.

Yarıqlarını yenə bitişdir,

Çünki yer sarsılıb.

³Öz xalqını çətinliyə salmısan,

Şərab içirərək bizi səndələtmisən.

⁴Səndən qorxanlara isə bayraq vermisən,

Qoy onu həqiqət naminə qaldırsınlar.

Sela

⁵Sevdiyin insanların xilas olması üçün

Sağ əlinlə bizi qurtar, mənə cavab ver!

⁶Allah Öz müqəddəs məskənindən belə söylədi:

«Şekemi sevinclə bölüşdürəcəyəm,

Sukkot dərəsini böləcəyəm.

⁷Gilead torpağı Mənimdir,

Menaşşe torpağı da Mənimdir,

Efrayim başımın dəbilqəsidir,

Yəhuda Mənim əsamdır.

⁸Moav yuyunmaq üçün ləyənimdir,

Çarığımı ataraq Edomu tutacağam,

Zəfər harayını Filiştə salacağam».

⁹Kim məni istehkamlı şəhərə apara bilər?

Kim mənə Edoma qədər yol göstərər?

¹⁰Ay Allah, Sən niyə bizi atmısan?

Ay Allah, qoşunlarımızla niyə yürüşə çıxmırsan?

¹¹Bizə düşmənin qarşısında imdad et,

Çünki insanın köməyi puçdur.

¹²Allahın köməyi ilə igidlik edəcəyik,

O, düşmənlərimizi tapdalayacaq!

Zəbur 61

Məzmur 61

Musiqi rəhbəri üçün. Davudun simli alətlərin müşayiəti ilə oxunan məzmuru.

¹Ey Allah, fəryadımı eşit,

Duamı dinlə.

²Düşkünlük qəlbimi alıb,

Mən dünyanın ucqarından Səni çağırıram.

Sən məni əlçatmaz bir qayaya apar.

³Çünki Sən mənim pənahgahımsan,

Düşmənə qarşı möhkəm qülləsən.

⁴Qoy sonsuzadək çadırında yaşayım,

Qanadlarının altında pənah tapım.

Sela

⁵Sən, ey Allah, etdiyim əhdi eşitdin,

Adından qorxanlara təyin etdiyin payı mənə verdin.

⁶Sən ömür ver, qoy padşahın yaşasın,

İlləri nəsillərdən-nəsillərə qədər uzansın.

⁷Allahın hüzurunda daim taxtda otursun,

Məhəbbət və sədaqət ver, onu qorusun.

⁸Mənsə adını həmişə tərənnüm edəcəyəm,

Hər gün əhd etdiyim təqdimləri verəcəyəm!

Zəbur 62

Məzmur 62

Musiqi rəhbəri Yedutun üçün. Davudun məzmuru.

¹Susan qəlbim yalnız Allahı gözləyir,

Ondadır qurtuluşum.

²Yalnız Odur qayam, qurtuluşum,

O mənim qalamdır, mən əsla sarsılmaram.

³İnsan divar kimi əyiləndə,

Hasar kimi laxlayanda

Nə vaxtadək üstünə hücum edəcəksiniz?

Nə vaxtadək onu əzəcəksiniz?

⁴Yalnız fikirləşirsiniz, onu nüfuzdan salaq,

Çünki yalandan zövq alırsınız.

Diliniz xeyir-dua söyləsə də,

Qəlbiniz lənət yağdırır.

Sela

⁵Ey qəlbim, sükutla Allahı gözlə,

Çünki ümidim Ondadır.

⁶Qayam, qurtuluşum yalnız Odur,

O mənim qalamdır, mən sarsılmaram.

⁷Qurtuluşum, şərəfim Allaha bağlıdır,

Allah möhkəm qayam və pənahımdır.

⁸Ey xalq, hər zaman Ona arxalan,

Onun hüzurunda qəlbini açıb-boşalt,

Çünki Allah bizim pənahımızdır!

Sela

⁹Bəşər övladları yalnız bir nəfəsdir –

İnsan övladları fanidir.

Tərəzinin gözündə çəkərkən hamısı yuxarı qalxır,

Çəkisi bir nəfəsdən yüngül gəlir.

¹⁰Heç zaman zorakılığınıza güvənməyin,

Talan malına boş yerə ümid bağlamayın,

Var-dövlətiniz artsa da, ona arxalanmayın.

¹¹Allah bir dəfə dedi,

Bunu iki dəfə eşitdim:

Qüdrət Allahındır,

¹² Ey Xudavənd, məhəbbət Sənindir!

Sən hər kəsə əməlinə görə əvəz verirsən!

Zəbur 63

Məzmur 63

Davudun məzmuru.

Yəhuda səhrasında olanda.

¹Ey Allah, mənim Allahım Sənsən,

Sənin üçün yaman qəribsəmişəm.

Quraq, cansıxıcı, susuz bir diyarda

Sənsiz könlüm susuzdur.

Bütün varlığımla həsrətini çəkirəm.

²Müqəddəs yerdə Səni seyr edirdim,

Qüdrətini, əzəmətini görürdüm.

³Mənim dilim Səni tərənnüm edir,

Məhəbbətin bu həyatdan gözəldir.

⁴Bütün ömrüm boyu Sənə alqış edəcəyəm,

Əllərimi qaldırıb adınla Səni səsləyəcəyəm.

⁵Sanki yağlı yeməklə canım tox olacaq,

Dilim Səni mədh edəcək, ağzım həmd oxuyacaq.

⁶Yatanda belə, Səni xatırlayıram,

Gecə növbələrində Səni düşünürəm.

⁷Sən mənə kömək oldun,

Qanadlarının kölgəsində Sənə mədh oxuyacağam.

⁸Könlüm Sənə bağlanır,

Sağ əlin məni möhkəm tutur.

⁹Amma canımın qəsdinə duranlar

Yerin dibinə batacaqlar,

¹⁰Qılıncın ağzına tuş gələcəklər,

Çaqqallara yem olacaqlar.

¹¹Amma padşah Allaha görə sevinəcək,

Adına and içən hər kəs həmd söyləyəcək,

Yalançıların isə ağzı yumulacaq.

Zəbur 64

Məzmur 64

Musiqi rəhbəri üçün. Davudun məzmuru.

¹Ey Allah, eşit səsimi, Sənə şikayət edirəm,

Həyatımı düşmən vahiməsindən qoru.

²Pislərin fəndlərindən,

Şər iş görənlərin vəlvələsindən

Məni qoru.

³Onlar qılınc kimi dillərini itiləyirlər,

Kamanın üstünə ox kimi acı sözlərini qoyurlar,

⁴Günahsız insana pusqu qurduqları yerlərdən

Qəfildən, çəkinmədən atırlar.

⁵Bir-birlərini şər iş görməkdə cəsarətləndirirlər,

Gizlənib tələ qurmaq üçün məsləhət edirlər,

«Bunu kim görəcək?» deyirlər.

⁶Fitnəkarlıqla qəsd qururlar və belə deyirlər:

«Ustalıqla fənd işlətdik».

İnsanın daxili, qəlbi görünməz.

⁷Lakin Allah onlara ox atacaq,

Onlar qəflətən yaralanacaq.

⁸Öz dilləri özlərini yıxacaq,

Onları görənlər başını bulayıb xor baxacaq.

⁹Bütün insanlar qorxacaq,

Allahın əməllərini bəyan edəcək,

Onun işləri barədə düşünəcək.

¹⁰Saleh insan Rəbbə görə sevinəcək,

Ona pənah gətirəcək.

Bütün ürəyidüz insanlar Rəbbə həmd edəcək!

Zəbur 65

Məzmur 65

Musiqi rəhbəri üçün. Davudun məzmuru.

Bir ilahi.

¹Ey Allah, Səni Sionda həmdlər gözləyir,

Sənə edilən əhd yerinə yetiriləcək.

²Ey duaları eşidən,

Bütün bəşər hüzuruna gələcək.

³Mən günaha batmışdım,

Lakin Sən üsyankarlığımızı kəffarə edirsən.

⁴Nə bəxtiyardır evinin həyətlərində yaşayan,

Seçib Özünə yaxın etdiyin insan!

Biz Sənin evinin, müqəddəs məbədinin

Nemətləri ilə doyacağıq!

⁵Sən ey qurtuluşumuzun Allahı,

Zəhmli işlərinlə ədalətini göstərirsən,

Bizə cavab verirsən.

Sən yer üzünün bütün ucqarlarının,

Ən uzaq dənizlərin belə, ümidisən.

⁶Sən qüdrətə bürünmüsən,

Qüvvətinlə dağları möhkəmlətmisən.

⁷Dənizlərin uğultusunu,

Dalğaların gurultusunu,

Ümmətlərin çaxnaşmasını

Yatıran Sənsən.

⁸Dünyanın ucqarlarında yaşayanlar

Sənin əlamətlərinə mat qalırlar.

Gündoğandan günbatanadək bütün insanlar

Sənə mədh oxuyurlar.

⁹Yer üzünün qayğısına qalıb su verirsən,

Onu çox məhsuldar edirsən.

Ey Allah, çayın su ilə doludur,

Torpağı taxıl üçün hazır edirsən.

¹⁰Torpağın şırımlarını sulayırsan,

Aralarını bərkidirsən,

Gur yağışla torpağını yumşaldırsan,

Məhsuluna bərəkət verirsən.

¹¹Yaxşılıqlarınla tac qoyursan,

Yollarından yağ damır,

¹²Çöl otlaqlarına tökülür,

Təpələr sevincə bürünür.

¹³Çəmənlərin sürülərlə dolur,

Dərələrini taxıl bürüyür.

Onlar cuşa gəlib tərənnüm söyləyir!

Zəbur 66

Məzmur 66

Musiqi rəhbəri üçün. Bir ilahi.

Məzmur.

¹Ey bütün dünya əhli,

Cuşa gəlib Allaha nida edin,

²Şərəfli ismini tərənnüm edin,

Ona şərəflə həmd edin!

³Siz Allaha belə deyin:

«Əməllərin nə qədər zəhmlidir!

O qədər qüdrətlisən ki,

Düşmənlərin qarşında diz çökür!

⁴Bütün dünya Sənə səcdə edir,

Səni tərənnüm edir,

İsmini tərənnüm edir».

Sela

⁵Gəlin, Allahın işlərini,

Bəşər övladları üçün etdiyi zəhmli əməllərini görün.

⁶ Dənizi quruya çevirdi,

Çayın sularını saxlayıb xalqını piyada keçirtdi.

Biz Allaha görə sevinək!

⁷Qüdrəti ilə əbədi səltənət sürər,

Günahkarlar Ona qarşı qalxmasın deyə

Göz qoyub millətlərə nəzarət edər.

Sela

⁸Ey xalqlar, Allahımıza alqış edin,

Ona həmd edin, səsiniz eşidilsin!

⁹Odur canımızı qoruyan,

Ayağımızı büdrəməyə qoymayan.

¹⁰Ey Allah, bizi sınaqdan keçirtdin,

Sən bizi gümüş kimi təmizləyib saflaşdırdın.

¹¹Sən bizi Öz torunla tutdun,

Kürəyimizə ağır yük qoydun.

¹²Sən insanları başımızın üstündən keçirtdin.

Oda düşdük, suya düşdük,

Axırda bizi Sən bolluğa çıxartdın.

¹³Sənin evinə yandırma qurbanları ilə gələcəyəm,

Sənə əhd etdiyim təqdimləri verəcəyəm.

¹⁴Dar gündə dilim bunları bəyan etdi,

Mənim ağzım bu əhdləri söylədi.

¹⁵Kökəldilmiş heyvanları

Sənin üçün yandırma qurbanı verəcəyəm.

Qoçların xoş tüstüsü Sənə sarı qalxacaq,

Təkələri, öküzləri qurban gətirəcəyəm.

Sela

¹⁶Ey Allahdan qorxanlar, gəlin, dinləyin,

Onun mənə nə etdiyini sizə bəyan edim.

¹⁷Ağzımla Onu səslədim,

Dilimlə Onu mədh etdim.

¹⁸Mən qəlbimdə təqsirə yer versəydim,

Xudavənd məni eşitməzdi.

¹⁹Lakin Allah məni dinlədi,

Duamın səsini eşitdi.

²⁰Alqış olsun Allaha! Duamı rədd etmədi,

Məndən məhəbbətini əsirgəmədi!

Zəbur 67

Məzmur 67

Musiqi rəhbəri üçün simli alətlərin müşayiəti ilə oxunan məzmur.

Bir ilahi.

¹Lütf edib, ey Allah, bizə xeyir-dua ver,

Üzün üstümüzə nur saçsın.

Sela

²Qoy yer üzündə Sənin yolun,

Bütün millətlər arasında qurtuluşun tanınsın.

³Ey Allah, Sənə xalqlar şükür etsin,

Qoy Sənə bütün xalqlar şükür etsin.

⁴Qoy ümmətlər sevinclə Səni mədh etsin,

Çünki xalqlara insafla hökm edirsən,

Yer üzündəki ümmətlərə yol göstərirsən.

Sela

⁵Ey Allah, Sənə xalqlar şükür etsin,

Qoy Sənə bütün xalqlar şükür etsin.

⁶Yer üzü bəhrəsini verib,

Allah, bizim Allahımız bizə bərəkət verib.

⁷Allah bizə xeyir-dua verib.

Qoy yer üzünün qurtaracağınadək hər yerdə olanlar Ondan qorxsun!

Zəbur 68

Məzmur 68

Musiqi rəhbəri üçün. Davudun məzmuru.

Bir ilahi.

¹Allah qalxsın, qoy düşmənlər dağılsın,

Ona nifrət edənlər qarşısından qaçsın,

²Pislər çəkilən tüstü kimi dağılsın,

Alovun qarşısında mum kimi ərisin.

Qoy onlar Allahın qarşısında məhv olsun.

³Salehlər sevinsin,

Allahın hüzurunda fərəhindən coşsun,

Sevinib şad olsun.

⁴Allaha ilahi oxuyun, ismini tərənnüm edin,

Buludlar üstünə minənə yol açın.

İsmi Rəbdir, hüzurunda fərəhiniz çağlasın.

⁵Öz müqəddəs məskənində olan Allah

Yetimlərin atası,

Dul qadınların müdafiəçisidir.

⁶Allah kimsəsizlərə ev qurur,

Əsirləri firavanlığa çıxarır,

Günahkarlar isə quru yurdda yaşayır.

⁷ Ey Allah, Sən xalqının önündə gedərkən,

Çöllükdə yürüşə çıxarkən

Sela

⁸Sina dağındakı Allahın qarşısında,

Allahın, İsrailin Allahının hüzurunda

Yer lərzəyə gəldi, göydən yağış töküldü.

⁹Ey Allah, yaxşıca yağışlar yağdırdın,

Solan torpaqlarını canlandırdın.

¹⁰Xalqın orada məskən saldı.

Ey Allah, xeyirxahlığına görə

Məzlumlar üçün oranı Sən hazırladın.

¹¹Xudavənd əmr edir,

Bir alay qadın

Belə müjdə paylayır:

¹²«Düşmən orduları qaçır!

Padşahları qaçır!

Evdə olanlar

Talan malını paylayırlar.

¹³Siz ağıllar arasında yatanda

Qanadları gümüş kimi bərq vuran,

Tükləri isə qızıl kimi parlayan,

Göyərçinə oxşayırsınız».

¹⁴Külli-İxtiyar padşahları elə dağıtdı ki,

Elə bil Salmon dağına göydən qar tökülür.

¹⁵Ey Başan dağı, Allahın dağı,

Ey zirvələri çox olan Başan dağı!

¹⁶Ey zirvələri çox olan dağlar,

Allah məskən salmaq üçün seçdiyi dağa

Niyə qibtə ilə baxırsınız?

Bəli, Rəbb orada əbədi yaşar.

¹⁷Allahın döyüş arabaları var

Minlərlə, saysız-hesabsız.

Xudavənd onlarla birgə

Sinadan müqəddəs məskəninə gəlib.

¹⁸ Ya Rəbb Allah, Sən yüksək yerlərə çıxıb məskən saldın,

Əsir etdiyin düşmənləri Özünlə oraya apardın,

Sən bütün insanlardan,

Hətta üsyankarlardan da xərac aldın.

¹⁹Xudavəndə,

Bizi qurtaran Allaha –

Hər gün qayğı yükümüzü çəkənə alqış olsun!

Sela

²⁰Allahımız azad edən Allahdır,

Ölümdən qurtaran Xudavənd Rəbdir.

²¹Allah düşmənlərin kəlləsini,

Günah içində yaşayanların tüklü təpəsini əzəcək.

²²Xudavənd belə dedi:

«Onları Başandan geri qaytaracağam,

Dənizin dibində olsalar belə,

Oradan geri qaytaracağam.

²³Qoy ayaqların düşmənlərin qanına batsın,

Bundan itlərinin dilləri də pay alıb yalasın».

²⁴Ey Allah, indi burada o zəfər yürüşün,

Ey Allahım, Padşahım, müqəddəs yerə gəlişin görünür,

²⁵Öndə ilahi oxuyanlar,

Arxalarından isə çalğıçılar,

Aralarında dəfçalan qızlar gəlir.

²⁶Ey İsrailin belindən gələnlər, cəmiyyət içində

Allahınız Rəbbə alqış edin.

²⁷Qabaqda kiçik Binyamin qəbiləsi gedir,

Ardınca çoxlu Yəhuda başçıları,

Ondan sonra Zevulunun, Naftalinin başçıları gəlir.

²⁸Ey Allah, qüdrətini,

Bizim üçün işlətdiyin qüvvətini göstər.

²⁹Yerusəlimdəki məbədinə görə

Sənə padşahlar xərac gətirir.

³⁰Qamışlıqda yaşayan heyvanları,

Xalqların danaları ilə buğa sürüsünü tənbeh et.

Bu gümüşpərəstləri təpiyinin altına sal,

Davakar xalqları pərən-pərən et.

³¹Misirdən Allahın hüzuruna elçilər gələcək,

Kuşlular da Ona əl açacaqlar.

³²Ey dünya ölkələri,

Allaha ilahi söyləyin.

Xudavəndi tərənnüm edin,

Sela

³³Göylərin, ulu göylərin üstünə minəni,

Güclü səslə gurlayanı dinləyin,

³⁴Allahın qüdrətini bəyan edin,

Əzəməti İsrail üzərindədir,

Onun qüdrəti göylərdədir!

³⁵Müqəddəs məkanında olan ey Allah, zəhmlisən!

İsrailin Allahı Öz xalqına qüdrət, qüvvət verir.

Allaha alqış olsun!

Zəbur 69

Məzmur 69

Musiqi rəhbəri üçün. Davudun «Şoşannim» üstə oxunan məzmuru.

¹Ay Allah, məni qurtar,

Su çıxıb boğazımacan,

²Dərin bataqlığa batmaqdayam,

Ayaq üstə durmağa yer yoxdur.

Dərin sulara qərq olmuşam,

Sellər məni aparır.

³Fəryad etməkdən taqətim kəsildi,

Allahı gözləməkdən

Boğazım qurudu, gözümün nuru söndü.

⁴ Boş yerə mənə nifrət edənlər

Başımın tükündən çoxdur.

Haqsız yerə mənə düşmən kəsilənlər,

Məni məhv etmək istəyənlər qüvvətlidir.

Oğurlamadığım şeyləri necə qaytara bilərəm?

⁵Ey Allah, ağılsızlıq etdiyimi bilirsən,

Günahlarım Səndən gizli deyil.

⁶Ey Ordular Rəbbi Xudavənd, Səni gözləyənlər

Mənə görə qoy utanmasınlar.

Ey İsrailin Allahı, Səni axtaranlar

Mənə görə qoy xəcalət içində qalmasınlar.

⁷Sənin uğrunda üzərimə rüsvayçılıq töküldü,

Üzümü xəcalət bürüdü.

⁸Qardaşlarıma yad oldum,

Anamın oğullarına özgə sayıldım.

⁹ Evinin qeyrəti məni yandırıb-yaxdı,

Səni təhqir edənlərin rüsvayçılıq təhqirləri altında qaldım.

¹⁰Oruc tutub ağlamağımı belə,

Mənə rüsvayçılıq saydılar.

¹¹Mən çula bürünəndə

Onlara söz oldum.

¹²Darvazadakı adamlar məndən qeybət edirlər,

Sərxoşların dilinin nəğməsinə çevrildim.

¹³Mənsə, ya Rəbb, Sənə dua edirəm.

Ey Allah, münasib gördüyün zaman

Bol məhəbbətinə görə mənə cavab ver,

Çünki qurtuluşuna etibar etmişəm.

¹⁴Məni qurtar, bataqlığa batmayım,

Qoy düşmənlərimdən,

Dərin sulardan xilas olum.

¹⁵Qoy sellər məni aparmasın,

Dərinlik məni udmasın,

Quyu üstümdə ağzını yummasın.

¹⁶Ya Rəbb, mənə cavab ver,

Çünki məhəbbətin yaxşıdır.

¹⁷Üzünü bu bəndəndən gizlətmə,

Tez cavab ver, çünki əzab çəkirəm.

¹⁸Yetiş, canımı azad et,

Məni düşmənlərimdən xilas et.

¹⁹Başıma gələn rüsvayçılığı,

Biabırçılığı, xəcaləti bilirsən,

Bütün yağılarım qarşındadır.

²⁰Rüsvayçılıq qəlbimi qırdı,

Gör necə biçarəyəm.

Çox axtardım, halıma yanan tapılmadı,

Hey axtardım, təsəlli verən olmadı.

²¹ Mənə yemək əvəzinə öd verdilər,

Susayanda sirkə içirtdilər.

²² Süfrələri onlar üçün tələ olsun,

Müttəfiqləri üçün tor olsun.

²³Gözlərinə qara gəlsin, görməsinlər,

Belləri onları lərzəyə salsın.

²⁴Qoy qəzəbin onların üzərinə yağsın,

Qoy hiddətinin qızğınlığı onları tutsun.

²⁵ Düşərgələri viran olsun,

Çadırları boş qalsın.

²⁶Çünki Sənin vurduğun insanı təqib edirlər,

Yaraladıqlarının dərdini ona qaxınc edirlər.

²⁷Bu təqsirkarları daha da təqsirkar çıxar,

Səndən bəraət almasınlar.

²⁸ Qoy adları həyat kitabından silinsin,

Salehlərlə yanaşı yazılmasın.

²⁹Mən məzlumam, dərdliyəm,

Ey Allah, Sənin qurtuluşun məni ucaltsın.

³⁰Allahın isminə ilahilərlə həmd oxuyacağam,

Onu şükürlərlə ucaldacağam.

³¹Mal-qara qurbanından çox

Bu, Rəbbin xoşuna gələcək,

Buynuzlu, dırnaqlı buğadan çox

Bu Ona xoş gələcək.

³²Bunu görən məzlumlar qoy sevinsin,

Ey Allahı axtaranlar, ürəyiniz dirçəlsin.

³³Çünki Rəbb fəqirləri eşidir,

Öz əsir xalqına xor baxmır.

³⁴Göy, yer, dənizlər, oradakı canlılar

Qoy Rəbbə həmd oxusunlar.

³⁵Çünki Allah Sionu qurtaracaq,

O, Yəhuda şəhərlərini bərpa edəcək.

Onun xalqı oranı mülk edib məskən salacaq,

³⁶Ora qullarının övladlarına irs olaraq qalacaq,

Allahın ismini sevənlər orada sakin olacaq!

Zəbur 70

Məzmur 70

(Zəb. 40:13-17)

Musiqi rəhbəri üçün. Davudun yadasalma məzmuru.

¹Ey Allah, məni xilas et,

Ya Rəbb, dadıma tez çat!

²Canımın qəsdinə duranlar

Qoy utanıb biabır olsunlar.

Pis günümdən zövq alanlar

Geri qovulub rüsvay olsunlar.

³«Aha! Aha!» deyənlər

Xəcalət içində çaşıb-qalsınlar.

⁴Lakin Səni axtaranlar

Sənə görə qoy şad olub sevinsinlər,

Verdiyin xilası sevənlər

Daim «Qoy ucalsın Allah!» desinlər.

⁵Budur, bir məzlum, bir fəqirəm,

Ey Allah, Sən Özünü tez yetir.

Köməyim, xilaskarım Sənsən,

Ya Rəbb, ləngimə!

Zəbur 71

Məzmur 71

¹Ya Rəbb, Sənə pənah gətirirəm,

Heç vaxt məni xəcalətdə qoyma.

²Məni ədalətinlə qurtar, xilas et,

Qulağını mənə sarı döndər, məni azad et.

³Mənə sığınacaq qaya ol,

Qoy əmrinlə hər vaxt ora girib qurtulum.

Çünki qayam da Sən, qalam da Sənsən.

⁴Ey Allahım, şər insanın əlindən,

Haqsızın, zalımın pəncəsindən məni qurtar.

⁵Ey Xudavənd, Sən mənim ümidimsən,

Ya Rəbb, gəncliyimdən bəri Sənə güvənmişəm.

⁶Doğulduğum gündən bəri dayağımsan,

Məni ana bətnindən dünyaya gətirmisən,

Həmişə Sənə həmd edirəm.

⁷Çoxlarına qəribə bir şey oldum,

Amma Sən mənim möhkəm sığınacağım oldun.

⁸Sənə həmd etmək dilimdən düşməz,

Daim Sənin izzətini düşünürəm.

⁹Yaşa dolanda da məni rədd etmə,

Taqətdən düşəndə də məni tərk etmə.

¹⁰Mənim barəmdə düşmənlərim belə söyləyir,

Məni öldürmək istəyənlər belə məsləhətləşir,

¹¹Deyirlər ki, Allah onu tərk edib,

Gəlin onu təqib edərək tutaq,

Çünki onu xilas edən yoxdur.

¹²Ey Allah, məndən uzaq durma,

Ey Allahım, dadıma tez çat!

¹³Qoy məni ittiham edənlər utanıb məhv olsun,

Bədxahlarımı xəcalət, rüsvayçılıq bürüsün.

¹⁴Mənsə hər zaman Sənə ümid bağlayacağam,

Sənə həmd oxuduqca oxuyacağam.

¹⁵Gün boyu salehliyini, qurtuluşunu dilim bəyan edir,

Onun ölçüsünü bilməsəm də.

¹⁶Ey Xudavənd Rəbb, qüdrətinlə dolanıb-gəzəcəyəm,

Sənin, yalnız Sənin salehliyini bəyan edəcəyəm.

¹⁷Ey Allah, gəncliyimdən bəri mənə təlim vermisən,

Sənin xariqələrini indiyədək elan edirəm.

¹⁸Yaşa dolub saçıma dən düşənə qədər

Gələcək nəslə qüvvətini,

Gələcək nəslin hər birinə qüdrətini

Elan edəcəyəm.

Ey Allah, məni tərk etmə.

¹⁹Ey Allah, salehliyin göylər qədər ucadır,

Böyük işlər görmüsən!

Ey Allah, Sənin kimisi varmı?

²⁰Sən mənə çoxlu ağır əzablar versən də,

Yenə məni dirçəldirsən,

Yerin dibindən yenə məni çıxarırsan,

²¹Hörmətimi artırmaqla

Mənə yenə əmniyyət verirsən.

²²Ey Allahım, sədaqətinə görə

Çəng çalıb Sənə şükür edəcəyəm!

Ey İsrailin Müqəddəsi,

Səni lira ilə tərənnüm edəcəyəm!

²³Dilim, azadlıq verdiyin qəlbim

Mədh oxuyub Səni tərənnüm edəcək,

²⁴Dilim daim salehliyindən söyləyəcək,

Çünki bədxahlarımın xəcalətdən üzləri qızarıb.

Zəbur 72

Məzmur 72

Süleymanın məzmuru.

¹Ey Allah, padşaha ədalət ver,

Şah oğluna salehlik ver.

²Qoy Sənin xalqına salehliklə,

Məzlumlara ədalətlə hakimlik etsin.

³Xalqın firavanlığı dağlardan aşsın,

Salehlər təpələri dolaşsın.

⁴Padşah xalq arasında olan məzlumları qorusun,

Fəqirləri xilas etsin,

Zalımları əzsin.

⁵Nə qədər günəş və ay varsa,

Hər gələn nəsil qoy Səndən qorxsun.

⁶Biçilən tarlaya yağış kimi,

Torpağı suvaran gur yağış kimi tökülsün.

⁷Bu padşahın ömrü boyu qoy salehlər çiçək açsın,

Göydə ay durduqca qoy firavanlıq artsın.

⁸ Dənizdən-dənizə qədər,

Fəratdan yer üzünün qurtaracağınadək hər yerdə hökmranlıq etsin.

⁹Onun qarşısında köçəri xalqlar diz çöksün,

Düşmənləri isə qoy yerə vurulsun.

¹⁰Tarşişin və adaların padşahları ona xərac gətirsin,

Səba və Seva padşahları ona bəxşiş versin.

¹¹Qarşısında bütün padşahlar təzim etsin,

Qoy bütün millətlər ona xidmət etsin!

¹²Çünki o imdad deyib çağıran fəqirləri,

Məzlumları, köməksizləri qurtarır.

¹³Yoxsula, fəqirə rəhm edir,

Fəqirlərin canlarını azad edir.

¹⁴Onları hədə-qorxudan, zorakılıqdan qurtarır,

Onun gözündə bunların qanı qiymətlidir.

¹⁵Yaşasın padşah!

Qoy ona Səba qızılı verilsin,

Qoy onun üçün durmadan dua edilsin,

Hər gün ona xeyir-dua verilsin.

¹⁶Qoy ölkənin zəmiləri bol olsun,

Dağların başında dalğalansın.

Bu ölkə Livan kimi məhsul versin,

Qoy şəhərin əhalisi ot kimi bitsin.

¹⁷Qoy padşahın adı əbədi qalsın,

Günəşin ömrü tək adı var olsun.

Onun vasitəsilə insanlar xeyir-dua alsın,

Onu bütün millətlər bəxtiyar adlandırsın!

¹⁸Alqış olsun Rəbb Allaha, İsrailin Allahına,

Xariqələrin yeganə yaradanına!

¹⁹Onun şərəfli ad-sanına əbədi alqış olsun,

Bütün yer üzü Onun izzətinə bürünsün!

Amin! Amin! ²⁰Yessey oğlu Davudun duaları burada sona çatır.

Üçüncü hissə

Zəbur 73

Məzmur 73

Asəfin məzmuru.

¹Doğrudan da, İsrail üçün,

Ürəyitəmiz olanlar üçün

Allah xeyirxahdır.

²Amma mənim ayaqlarım az qala büdrəmişdi,

Addımlarım məni yıxmışdı.

³Pislərin firavanlığını görərkən

Bu məğrurlara həsəd aparırdım.

⁴Ölənədək onların ağrıları yoxdur,

Vücudları ətə-cana gəlib.

⁵Onlar başqaları kimi dərdə düşməzlər,

Əzab çəkməzlər.

⁶Çünki təkəbbür onlar üçün boyunbağı kimidir,

Zorakılıq libas kimi əyinlərini örtür.

⁷Köklükdən gözləri dombalıb çıxır,

Qəlblərinin pis məqsədləri aşıb-daşır.

⁸Pis niyyətli sözləri ilə insanlara istehza edirlər,

Onlara yuxarıdan baxıb hədə-qorxu gəlirlər.

⁹Ağızlarını göylərin əleyhinə açırlar,

Dillərinin sözləri dünyanı gəzib-dolaşır.

¹⁰Ona görə bütün xalq onların tərəfinə keçir,

Sözlərini axıradək su kimi içir.

¹¹Deyirlər ki, Allah necə xəbər tutacaq?

Haqq-Taala bundan necə xəbərdar olacaq?

¹²Belədir pis adamlar,

Daim arxayındırlar, var-dövlət artırırlar.

¹³Məgər mən boş yerə qəlbimi təmizləmişdim,

Günahsızlıq içində əllərimi yumuşdum?

¹⁴Həmişə əziyyətə düşürəm,

Hər səhər töhmətə rast gəlirəm.

¹⁵Əgər «qoy mən də belə danışım» deyə düşünsəydim,

Sənin övladlarına xəyanət edərdim.

¹⁶Bunu anlamaq üçün düşünəndə

Çətin bir iş kimi gözümə durdu.

¹⁷Yalnız Allahın Müqəddəs məkanına girərkən

Onların aqibətini dərk etdim.

¹⁸Doğrudan da, onları sürüşkən yerə qoymusan,

Onları məhvə yuvarlayırsan.

¹⁹Onlar bir anda yox olacaqlar,

Dəhşət içində itib-batacaqlar.

²⁰Yuxudan ayılanda röyalar unudular,

Ey Xudavənd, Sənin oyanışınla bu adamlar boş sayılacaq.

²¹O vaxt könlüm zəhərlənmişdi,

Qəlbim dəlik-deşik olmuşdu.

²²Necə axmaq idim, dərrakəm yox idi,

Qarşında sanki bir heyvan idim.

²³Amma daim Səninlə olmuşam,

Mənim sağ əlimdən tutmusan.

²⁴Nəsihətinlə mənə yol göstərirsən,

Sonra məni şərəfə çatdıracaqsan.

²⁵Göylərdə Səndən başqa kimim var?

Yer üzündə də Səndən başqa heç nə istəmirəm.

²⁶Cismim və ürəyim taqətdən düşsə belə,

Daim, ey Allah, qəlbimin qüvvəti, nəsibimsən.

²⁷Budur, Səndən uzaq düşənlər məhv olurlar,

Sənə xəyanət edənləri yox edirsən.

²⁸Mənim üçün Allaha yaxınlaşmaq yaxşıdır,

Xudavənd Rəbbə pənah gətirmişəm,

Ona görə bütün işlərini hamıya çatdıracağam!

Zəbur 74

Məzmur 74

Asəfin maskili.

¹Ey Allah, niyə bizi əbədilik tərk etmisən?

Otlağının sürüsünə niyə qəzəbin alovlanıb?

²Yada sal keçmişdə satın aldığın icmanı,

Özünə xalq etmək üçün azad etdiyin tayfanı,

Həm də məskənin olan Sion dağını.

³Əbədi viranələrə doğru get,

Müqəddəs yerdə hər şeyi düşmən dağıdıb.

⁴Səcdəgahının ortasında düşmənlər nərə çəkdilər,

Bu yerə zəfər bayraqlarını keçirtdilər.

⁵Sıx meşəni budamaq üçün

Balta qaldıran adamlara bənzəyirlər.

⁶Müqəddəs yerin bütün oyma işlərini

Baltalar və çəkiclərlə qırıb tökdülər.

⁷Sənin Müqəddəs məkanına od vurdular,

Adının sakin olduğu yeri uçurub murdarladılar.

⁸«Bu xalqı biz birgə əzməliyik» deyə düşünərək

Ölkədəki bütün səcdəgahları yandırdılar.

⁹Heç bir rəmzimiz görünmür,

Daha peyğəmbərimiz yoxdur.

Kimsə bilmir, biz nə vaxtadək belə qalacağıq.

¹⁰Ey Allah, nə vaxtadək düşmən Səni söyəcək?

Yağı əbədilikmi Sənə küfr edəcək?

¹¹Axı nə üçün əlini geri çəkirsən?

Çıxart qoynundan sağ əlini, onları məhv et.

¹²Ey Allah, əzəldən Padşahımsan,

Yer üzünə qurtuluşlar verirsən.

¹³ Sən dənizi Öz qüdrətinlə böldün,

Dəniz əjdahalarının başlarını əzdin.

¹⁴Sən Livyatanın başlarını əzdin,

Onu çöl heyvanlarına yem etdin.

¹⁵Sən bulaqlar açıb sellər axıtdın,

Həmişəaxar çayları isə qurutdun.

¹⁶Gündüz də Sənindir, gecə də Sənin,

Ayı və günəşi Sən yaratmısan.

¹⁷Sən quru yerin bütün sərhədlərini qoydun,

Həm yayı, həm qışı yaratdın.

¹⁸Ya Rəbb, unutma, düşmən Səni söyür,

Sənin adına axmaq bir xalq küfr edir.

¹⁹Öz qumrunun canını yırtıcılara vermə,

Məzlumlarının həyatını əsla unutma.

²⁰Özün bizimlə bağladığın əhdə bax!

Zorakılıq yuvaları ölkənin hər zülmət yerinə dolub.

²¹Qoyma əzabkeş yenə də rüsvay olsun,

Qoy sənin adına məzlumlar və fəqirlər həmd oxusun.

²²Qalx, ey Allah, mübarizəni apar,

Unutma ki, axmaqlar həmişə Səni söyür.

²³Düşmənlərinin səsini,

Əleyhdarlarının daim yüksələn vəlvələsini unutma.

Zəbur 75

Məzmur 75

Musiqi rəhbəri üçün Asəfin «Al-taşxet» üstə oxunan məzmuru.

Bir ilahi.

¹Ey Allah, biz Sənə şükür edirik,

Bizə doğma olan isminə şükür olsun,

Xariqələrin bunu bəyan edir!

²Allah deyir: «Müəyyən etdiyim zaman

Mən insafla hakimlik edəcəyəm.

³Yer və üzərindəkilər lərzəyə gələrkən

Onu saxlayıb sütunlarından tutan Mənəm.

Sela

⁴Məğrurlara dedim: “Daha məğrurluq etməyin”,

Pislərə dedim: “Gücünüzü göstərməyin,

⁵Buynuz çıxartmayın,

Dikbaş-dikbaş danışmayın”».

⁶İnsanı yüksəltmək

Nə şərqdən, nə qərbdən, nə də çöllərdən gəlir.

⁷Hökm verən Allah isə

Həm alçaldır, həm yüksəldir.

⁸Rəbb əlində bir cam tutub,

Onu ədviyyatlı, köpüklənən şərabla doldurub.

Şərabından töküb dünyanın bütün pislərinə paylayacaq,

Onlar da şərabı dibinə qədər içib-qurtaracaq.

⁹Mənsə daim bunu elan edəcəyəm,

Yaqubun Allahına tərənnüm oxuyacağam.

¹⁰Pis adamların buynuzları qırılacaq,

Amma salehlərin qüvvəti artacaq.

Zəbur 76

Məzmur 76

Musiqi rəhbəri üçün. Asəfin simli alətlərin müşayiəti ilə oxunan məzmuru.

Bir ilahi.

¹Allah Yəhudada şöhrətlidir,

İsraildə Onun adı böyükdür.

²Çardağı Salemdədir,

Məskəni Siondadır.

³Allah orada alovlu oxları,

Qalxan-qılıncı və bütün silahları qırdı.

Sela

⁴Ey Allah, şərəfli Sənsən,

Ulu dağlardan da əzəmətlisən!

⁵Cəsur ürəklilər talan oldu,

Ölüm yuxusuna daldı,

Bütün cəngavərlərin əlləri sustaldı.

⁶Ey Yaqubun Allahı, Sənin məzəmmətindən

Arabaçılar və atlar uyumuş qaldı.

⁷Sən zəhmlisən, Sən!

Qəzəblənəndə qarşında kim dura bilər?

⁸Öz hökmünü göylərdən elan etdin,

Yer vahimələndi və səsini kəsdi.

⁹Onda, ey Allah, hökm çıxarmaq üçün,

Dünyadakı məzlumların hamısını qurtarmaq üçün qalxdın.

Sela

¹⁰Qəzəbli insanlar belə, Sənə şükür edir,

Qəzəbdən qurtulanları Özünə bağlayırsan.

¹¹Allahınız Rəbbə əhd edin və yerinə yetirin,

Ey bütün ətraf xalqlar, o Zəhmli Olana xərac gətirin.

¹²O, hökmdarların nəfəsini kəsər,

Dünya padşahlarını vahimələndirər.

Zəbur 77

Məzmur 77

Musiqi rəhbəri Yedutun üçün. Asəfin məzmuru.

¹Allahı səsləyirəm, fəryad edirəm,

Allahı səsləyirəm, O məni dinlər.

²Dar günümdə Xudavəndi axtarıram,

Bütün gecə durmadan,

Könlüm ovunmadan Ona əl açmışam.

³Allahı yada salarkən təlaşa düşürəm,

Dərindən fikirləşəndə ruhdan düşürəm.

Sela

⁴Qoymursan gözlərimi yumum,

Üzgünlükdən danışa bilmirəm.

⁵Düşünürəm keçən günləri,

Ötən dövranı, illəri.

⁶Oxuduğum ilahi gecələr yadıma düşür,

Ürəyimdə düşünəndə könlüm məndən soruşur:

⁷«Xudavənd məni əbədilikmi tərk edib?

Bir daha məndən razı qalmayacaqmı?

⁸Məhəbbəti həmişəlik qurtardımı?

Vədi nəsildən-nəslə qədər sona çatdımı?

⁹Allah rəhm etməyi unudubmu,

Mərhəmətinin yerini qəzəb tutdumu?»

Sela

¹⁰Dedim: «Bu mənim üçün bəladır,

Haqq-Taala daha gücünü göstərmir».

¹¹Ya Rəbb, Sənin əməllərini yada salıram,

Bəli, xatırlayıram, ta qədimdən xariqələr göstərmisən.

¹²Sənin bütün işlərini dərindən düşünürəm,

Əməllərin barədə xəyala dalıram.

¹³Allahın yolu müqəddəsdir.

Allah kimi böyük hansı allah var?

¹⁴Xariqələr yaradan Allah Sənsən,

Xalqlar arasında qüdrətini göstərmisən.

¹⁵Əl uzadıb xalqını,

Yaqub, Yusif övladlarını azad etmisən.

Sela

¹⁶Ey Allah, sular Səni gördü,

Səni görən sular qorxdu,

Hətta ümmanlar lərzəyə gəldi.

¹⁷Buludlar yağışa döndü,

Göylərdən gurultular eşidildi,

Hər tərəfə oxların töküldü.

¹⁸Qasırğanın içindən ildırım çaxdı,

Şimşəklər yer üzünə işıq saçdı,

Yer lərzəyə gəlib sarsıldı.

¹⁹Sən dənizdə, ümman sularda yol açdın,

Amma ayaq izlərin məlum olmadı.

²⁰Sən Musa və Harunun əli ilə

Xalqını bir sürü kimi aparmışdın.

Zəbur 78

Məzmur 78

Asəfin maskili.

¹Ey xalqım, təlimimi dinləyin,

Dilimdən çıxan sözləri eşidin.

² Ağzımı bu məsəllə açıb

Keçmişdəki müəmmaları bəyan edəcəyəm.

³Bunları eşitmişik, bilirik,

Bizə atalarımız nəql edib.

⁴Bunu onların nəvələrindən gizlətməyəcəyik;

Rəbbin həmdə layiq işlərini,

Onun qüdrətini, etdiyi xariqələri

Gələcək nəsillərə söyləyəcəyik.

⁵Rəbb öyüd vermək üçün Yaqub nəslinə –

İsrailə bir təlim qoydu.

Ata-babalarımıza əmr etdi ki,

Bu təlimi övladlarına öyrətsin.

⁶Qoy gələcək nəsil də bilsin,

Gələcəkdə doğulacaq övladlar da

Balalarına bu təlimi verə bilsin.

⁷Qoy ümidlərini Allaha bağlasınlar,

Allahın işlərini unutmasınlar,

Əmrlərini yerinə yetirsinlər.

⁸Qoy ata-babaları kimi olmasınlar,

Çünki onlar dikbaş, üsyankar bir nəsil idi.

Allaha ürəkləri dönük,

Könülləri vəfasız idi.

⁹Efrayim övladları ox-kamanla silahlandılar,

Amma döyüş günü tez geriyə qayıtdılar.

¹⁰Allahın əhdini pozanlar belə etdilər,

Sənin qanunlarınla yaşamaq istəmədilər.

¹¹Allahın işlərini,

Göstərdiyi xariqələrini unutdular.

¹² Allah Misir torpağında, Soan bölgəsində,

Ata-babalarının gözləri önündə xariqələr göstərmişdi.

¹³ Dənizi yarıb onları keçirmişdi,

Suları divar kimi saxlamışdı.

¹⁴ Onlara gündüz buludla,

Bütün gecə şəfəq saçan alovla yol göstərmişdi.

¹⁵ Çöldə qayaları yarmışdı,

İçsinlər deyə ümman kimi bol su çıxarmışdı.

¹⁶Qayadan suları sel kimi çıxarmışdı,

Bu suları çaylar kimi axıtmışdı.

¹⁷Amma onlar günah etməyi davam etdirdilər,

Səhrada Haqq-Taalaya qarşı üsyankar oldular.

¹⁸ İştahaları artdı, yemək tələb etdilər,

Ürəklərində Allahı sınağa çəkdilər.

¹⁹Allahın əleyhinə belə danışdılar:

«Məgər Allah çöldə süfrə qura bilər?

²⁰Nə olsun qayaya vuranda sular axdı,

Sellər aşıb-daşdı.

Görəsən O, çörək verə bilərmi?

Xalqına ət verə bilərmi?»

²¹Rəbb bunu eşidərkən qəzəbləndi,

Yaquba qarşı alovunu yerə tökdü,

İsrailə qarşı hiddəti artdı.

²²Çünki onlar Allaha inanmırdılar,

Onun qurtuluşuna arxalanmırdılar.

²³Bununla belə, uca səmaya əmr etdi,

Göylərin qapılarını açdırdı.

²⁴ Onlara yemək üçün manna yağdırdı,

Göylərin taxılını verdi.

²⁵İnsan mələklərin çörəyindən yedi,

Onlara doyunca yemək verildi.

²⁶Göylərdə şərq küləyini əsdirdi,

Qüdrəti ilə cənub küləyini gətirdi.

²⁷Başlarına toz kimi ət yağdırdı,

Onlara dənizdəki qum qədər quşlar göndərdi.

²⁸Düşərgələrinin ortasına,

Qaldıqları yerin ətrafına səpələdi.

²⁹Onlar doyunca, çox yedi,

İştahaları çəkən şeyləri onlara verdi.

³⁰Lakin iştahaları qurtarmamış,

Yemək ağızlarında olarkən

³¹Allah onlara qarşı hiddətini artırdı,

Ətli-canlılarını qırdı,

İsrail igidlərini vurub yerə sərdi.

³²Bununla belə, günahlarını davam etdirdilər,

Onun xariqələrinə inanmadılar.

³³Buna görə də günlərini puç etdi,

Dəhşətlə ömürlərini sona yetirdi.

³⁴Ölənləri görüb Allahı axtardılar,

Geri dönüb Allahı səylə aradılar.

³⁵Yadlarına düşdü ki, Allah onların Qayası idi,

Allah-Taala onların Satınalanı idi.

³⁶Lakin ağızları ilə Ona yaltaqlanırdılar,

Dilləri ilə Ona yalan danışırdılar.

³⁷ Qəlblərində Ona qarşı dönük olmuşdular,

Əhdinə vəfasız çıxmışdılar.

³⁸Allah isə rəhmlidir, günahı bağışlayır,

Günahkarı yox etmir.

Dəfələrlə qəzəbini saxlayır,

Hiddətini tamamilə oyanmağa qoymayır.

³⁹Yada saldı ki, onlar yalnız bəşərdir,

Onlar əsən, geri dönməyən küləyə bənzəyir.

⁴⁰Neçə dəfə səhrada Ona qarşı üsyankar oldular,

Neçə dəfə çöllükdə Onu kədərləndirdilər!

⁴¹Allahı dönə-dönə sınadılar,

İsrailin Müqəddəsinin xətrinə dəydilər.

⁴²Xatırlamadılar Onun qüdrətini,

Düşməndən azad etdiyi günü,

⁴³Misirdə göstərdiyi əlamətləri,

Soan bölgəsində göstərdiyi möcüzələri.

⁴⁴ Misirlilər sulardan içə bilməsinlər deyə

Suları qana döndərib çaylardan axıtmışdı.

⁴⁵ Onları göndərdiyi mozalanlara yem etmişdi,

Göndərdiyi qurbağalar ölkələrini xarabaya çevirmişdi.

⁴⁶ Əkinlərini tırtıllara,

Zəhmətlərinin bəhərini çəyirtkələrə vermişdi.

⁴⁷ Üzümlərini dolu ilə,

Firon ənciri ağaclarını şaxta ilə məhv etmişdi.

⁴⁸Naxırlarını dolu ilə,

Sürülərini şimşəklə qırmışdı.

⁴⁹Onların üzərinə qızğın qəzəbini,

Hirsini, hiddətini, dərdləri,

Bir qoşun ölüm mələklərini tökmüşdü.

⁵⁰Qızğın qəzəbinə yol açmışdı,

Əsirgəmədən canlarına ölüm vermişdi,

Həyatlarına bəla gətirmişdi.

⁵¹ Hər Misirlinin ilk oğlunu,

Ham nəslindən hər kişinin belindən gələn ilk oğlunu qırmışdı.

⁵² Öz xalqını isə qoyun kimi oradan çıxarmışdı,

Çöldən onları sürü kimi aparmışdı.

⁵³ Onları qorxudan uzaq, asayiş içində aparmışdı,

Düşmənləri isə dənizdə qərq olmuşdu.

⁵⁴ Onları Öz müqəddəs torpağına,

Sağ əli ilə aldığı dağlar diyarına gətirdi.

⁵⁵ Onların qarşısından başqa millətləri qovdu,

Torpaqlarını da İsrail qəbilələrinə mülk olaraq payladı,

Yaşamaq üçün yurd-yuvalarını onlara verdi.

⁵⁶ Lakin onlar Allah-Taalanı sınadılar,

Ona qarşı üsyankar oldular,

Göstərişlərinə əməl etmədilər.

⁵⁷Ataları kimi dönüklük və xəyanət etdilər,

Xarab kamandan atılan ox kimi əyri getdilər.

⁵⁸Onu səcdəgahları ilə qəzəbləndirdilər,

Onu yonma bütləri ilə qısqandırdılar.

⁵⁹Bunları eşidən Allah çox hiddətləndi,

İsraili tamamilə rədd etdi.

⁶⁰ İnsanlar
arasında qaldığı çadırını,

Şilodakı məskənini tərk etdi.

⁶¹ Qüdrətini əsarətə,

Şərəfini düşmən əlinə təslim etdi.

⁶²Öz xalqını qılıncdan keçirtdi,

Öz irsini qəzəbinə düçar etdi.

⁶³İgidləri alov uddu,

Nişanlı qızlara toy çalınmadı.

⁶⁴Kahinləri qılınclarla qırıldı,

Arvadları dul qaldı, gözlərinin yaşı qurudu.

⁶⁵O zaman Xudavənd yuxulu insan kimi oyandı,

Sanki şərabın təsirindən ayılan bir pəhləvandır.

⁶⁶Düşmənlərini vuraraq geri atdı,

Əbədi olaraq onları rüsvay etdi.

⁶⁷Yusifin nəslini rədd etdi,

Efrayim qəbiləsini seçmədi.

⁶⁸Yəhuda qəbiləsini,

Sevdiyi Sion dağını seçdi.

⁶⁹Öz Müqəddəs məkanını səma kimi,

Əbədi qurduğu dünya kimi tikdi.

⁷⁰ Çoban olan qulu Davudu seçdi,

Onu qoyun ağıllarından götürdü.

⁷¹Əmlik quzuların qayğısına qalanı gətirdi,

Xalqı Yaqub nəslinin və Öz irsi İsrailin çobanı etdi.

⁷²Davud onları kamil ürəklə otardı,

Əlindən gələn məharətlə onları irəli apardı.

Zəbur 79

Məzmur 79

Asəfin məzmuru.

¹Ey Allah, millətlər Sənin mülkünə giriblər,

Müqəddəs məbədini murdar ediblər,

Yerusəlimi viranəliyə çeviriblər.

²Qullarının cəsədini göydəki quşlara yem ediblər,

Möminlərinin ətini yerdəki heyvanlara veriblər.

³Yerusəlimin hər tərəfində onların qanı axıdılıb,

Onları dəfn edən yoxdur.

⁴Qonşularımızın tənə hədəfinə döndük,

Ətrafdakılarımız tərəfindən ələ salınıb lağ edildik.

⁵Ya Rəbb, nə vaxtacan,

Yoxsa əbədilikmi bu qəzəbindən dönməyəcəksən,

Qısqanclıqdan od tutub yanacaqsan?

⁶ Səni tanımayan millətlərin,

İsmini çağırmayan ölkələrin üstünə hiddətini tök.

⁷Çünki onlar Yaqub nəslinin başını yeyiblər,

Yurd-yuvasını viranəyə çeviriblər.

⁸Ata-babalarımızın günahını boynumuza qoyma,

Nə qədər alçalmışıq, mərhəmətini bizə tez göstər.

⁹Ey bizi qurtaran Allah,

İsmin şərəfinə Sən bizə yardım et,

Günahlarımızı kəffarə edərək

İsmin naminə Sən bizi xilas et.

¹⁰Niyə millətlər «Hanı onların Allahı?» desinlər?

Qullarının tökülən qan qisasının alınmasını

Qoy gözümüz görsün, millətlər də bilsinlər.

¹¹Qoy əsirlərin ah-naləsi hüzuruna çatsın,

Ölümə aparılanları böyük qüdrətinlə qoru.

¹²Ey Xudavənd, Sənə tənə vuran bizim qonşuların

Tənələrini yeddi qat artıq kökslərinə qaytar.

¹³Biz Sənin xalqın, otlağının sürüsüyük,

Əbədilik Sənə şükür edərik,

Nəsildən-nəslə qədər həmdlərini bəyan edərik!

Zəbur 80

Məzmur 80

Musiqi rəhbəri üçün. Asəfin «Şoşannim» üstə oxunan şəhadət məzmuru.

¹Ey İsrailin Çobanı,

Yusif nəslinə sürü kimi Baxan, qulaq as!

Ey keruvlar üstündə Oturan, nurunu saç!

²Efrayim, Binyamin, Menaşşe qəbilələrinin önündə

Qoy qüvvətin oyansın, gəl, bizi qurtar!

³Ey Allah, bizi əvvəlki halımıza qaytar,

Üzündən nur saçıb bizi qurtar!

⁴Ya Rəbb, ey Ordular Allahı, nə vaxtacan

Xalqının duasından qəzəblənəcəksən?

⁵Onlara çörək yerinə göz yaşı yedirdin,

Onlara bolluca göz yaşı içirdin.

⁶Qonşularımızla bizi çəkişməyə vadar etdin,

Düşmən bizi ələ salıb gülür.

⁷Ey Ordular Allahı, bizi əvvəlki halımıza qaytar,

Üzündən nur saçıb bizi qurtar!

⁸Misirdən tənək fidanı gətirərək

Qovduğun millətlərin torpağında əkdin.

⁹Bunun üçün sahə hazırlamışdın,

Tənək rişələnib ölkəni bürüdü.

¹⁰Budaqları dağlara,

Böyük sidr ağaclarına kölgə saldı.

¹¹Dənizə qədər qol-budaq atdı,

Zoğ atıb Fərat çayına çatdı.

¹²Bəs niyə ətrafdakı hasarını uçurdun?

Budur, yoldan keçən hər kəs məhsullarını qoparır,

¹³Tənəyi meşənin qabanları korlayır,

Onu çöl heyvanları çeynəyir.

¹⁴Ey Ordular Allahı, dön, göydən bax,

Bu tənəyi gör, qayğısına qal.

¹⁵Axı bu fidanı sağ əlinlə əkmisən,

Kökünə qüvvət vermisən.

¹⁶Tənəyini kəsib yandıranlar

Qəzəbli məzəmmətinlə qoy yox olsunlar!

¹⁷Sənin əlin, sağ əlin Öz seçdiyin adamı –

Qüvvət verdiyin bəşər oğlunu qorusun.

¹⁸Qoy Səndən dönüb ayrılmayaq,

Bizi elə yaşat ki, ismini çağıraq.

¹⁹Ya Rəbb, ey Ordular Allahı, bizi əvvəlki halımıza qaytar,

Üzündən nur saçıb bizi qurtar!

Zəbur 81

Məzmur 81

Musiqi rəhbəri üçün. Asəfin «Gittit» üstə oxunan məzmuru.

¹Qüvvətimiz olan Allahı mədh edin,

Yaqubun Allahına cuşa gəlib nida edin!

²İlahi oxuyun,

Dəfi, xoş avazlı liranı və çəngi çalın.

³ Təzə Ay mərasimində, ay bədirlənəndə,

Bizim bayram günündə

Şeypur çalın!

⁴Çünki bu, İsrail üçün verilən qaydadır,

Yaqubun Allahının hökmüdür.

⁵O, Misir əleyhinə çıxanda

Yusif nəslinə belə bir öyüd verib.

Naməlum bir səs eşitdim:

⁶«Onun çiyinlərini bu yükdən qurtarıram,

Qoy əlləri bu ağır səbətdən azad olsun.

⁷ Dar günündə Məni çağırdın,

Mən də səni qurtardım.

Gurlayaraq tufan içindən sənə cavab verdim,

Meriva sularında səni sınadım.

Sela

⁸Ey xalqım, dinlə, xəbərdarlıq edirəm,

Ey İsrail, kaş ki Məni dinləyəydin!

⁹ Aranızda özgə allah olmasın,

Yad allaha kimsə səcdə qılmasın.

¹⁰Rəbb Allahınız Mənəm,

Mən sizi Misir torpağından buraya gətirmişəm.

Ağzını yaxşı aç,

Doyunca yemək verirəm.

¹¹Lakin xalqım səsimi eşitmədi,

İsrail nəsli Məni istəmədi.

¹²Onların inadkar qəlblərinə izin verdim ki,

Necə istəyirlər, elə gəzsinlər.

¹³Kaş ki xalqım Mənə qulaq asaydı,

İsrail nəsli Mənim yolumla gedəydi!

¹⁴Bir anda düşmənlərini yerə sərərdim,

Əlimi yağılarının üstünə qaldırardım.

¹⁵Mən Rəbbə nifrət edənlər Mənə boyun əyərdi,

Əbədi olaraq vaxtları belə keçərdi.

¹⁶Sizə taxılın əlasını yedirərdim,

Sizi qayadan axan balla bəsləyərdim».

Zəbur 82

Məzmur 82

Asəfin məzmuru.

¹Allah Öz toplantısında durub,

Hökmünü verərək allahlar arasında deyir:

²«Nə vaxtadək nahaq hökm verəcəksiniz,

Pislərə tərəfkeşlik edəcəksiniz?

Sela

³Yoxsulun və yetimin işinə ədalətlə baxın,

Məzlumun və fəqirin haqqını verin.

⁴Yoxsul və möhtacları qurtarın,

Pislərin əlindən onları azad edin.

⁵Nə bilirsiniz, nə də ki anlayırsınız!

Yerin təməlləri sarsılır, qaranlıqda dolanırsınız.

⁶ Demişəm: “Siz allahlarsınız,

Hər biriniz Haqq-Taala övladlarısınız”.

⁷Lakin insan kimi öləcəksiniz,

Adi bir hökmdar kimi torpağa düşəcəksiniz».

⁸Ey Allah, qalx, dünyaya hakim ol,

Çünki bütün millətlərə Sən sahib olacaqsan!

Zəbur 83

Məzmur 83

Bir ilahi.

Asəfin məzmuru.

¹Ey Allah, susub səssiz durma!

Ey Allah, sakit olma!

²Budur, düşmənlər qiyamət qoparır,

Sənə nifrət edənlər Sənin əleyhinə qalxır.

³Xalqına qarşı fənd işlədirlər,

Sənin qoruduqlarına qarşı birgə qərara gəlirlər.

⁴Deyirlər: «Gəlin, onları millət olmasın deyə məhv edək,

İsrailin adı xatırlanmasın deyə onları yox edək».

⁵Ürəkləri bir olaraq qərara gəliblər,

Sənə qarşı bunlar əhd ediblər:

⁶Edomlular, İsmaillilər,

Moavlılar, Həcərlilər,

⁷Geval, Ammon, Amaleq,

Filişt və Sur əhalisi.

⁸Aşşur da onlara qoşulub,

Lutun övladlarına kömək edir.

Sela

⁹ Başlarına gətir Midyanlılara etdiklərini,

Qişon vadisində Sisranın, Yavinin başına gətirdiklərini.

¹⁰Onlar En-Dorda həlak oldular,

Torpaq üçün peyin oldular.

¹¹ Əsilzadələrini Orev və Zeev kimi et,

Bütün ağalarını Zevah və Salmunna kimi et.

¹²Onlar demişdilər:

«Allahın otlaqlarına sahib olaq».

¹³Ey Allahım, onları sovrulan toza,

Küləyin süpürdüyü saman qırıntısına çevir.

¹⁴Meşəni yandıran od kimi,

Dağları alışdıran alov kimi

¹⁵Onları tufanınla qov,

Qasırğanla dəhşətə sal.

¹⁶Ya Rəbb, onların üzünü xəcalətə bürü,

Qoy Sənin ismini axtarsınlar.

¹⁷Əbədilik utanaraq vəlvələyə düşsünlər,

Rüsvay olub yox olsunlar.

¹⁸Bilsinlər ki, Sənin ismin Rəbdir,

Bütün yer üzündə ancaq Sən Haqq-Taalasan!

Zəbur 84

Məzmur 84

Musiqi rəhbəri üçün. Qorah övladlarının «Gittit» üstə oxunan məzmuru.

¹Ey Ordular Rəbbi, məskənin nə qədər əzizdir,

²Qəlbim Rəbbin həyətinin həsrətindədir,

Könlüm, cismim var olan Allaha mədh oxuyur.

³Ey Ordular Rəbbi, Padşahım, Allahım,

Qurbangahının yaxınında sərçələr yurd salar,

Qaranquş bala çıxartmaq üçün yuva qurar.

⁴Nə bəxtiyardır evində yaşayanlar,

Daim Sənə həmd oxuyanlar!

Sela

⁵Nə bəxtiyardır Səndən qüvvət alanlar,

Qəlbində Sionu ziyarət etməyi arzulayanlar!

⁶Baka vadisindən keçərkən

Onlara çağlayan bulaqlar görünər,

İlk yağışdan ora gölməçələrə bürünər.

⁷Bu adamlar getdikcə qüvvət alarlar,

Sionda Allahın hüzurunda olarlar.

⁸Ya Rəbb, ey Ordular Allahı, duamı dinlə,

Ey Yaqubun Allahı, qulaq as!

Sela

⁹Ey Allah, bizə sipər olana bax,

Məsh etdiyinin üzünə bax!

¹⁰Sənin həyətində keçən bir günüm

Başqa yerdə keçən min günümdən yaxşıdır.

Allahımın evinin keşiyində dayanmağım

Pislərin çadırında rahat ömür sürməkdən yaxşıdır.

¹¹Axı Rəbb Allah günəşdir, sipərdir,

Rəbb lütf və şərəf verir,

Xeyirxahlığını düz yolla gedənlərdən əsirgəmir.

¹²Ey Ordular Rəbbi, Sənə güvənən nə bəxtiyardır!

Zəbur 85

Məzmur 85

Musiqi rəhbəri üçün. Qorah övladlarının məzmuru.

¹Ya Rəbb, ölkədən razı qaldın,

Yaqub nəslini bəxtəvər günlərə qaytardın.

²Xalqının təqsirlərini bağışladın,

Bütün günahlarını əfv etdin.

Sela

³Sən bütün hirsini uddun,

Qızğın qəzəbini yatırdın.

⁴Ey bizi qurtaran Allah,

Bizə bəxtəvər günlərimizi qaytar.

Bizə qarşı hiddətindən əl çək.

⁵Əbədilikmi bizə acığın tutacaq?

Qəzəbin nəsildən-nəslə qədərmi uzanacaq?

⁶Xalqın Səndən sevinc alsın deyə

Bizi yenə dirçəltməyəcəksənmi?

⁷Ya Rəbb, bizə məhəbbətini göstər,

Bizi xilas et.

⁸Rəbb Allah nə söyləsə, dinləyirəm.

Sözləri xalqına, möminlərinə sülh bəyan edər ki,

Onlar öz cəhalətlərinə dönməsinlər.

⁹Bəli, Rəbb Ondan qorxanları qurtarmaq üçün,

Ehtişamını ölkəmizdə saxlamaq üçün yaxınlaşır!

¹⁰Məhəbbətlə həqiqət bir-birinə qovuşacaq,

Salehliklə əmin-amanlıq bir-biri ilə öpüşəcək.

¹¹Həqiqət yerdə bitib-göyərəcək,

Ədalət göylərdən baxacaq.

¹²Bəli, Rəbb ən yaxşı şeyləri göndərəcək,

Torpağımız bol məhsul verəcək.

¹³Ədalət Rəbbin önündə addımlayar,

Qədəmləri üçün cığır salar.

Zəbur 86

Məzmur 86

Davudun duası.

¹Ya Rəbb, mənə qulaq asıb cavab ver,

Çünki mən məzlumam, fəqirəm.

²Möminəm, Sən Özün məni qoru,

Ey Allahım, Sənə güvənən bəndəni qurtar.

³Rəhm et mənə, ey Xudavənd,

Çünki bütün gün Səni səsləyirəm!

⁴Bu bəndənin qəlbini sevindir,

Ey Xudavənd, Sənə ürəyimi təqdim edirəm.

⁵Çünki Sən, ey Xudavənd, xeyirxahsan, bağışlayan Sənsən,

Səni səsləyənlərin hamısı üçün məhəbbətin boldur.

⁶Ya Rəbb, duamı dinlə,

Yalvarışlarımın səsinə qulaq as.

⁷Dar gündə Səni səsləyirəm,

Bilirəm ki, mənə cavab verərsən.

⁸Ey Xudavənd, allahlar arasında Sənin kimisi yoxdur,

Əməllərin kimi əməl yoxdur.

⁹ Ey Xudavənd, yaratdığın millətlərin hamısı hüzuruna gələcək,

Sənin ismini izzətləndirərək səcdə edəcək.

¹⁰Çünki əzəmətli, xariqələr yaradan Sənsən,

Yeganə Allah Sənsən!

¹¹Ya Rəbb, mənə yolunu göstər,

Sənin həqiqətinlə addımlayım.

Qəlbimi səmimi et,

Qoy Sənin ismindən qorxum.

¹²Ey Xudavənd Allahım, bütün qəlbimlə Sənə şükür edəcəyəm,

Daim ismini izzətləndirəcəyəm.

¹³Çünki mənə olan məhəbbətin böyükdür,

Canımı ölülər diyarına enməkdən qurtardın.

¹⁴Ey Allah, lovğalar əleyhimə qalxır,

Bir dəstə zalım canımı almaq üçün məni axtarır,

Səni qarşılarında görmür.

¹⁵ Ey Xudavənd, Sən rəhmli, lütfkar Allahsan,

Hədsiz səbirlisən, məhəbbətin və sədaqətin boldur.

¹⁶Sən mənə baxıb rəhm et,

Bu bəndənə Öz gücündən ver,

Kənizinin oğlunu xilas et.

¹⁷Xeyirxahlığından mənə bir əlamət göstər,

Qoy mənə nifrət edənlər görüb utansınlar.

Çünki, ya Rəbb, mənə kömək edirsən,

Könlümə təsəlli verirsən.

Zəbur 87

Məzmur 87

Qorah övladlarının məzmuru.

Bir ilahi.

¹Müqəddəs dağlar

Rəbbin şəhərinin təməlidir,

²Yaqubun bütün məskənlərindən çox

Sionun darvazaları Ona əzizdir.

³Ey Allahın şəhəri,

Haqqında bu şanlı sözləri deyirlər:

Sela

⁴«Məni tanıyanların içindən

Rahavın, Babilin adını çəkəcəyəm.

Həm də Filişt, Sur, Kuş barədə

Deyiləcək: “Bunlar da bu yerdə doğulub”.

⁵Bəli, Sion barədə deyiləcək:

“Onların hamısı bu yerdə doğulub,

Haqq-Taala buranı sarsılmaz edəcək”.

⁶Rəbb xalqları siyahıda qeyd edəndə yazacaq:

“Bunlar bu yerdə doğulub”.

Sela

⁷Oxuyanlar, rəqs edənlər belə deyəcəklər:

“Səndə mənim üçün hər cür çeşmə var”».

Zəbur 88

Məzmur 88

Bir ilahi.

Qorah övladlarının məzmuru.

Musiqi rəhbəri üçün Ezrahlı Hemanın «Maxalat leannot» üstə oxunan maskili.

¹Ya Rəbb, ey məni qurtaran Allah,

Gecə-gündüz Sənə yalvarıram!

²Qoy duam Sənə çatsın,

Qulaq as naləmə.

³Bəlalardan canım boğazıma gəldi,

Həyatım ölülər diyarına yaxınlaşır.

⁴Qəbirə düşənlərin içində sayılıram,

Sanki məndə taqət qalmayıb.

⁵Elə bil ölülər içinə düşmüşəm,

Yaddaşından silinmişəm,

Köməyindən əlimi üzmüşəm,

Məzarda yatan meyitlər kimiyəm.

⁶Məni dərin qəbirə,

Dərin, qaranlıq bir yerə saldın.

⁷Qəzəbin üstümə gəldi,

Təlatümün tamamilə məni əzdi.

Sela

⁸Tanışlarımı məndən uzaqlaşdırdın,

Onlarda mənə qarşı ikrah yaratdın.

Qapalı qalmışam, çıxa bilmirəm,

⁹Bu zülmümdən gözlərimin nuru sönür.

Ya Rəbb, hər gün Səni çağırıram,

Sənə əl açıram.

¹⁰Xariqələrini ölülərəmi göstərəcəksən?

Kölgələrmi qalxıb Sənə şükür edəcək?

Sela

¹¹Məhəbbətin məzardamı,

Sədaqətin Həlak yerindəmi bəyan olunacaq?

¹²Xariqələrin qaranlıqdamı,

Ədalətin unudulma diyarındamı tanınacaq?

¹³Mən isə, ya Rəbb, Səni imdada çağırıram,

Duam hər səhər hüzuruna qalxır.

¹⁴Ya Rəbb, niyə məni rədd edirsən?

Niyə məndən üzünü gizlədirsən?

¹⁵Mən uşaqlıqdan məzlumam, ölümcül haldayam,

Göstərdiyin dəhşətlərdən çarəsiz qalmışam.

¹⁶Qəzəbin üzərimdən basır,

Verdiyin vahimələrdən məhv oluram.

¹⁷Bunlar sel kimi məni dövrəyə salır,

Bunlar birgə həmişə başımın üstünü alır.

¹⁸Yarımı, yoldaşımı məndən uzaqlaşdırmısan,

Yalnız qaranlıqla həmdəm olmuşam.

Zəbur 89

Məzmur 89

Ezrahlı Etanın maskili.

¹Ya Rəbb, daim məhəbbətindən nəğmə oxuyacağam,

Sənin sədaqətini dilim hər nəslə deyəcək.

²Deyirəm ki, məhəbbətin əbədiyaşardır,

Sədaqətin göylər qədər sarsılmazdır.

³Dedin: «Öz seçdiyimlə əhd kəsmişəm,

Qulum Davud üçün belə and içmişəm:

⁴ “Mən nəslini əbədi sarsılmaz edəcəyəm,

Sülaləni taxtında sonsuzadək yaşadacağam”».

Sela

⁵Ya Rəbb, göylər Sənin xariqələrinə şükür etsin,

Müqəddəslər camaatı arasında sədaqətinə həmd edilsin.

⁶Göydə Rəbbin tayı-bərabəri varmı?

İlahi varlıqlar arasında Rəbbin bənzəri varmı?

⁷Müqəddəslər məclisində Allah çox zəhmlidir,

Ətrafında olanların hamısından O heybətlidir.

⁸Ya Rəbb, Ordular Allahı, Sənin tək qüdrətli varmı?

Səni sədaqətin bürüyüb.

⁹Sən qabaran dənizə hökm edirsən,

Aşıb-daşan dalğaları yatırırsan.

¹⁰Sən Rahavı əzib leşini çıxartdın,

Qüvvətli qolunla düşmənləri dağıtdın.

¹¹Göylər Sənin, yer üzü Sənin,

Qurduğun yer üzündə hər şeyin təməlini qoymusan.

¹²Sən şimalı, cənubu yaratmısan,

Tavor və Xermon adına mədh oxuyur.

¹³Qolun nə qədər qüvvətlidir,

Sağ əlin ucadır, əllərin qüdrətlidir!

¹⁴Salehlik və ədalət taxtının təməlidir,

Məhəbbət və sədaqət önündə gedir!

¹⁵Bayram şənliyində olan xalq nə bəxtiyardır!

Ya Rəbb, onlar Sənin üzünün nurunda gəzər.

¹⁶İsminə görə daim sevinirlər,

Salehliyinə görə şərəfə çatırlar.

¹⁷Onların ehtişamı, qüvvəti Sənsən.

Sənin lütfündən gücümüz artır.

¹⁸Çünki sipərimiz Rəbdəndir,

Padşahımız İsrailin Müqəddəsidir.

¹⁹Keçmişdə bir görüntü ilə

Möminlərinə belə söylədin:

«Bir cəngavərə kömək etdim,

Xalqın içindən onu seçib yüksəltdim.

²⁰ Qulum Davudu tapdım,

Müqəddəs yağımla onu məsh etdim.

²¹Əlim daim onu möhkəmləndirəcək,

Qolum ona qüvvət verəcək!

²²Düşmən ona qalib gələ bilməz,

Fitnəkarlar ona zülm edə bilməz.

²³Qarşısındakı düşmənləri qıracağam,

Ona nifrət edənləri vuracağam.

²⁴Yanında sədaqətim, məhəbbətim olacaq,

Gücü ismimlə artacaq.

²⁵Dənizlərə əlini,

Çaylara sağ əlini çatdıracağam.

²⁶Məni çağırıb deyəcək: “Atamsan, Allahımsan,

Məni xilas edən Qaya Sənsən!”

²⁷ Mən də ilk oğul haqqını ona verəcəyəm,

Onu yer üzünün ən uca padşahı edəcəyəm.

²⁸Ona daim məhəbbətimi göstərəcəyəm,

Sadiq qalıb əhdimi pozmayacağam.

²⁹Onun nəslini əbədi yaşadacağam,

Göylər durduqca taxtını saxlayacağam.

³⁰Övladları qanunumu atsalar,

Hökmlərimə görə yaşamasalar,

³¹Qaydalarımı pozsalar,

Əmrlərimə əməl etməsələr,

³²Bu qanunsuzluqlarını kötəklə cəzalandıracağam,

Təqsirlərini qamçı ilə tənbeh edəcəyəm.

³³Amma yenə də məhəbbətimi atmaram,

Sədaqətimi yalan olmağa qoymaram.

³⁴Öz əhdimi pozmaram,

Dilimdən çıxan sözləri dəyişmərəm.

³⁵Müqəddəsliyim naminə bir dəfə and içmişəm:

Davuda yalandan söz verməyəcəyəm.

³⁶Sülaləsi taxtda əbədi qalacaq,

Taxtı hüzurumda günəş kimi duracaq.

³⁷Ay kimi –

Göydəki etibarlı şahid kimi sabit qalacaq».

Sela

³⁸Amma, ya Rəbb, məsh etdiyin padşaha qəzəblənmisən,

Sən onu rədd etmisən, ona arxa çevirmisən.

³⁹Qulunla bağladığın əhddən imtina etmisən,

Tacını toz-torpağa atıb bulaşdırmısan.

⁴⁰Bütün divarlarını yıxmısan,

Qalalarını viran etmisən.

⁴¹Yoldan keçənlər oranı soyub-talayırlar,

Qonşuları ona tənə vururlar.

⁴²Onun düşmənlərinin sağ əlini yuxarı qaldırmısan,

Bütün yağılarını sevindirmisən.

⁴³Qılıncının ağzını kütləşdirmisən,

Onu döyüşdə qaldırmamısan.

⁴⁴Onu şərəfdən salmısan,

Taxtını yerlə yeksan etmisən.

⁴⁵Nə tez onu gəncliyindən saldın,

Onu xəcalətə bürüdün.

Sela

⁴⁶Ya Rəbb, nə vaxta qədər,

Yoxsa əbədilikmi bizdən gizlənəcəksən,

Od tutub qəzəbdən yanacaqsan?

⁴⁷Ömrümün nə tez keçdiyini xatırla,

Bütün bəşər övladlarını nə fani yaratmısan!

⁴⁸İnsanlar arasında ölüm görməyən kimdir?

Kim canını ölülər diyarının pəncəsindən qurtarar?

Sela

⁴⁹Ey Xudavənd, əvvəlki məhəbbətin harada qaldı?

Çünki bu barədə Davuda sədaqətlə and içdin.

⁵⁰Ey Xudavənd, unutma, gör bu bəndən necədir,

Köksümdə nə qədər xalqın tənəsini gəzdirirəm.

⁵¹Ya Rəbb, düşmənlərinin etdiyi təhqirləri,

Məsh etdiyinin yoluna vurduqları tənələri daşıyıram.

⁵²Rəbbə əbədilik alqış olsun!

Amin, Amin.

Dördüncü hissə

Zəbur 90

Məzmur 90

Allah adamı Musanın duası.

¹Ey Xudavənd, bütün nəsillərdən bəri

Bizə pənah yeri olmusan.

²Dağlara təvəllüd verməmişdən əvvəl,

Kainatı, dünyanı doğmazdan əvvəl

Əzəldən axıradək Allah Sənsən.

³İnsanları torpağa çevirirsən,

Deyirsən: «Qoy bəşər övladları toza dönsün».

⁴ Sənin gözündə min il ötən bir günə,

Bir gecə növbəsinə bənzər.

⁵İnsanları silirsən, çəkilirlər,

Elə bil ki yuxudurlar.

Sanki sübh çağı yerdə bitən otdurlar,

⁶Səhər boy atar, çiçək açar,

Axşamsa solar, quruyar.

⁷Qəzəbindən məhv oluruq,

Hiddətindən vəlvələyə düşürük.

⁸Hüzurunda təqsirlərimizi üzə çıxarmısan,

Gizli günahlarımıza üzünün işığını salmısan.

⁹Ömür-günümüz Sənin qəzəbin altında keçir,

İllərimiz bir nəfəs tək tükənir.

¹⁰Yetmiş il ömür sürərik,

Sağlam olsaq, səksənə yetişərik.

Ən yaxşı çağımız belə, zəhmətlə, kədərlə keçir,

Ömrümüz tez bitir, uçub-gedir.

¹¹Axı qəzəbinin gücünü kim dərk edə bilər?

Hirsinin vahiməsini kim duya bilər?

¹²Bizə öyrət nə qədər ömrümüz var,

Qoy qəlbimiz hikmətli olsun.

¹³Əl çək, ya Rəbb! Nə vaxtadək qəzəbindən dönməyəcəksən?

Sən qullarına rəhm et.

¹⁴Səhər-səhər bizə doyunca məhəbbət göstər,

Qoy ömrümüz boyu sevinib fərəhlənək.

¹⁵Bizi zülmə saldığın günlər qədər,

Bəlaya düşdüyümüz illər qədər sevindir.

¹⁶Əməllərin qullarına,

Əzəmətin övladlarına görünsün.

¹⁷Ey Xudavənd Allahımız, bizimlə xoş rəftar et,

Əllərimizin zəhmətini uğurlu et,

Bəli, bizim əllərimizin zəhmətini uğurlu et.

Zəbur 91

Məzmur 91

¹Haqq-Taalanın pənahında yaşayan,

Külli-İxtiyarın kölgəsində oturan insan

²Rəbb haqqında belə söyləyir:

«O mənim sığınacağımdır, qalamdır,

Allahımdır, Ona güvənirəm».

³Bil ki, O səni ovçunun tələsindən,

Ağır xəstəliyə düşüb ölməkdən qurtarar.

⁴Səni qanadlarının altına alar,

Pərlərinin altında sığınacaqsan.

Sədaqəti qalxanın, sipərin olar.

⁵Nə gecənin kabusundan,

Nə də gündüz atılan oxdan,

⁶Nə zülmətdə dolanan ağır xəstəlikdən,

Nə də günorta məhvedici qırğından qorxmazsan.

⁷Yanında min nəfər,

Sağında on min nəfər qırılsa,

Sənə xətər dəyməz.

⁸Gözlərinlə baxacaqsan,

Pislərin cəzasını görəcəksən.

⁹«Ya Rəbb, sığınacağımsan!» dediyin üçün,

Haqq-Taalaya sığındığın üçün

¹⁰Şərə düçar olmazsan,

Bəla çadırından uzaq qaçar.

¹¹Allah sənə görə mələklərinə əmr edər ki, Gedəcəyin hər yerdə səni qorusunlar,

¹²Səni əlləri üstündə aparsınlar, Ayağın bir daşa dəyməsin.

¹³Şiri, gürzəni ayaqlayarsan, Gənc aslanı, əfi ilanı tapdalayarsan.

¹⁴«Mən Rəbbi sevdiyinə görə onu azad edəcəyəm,

İsmimi tanıdığına görə onu yüksəldəcəyəm.

¹⁵Məni çağırarkən ona cavab verəcəyəm,

Dar günündə ona yar olacağam,

Onu xilas edib şərəfə-şana çatdıracağam.

¹⁶Onu uzun ömürlə doyduracağam,

Ona qurtuluşumu göstərəcəyəm».

Zəbur 92

Məzmur 92

Məzmur.

Şənbə günü üçün bir ilahi.

¹Nə yaxşıdır Rəbbə şükür etmək,

Ey Haqq-Taala, isminə tərənnüm söyləmək,

²Hər səhər məhəbbətini elan etmək,

Hər gecə sədaqətini bəyan etmək,

³On telli alətin avazı ilə,

Çəngin, liranın sədası ilə oxumaq.

⁴Çünki, ya Rəbb, əməllərinlə məni sevindirmisən,

Əllərinin işlərinə görə Səni mədh edirəm.

⁵Ya Rəbb, Sənin işlərin nə qədər əzəmətlidir,

Sənin fikirlərin dərindən dərindir!

⁶Nadan insan bunu heç vaxt bilməz,

Axmaq insan bunu dərk etməz:

⁷Pislər ot kimi bitsə də,

Bütün şər iş görənlər çiçəklənsə də,

Əbədilik yox olacaqlar.

⁸Amma, ya Rəbb, Sən əbədi ucasan.

⁹Ya Rəbb, düşmənlərin mütləq qırılacaq,

Bütün şər iş görənlər darmadağın olacaq.

¹⁰Sən mənə çöl öküzü kimi güc vermisən,

Başıma təzə zeytun yağı çəkmisən.

¹¹Düşmənlərimin yerə sərilməsini gözlərimlə gördüm,

Bədxahlarımın can verməsini qulaqlarımla eşitdim.

¹²Salehlər xurma ağacı kimi göyərir,

Livandakı sidr ağacı kimi böyüyür.

¹³Onlar Rəbbin evində əkilib,

Onlar Allahımızın həyətində göyərir.

¹⁴Qocalanda da bar verəcəklər,

Təravətli, yamyaşıl qalacaqlar,

¹⁵Belə deyəcəklər: «Rəbb haqdır,

O mənim qayamdır, Onda haqsızlıq yoxdur».

Zəbur 93

Məzmur 93

¹Rəbb hökmranlıq edir, əzəmət libasıdır,

Rəbbin libasına qüdrət qurşanıb.

Dünya möhkəm durub, sarsılmazdır.

²Ya Rəbb, taxtın əvvəldən qurulub,

Əzəldən var olan Sənsən.

³Ya Rəbb, sellər çağlayır,

Şırıldayan sellər çağlayır,

Uğuldayan sellər çağlayır.

⁴Gur suların uğultusundan da,

Dənizin güclü dalğalanmasından da,

Ucalarda olan Rəbb qüdrətlidir!

⁵Ya Rəbb, öyüdlərin tamamilə etibarlıdır,

Evinə müqəddəslik əbədi olaraq yaraşır.

Zəbur 94

Məzmur 94

¹Ya Rəbb, qisas alan Allah!

Ey qisas alan Allah, nurunu saç!

²Ey dünyanın Hakimi, qalx,

Təkəbbürlülərin əvəzini ödə!

³Ya Rəbb, nə vaxtadək pislər –

Axı nə vaxtadək pislər sevincdən cuşa gələcəklər?

⁴Dillərindən lovğa sözlər tökülür,

Bütün şər iş görənlər öyünürlər.

⁵Ya Rəbb, xalqını əzirlər,

Sənin irsindən olan adamlara zülm edirlər.

⁶Dul qadını və qəribi öldürürlər,

Yetimləri qırırlar.

⁷Belə deyirlər: «Rəbb heç nə görmür,

Yaqubun Allahı heç nə dərk etmir».

⁸Dərk edin, ey xalqın nadanları!

Ey axmaqlar, nə vaxt ağla gələcəksiniz?

⁹Qulaqları yaradan eşitməzmi?

Gözlərə quruluş verən görməzmi?

¹⁰Məgər millətlərə təlim verən,

İnsanlara bilik öyrədən tənbeh etməzmi?

¹¹Rəbb insanın düşüncələrini görər, Bunların boş olduğunu bilər.

¹²Ya Rəbb, bəxtiyar o insandır ki, ona təlim vermisən,

Öz qanununu öyrətmisən!

¹³Pislər üçün qəbir qazılanadək

Onu dar gündən çıxarıb dinclik verəcəksən.

¹⁴Çünki Rəbb xalqını Özündən ayırmaz,

İrsini Öz əlindən verməz.

¹⁵Yenə ədalətli hökmlər çıxarılacaq,

Ürəyidüz olanlar haqqın ardınca gedəcək.

¹⁶Kim mənim üçün pislərə qarşı durar?

Şər iş görənlərə qarşı kim müdafiəçim olar?

¹⁷Əgər Rəbb köməyim olmasaydı,

Canım sükut diyarına vaxtsız köçərdi.

¹⁸Mən «ayağım büdrəyir» deyən zaman,

Ya Rəbb, mənə məhəbbətinlə dayaqsan.

¹⁹Mən daxilən çox narahat olarkən

Təsəlli verərək məni fərəhləndirirsən.

²⁰Qanun bəhanəsi ilə şər quran

Əzazil hökmdarlardan Sənə yoldaş olarmı?

²¹Əlbir olub salehlərin canına qəsd qururlar,

Məhkum edib təqsirsizin qanına bais olurlar.

²²Amma Rəbb mənə qala oldu,

Allahım mənə sığınacaq bir qaya oldu!

²³Pislərin şər işlərini başlarına gətirəcək,

Pisliklərinə görə onları yox edəcək,

Bəli, Allahımız Rəbb onları yox edəcək!

Zəbur 95

Məzmur 95

¹Gəlin Rəbbi mədh edək,

Bizi qurtaran Qayaya sevincdən cuşa gələrək nida edək,

²Şükranlıqla hüzuruna gedək, (Şükür edərək hüzuruna gedək)

Cuşa gəlib ilahilərlə Ona nida edək!

³Axı Rəbb böyük Allahdır,

Bütün allahlar üzərində əzəmətli Padşahdır.

⁴Yerin dərin qatları Onun əlindədir,

Həm də dağların zirvələri Onundur,

⁵Onunkudur dəniz, Özü yaratmış,

Torpağı əlləri qurmuş!

⁶Gəlin Ona səcdə edək, əyilək,

Bizi yaradan Rəbbin hüzurunda diz çökək.

⁷Çünki O, Allahımızdır, Biz Onun otlağının xalqıyıq,

Əlinin altındakı sürüsüyük.

Əgər bu gün Onun səsini eşitsəniz,

⁸«Qoy ürəkləriniz Merivada olduğunuz kimi,

Səhradakı Massada keçən gündə olduğu kimi inadkar olmasın.

⁹Orada atalarınız Məni sınadılar,

Əməllərimi görsələr də, Məni yoxladılar.

¹⁰Qırx il o nəsildən dərdini çəkdim. (Zəhləm getdi.)

Dedim: “Onlar azğın ürəkli xalqdır,

Yollarımı tanımır”.

¹¹Buna görə qəzəblənib and içmişəm: “Onlar Mənim rahatlıq diyarıma girməyəcəklər”».

Zəbur 96

Məzmur 96

(1Saln. 16:23-33)

¹Rəbbə yeni bir ilahi oxuyun,

Ey bütün dünya, Rəbbə ilahi oxuyun,

²İsminə alqış edin, Rəbbə ilahi oxuyun,

Xilaskar olduğunu hər gün müjdələyin.

³Ehtişamını millətlərə elan edin,

Xariqələrini bütün xalqlara bəyan edin!

⁴Axı Rəbb əzəmətlidir, bol həmdə layiqdir,

O bütün allahlardan daha zəhmlidir.

⁵Bütün özgə xalqların allahları bütlərdir,

Lakin göyləri yaradan Rəbdir.

⁶Ehtişam və əzəmət hüzurundadır,

Müqəddəs məkanında gözəlliklə qüdrət var.

⁷Ey xalqların tayfaları, Rəbbə verin – İzzəti, qüdrəti Rəbbə verin,

⁸Adına layiq izzəti Rəbbə verin,

Həyətinə girib təqdimlər verin.

⁹Müqəddəslik zinəti ilə Rəbbə səcdə edin,

Ey bütün dünya, Onun hüzurunda lərzəyə gəlin!

¹⁰Millətlərə belə elan edin:

«Rəbb hökmranlıq edir,

O, dünyanı sarsılmaz və möhkəm qurub,

O, insafla xalqların hökmünü verəcək».

¹¹Göylər sevinsin, yer üzü şad olsun,

Dənizin və dənizdəki canlıların səsi ucalsın,

¹²Çöllər və çöldə yaşayanlar fərəhlənsin, Meşədəki bütün ağaclar mədh söyləsin

¹³Rəbbin hüzurunda!

O gəlir, dünyanın hökmünü vermək üçün gəlir,

Yer üzünün hökmünü ədalətlə,

Xalqların hökmünü həqiqətlə verəcək!

Zəbur 97

Məzmur 97

¹Rəbb hökmranlıq edir, qoy yer üzü şadlıq etsin,

Qoy bütün adalar sevinsin.

²Buludlar və zülmət Onun ətrafındadır,

Salehliklə ədalət taxtının təməlidir.

³Onun önündən alov çıxar,

Ətrafındakı düşmənləri yandırıb-yaxar.

⁴Şimşəkləri dünyaya işıq saçar,

Yer üzü bunu görəndə sarsılar.

⁵Dağlar Rəbbin hüzurunda –

Bütün yer üzünün Sahibinin hüzurunda mum tək əriyər.

⁶Göylər salehliyini bəyan edər,

Əzəmətini bütün xalqlar görər.

⁷Bütün bütpərəstlər,

Xeyirsiz bütlərlə öyünənlər rüsvay olacaq!

Ey bütün allahlar, Rəbbə səcdə edin!

⁸Ya Rəbb, Sənin hökmlərini

Sion eşidib sevinir,

Yəhuda qızları cuşa gəlir.

⁹Çünki bütün yer üzərində,

Ya Rəbb, Haqq-Taala Sənsən!

Bütün allahların üzərində

Sən nə qədər yüksəksən!

¹⁰Ey Rəbbi sevənlər, şərə nifrət edin!

O, möminlərinin canını qoruyar,

Onları pislərin əlindən qurtarar.

¹¹Salehlərin üstünə nur tökülər,

Ürəyidüz olanların üstünə sevinc səpilər.

¹²Ey salehlər, Rəbbə görə sevinin,

Onun müqəddəs adına şükür edin!

Zəbur 98

Məzmur 98

Məzmur.

¹Rəbbə yeni bir ilahi oxuyun,

Çünki O, xariqələr yaratdı.

O, sağ əli ilə,

Öz müqəddəs qolu ilə zəfərlər qazandı.

²Rəbb zəfərini bəyan etdi,

Millətlərin gözündə salehliyini aydın göstərdi.

³İsrail nəslinə

Göstərdiyi məhəbbətini və sədaqətini xatırladı.

Yer üzünün qurtaracağınadək hər yerdə

Allahımızın zəfərini gördü.

⁴Ey bütün dünya, cuşa gəlib Rəbbə nida et,

Birdən nida edin, mədh, tərənnüm səsini ucaldın!

⁵Rəbbi lira ilə –

Lira ilə, ilahi bir səslə tərənnüm edin!

⁶Kərənay, şeypur səsi ilə,

Padşah olan Rəbbin hüzurunda cuşa gəlin,

Ona nida edin!

⁷Qoy dənizin və dənizdəki canlıların,

Yer üzü və orada yaşayanların səsi ucalsın.

⁸Onun hüzurunda qoy çaylar əl çalsın,

Dağlar birgə mədh oxusun!

⁹Çünki Rəbb dünyaya hökm etmək üçün gəlir.

Yer üzünə ədalətlə,

Xalqlara insafla hökm edəcək!

Zəbur 99

Məzmur 99

¹Rəbb hökmranlıq edir, qoy xalqlar titrəsin, O, keruvlar üstündəki taxtındadır, qoy yer üzü lərzəyə gəlsin!

²Sionda olan Rəbb əzəmətlidir,

O bütün xalqların üzərindədir, yüksəkdədir.

³Qoy böyük, zəhmli adına şükür etsinlər!

O müqəddəsdir!

⁴Ey ədalətsevər güclü Padşah,

İnsafı bərqərar edən Sənsən,

Yaqub nəslinə ədalət və salehliyi göstərmisən.

⁵Allahımız Rəbbi ucaldın,

Ayaqlarına düşüb səcdə qılın,

O müqəddəsdir!

⁶Onun kahinləri arasında Musa ilə Harun olub,

Ona yalvaranlar arasında Şamuel olub.

Onlar Rəbbə yalvararkən

O cavab verərdi.

⁷Bulud sütununun içindən onlarla danışdı, Onun göstərişlərinə,

Onlara verdiyi qaydalarına bağlı qaldılar.

⁸Ya Rəbb Allahımız, Sən onlara cavab verdin,

Pis əməllərinin cəzasını versən də,

Bağışlayan Allah olduğunu onlara göstərdin.

⁹Allahımız Rəbbi ucaldın,

Müqəddəs dağında Ona səcdə qılın,

Çünki Allahımız Rəbb müqəddəsdir!

Zəbur 100

Məzmur 100

Şükran məzmuru.

¹Ey bütün dünya, cuşa gəlib Rəbbə nida edin,

²Sevinclə Rəbbə qulluq edin,

Mədh oxuyaraq Onun hüzuruna gəlin!

³Rəbb Allahdır, siz bunu bilin,

O bizi yaradıb, biz Ona aidik,

Xalqıyıq, otlağında otardığı sürüyük.

⁴Dərgahına şükürlərlə,

Həyətlərinə həmdlərlə gəlin.

Ona şükür edin,

İsminə alqış söyləyin.

⁵ Rəbb nə yaxşıdır, məhəbbəti əbədidir,

Sədaqəti nəsillərdən-nəslə çatır!

Zəbur 101

Məzmur 101

Davudun məzmuru.

¹Məhəbbətini, həqiqətini tərənnüm edəcəyəm,

Ya Rəbb, Sənə ilahi söyləyəcəyəm!

²Kamillik yolunda müdrik olacağam.

Sən yanıma nə zaman gələcəksən?

Təmiz ürəklə evimdə yaşayacağam,

³İyrənc şeylərdən gözümü çəkəcəyəm.

Azğınların işlərinə nifrət edirəm,

Qoymaram məndən yapışsın.

⁴Əyri ürəkdən dönəcəyəm,

Şəri tapdalayacağam.

⁵Qonşusuna gizlincə böhtan atanı susduracağam,

Yuxarıdan baxan lovğa insana dözə bilmərəm.

⁶Gözüm ölkənin sadiq insanlarına baxar,

Qoy onlar yanımda yaşasın.

Kamillik yolu ilə gedənlər qulluğumda dayanar.

⁷Fırıldaqçıları sarayımda yaşamağa qoymaram,

Yalançını hüzurumda dayanmağa qoymaram.

⁸Hər səhər ölkədəki pisləri yox edəcəyəm,

Bütün şər iş görənləri Rəbbin şəhərindən kəsib atacağam.

Zəbur 102

Məzmur 102

Bir məzlumun duası.

Taqətdən düşüb Rəbbin hüzurunda şikayətlənəndə.

¹Ya Rəbb, bu duama qulaq as,

Qoy fəryadım Sənə çatsın.

²Nə olar, dar günümdə üzünü məndən gizlətmə,

Qulaq as, Səni çağırarkən mənə tez cavab ver.

³Günlərim tüstü kimi çəkilir,

Sümüklərim elə bil yanıb közə dönür.

⁴Ürəyim kəsilib atılan ot kimi saralıb-solur,

Çörək yemək belə, yadımdan çıxır.

⁵Ah-zar çəkməkdən

Bir dəri, bir sümük qalmışam.

⁶İndi çöldəki yapalağa bənzəyirəm,

Viranəlik bayquşu kimiyəm.

⁷Gözümə yuxu getmir,

Damda tənha qalan bir quşa bənzəyirəm.

⁸Bütün gün düşmənlərim məni təhqir edir,

Mənə istehza edənlər adımla lənət oxuyur.

⁹Yeməyim çörək yerinə kül olub,

İçməyim göz yaşıma qarışıb.

¹⁰Çünki qəzəbindən, hiddətindən

Məni götürüb bir tərəfə atmısan.

¹¹Günlərim axşamın kölgəsi kimi keçir,

Bir ot kimi quruyuram.

¹² Lakin Sən, ya Rəbb, əbədi taxtında əyləşmisən,

Sənin şöhrətin nəsildən-nəslə deyiləcək.

¹³Sən qalxıb Siona mərhəmət edəcəksən,

Zamanını təyin etdin, indi ona lütf ediləcək.

¹⁴Çünki Sənin qulların onun daşlarını əziz tuturlar,

Onun toz-torpağına necə də acıyırlar.

¹⁵Millətlər Rəbbin ismindən,

Dünyanın bütün padşahları Onun əzəmətindən qorxacaqlar.

¹⁶Rəbb Sionu yenidən bərpa edəcək,

Əzəmətində görünəcək,

¹⁷Yoxsulların duasına qulaq asacaq,

Yalvarışlarına xor baxmayacaq.

¹⁸Sonrakı övladları Rəbbə həmd etsin deyə

Qoy gələcək nəsil üçün belə yazılsın:

¹⁹«Rəbb müqəddəs yüksəklikdən,

Göylərdən yer üzünə nəzər saldı;

²⁰Əsirlərin naləsini eşitmək üçün,

Ölümə aparılanları azad etmək üçün».

²¹Ona görə Rəbbin ismini Sionda elan edəcəklər,

Yerusəlimdə Ona həmdlər söyləyəcəklər

²²Rəbbə xidmət etmək üçün gələrkən,

Xalqlar, ölkələr bir yerə gələrkən.

²³Yolda ikən Rəbb gücümü azaltdı,

O, ömrümü qısaltdı.

²⁴Dedim: «Ey Allahım, canımı alma, ömrümün yarısıdır,

Sənin illərin nəsillərdən-nəsillərə çatır».

²⁵ Yerin təməlini əzəldən qurmusan,

Göylər Sənin əllərinin işidir!

²⁶Onlar yox olacaq, amma Sən qalacaqsan,

Hamısı paltar kimi köhnələcək,

Onları geyim kimi dəyişdirəcəksən,

Keçib-gedəcəklər.

²⁷Amma Sən dəyişməzsən,

İllərin tükənməzdir.

²⁸Qullarının övladları yaşayacaq,

Nəvə-nəticələri hüzurunda dayanacaq.

Zəbur 103

Məzmur 103

Davudun məzmuru.

¹Rəbbə alqış et, ey könlüm,

Ey bütün varlığım, Onun müqəddəs adına alqış et!

²Rəbbə alqış et, ey könlüm,

Unutma etdiyi yaxşılıqları:

³Odur bütün təqsirlərini əfv edən,

Bütün xəstəliklərinə şəfa verən.

⁴Odur həyatını məzara düşməkdən qurtaran,

Məhəbbətin, mərhəmətin tacını başına qoyan.

⁵Odur ömür boyu səni bərəkəti ilə doyduran,

Səni təzələyib gənc, gümrah qartala oxşadan.

⁶Rəbb bütün miskinlər üçün

Haqq və ədalət edir.

⁷Yollarını Musaya,

Əməllərini İsrail övladlarına göstərib.

⁸ Rəbb rəhmli və lütfkardır,

Hədsiz səbirli və bol məhəbbətlidir.

⁹Həmişə töhmətləndirməz,

Qəzəbi sonsuza qədər sürməz.

¹⁰Bizimlə günahlarımıza görə davranmaz,

Təqsirlərimizin əvəzini çıxmaz.

¹¹Çünki göylər yerdən nə qədər ucadırsa,

Ondan qorxanlara olan məhəbbəti o qədər böyükdür.

¹²Nə qədər şərq qərbdən uzaqdırsa,

Qanunsuzluqlarımızı bizdən o qədər uzaqlaşdırıb.

¹³Ata övladlarına rəhm etdiyi kimi

Rəbb də Ondan qorxanlara elə rəhm edir.

¹⁴Çünki necə yarandığımızı bilir,

Torpaqdan düzəlməyimizi unutmur.

¹⁵İnsanınsa ömrü bir ota oxşar,

Çəmən gülləri kimi çiçək açar,

¹⁶Üstündən yel əsərkən yox olur,

Yerində izi belə, qalmır.

¹⁷Rəbbin isə Ondan qorxanlara olan məhəbbəti,

Onların övladlarına olan salehliyi

Əzəldən var, bu əbədi qalacaq.

¹⁸Onun əhdinə vəfa edənlərə bunları göstərir,

Qayda-qanunlarını yerinə yetirənləri unutmur.

¹⁹Rəbb taxtını göylərdə qurub,

Hər yerdə hökmranlıq edir.

²⁰Rəbbə alqış edin, ey Onun mələkləri,

Ey Onun sözünə baxıb icra edən qüdrətli igidlər!

²¹Rəbbə alqış edin, ey səmanın bütün orduları,

İradəsini yerinə yetirən xidmətçiləri!

²²Rəbbə alqış edin, ey Onun yaratdıqları,

Ey Onun hökm etdiyi yer üzərində olan bütün varlıqlar!

Rəbbə alqış et, ey könlüm!

Zəbur 104

Məzmur 104

¹Rəbbə alqış et, ey könlüm!

Ya Rəbb Allahım, Sən nə qədər böyüksən,

Ehtişamı, əzəməti geyinmisən!

²Nura libas kimi bürünən,

Göyləri çadır tək açan,

³Yuxarı otaqlarını suların üstündə quran,

Buludları Özünə araba edən,

Yel qanadları üstünə minib gəzən,

⁴Küləyi Özünə elçi edən, Yanar odu Özünə xidmətçi edən Sənsən!

⁵Yer üzünün təməlini elə qurdun ki,

Əsla sarsılmasın.

⁶Dərin suları libas kimi yer üzünə geydirdin,

Sular dağların üstünə qalxdı.

⁷Sənin məzəmmətindən sular çəkildi,

Şimşəyinin səsindən qorxub qaçdı.

⁸Dağlardan dərələrə axdı,

Sənin təyin etdiyin yerlərə töküldü.

⁹Onların önünə hədd qoydun ki, ondan aşmasınlar,

Heç vaxt daşıb dünyanı basmasınlar.

¹⁰Bulaqları vadilərdən fışqırtdın,

Dağların arasından axıtdın.

¹¹Bu bulaqlar bütün çöl heyvanlarına su verər,

Vəhşi eşşəklər içər, susuzluğu gedər.

¹²Yanlarında quşlar yuva qurar,

Budaqlara qonub oxuyar.

¹³Sən dağları göydəki sarayından sulayırsan,

Əlinin bəhrəsindən yer doyur.

¹⁴Heyvanlar üçün ot bitirirsən,

İnsana becərmək üçün bitkilər yetirirsən.

Qoy insan torpaqdan azuqəsini çıxartsın:

¹⁵Ürəkləri xoşhal edən şərabı,

Üzləri güldürən zeytun yağını,

Taqət verən çörəyi.

¹⁶Doyunca su içər Rəbbin ağacları,

Livanda əkdiyi sidr ağacları.

¹⁷Bu ağaclarda quşlar yuva qurar,

Leyləklərin yuvası şam ağacındadır.

¹⁸Uca dağlar dağ keçilərinin oylağıdır,

Qayalar qayadovşanlarının sığınacağıdır.

¹⁹Fəsilləri müəyyən etmək üçün ayı yaratdın,

Günəş batacağı zamanı bilir.

²⁰Gecə olsun deyə havanı qaraldırsan,

Bütün meşə heyvanları vurnuxmaya düşürlər.

²¹Ov üçün gənc aslanlar nərə çəkərlər,

Öz yemlərini Allahdan istəyərlər.

²²Gün doğanda çəkilirlər,

Yuvalarında yatırlar.

²³İnsanlar iş başına gedir,

Qaş qaralana qədər işləyirlər.

²⁴Ya Rəbb, əməllərin çoxdur!

Hər birini müdrikliklə etmisən,

Yaratdıqların yer üzünü doldurub.

²⁵Böyük, dərin dənizlərin var,

Orada da saysız məxluqlar –

Həm kiçik, həm də böyük canlılar qaynaşar.

²⁶Oradan gəmilər keçir,

Yaratdığın Livyatan sularda oynayır.

²⁷Bunların hamısı gözləyir ki, Sən

Vaxtlı-vaxtında onları yemləyəsən.

²⁸Sən yem verərkən onlar yem yığırlar,

Açıq əlinin nemətindən doyurlar.

²⁹Amma üzünü gizlədərkən vəlvələyə düşürlər,

Sən onların nəfəsini kəsərkən ölüb torpağa qarışırlar,

³⁰Ruhunu göndərərkən onlar yaranır,

Yer üzünə yeni həyat verirsən.

³¹Rəbbin ehtişamı qoy əbədi var olsun!

Qoy Rəbb yaratdıqlarına görə şad olsun!

³²Rəbb yerə baxanda yer lərzəyə gəlir,

Dağa toxunanda dağ tüstülənir.

³³Rəbbə ömrüm boyu ilahi söyləyəcəyəm,

Nə qədər varam, Allahımı tərənnüm edəcəyəm.

³⁴Düşüncəm Ona xoş görünsün,

Mən Rəbbə görə sevinəcəyəm.

³⁵Günahkarlar yer üzündən silinsinlər,

Pis adamlar yox olsunlar!

Rəbbə alqış et, ey könlüm!

Rəbbə həmd edin!

Zəbur 105

Məzmur 105

(1Saln. 16:8-22)

¹Rəbbə şükür edin, ismini səsləyin, Əməllərini xalqlar arasında elan edin!

²Onu ilahilərlə tərənnüm edin,

Bütün xariqələrini bəyan edin!

³Onun müqəddəs adı ilə fəxr edin,

Ey Rəbbi axtaranlar, ürəkləriniz qoy sevinsin!

⁴Rəbbi, Onun qüvvətini arayın,

Daim hüzurunu axtarın.

⁵Etdiyi xariqələri,

Möcüzələri, dilindən çıxan hökmləri xatırlayın,

⁶Ey Onun qulu İbrahim nəsli,

Ey Yaqub övladları, ey Onun seçdikləri!

⁷Allahımız Rəbb Odur,

Hökmü bütün yer üzündədir.

⁸Əbədi olaraq min nəslə qədər əhdini, Əmr etdiyi sözü,

⁹İbrahimlə kəsdiyi əhdini,

İshaqa and içərək verdiyi vədini unutmaz.

¹⁰Bunu qayda kimi Yaqub üçün təsdiq etdi, Bu əbədi əhdi İsrail üçün etdi.

¹¹Dedi: «Övladlarının payına düşən mülk kimi

Kənan torpağını sənə verəcəyəm».

¹²O zaman onlar sayca az idilər,

Azsaylı olaraq ölkədə qərib idilər.

¹³Ölkədən-ölkəyə,

Məmləkətdən-məmləkətə köçürdülər.

¹⁴Rəbb heç kimi onlara əzab verməyə qoymadı, Onlara görə padşahları tənbeh etdi.

¹⁵Dedi: «Məsh etdiklərimə dəyməyin,

Peyğəmbərlərimə pislik etməyin».

¹⁶Ölkəyə qıtlıq göndərdi, Bütün çörəyin kökünü kəsdi.

¹⁷Lakin bunlardan əvvəl birini göndərmişdi, Bu, qul kimi satılan Yusif idi.

¹⁸Ayaqlarını zəncirləyib əzdilər, Boğazına dəmir halqa keçirdilər.

¹⁹Yusifin sözü düz çıxanadək

Rəbbin sözü onu təmizlədi.

²⁰Padşah buyruq verərək onu azad etdi, Xalqların hökmdarı ona azadlıq verdi.

²¹Onu sarayının ağası etdi, Varidatı üçün cavabdeh etdi.

²²Ona başçılar üstündə səlahiyyət verdi ki,

Ağsaqqallarına uzaqgörənlik öyrətsin.

²³Sonra İsrail Misirə gəldi, Yaqub Ham ölkəsində yerləşdi.

²⁴Rəbb onun xalqına bərəkət verdi, Düşmənlərindən çox onlara qüdrət verdi.

²⁵Rəbb düşmənlərinə fikir göndərdi ki, xalqına nifrət etsinlər,

Qullarına qarşı fırıldaq işlətsinlər.

²⁶Qulu Musanı, Həm də seçdiyi Harunu göndərdi.

²⁷Xalqın arasında Rəbbin əlamətlərini,

Ham ölkəsində Onun möcüzələrini göstərdilər.

²⁸Rəbb qaranlıq göndərərək ölkəni zülmət etdi, Çünki Onun sözlərinə itaət etmədilər.

²⁹Sularını qana çevirdi, Balıqlarını öldürdü.

³⁰Ölkəyə qurbağalar qaynaşıb gəldilər, Padşahın otaqlarına belə, girdilər.

³¹Əmr etdi, topa-topa mozalan gəldi, Mığmığalar bütün ərazilərini bürüdü.

³²Yağış əvəzinə dolu yağdırdı, Ölkələrini şimşəklərə qərq etdi.

³³Tənəklərinə, əncir ağaclarına zərbə vurdu,

Sahələrində olan ağacları qırdı.

³⁴Əmr etdi çəyirtkələrə qaynaşsın, Saysız balaları torpaqlarına daraşsın.

³⁵Onlar ölkədə olan bütün otları yedilər,

Torpaqlarının bar-bəhərini yedilər.

³⁶O, ölkədə hər yerlinin ilk oğlunu, Hər kişinin belindən gələn ilk oğlunu öldürdü.

³⁷İsrailliləri oradan qızılla, gümüşlə çıxartdı, Qəbilələri arasında yıxılan olmadı.

³⁸Onlar çıxanda Misirlilər sevindi,

Canlarında İsraillilərin qorxusu var idi.

³⁹Üzərlərinə örtük kimi bulud sərdi, Gecəni işıqlandırmaq üçün od göndərdi.

⁴⁰İstədiklərinə görə O, bildirçin gətirdi, Onlara göydən doyunca çörək verdi.

⁴¹Qayanı yararaq suyu fışqırtdı, Quraq yerə çay kimi axdı.

⁴²Çünki müqəddəs sözünü yada salmışdı,

Qulu İbrahimə verdiyi vədini xatırlamışdı.

⁴³O, xalqını sevinclə,

Öz seçdiklərini mədh səsi ilə çıxartdı.

⁴⁴Millətlərin torpaqlarını onlara verdi, Onları ümmətlərin sərvətlərinə sahib etdi.

⁴⁵Qoy Rəbbin qaydalarına riayət etsinlər,

Qanunlarına əməl etsinlər.

Rəbbə həmd edin!

Zəbur 106

Məzmur 106

¹Rəbbə həmd edin! Rəbbə şükür edin, ona görə ki yaxşıdır,

Çünki məhəbbəti əbədidir.

²Rəbbin qüdrətli işlərini sözlə demək olarmı?

Onu layiqincə həmd edən varmı?

³Nə bəxtiyardır ədalətə bağlananlar,

Hər zaman əməlisaleh olanlar!

⁴Ya Rəbb, xalqına lütf edərkən məni yada sal,

Onları nicata çatdırarkən mənim də qayğıma qal.

⁵Qoy seçdiklərini bəxtiyar görüm,

Millətinin sevinci ilə sevinim,

İrsinlə birlikdə fəxr edim.

⁶Ata-babamız kimi biz də günaha batmışıq,

Biz də şər iş görməklə təqsirkar olmuşuq.

⁷Misirdə olanda ata-babamız Sənin xariqələrini anlamadı, Bol məhəbbətini yada salmadı,

Dəniz kənarında, Qırmızı dənizdə Sənə qarşı üsyankar oldu.

⁸Amma Rəbb qüdrətini göstərmək üçün

Onları ismi naminə qurtardı.

⁹Onun məzəmmətindən Qırmızı dəniz qurudu, Çöldən keçdikləri kimi onları dərin yerdən keçirtdi.

¹⁰İsrailliləri onlara nifrət edənin əlindən qurtardı,

Onları düşməninin əlindən xilas etdi.

¹¹Yağıları sular basdı,

Bir nəfər də qalmadı.

¹²O zaman Rəbbin sözlərinə inandılar, Onu həmdlə tərənnüm etdilər.

¹³Lakin Rəbbin əməllərini tez unutdular,

Ondan məsləhət almadılar.

¹⁴Onlar səhrada iştahaya düşdülər, Çöllükdə Allahı sınağa çəkdilər.

¹⁵O da istədiklərini verdi,

Lakin onlara azar göndərdi.

¹⁶Düşərgədə Musaya, Rəbb üçün təqdis olunan Haruna paxıllıq etdilər,

¹⁷Torpaq yarılıb Datanı uddu,

Aviramla yoldaşlarını yerə batırdı.

¹⁸Yoldaşlarının içinə alov saldı,

Bu, pisləri yandırıb-yaxdı.

¹⁹Xorevdə bir dana heykəli düzəltdilər, Tökmə bir bütə səcdə etdilər.

²⁰Allahın əvəzinə

Otyeyən buğanın surətinə şərəf verdilər.

²¹Onları qurtaran Allahı –

Misirdə böyük möcüzələr yaradanı,

²²Ham ölkəsində xariqələr göstərəni,

Qırmızı dənizdə zəhmli işlər görəni unutdular.

²³Rəbb onları yox etmək üçün niyyətini söylədi,

Onu məhvedici qəzəbindən döndərmək üçün

Seçdiyi Musa Onun qarşısına gəldi.

²⁴Sonra o gözəl diyara da xor baxdılar, Rəbbin vədinə inanmadılar.

²⁵Çadırlarında giley-güzar etdilər,

Rəbbin səsini eşitmədilər.

²⁶Buna görə Rəbb and içdi:

Meyitlərini çöllərə sərəcək,

²⁷Övladlarını millətlər arasına səpələyəcək, Onları ölkələr arasında darmadağın edəcək.

²⁸Onlar Peordakı Baala səcdə etməyə gəldilər, Ölü bütə verilən qurban ətindən yedilər.

²⁹Bu işlər Rəbbin qəzəbinə gəldi,

Aralarına vəba töküldü.

³⁰Onda Pinxas qalxıb buna müdaxilə etdi,

Beləliklə, vəba çəkilib getdi.

³¹Bu, nəsillər boyu, əbədilik

Onun üçün salehlik sayıldı.

³²Onlar Meriva suları kənarında Rəbbi qəzəbləndirdilər, Buna görə Musanın başına qəza gəldi:

³³Onlar Musanın ruhunu incitdilər,

O da düşünülməmiş sözlər dedi.

³⁴Rəbbin əmrini yerinə yetirmədilər, Dediyi xalqları məhv etmədilər.

³⁵Əksinə, həmin millətlərə qarışdılar,

Adət-ənənələrini öyrənib onlara əməl etdilər.

³⁶Onların bütlərinə ibadət edərək

Özlərini bu tələyə saldılar.

³⁷Oğul-qızlarını Cinlərə qurban verdilər.

³⁸Oğul-qızlarının günahsız qanını tökdülər, Onları Kənan bütlərinə qurban verdilər,

Ölkəni qana bulaşdırdılar.

³⁹Belə işlərlə murdarlandılar,

Öz əməlləri ilə xəyanətə satıldılar.

⁴⁰Rəbb xalqına qarşı qəzəbindən yandı, Öz irsini iyrənc bir şey sandı.

⁴¹Onları millətlərə təslim etdi,

Onlara nifrət edənlər üzərlərində hakim oldu.

⁴²Düşmənləri onları zülm altına saldılar,

Onlara tabe olaraq əl altında qaldılar.

⁴³Rəbb dəfələrlə onları azad etmişdi,

Amma pisniyyətli olduqları üçün üsyankar olmuşdular,

Bu insanları öz günahları alçaltdı.

⁴⁴Lakin O, fəryadlarını eşidəndə

Onların əziyyətinə baxdı.

⁴⁵Bu insanlarla bağladığı əhdini yada saldı,

Bol məhəbbəti naminə rəhmini göstərdi.

⁴⁶Onları əsir edənlərin

Qəlbinə mərhəmət saldı.

⁴⁷Ey Allahımız Rəbb, bizi qurtar, Bizi millətlərin arasından topla.

Müqəddəs isminə şükür edək,

Biz fəxrlə Sənə həmd söyləyək.

⁴⁸Alqış olsun İsrailin Allahı Rəbbə

Əzəldən sonsuza qədər!

Qoy bütün xalq söyləsin «Amin!»

Rəbbə həmd edin!

Beşinci hissə

Zəbur 107

Məzmur 107

¹Rəbbə şükür edin, ona görə ki yaxşıdır,

Çünki məhəbbəti əbədidir!

²Qoy belə söyləsin Rəbbin xilas etdikləri,

Düşmən əlindən qurtardıqları,

³Şərqdən, qərbdən, şimaldan və cənubdan –

Ölkələrdən topladıqları.

⁴Bəziləri səhrada, çöllükdə sərgərdan dolanırdılar,

Yaşamaq üçün heç bir şəhər tapmırdılar.

⁵Aclıqdan, susuzluqdan

Canlarının taqəti getmişdi.

⁶Onlar dara düşəndə Rəbbə fəryad etdilər,

Rəbb onları dərdlərindən qurtardı.

⁷Yaşamaq üçün onlar bir şəhərə çatanadək

Onları düz yolla apardı.

⁸Rəbbə şükür etsinlər məhəbbətinə görə,

Bəşər övladlarına göstərdiyi xariqələrinə görə!

⁹Çünki O, susuzlara doyunca su verər,

Acları bol nemətlərlə bəslər.

¹⁰Bəziləri əsir düşüb zülmətdə yaşayırdı,

Zəncirlənib qaranlıqda, əziyyətdə qalırdı.

¹¹Çünki Allahın sözlərinə qarşı çıxmışdılar,

Haqq-Taalanın məsləhətinə xor baxmışdılar.

¹²Ona görə ağır işlə onların ürəklərinə əzab verdi,

Yıxılanda heç kim onlara kömək etmədi.

¹³Onlar dara düşəndə Rəbbə fəryad etdilər,

Rəbb onları dərdlərindən qurtardı.

¹⁴Onların buxovlarını qopardı,

Zülmətdən, qaranlıqdan çıxardı.

¹⁵Qoy şükür etsinlər Rəbbə məhəbbətinə görə,

Bəşər övladlarına göstərdiyi xariqələrinə görə!

¹⁶Çünki O, tunc qapıları qırar,

Dəmir cəftələri qoparar.

¹⁷Bəzilərinin ağlı çaşıb üsyankar oldu,

Təqsirləri onları zülmə saldı.

¹⁸Hər yeməkdən iyrəndilər,

Ölüm qapılarına yaxın gəldilər.

¹⁹Dara düşərkən Rəbbə fəryad qopardılar,

Rəbb onları dərdlərindən qurtardı.

²⁰Kəlamını göndərib onlara şəfa verdi,

Məzara düşməkdən onları xilas etdi.

²¹Rəbbə şükür etsinlər məhəbbətinə görə,

Bəşər övladlarına göstərdiyi xariqələrinə görə!

²²Qoy şükür qurbanlarını təqdim etsinlər,

Əməllərinə mədh oxuyub bəyan etsinlər!

²³Bəziləri gəmilərlə dənizlərdə üzdülər,

Dəryalarda böyük işlər gördülər.

²⁴Orada Rəbbin əməllərinə,

Dərin sularda etdiyi xariqələrinə şahid oldular.

²⁵Çünki Onun əmri ilə qasırğa qopdu,

Dənizin dalğaları qalxdı.

²⁶Gəmiçilər göyə qalxıb dərinə enirdi,

Qorxudan canları əldən gedirdi.

²⁷Onlar sərxoş kimi yırğalanıb-səndələyirdi,

Ağıllarına heç bir çarə gəlmirdi.

²⁸Onlar dara düşəndə Rəbbə fəryad etdilər,

Rəbb onları dərdlərindən qurtardı.

²⁹Qasırğanı yatırdı, sükut gətirdi,

Dalğaları sakit etdi.

³⁰Sakitlik yarananda onlar çox sevindilər,

Rəbb də onları istədikləri limana çatdırdı.

³¹Rəbbə məhəbbətinə görə,

Bəşər övladlarına göstərdiyi xariqələrinə görə şükür etsinlər!

³²Qoy Onu xalqın toplantısında ucaltsınlar,

Ona ağsaqqallar məclisində həmd etsinlər!

³³O, çayları qurudub səhra edər,

Bulaqlar olan yeri quraq çölə döndərər,

³⁴Orada yaşayanların pisliyinə görə

Münbit torpağı şoranlığa çevirər.

³⁵Səhranı gölməçəyə döndərər,

Quraq torpaqdan bulaqlar çıxardar.

³⁶Oranı verər ki, aclar məskən salsınlar,

Yaşamaq üçün özlərinə şəhər qursunlar,

³⁷Tarlanı əksinlər, üzümlüklər salsınlar.

Bol məhsul götürsünlər.

³⁸Onun xeyir-duası ilə törəyib artırlar,

Heyvanlarının sayı azalmır.

³⁹Sonra əzabdan, darlıqdan, bəlalardan

Onlar azalıb alçaldılan an

⁴⁰ Rəbb əsilzadələrin üstünə həqarət yağdırar,

Onları sonsuz çöldə sərgərdan dolandırar.

⁴¹Amma fəqiri zülm altından qaldırar,

Övladlarını sürü kimi çoxaldar.

⁴²Bunu görən əməlisalehlər şad olar,

Fitnə söyləyən ağızlarsa yumular.

⁴³Kimin ağlı varsa, qoy buna fikir versin,

Qoy Rəbbin məhəbbətini dərk etsin!

Zəbur 108

Məzmur 108

(Zəb. 57:7-11; 60:5-12)

Bir ilahi.

Davudun məzmuru.

¹Ey Allahım, qəlbim Sənə möhkəm bağlanıb,

Qoy bütün varlığımla ilahi oxuyum, Səni tərənnüm edim.

²Ey çəng və lira, oyan!

Qoy səhəri oyadım.

³Ya Rəbb, xalqlar arasında

Sənə şükür edəcəyəm.

Ümmətlər arasında

Səni tərənnüm edəcəyəm.

⁴Məhəbbətin böyükdür, göylərdən ucadır,

Sədaqətin buludlara çatır.

⁵Ey Allah, göylər üzərində ucal!

Ehtişamın bütün yer üzərində olsun!

⁶Sevdiyin insanların xilas olması üçün

Sağ əlinlə bizi qurtar, mənə cavab ver!

⁷Allah Öz müqəddəs məskənindən belə söylədi:

«Şekemi sevinclə bölüşdürəcəyəm,

Sukkot dərəsini böləcəyəm.

⁸Gilead torpağı Mənimdir,

Menaşşe torpağı Mənimdir,

Efrayim başımın dəbilqəsidir,

Yəhuda Mənim əsamdır.

⁹Moav yuyunmaq üçün ləyənimdir,

Çarığımı ataraq Edomu tutacağam,

Zəfər harayını Filiştə salacağam».

¹⁰Kim məni istehkamlı şəhərə apara bilər?

Edoma qədər kim mənə yol göstərə bilər?

¹¹Ay Allah, niyə bizi atmısan?

Ay Allah, qoşunlarımızla niyə yürüşə çıxmırsan?

¹²Düşmənin qarşısında bizə imdad et,

Çünki insanın köməyi puçdur.

¹³Allahın köməyi ilə şücaət göstərəcəyik,

O, düşmənlərimizi tapdalayacaq!

Zəbur 109

Məzmur 109

Musiqi rəhbəri üçün. Davudun məzmuru.

¹Ey tərənnüm etdiyim Allah, susma!

²Çünki pislər, hiyləgərlər ağzını açıb

Yalançı dilləri ilə məndən danışırlar.

³Mənə hər tərəfdən nifrət dolu sözlər deyirlər,

Nahaq yerə hücumlarına məruz qalıram.

⁴Sevgimin əvəzinə mənə ittiham yağdırırlar,

Mən isə dua etməkdəyəm.

⁵Yaxşılığımın əvəzinə yamanlıq edirlər,

Sevgimin əvəzinə nifrətlə cavab verirlər.

⁶Belə adamın qarşısına bir pis insanı çıxar,

Sağ tərəfində dayanıb onu ittiham etsin!

⁷Hökm oxunanda o təqsirkar çıxsın,

Qoy onun duası günah sayılsın!

⁸ Onun ömrü az olsun,

Vəzifəsini başqası tutsun!

⁹Övladları yetim,

Arvadı isə dul qalsın!

¹⁰Övladları didərgin düşüb dilənçi olsun,

Yaşamağa xarabalıq belə, tapmasın!

¹¹Sələmçilər hər şeyini əlindən alsın,

Nə qazanıbsa, yadellilər talayaraq aparsın!

¹²Ona məhəbbət göstərən olmasın,

Yetim qalan balalarına yazığı gələn tapılmasın!

¹³Qoy onun nəsli kəsilsin,

Gələcək nəslin arasından adları silinsin!

¹⁴Ata-babasının təqsiri Rəbbin hüzurunda yaddan çıxmasın,

Anasının günahı heç zaman yuyulmasın!

¹⁵Belə adamlar Rəbbin hüzurunda daim təqsirkar qalsınlar,

Dünyadan izi-tozu silinsin, yada salınmasınlar!

¹⁶Çünki məhəbbət göstərməyi unutdular,

Məzlumu, fəqiri, qəlbisınıqları

Həlak etmək üçün təqib etdilər.

¹⁷Qarğış etməyi sevirdi, öz başına dönsün,

Alqış etməyi sevmirdi, ona əli çatmasın!

¹⁸Ondan əynindəki paltar kimi qarğış çıxardı,

Qoy qarğışı su kimi canına, ilik kimi sümüklərinə hopsun!

¹⁹Qarğışı onu əyninin libası kimi bürüsün,

Hər gün belinə kəmər tək dolansın!

²⁰Məni ittiham edənlər,

Mənim barəmdə pis sözlər söyləyənlər

Rəbbin cəzasına gəlsinlər!

²¹Lakin, ey Xudavənd Rəbb, ismin naminə

Özün mənə qayğı göstər,

O gözəl məhəbbətinə görə məni azad et.

²²Çünki mən məzlum və fəqir insanam,

Köksümdəki ürəyimdən yaralanmışam.

²³Düşən kölgə kimi itirəm,

Vurulub atılan çəyirtkəyə bənzəyirəm.

²⁴Bax oruc tutmaqdan dizlərim əsir,

Bir dəri, bir sümük qalmışam.

²⁵ Görənlər mənə lağ edir,

Başlarını yelləyir.

²⁶Ya Rəbb Allahım, Sən mənə kömək et,

Məhəbbətinə görə məni qurtar.

²⁷Bilsinlər ki, bu Sənin əlindədir,

Ya Rəbb, Sən bunu edə bilərsən.

²⁸Qoy onlar qarğış etsinlər, Sən mənə xeyir-dua ver,

Qoy onlar əleyhimə qalxarkən utansınlar.

Sənin qulunam, qoy sevinim!

²⁹İttihamçılarım rüsvayçılığa bürünsünlər,

Xəcaləti xalat kimi geyinsinlər.

³⁰Mənim dilim Rəbbə bol-bol şükür söyləyəcək,

Xalq içində Ona həmd edəcək.

³¹Çünki O, fəqirin sağ tərəfində dayanar ki,

Edam hökmü verənlərin əlindən onu qurtarsın.

Zəbur 110

Məzmur 110

Davudun məzmuru.

¹Rəbb mənim Ağama dedi:

«Mən düşmənlərini ayaqlarının altına kətil kimi salanadək

Sağımda otur».

²Rəbb Siondan Sənin qüdrətli əsanı göndərəcək,

Düşmənlərinin üzərində sənə hökmranlıq verəcək.

³Döyüşəcəyin gün xalqın könüllü olaraq sənə qoşulacaq,

Gənclərin səhər şehi kimi müqəddəs libasını geyib yanına gələcək.

⁴ Rəbb and içdi, qərarını dəyişməz:

«Sən Melkisedeq vəzifəli əbədi bir kahinsən».

⁵Xudavənd sənin sağ tərəfindədir,

Qəzəb günündə padşahları qıracaq.

⁶Millətlərin hökmünü verəndə cəsədləri hər yeri bürüyəcək,

O bütün ölkələrin başçılarını əzəcək.

⁷Yol kənarında olan vadidən su içəcək,

Buna görə güclənib yüksələcək.

Zəbur 111

Məzmur 111

¹Rəbbə həmd edin!

Əməlisalehlər məclisində, icma arasında

Bütün qəlbimlə Rəbbə şükür edəcəyəm.

²Rəbbin işləri böyükdür,

Bunlardan zövq alanlar ibrət götürür.

³Əməllərində ehtişamı, əzəməti görünür,

Salehliyi əbədi qalır.

⁴Xariqələrini xalqının yadına salır.

Rəbb lütfkar və rəhmlidir,

⁵Ondan qorxanları bəsləyərək saxlayır,

Öz əhdini əbədi olaraq yadda saxlayır.

⁶Xalqına millətlərin torpaqlarını verərək

Qüdrətli işlərini onlara göstərdi.

⁷Əllərinin işləri sədaqət və ədalətdir,

Onun bütün qayda-qanunları etibarlıdır.

⁸Onlar həmişə, əbədi olaraq möhkəmdir,

Sədaqətdən, düzlükdən yaranmışdır.

⁹Öz xalqına qurtuluş göndərdi,

Əhdi əbədi olsun deyə əmr verdi,

İsmi müqəddəsdir, zəhmlidir.

¹⁰Rəbb qorxusu hikmətin başlanğıcıdır, Buna əməl edənlərin sağlam düşüncəsi vardır.

Ona əbədi olaraq həmdlər olsun!

Zəbur 112

Məzmur 112

¹Rəbbə həmd edin!

Nə bəxtiyardır Rəbdən qorxan,

Əmrlərindən zövq alan insan!

²Nəsli yer üzündə güclü olacaq,

Əməlisalehlərin övladları xeyir-dua alacaq.

³Evindən bolluq və sərvət əskilməz,

Salehliyi əbədi qalar.

⁴Zülmətdə belə, əməlisaleh insanlar üçün,

Lütfkar, rəhmli və saleh adamlar üçün nur doğar.

⁵Səxavətlə borc verən,

İşlərini ədalətlə görən yaxşı insandır.

⁶Belə adam əsla sarsılmaz,

Saleh insan əbədi olaraq yadda qalacaq.

⁷Pis xəbərdən qorxmaz,

Rəbbə güvəndiyi üçün ürəyi möhkəmdir,

⁸Cəsur ürəklidir,

Düşmənlərinin süqutunu görənədək qorxmaz.

⁹ Səpələyər, fəqirlərə paylayar,

Salehliyi əbədi qalar,

Qüdrəti və hörməti ucalar.

¹⁰Pis adamsa bunu görüb qəzəblənər,

Dişlərini qıcıdar, yanıb-tökülər,

Pislərin arzusu puç olar.

Zəbur 113

Məzmur 113

¹Rəbbə həmd edin!

Ey Rəbbin qulları, həmd edin,

Rəbbin isminə həmd edin!

²İndidən sonsuzadək

Rəbbin isminə alqış olsun!

³Gündoğandan günbatanadək

Rəbbin ismi həmdə layiqdir!

⁴Rəbb bütün millətlərdən ucadır,

Ehtişamı göylərdən yüksəkdir!

⁵Allahımız Rəbbin misli varmı?

Ucalardakı taxtında oturan,

⁶Göyə, yerə əyilərək baxan Odur.

⁷O, yoxsulları toz-torpaqdan qaldırar, Fəqirləri küllükdən çıxarar.

⁸Onları əsilzadələrlə,

Öz xalqının əsilzadələri ilə yanaşı oturdar.

⁹Sonsuz qadının evini tikər,

Ona övlad verməklə bəxtəvər ana edər.

Rəbbə həmd edin!

Zəbur 114

Məzmur 114

¹İsraillilər Misirdən çıxanda, Yaqub nəsli başqa dildə danışan xalqdan ayrılanda

²Yəhuda Rəbbin müqəddəs məskəni oldu,

İsrail Rəbbin səltənəti oldu.

³Onları görəndə dəniz qaçdı, İordan çayı geri çəkildi.

⁴Zirvələr qoçlar kimi,

Təpələr quzular kimi tullandı.

⁵Ey dəniz, niyə qaçdın, sənə nə oldu?

Ey İordan çayı, niyə belə geri çəkildin?

⁶Ey zirvələr, qoçlar kimi,

Ey təpələr, quzular kimi niyə tullandınız?

⁷Ey dünya, Hökmranın hüzurunda, Yaqubun Allahının qarşısında lərzəyə gəl!

⁸Qayanı gölməçəyə döndərən,

Çaxmaq daşını çeşməyə çevirən Odur.

Zəbur 115

Məzmur 115

¹Bizi yox, ya Rəbb, bizi yox,

Məhəbbətin, sədaqətin naminə

Öz adını şərəfləndir.

²Niyə millətlər belə desin:

«Onların Allahı haradadır?»

³Allahımız göylərdədir,

Öz istədiyini edir.

⁴Amma onların bütləri qızıldan, gümüşdən düzəlmişdir, Onlar insan əllərinin işidir.

⁵Ağızları var, danışa bilmir,

Gözləri var, amma görmür,

⁶Qulaqları var, eşitmir,

Burunları var, qoxu bilmir,

⁷Əlləri var, hiss etmir,

Ayaqları var, gəzə bilmir,

Boğazlarından səs gəlmir.

⁸Bütləri düzəldən, onlara güvənən insanlar

Bu bütlər kimi cansız olacaqlar.

⁹Ey İsraillilər, Rəbbə güvənin,

Odur köməyiniz və sipəriniz!

¹⁰Ey Harun nəsli, Rəbbə güvənin,

Odur köməyiniz və sipəriniz!

¹¹Ey Rəbdən qorxanlar, Rəbbə güvənin,

Odur köməyiniz və sipəriniz!

¹²Rəbb bizi unutmayıb,

Bizə xeyir-dua verəcək –

İsrail nəslinə xeyir-dua verəcək,

Harun nəslinə xeyir-dua verəcək,

¹³Kiçikdən böyüyə qədər Ondan qorxanlara xeyir-dua verəcək.

¹⁴Qoy Rəbb sizi,

Sizi və nəslinizi artırsın!

¹⁵Rəbdən, göyləri və yeri Yaradandan

Bərəkət alasınız!

¹⁶Rəbb səmaya sahibdir,

Yeri bəşər övladlarına verdi.

¹⁷Ölənlər, sükut diyarına düşənlər

Rəbbə həmd etmirlər.

¹⁸Lakin biz Rəbbə alqış edirik

İndidən sonsuzadək.

Rəbbə həmd edin!

Zəbur 116

Məzmur 116

¹Rəbbi sevirəm,

Çünki O, yalvarışımı eşidir.

²Səsimə qulaq asdığı üçün

Nə qədər varam, Onu çağıracağam.

³Ətrafıma ölüm bağları sarıldı,

Ölülər diyarının sıxıntıları məni haqladı,

Dərd-bəlalar məni tapdı.

⁴O zaman Rəbbin adını çağırdım:

«Ya Rəbb, amandır, canımı qurtar!»

⁵Rəbb lütfkardır, ədalətlidir,

Allahımız mərhəmətlidir.

⁶Rəbb avam adamı qoruyur,

O məni düşkünlüyə düçar olanda qurtardı.

⁷Ey canım, rahat ol,

Çünki Rəbb sənə comərdlik etdi.

⁸Ya Rəbb, canımı ölümdən,

Gözlərimi göz yaşından, ayağımı büdrəməkdən qurtardın.

⁹İndi Rəbbin hüzurunda gəzib-dolaşıram,

Dirilər arasındayam.

¹⁰«Mən çox əzab çəkirəm» deyərkən İnamımı itirməmişdim.

¹¹Mən təlaşa düşüb belə demişdim:

«Bütün insanlar yalançıdır».

¹²Mənə etdiyi comərdliyə görə

Rəbbin borcunu necə qaytara bilərəm?

¹³Qurtuluş piyaləsini qaldıracağam,

Rəbbin ismini çağıracağam.

¹⁴Rəbbə Onun bütün xalqı qarşısında

Əhd etdiyim təqdimləri verəcəyəm.

¹⁵Rəbbin gözündə hər bir möminin

Ölümü çox bahadır.

¹⁶Aman, ya Rəbb, mən Sənin qulunam,

Qulunam, kənizinin oğluyam,

Buxovlarımı açmısan.

¹⁷Sənə şükür qurbanları təqdim edəcəyəm,

Rəbbin adını çağıracağam.

¹⁸Rəbbə Onun bütün xalqı qarşısında

Əhd etdiyim təqdimləri verəcəyəm

¹⁹Rəbbin evinin həyətində,

Ey Yerusəlim, sənin mərkəzində.

Rəbbə həmd edin!

Zəbur 117

Məzmur 117

¹Ey bütün millətlər, Rəbbə həmd edin! Ey bütün ümmətlər, Onu mədh edin!

²Bizə olan məhəbbəti böyükdür,

Rəbbin sədaqəti əbədidir!

Rəbbə həmd edin!

Zəbur 118

Məzmur 118

¹Rəbbə şükür edin, ona görə ki yaxşıdır, Çünki məhəbbəti əbədidir!

²Qoy İsraillilər belə desin:

«Çünki məhəbbəti əbədidir!»

³Harun nəsli belə desin:

«Çünki məhəbbəti əbədidir!»

⁴Qoy Rəbdən qorxanlar belə söyləsin:

«Çünki məhəbbəti əbədidir!»

⁵Sıxıntı içində Rəbbi çağırdım,

Cavab verib məni genişliyə çıxartdı.

⁶Rəbb mənimlədir, heç qorxmaram. İnsan mənə nə edə bilər?

⁷Rəbb mənimlədir, mənə yardım edər,

Mənə nifrət edənlərin aqibətini görəcəyəm.

⁸Rəbbə pənah gətirmək

İnsana güvənməkdən yaxşıdır.

⁹Rəbbə pənah gətirmək

Əsilzadələrə güvənməkdən yaxşıdır.

¹⁰Bütün millətlər məni mühasirəyə aldılar,

Rəbbin ismi ilə onları qırdım.

¹¹Hər tərəfdən məni mühasirəyə aldılar,

Rəbbin ismi ilə onları qırdım.

¹²Arılar tək məni mühasirəyə aldılar,

Lakin kol-kos kimi alışıb tez söndülər,

Rəbbin ismi ilə onları qırdım.

¹³Möhkəm təzyiq altında yıxılmağıma az qalmışdı,

Lakin Rəbb imdadıma çatdı.

¹⁴Rəbb qüvvətim, məzmurumdur, O məni xilas etdi!

¹⁵Salehlərin çadırlarından zəfər nidası yüksəlir:

«Rəbbin sağ əli qüdrətli işlər göstərir!

¹⁶Rəbbin sağ əli necə əzəmətlidir!

Rəbbin sağ əli qüdrətli işlər göstərir!»

¹⁷Ölməyib sağ qalacağam,

Rəbbin işlərini bəyan edəcəyəm.

¹⁸Rəbb mənə möhkəm cəza verdi,

Amma məni ölümə təslim etmədi.

¹⁹Salehlik darvazalarını üzümə açın,

Qoy oradan keçib Rəbbə şükür edim.

²⁰Bu, Rəbbin darvazasıdır,

Oradan saleh insanlar keçəcək.

²¹Ya Rəbb, Sənə şükür edirəm,

Çünki cavab verərək məni xilas etmisən!

²²Bənnaların rədd etdiyi daş Guşədaşı olub.

²³Bu, Rəbbin işi idi,

Gözümüzdə xariqəli bir işdir.

²⁴Bu günü Rəbb yaratdı,

Onda sevinib şadlıq edək!

²⁵Aman, ya Rəbb, bizi qurtar! Aman, ya Rəbb, bizə uğur göndər!

²⁶Rəbbin ismi ilə gələnə alqış olsun! Sizə Rəbbin evindən xeyir-dua veririk.

²⁷Rəbb Allahdır, O, üzərimizə nur saçdı,

Qurbangahın buynuzlarına bayram qurbanını bağlayın.

²⁸Allahım Sənsən, Sənə şükür edəcəyəm!

Allahımsan, Səni yüksəldəcəyəm!

²⁹Rəbbə şükür edin, ona görə ki yaxşıdır,

Çünki məhəbbəti əbədidir!

Zəbur 119

Məzmur 119

Alef

¹Nə bəxtiyardır öz yolunda kamil olanlar,

Rəbbin qanununa görə yaşayanlar.

²Nə bəxtiyardır Onun göstərişlərinə əməl edənlər,

Bütün qəlbi ilə Onu axtaranlar.

³Həqiqətən, onlar fitnəkarlıq etməzlər,

Rəbbin yolunda gəzərlər.

⁴Sən qayda-qanunlarını qoydun,

Bunlara bağlı qalmağı buyurdun.

⁵Sənin qaydalarına bağlı qalmaq üçün

Kaş tutduğum yolda möhkəm olaydım.

⁶Onda xəcalət çəkməzdim,

Sənin bütün əmrlərindən gözümü çəkməzdim.

⁷Adil hökmlərini öyrənərkən

Sənə düz qəlblə şükür edəcəyəm.

⁸Sənin qaydalarına əməl edəcəyəm,

Sən məni tamamilə tərk etmə!

Bet

⁹Bir cavan yolunu necə təmiz saxlaya bilər?

– Sənin sözlərinə bağlı qalmaqla.

¹⁰Bütün qəlbimlə Səni axtarmışam,

Qoyma əmrlərindən çıxım.

¹¹Sənə qarşı günah etməyim deyə

Kəlamını qəlbimdə qoruyub saxlamışam.

¹²Ya Rəbb, Sənə alqış olsun!

Qaydalarını mənə öyrət.

¹³Ağzından çıxan hər hökmü

Dilimlə bəyan edirəm.

¹⁴Göstərişlərinin ardınca gedərkən sevinirəm,

Elə bil bolluca var-dövlətə çatmışam.

¹⁵Qayda-qanunlarını dərindən düşünürəm,

Sənin yollarından gözümü çəkmirəm.

¹⁶Qaydalarından zövq alıram,

Sözünü unutmuram.

Gimel

¹⁷Quluna comərdliyini göstər,

Qoy yaşayım və sözünə bağlı qalım.

¹⁸Gözlərimi aç ki,

Qanununun xariqələrini görüm.

¹⁹Əmrlərini məndən gizlətmə,

Çünki mən bu dünyada bir qəribəm,

²⁰Hökmlərinin həsrətini çəkməkdən

Hər zaman ürəyim ağrıyır.

²¹Sənin əmrlərindən çıxan lovğaları məzəmmət etdin,

Çünki onlar lənətləndi.

²²Həqarəti, tənəni məndən uzaq et,

Göstərişlərinə əməl etmişəm.

²³Başçılar yığılıb mənim üçün qəsd qurdular,

Lakin mən qulun qaydalarını dərin düşünürəm.

²⁴Göstərişlərin mənə zövq verir,

Onlar mənim məsləhətçilərimdir.

Dalet

²⁵Mən torpağa düşmüşəm,

Öz sözünə görə məni həyata qaytar.

²⁶Keçdiyim yolları Sənə bəlli edəndə cavab verdin,

Mənə qaydalarını öyrət.

²⁷Qayda-qanunlarının yollarını mənə Özün izah et,

Xariqələrin barədə dərin düşünüm.

²⁸Kədərdən canım üzülüb,

Öz sözünə görə mənə güc ver.

²⁹Məni yanlış yoldan uzaqlaşdır,

Qanununa görə mənə lütf göstər.

³⁰Mən sədaqət yolunu seçdim,

Hökmlərini gözümün önünə gətirdim.

³¹Sənin göstərişlərindən yapışmışam,

Ya Rəbb, qoyma xəcalətli qalım.

³²Qəlbimin düşüncəsini genişləndirərkən

Əmrlərinin yolu ilə getməyə səy göstərəcəyəm.

³³Ya Rəbb, Sən mənə qaydalarının yolunu öyrət,

Onlara axıradək əməl edəcəyəm.

³⁴Mənə ağıl ver, qanununa görə yaşayım,

Bütün qəlbimlə ona bağlanım.

³⁵Mənə əmrlərinin yollarını göstər,

Bu yollardan zövq alaram.

³⁶Qəlbimi haram qazanca deyil,

Göstərişlərinə tərəf yönəlt.

³⁷Qoyma gözlərim fani şeylərə baxsın,

Öz yolunda mənə həyat bəxş et.

³⁸Səndən qorxanlara verdiyin vədini

Qulun üçün həyata keçirt.

³⁹Qorxduğum tənələri məndən sovuşdur,

Sənin hökmlərin nə yaxşıdır!

⁴⁰Qayda-qanunlarının həsrətini çəkirəm,

Salehliyinlə məni yaşat.

Vav

⁴¹Ya Rəbb, mənə məhəbbətini göstər,

Kəlamına görə məni qurtar!

⁴²Məni təhqir edənlərə layiqincə cavab verəcəyəm,

Çünki Sənin sözlərinə güvənirəm.

⁴³Qoy həqiqət kəlamı dilimdən düşməsin,

Çünki Sənin hökmlərinə ümid bağlamışam.

⁴⁴Daim, əbədi olaraq

Qanununa bağlı qalacağam.

⁴⁵Azad gəzib-dolaşacağam,

Çünki qayda-qanunlarını axtarmışam.

⁴⁶Padşahların hüzurunda göstərişlərindən danışacağam,

Bundan utanmayacağam.

⁴⁷Sənin əmrlərindən zövq alıram,

Onları sevirəm.

⁴⁸Sevdiyim əmrlərinə tərəf əl açacağam,

Sənin qaydalarını dərindən düşünəcəyəm.

Zayin

⁴⁹Sən quluna verdiyin sözü xatırla,

Bu sözünlə mənə ümid vermisən.

⁵⁰Əzab çəkəndə bundan təsəlli tapıram ki,

Kəlamın məni həyata qaytaracaq.

⁵¹Lovğalar mənə çox istehza etdilər,

Amma Sənin qanunundan dönmədim.

⁵²Əzəldən var olan hökmlərini xatırladıqca,

Ya Rəbb, bunlardan təsəlli tapıram.

⁵³Qanununu atan pisləri görərkən

Qəzəb məni bürüyür.

⁵⁴Sənin qaydalarını bu qürbət eldə

İlahi tək oxuyuram.

⁵⁵Hər gecə adını yadıma salıram,

Ya Rəbb, qanununa bağlı qalıram.

⁵⁶Bu mənə bir adət oldu,

Sənin qayda-qanunlarını yerinə yetirdim.

Xet

⁵⁷Ya Rəbb, mənim nəsibimsən,

Sözlərinə bağlı qalmaq üçün vəd etmişəm.

⁵⁸Bütün qəlbimlə Sənə yalvarıram,

Sən Öz kəlamına görə mənə lütf göstər.

⁵⁹Tutduğum yollara nəzər salmışam,

Hər addımımı göstərişlərinə tərəf yönəltmişəm.

⁶⁰Əmrlərinə bağlanmaq üçün tələsirəm,

Bunun üçün ləngimirəm.

⁶¹Pis adamlar mənə kəmənd atarkən

Qanununu unutmadım.

⁶²Adil hökmlərinə görə Sənə şükür etmək üçün

Gecə yarısı qalxıram.

⁶³Səndən qorxanların hamısı ilə,

Qayda-qanunlarına bağlı qalanlarla dostam.

⁶⁴Ya Rəbb, yer üzü məhəbbətinə bürünüb,

Mənə qaydalarını öyrət.

Tet

⁶⁵Ya Rəbb, verdiyin sözə görə

Quluna xeyirxahlıq etmisən.

⁶⁶Mənə ağıl, bilik öyrət,

Çünki əmrlərinə inanıram.

⁶⁷Əzaba düşməzdən əvvəl yoldan azırdım,

Amma indi mən kəlamına bağlıyam.

⁶⁸Nə qədər yaxşısan, xeyirxahlıq edirsən!

Mənə qaydalarını öyrət.

⁶⁹Lovğalar yalanları ilə mənə qara yaxırlar,

Amma mən bütün qəlbimlə qayda-qanunlarını yerinə yetirirəm.

⁷⁰Onların ürəkləri piylənərək daş bağlayıb,

Mənsə qanunundan zövq alıram.

⁷¹Çəkdiyim əzabın xeyri mənə bu olub:

Sənin qaydalarını öyrənirəm.

⁷²Ağzından çıxan qanun mənim üçün

Minlərlə qızıldan, gümüşdən daha qiymətlidir.

Yod

⁷³Əllərinlə yaranmışam, mənə surət vermisən,

Mənə qabiliyyət ver, qoy əmrlərini öyrənim.

⁷⁴Səndən qorxanlar məni görərkən sevinsinlər,

Çünki Sənin sözünə ümid bağlamışam.

⁷⁵Ya Rəbb, bilirəm ki, hökmlərin ədalətlidir,

Mənə əzab çəkdirsən də, sədaqətin yox olmur.

⁷⁶Quluna verdiyin kəlama görə

Məhəbbətin mənə təsəlli versin.

⁷⁷Mənə mərhəmət et ki, yaşayım,

Çünki qanunundan zövq alıram.

⁷⁸Mənim barəmdə yalan danışan lovğaları utandır,

Çünki mən qayda-qanunlarını dərindən düşünürəm.

⁷⁹Səndən qorxanlar yanıma gəlsin,

Onlar Sənin göstərişlərini bilənlərdir.

⁸⁰Qaydalarına görə mənim qəlbim kamil olsun,

Qoy heç zaman xəcalət çəkməyim!

Kaf

⁸¹Qurtuluş həsrətini çəkməkdən qəlbimdə tab qalmayıb,

Sözünə ümid bağlamışam.

⁸²Sözünün intizarından gözümün nuru sönür.

Deyirəm: «Nə vaxt mənə təsəlli verəcəksən?»

⁸³Tüstü içindəki tuluq kimi oldum,

Amma qaydalarını unutmuram.

⁸⁴Qulun daha nə qədər gözləsin?

Məni təqib edənləri nə vaxt mühakimə edəcəksən?

⁸⁵Qanununu pozan lovğa insanlar

Mənim üçün quyu qazıblar.

⁸⁶Sənin bütün əmrlərin etibarlıdır.

Kömək et! Məni yalançı insanlar təqib edir.

⁸⁷Az qaldı ki, yer üzündən məni yox etsinlər,

Lakin qayda-qanunlarından çıxmamışam.

⁸⁸Məhəbbətinə görə mənə həyat ver,

Ağzından çıxan göstərişlərə bağlı qalım.

Lamed

⁸⁹Ya Rəbb, sözün əbədidir,

Göylərdədir, dəyişməzdir.

⁹⁰Sədaqətin nəsildən-nəslə çatır,

Yer üzünü Sən qurmusan, möhkəm qalır.

⁹¹Hökmlərinə görə bu günədək hər şey qalır,

Onlar Sənin xidmətində dayanırlar.

⁹²Sənin qanunundan zövq almasaydım,

Əzab çəkməkdən həlak olardım.

⁹³Qayda-qanunlarını heç vaxt unutmaram,

Çünki onlarla məni həyata qaytarmısan.

⁹⁴Qurtar məni, mən Səninəm,

Qayda-qanunlarını axtarmışam.

⁹⁵Pislər məni öldürmək üçün pusqu qurarkən

Mən Sənin göstərişlərinin üzərində düşünürəm.

⁹⁶Görmüşəm ki, hər kamil şeyin qarşısına bir hədd qoyulur,

Sənin əmrlərin isə sərhəd tanımır.

Mem

⁹⁷Qanununu nə qədər sevirəm!

Həmişə onun üzərində dərindən düşünürəm.

⁹⁸Əmrlərin məni düşmənlərimdən daha müdrik edir,

Çünki onlar həmişə mənimlədir.

⁹⁹Bütün müəllimlərimdən daha aqil olmuşam,

Çünki göstərişlərin üzərində dərindən düşünürəm.

¹⁰⁰Ağsaqqallardan da artıq dərrakəliyəm,

Çünki qayda-qanunlarına əməl edirəm.

¹⁰¹Ayağımı hər pis yoldan kənar qoydum ki,

Sözlərinə bağlı qalım.

¹⁰²Hökmlərindən dönməmişəm,

Çünki məni Sən belə öyrətmisən.

¹⁰³Vədlərin damağıma necə də ləzzət verir!

Onlar dilimdə baldan şirindir.

¹⁰⁴Qayda-qanunlarına görə dərrakəliyəm,

Buna görə hər yanlış yola nifrət edirəm.

Nun

¹⁰⁵Sözün addımıma çıraqdır,

Yollarıma işıqdır.

¹⁰⁶Ədalətli hökmlərinə bağlı qalmaq üçün and içmişəm,

Yerinə yetirəcəyəm.

¹⁰⁷Ya Rəbb, nə qədər əzab çəkmişəm!

Öz sözünə görə həyatımı qoru.

¹⁰⁸Ya Rəbb, sidq ürəkdən etdiyim həmdi qəbul et,

Mənə Öz hökmlərini öyrət.

¹⁰⁹Həyatım daim təhlükəyə düşdü,

Amma qanununu unutmadım.

¹¹⁰Pislər mənə tələ quranda belə,

Mən Sənin qayda-qanunlarını pozmadım.

¹¹¹Əbədilik Sənin göstərişlərinə malikəm,

Çünki onlar qəlbimə sevinc verir.

¹¹²Qəlbimi əbədilik, sonsuzadək

Qaydalarına əməl etməyə meyl etdirmişəm.

Samek

¹¹³İkiüzlü insanlara nifrət edirəm,

Qanununu isə sevirəm.

¹¹⁴Sən pənahgahım, sipərimsən,

Sözünə ümid bağlamışam.

¹¹⁵Siz ey pislər, məndən uzaq olun!

Qoy Allahımın əmrlərinə əməl edim.

¹¹⁶Kəlamınla mənə dayaq ol ki, yaşayım,

Ümidim boşa çıxmasın, utanmayım.

¹¹⁷Özün mənə dayaq ol, qoy mən nicat tapım,

Sənin qaydalarını həmişə nəzərimdə tutum.

¹¹⁸Qaydalarını atanları Özündən kənar edirsən,

Çünki onların bütün fəndləri boşdur.

¹¹⁹Yer üzünün bütün pislərini tullantı hesab edirsən,

Buna görə göstərişlərini sevirəm.

¹²⁰Zəhmindən bədənim lərzəyə gəlir,

Hökmlərindən çox qorxuram.

Ayin

¹²¹Ədalətli, düz işlər görmüşəm,

Məni zülmkarlara təslim etmə.

¹²²Qulunun xeyri üçün zamin dur,

Qoyma lovğa insanlar mənə zülm etsin.

¹²³Xilasını, haqq sözünə əməl olunmasını gözləməkdən

Gözümün nuru sönür.

¹²⁴Quluna məhəbbət göstər,

Qaydalarını mənə öyrət.

¹²⁵Qulunam, mənə ağıl ver ki,

Sənin göstərişlərini dərk edim.

¹²⁶Ya Rəbb, insanlar qanununu pozdular,

Vaxtı çatıb, onlar üçün bir tədbir gör.

¹²⁷Qızıldan, saf qızıldan çox

Sənin əmrlərini sevirəm.

¹²⁸Bəli, bütün qayda-qanunlarına görə

Mən düz yolla gedirəm,

Bütün səhv yollarasa nifrət edirəm.

¹²⁹Göstərişlərinin heyrətamizliyinə görə

Onlara ürəkdən əməl edirəm.

¹³⁰Kəlamının açıqlanması nur saçır,

Hər nadanı ağıllandırır.

¹³¹Ağız açıb ah-zar edirəm,

Çünki əmrlərinin həsrətini çəkirəm.

¹³²Adını sevənlər üçün etdiyin adətə görə

Mənə bax və lütf göstər.

¹³³Kəlamınla addımlarımı möhkəmləndir,

Qoy heç bir təqsirim mənə hakimlik etməsin.

¹³⁴Məni insanların zülmündən qurtar,

Qoy Sənin qayda-qanunlarına bağlı qalım.

¹³⁵Üzün qulunun üstünə nur saçsın,

Sən mənə qaydalarını öyrət.

¹³⁶Gözlərimdən sellər kimi yaş axır,

Çünki insanlar qanununa bağlı qalmırlar.

Sade

¹³⁷Ya Rəbb, adilsən,

Hökmlərin doğrudur.

¹³⁸Buyurduğun göstərişlər ədalətlidir,

Onlar tamamilə etibarlıdır.

¹³⁹Qeyrətim məni yandırıb-yaxıb,

Çünki düşmənlərim Sənin sözlərini unudub.

¹⁴⁰Sənin kəlamın çox safdır,

Bu qulun onu sevir.

¹⁴¹Kiçik sayılsam da, mənə xor baxsalar da,

Qayda-qanunlarını unutmamışam.

¹⁴²Salehliyin əbədi salehlikdir,

Sənin qanunun həqiqətdir.

¹⁴³Başıma sıxıntı və məşəqqət gəldi,

Amma Sənin əmrlərin mənə zövq verdi.

¹⁴⁴Sənin göstərişlərin həmişə ədalətlidir,

Mənə ağıl ver ki, yaşayım.

Qof

¹⁴⁵Ya Rəbb, cavab ver! Bütün qəlbimlə Səni səsləyirəm,

Sənin qaydalarına əməl edəcəyəm.

¹⁴⁶Səni səslədim, məni qurtar,

Qoy göstərişlərinə bağlı qalım.

¹⁴⁷Dan yeri sökülməzdən əvvəl qalxıb Səni imdada çağırıram,

Çünki ümidimi Sənin sözlərinə bağlayıram.

¹⁴⁸Gecə boyu gözümə yuxu getmir,

Kəlamını dərindən düşünürəm.

¹⁴⁹Məhəbbətinə görə mənim səsimi eşit,

Ya Rəbb, hökmlərinə görə mənə həyat bəxş et.

¹⁵⁰Şər ardınca qaçanlar mənə yaxınlaşdılar,

Onlar Sənin qanunundan uzaqlaşdılar.

¹⁵¹Ya Rəbb, Sən mənə yaxınsan,

Bütün əmrlərin həqiqətdir.

¹⁵²Göstərişlərini lap əvvəldən öyrənirəm,

Əbədi qalsın deyə öyüdlərini verdin.

Reş

¹⁵³Çəkdiyim əzabı gör, məni qurtar,

Çünki qanununu unutmamışam.

¹⁵⁴Münaqişəmi həll edib Özün məni azad et,

Mənə kəlamına görə həyat bəxş et.

¹⁵⁵Pislər qurtuluşdan uzaqdır,

Çünki onlar Sənin qaydalarını axtarmırlar.

¹⁵⁶Ya Rəbb, mərhəmətin çoxdur,

Hökmlərinə görə məni yaşat.

¹⁵⁷Düşmənlərim, məni təqib edənlər çoxdur,

Lakin Sənin göstərişlərindən dönmədim.

¹⁵⁸Bu xainlərə ikrahla baxıram,

Çünki Sənin vədinə bağlı qalmayıblar.

¹⁵⁹Sənin qayda-qanunlarını gör nə qədər sevirəm,

Ya Rəbb, məhəbbətinə görə mənə həyat ver.

¹⁶⁰Sözlərinin mahiyyəti həqiqətdir,

Bütün ədalətli hökmlərin əbədidir.

Sin və Şin

¹⁶¹Başçılar boş yerə məni təqib edir,

Amma ürəyim Sənin sözlərindən qorxur.

¹⁶²Çoxlu qənimət tapan bir insan kimi

Sənin kəlamın məni sevindirir.

¹⁶³Yalandan zəhləm gedir, iyrənirəm,

Çünki qanununu sevirəm.

¹⁶⁴Ədalətli hökmlərinə görə

Hər gün yeddi dəfə Sənə həmd edirəm.

¹⁶⁵Qanununu sevənlər böyük əmin-amanlıq tapırlar,

Onlar heç nə ilə büdrəməzlər.

¹⁶⁶Ya Rəbb, xilasına ümid bəsləmişəm,

Əmrlərinə əməl etmişəm.

¹⁶⁷Göstərişlərinə ürəkdən bağlanmışam,

Onları çox sevirəm!

¹⁶⁸Qayda-qanunlarına, göstərişlərinə bağlı qalıram,

Çünki bütün yollarım Sənin hüzurundadır.

Tav

¹⁶⁹Ya Rəbb, mənim fəryadım qoy Sənə çatsın,

Mənə Öz sözünə görə ağıl ver.

¹⁷⁰Qoy yalvarışım hüzuruna çatsın,

Məni Öz kəlamınla azad et.

¹⁷¹Qoy dilimdən həmdlər tökülsün,

Mənə qaydalarını öyrətmisən.

¹⁷²Sənin kəlamını dilim tərənnüm etsin,

Çünki Sənin bütün əmrlərin ədalətlidir.

¹⁷³Sənin əlin mənə kömək etsin,

Çünki Sənin qayda-qanunlarını seçdim.

¹⁷⁴Ya Rəbb, qurtuluşun üçün həsrət çəkirəm,

Qanunundan zövq alıram.

¹⁷⁵Mənə həyat bəxş elə, qoy Sənə həmd oxuyum,

Hökmlərin qoy mənə kömək olsun.

¹⁷⁶İtən quzu kimi azmışam, qulunu axtar,

Çünki əmrlərini unutmamışam.

Zəbur 120

Məzmur 120

Ziyarət nəğməsi.

¹Dar gündə Rəbbi səslədim,

O mənə cavab verdi.

²Dedim: «Ya Rəbb, yalançı dodaqlardan,

Fitnəkar dillərdən canımı qurtar».

³Ey fitnəkar dil, sənə nə veriləcək?

Bu işinin əvəzi nə ilə ödəniləcək?

⁴Cəngavərin iti oxları,

Yanan odundan düşən közlər!

⁵Yazıq canım, Meşekdə qərib olmuşam,

Qedar çadırlarında yaşayıram!

⁶Mənim belə yerdə,

Sülhə nifrət edənlərin içində yaşamağım bəsdir.

⁷Mən sülh sevirəm, buna görə danışıram,

Onlarsa müharibə üçün çalışır.

Zəbur 121

Məzmur 121

Ziyarət nəğməsi.

¹Gözlərimi dağlara dikirəm,

Haradan mənə kömək gələcək?

²Göyləri və yeri yaradan Rəbdən

Mənə kömək gələcək.

³O, ayaqlarını büdrəməyə qoymaz,

Səni qoruyan yatmaz.

⁴Bax İsraili qoruyan yuxulamaz,

Yatıb qalmaz.

⁵Səni qoruyan Rəbdir,

O, sağ tərəfindədir, sənə kölgədir.

⁶Gündüz günəşin ziyanı sənə dəyməz,

Gecə ay da sənə zərər verməz.

⁷Rəbb səni hər cür şərdən saxlayar,

Canını qoruyar.

⁸Rəbb gediş-gəlişini hifz edər

İndidən sonsuza qədər.

Zəbur 122

Məzmur 122

Davudun ziyarət nəğməsi.

¹Mənə «Rəbbin evinə gedək» deyilərkən sevindim.

²Ey Yerusəlim, sənin darvazalarından keçdim,

Torpağına qədəm qoydum.

³Bu, Yerusəlim şəhəridir,

Çox sıx tikilmişdir.

⁴İsrail üçün verilən şəhadət naminə

Qəbilələr, Rəbbin qəbilələri

Rəbbin isminə şükür etmək üçün

Buranı ziyarət etməyə gəlirlər.

⁵Hökm üçün burada taxtlar qurulub,

Bu taxtlarda Davud sülaləsi oturub.

⁶Hamı Yerusəlim üçün sülh diləsin:

«Qoy səni sevənlər dinc həyat sürsün!

⁷Qoy qala divarlarının içində sülh olsun!

Qoy saraylarındakılar dinc yaşasın!»

⁸Yoldaşlarıma, dostlarıma görə

«Səndə sülh olsun!» deyirəm.

⁹Allahımız Rəbbin evinə görə

Sənə bəxtiyarlıq diləyirəm.

Zəbur 123

Məzmur 123

Ziyarət nəğməsi.

¹Ey göylərdəki taxtında Oturan,

Gözlərimi Sənə dikmişəm.

²Ağasının əlinə baxan qul kimi,

Xanımının əlinə baxan kəniz tək

Biz də Allahımız Rəbbə göz dikmişik,

Bizə rəhm etməsini gözləyirik.

³Bizə rəhm et, ya Rəbb, rəhm et!

Çünki təhqirlərdən doymuşuq.

⁴Laqeydlərin rişxəndləri,

Təkəbbürlülərin təhqirləri bizi cana doydurdu.

Zəbur 124

Məzmur 124

Davudun ziyarət nəğməsi.

¹İndi İsrail söyləsin:

Rəbb tərəfimizi saxlamasaydı,

²Bizə qarşı insanlar qalxarkən

Rəbb tərəfimizi saxlamasaydı,

³Bizə qarşı qəzəblərindən yanarkən

Bizi diri-diri udardılar,

⁴Sular bizi yuyub-aparardı,

Sellər üstümüzü basardı,

⁵Azğın sular üstümüzü basardı.

⁶Alqış olsun Rəbbə!

O bizi onların dişlərinə ov etmədi.

⁷Bizi ovçunun tələsindən bir quş kimi qurtardı,

Tələ qırıldı, canımız azad oldu.

⁸Bizə Rəbbin adından,

Göyləri və yeri yaradandan yardım gəlir.

Zəbur 125

Məzmur 125

Ziyarət nəğməsi.

¹Rəbbə güvənənlər Sion dağı kimi

Sarsılmaz, əbədi qalar.

²Dağlar Yerusəlimi dövrəyə aldığı kimi

Rəbb də indidən sonsuzadək xalqının ətrafındadır.

³Salehlərin payı üstündə

Şər insanların dəyənəyi hökm sürə bilməz,

Yoxsa salehlər də şərə əl atardı.

⁴Ya Rəbb, xeyirxahlara,

Ürəyidüz olan insanlara xeyirxahlıq et!

⁵Rəbb əyri yola dönənləri aparacaq,

Onları şər iş görənlərlə bir yerə qoyacaq.

İsrailin üzərinə sülh olsun!

Zəbur 126

Məzmur 126

Ziyarət nəğməsi.

¹Rəbb Siona bəxtəvər günlərini qaytaranda

Bizə röya kimi gəldi.

²Dodaqlarımızdan gülüş tökülürdü,

Dilimizdən sevinc harayı yüksəlirdi.

Millətlər öz aralarında belə deyirdi:

«Rəbb onlar üçün böyük işlər görüb».

³Bunun üçün sevinirik,

Çünki Rəbb bizim üçün böyük işlər görüb.

⁴Selləri Negevə qaytardığın kimi,

Ya Rəbb, o bəxtəvər günləri bizə qaytar.

⁵Göz yaşı ilə əkənlər

Sevinc harayı çəkərək biçəcək.

⁶Ağlaya-ağlaya toxum torbasını daşıyıb-gedən

Sevinc harayı ilə dərzləri daşıya-daşıya gələcək.

Zəbur 127

Məzmur 127

Süleymanın ziyarət nəğməsi.

¹Evi Rəbb tikməzsə,

Bənnaların zəhməti boşa gedər.

Şəhəri Rəbb qorumazsa,

Keşikçilər boş yerə orada gözlər.

²Erkən qalxıb gec yatmağınız,

Azuqə üçün özünüzü çox yormağınız faydasızdır.

Rəbb sevdiklərinə yuxuda olanda belə, verər.

³Övladlar Rəbbin verdiyi paydır,

Bətnin bəhrəsi Onun mükafatıdır.

⁴İnsanın gənc ikən övladları olarsa,

Bir igidin əlindəki oxlara bənzər.

⁵Oxdanı bu cür dolu olan nə bəxtiyardır!

Darvazada əleyhdarları ilə çəkişən zaman

Xəcalətli olmayacaq.

Zəbur 128

Məzmur 128

Ziyarət nəğməsi.

¹Nə bəxtiyardır Rəbdən qorxan,

Onun yolları ilə gedən insan!

²Çünki öz əlinin bəhrəsini yeyəcəksən,

Xoşbəxt olub uğur qazanacaqsan.

³Evində arvadın tənək kimi bar gətirəcək,

Övladların zeytun pöhrələri kimi

Süfrənin ətrafını bürüyəcək.

⁴Rəbdən qorxan insan

Belə xeyir-dua alacaq:

⁵Rəbb Siondan sənə xeyir-dua versin,

Ömür boyu Yerusəlimin xoşbəxtliyini görəsən,

⁶Övladlarının övladlarını görəsən!

İsrailin üzərinə sülh olsun!

Zəbur 129

Məzmur 129

Ziyarət nəğməsi.

¹Qoy İsrail söyləsin:

«Mənə gəncliyimdən bəri əzab verdilər.

²Bəli, gəncliyimdən bəri mənə əzab verdilər,

Lakin məğlub edə bilmədilər.

³Elə bil kürəyimdə kotan sürüblər,

Qamçılarla bədənimə uzun-uzun şırım çəkiblər.

⁴Rəbb isə adildir,

Pislərin buxovlarını qırdı».

⁵Siona nifrət bəsləyənlərin hamısı

Qoy xəcalət içində geri qovulsun!

⁶Qoy cücərmədən solsunlar,

Damda bitən ot kimi olsunlar!

⁷O, biçinçinin ovcunu,

Dərz bağlayanın qucağını doldurmaz!

⁸Yoldan keçən onlara belə deməz:

«Rəbb sizə xeyir-dua versin,

Sizə Rəbbin ismi ilə alqış olsun!»

Zəbur 130

Məzmur 130

Ziyarət nəğməsi.

¹Ya Rəbb, dərinliklərdən

Səni səsləyirəm.

²Ey Xudavənd, səsimi eşit,

Yalvarış səsimi yaxşı dinlə.

³Ya Rəbb, bizim təqsirlərimizi siyahıya alsan,

Bəs, ey Xudavənd, kim bunun qarşısında dayana bilər?

⁴Amma Sən bağışlayansan,

Ona görə hamı Səndən çəkinir.

⁵Rəbbi gözləyirəm, döyünən ürəyim gözləyir,

Onun sözünə ümid edirəm.

⁶Keşikçilər səhərin açılmasını gözlər,

Bəli, keşikçilər səhərin açılmasını gözlər,

Qəlbimsə bundan da çox Xudavəndin həsrətini çəkər.

⁷Ey İsrail, Rəbbə ümidini bağla!

Çünki Rəbdə məhəbbət var,

Onda bol-bol qurtuluş var.

⁸ Ey İsrail, O səni

Bütün təqsirlərindən azad edər!

Zəbur 131

Məzmur 131

Davudun ziyarət nəğməsi.

¹Ya Rəbb, təkəbbürlü deyiləm,

Gözümü yuxarı yerlərə dikməmişəm,

Gücüm çatmayan böyük işlərə girişməmişəm.

²Ovunub səsimi kəsmişəm,

Ana qucağında olan körpə kimiyəm,

Sanki bir sakit körpəyə dönmüşəm.

³Ey İsrail, Rəbbə ümidini bağla,

İndidən sonsuzadək ümidini Ona bağla!

Zəbur 132

Məzmur 132

Ziyarət nəğməsi.

¹Ya Rəbb, Davudu,

Çəkdiyi bütün əzabları,

²Rəbbə etdiyi andı,

Yaqubun qüdrətli Allahına etdiyi əhdi yada sal.

³O dedi: «Öz evimdə yaşamaram,

Yatağımda yatmaram,

⁴Gözümə yuxu getməz,

Gözlərimi yummaram

⁵Rəbbə layiq bir yer,

Yaqubun qüdrətli Allahına bir məskən tapana qədər».

⁶ Əhd sandığının Efratada olduğunu eşitdik,

Onu Yaar tarlalarında tapdıq.

⁷Dedik: «Gəlin, Onun məkanına gedək,

Kətilində səcdə edək».

⁸Ya Rəbb, qüvvənin rəmzi olan sandığınla birgə

İstirahət edəcəyin yerə qalx.

⁹Kahinlərin həqiqətə bürünsün,

Möminlərin Səni mədh etsin.

¹⁰Qulun Davudun xatirinə

Məsh etdiyindən üz döndərmə.

¹¹ Rəbb Davuda sədaqətlə and içdi,

Bu andından dönməz:

«Belindən gələn oğullarından birini

Səndən sonra taxtında oturdacağam.

¹²Əgər övladların əhdimə,

Onlara öyrədəcəyim göstərişlərə əməl edərlərsə,

Onların oğulları da

Sonsuza qədər sənin taxtında oturacaq».

¹³Çünki Rəbb Sionu seçdi,

Orada Öz məskənini salmaq istədi.

¹⁴Dedi: «Bura əbədi olaraq istirahət edəcəyim yerdir,

İstəyirəm ki, burada məskən salım.

¹⁵Bu yerə bol ruzi-bərəkət verəcəyəm,

Buradakı fəqirlərə doyunca ərzaq verəcəyəm.

¹⁶Kahinlərini zəfərə bürüyəcəyəm,

Möminləri sevinclə mədh oxuyacaq.

¹⁷ Burada Davud sülaləsindən güclü hökmdar yetirəcəyəm,

Məsh etdiyim üçün bir çıraq hazır etmişəm.

¹⁸Düşmənlərini xəcalətə salacağam,

Lakin onun tacı nur saçacaq».

Zəbur 133

Məzmur 133

Davudun ziyarət nəğməsi.

¹Nə yaxşıdır, nə xoşdur

Qardaş olub bir yaşamaq!

²Belə yaşamaq qiymətli yağ kimidir;

O yağ ki başa çəkilib saqqala,

Harunun saqqalından paltarının yaxasına axırdı.

³Sanki Xermon dağının şehi

Sion dağlarına düşür,

Çünki Rəbb buyurub ki,

Bu məkana bərəkət, əbədi həyat verilsin.

Zəbur 134

Məzmur 134

Ziyarət nəğməsi.

¹Rəbbə alqış edin, ey Onun qulları,

Ey Rəbb evinin xidmətində gecələr oyaq duranlar!

²Müqəddəs yerə tərəf əllərinizi qaldırın,

Rəbbə alqış edin!

³Göyləri və yeri yaradan Rəbb

Siondan sizə xeyir-dua versin.

Zəbur 135

Məzmur 135

¹Rəbbə həmd edin!

Rəbbin isminə həmd edin,

Ey Rəbbin qulları, həmd edin!

²Ey Rəbbin evində xidmət edənlər,

Allahımızın evinin həyətində duranlar,

³Rəbb yaxşıdır, Rəbbə həmd edin,

O nə qədər şirindir, isminə tərənnüm oxuyun!

⁴Çünki Rəbb Özü üçün Yaqubu seçdi,

İsraili Özünə məxsus xalq olaraq seçdi.

⁵Bilirəm, Rəbb əzəmətlidir,

Xudavəndimiz bütün allahlardan üstündür.

⁶Göylərdə, yer üzündə,

Dənizlərdə, bütün ümmanlarda Rəbb istədiyini edər.

⁷Yerin ucqarlarından buludları qaldırar, Şimşəkləri çaxdırar, yağış yağdırar,

Küləkləri öz mənbələrindən çıxarar.

⁸Rəbb Misirlilərin ilk oğullarını qırdı,

Hər insanın, hər heyvanın ilk balasını öldürdü.

⁹Ey Misir, sənin daxilində,

Fironla bütün əyanlarının üzərində

O, əlamətlərini, möcüzələrini göstərdi.

¹⁰Nə qədər millətləri qırdı,

Qüdrətli padşahları öldürdü.

¹¹Emorluların padşahı Sixonu,

Başan padşahı Oqu,

Bütün Kənan padşahlarını qırdı.

¹²Onların torpaqlarını, mülklərini

Öz xalqı İsrailə irs olaraq verdi.

¹³Ya Rəbb, ismin əbədidir!

Ey Rəbb, şöhrətin nəsillərdən-nəsillərə çatır!

¹⁴Rəbb xalqına haqq verəcək,

Qullarına rəhm edəcək.

¹⁵Amma millətlərin bütləri qızıldan, gümüşdən düzəlmişdir, Onlar insan əllərinin işidir.

¹⁶Ağızları var, danışa bilmir,

Gözləri var, amma görmür,

¹⁷Qulaqları var, eşitmir,

Ağızlarından nəfəs gəlmir.

¹⁸Bütləri düzəldən, onlara güvənən insanlar

Bu bütlər kimi cansız olacaqlar.

¹⁹Ey İsraillilər, Rəbbə alqış edin!

Ey Harun nəsli, Rəbbə alqış söyləyin!

²⁰Ey Levi nəsli, Rəbbə alqış edin!

Ey Rəbdən qorxanlar, Ona alqış söyləyin!

²¹Rəbbə Siondan alqış oxunsun!

Rəbb Yerusəlimdə yaşayır!

Rəbbə həmd edin!

Zəbur 136

Məzmur 136

¹Rəbbə şükür edin, ona görə ki yaxşıdır, Çünki məhəbbəti əbədidir!

²Allahların Allahına şükür edin,

Çünki məhəbbəti əbədidir!

³Hökmranların Hökmranına şükür edin,

Çünki məhəbbəti əbədidir!

⁴Yalnız Odur böyük xariqələr yaradan,

Çünki məhəbbəti əbədidir!

⁵Odur göyləri hikməti ilə quran, Çünki məhəbbəti əbədidir!

⁶Odur yerin təməlini sular üstündə qoyan, Çünki məhəbbəti əbədidir!

⁷Odur böyük işıqları yaradan, Çünki məhəbbəti əbədidir!

⁸Gündüzü günəşin hökmü altına saldı,

Çünki məhəbbəti əbədidir!

⁹Gecə ay-ulduzların hökmü altında oldu,

Çünki məhəbbəti əbədidir!

¹⁰O, Misirlilərin ilk oğullarını qırdı, Çünki məhəbbəti əbədidir!

¹¹İsrail nəslini Misirlilərin arasından çıxartdı, Çünki məhəbbəti əbədidir!

¹²İsrailliləri qüdrətli əli, uzanan qolu ilə apardı,

Çünki məhəbbəti əbədidir!

¹³Qırmızı dənizi iki yerə yardı, Çünki məhəbbəti əbədidir!

¹⁴İsrailliləri dənizin ortasından keçirtdi,

Çünki məhəbbəti əbədidir!

¹⁵Fironla ordusunu Qırmızı dənizdə batırdı,

Çünki məhəbbəti əbədidir!

¹⁶O, xalqını səhrada apardı,

Çünki məhəbbəti əbədidir!

¹⁷O, böyük padşahları vurdu,

Çünki məhəbbəti əbədidir!

¹⁸O, güclü padşahları qırdı,

Çünki məhəbbəti əbədidir!

¹⁹Emor padşahı Sixonu vurdu, Çünki məhəbbəti əbədidir!

²⁰Başan padşahı Oqu öldürdü, Çünki məhəbbəti əbədidir!

²¹Onların torpaqlarını irs olaraq verdi,

Çünki məhəbbəti əbədidir!

²²Bu yerləri qulu İsrail nəslinin mülkü etdi,

Çünki məhəbbəti əbədidir!

²³O, miskin halımızda bizi yaddan çıxarmadı,

Çünki məhəbbəti əbədidir!

²⁴Bizi düşmən əlindən qurtardı,

Çünki məhəbbəti əbədidir!

²⁵O, bəşəriyyətə ruzi verir,

Çünki məhəbbəti əbədidir!

²⁶Göylərin Allahına şükür edin,

Çünki məhəbbəti əbədidir!

Zəbur 137

Məzmur 137

¹Babil torpağında olanda Sionu yada salardıq,

Çay kənarında oturaraq ağlayardıq,

²Liralarımızı söyüd ağaclarından asardıq.

³Bizi əsir edənlər

Nəğmə oxumağımızı əmr edirdilər,

Bizə zülm verənlər

Onları şənləndirməyimizi istəyirdilər,

«Bizim üçün Sion nəğmələrini oxuyun» deyirdilər.

⁴Axı yad ölkədə Rəbbin nəğmələrini necə oxuyaq?

⁵Ey Yerusəlim, əgər səni unutsam,

Qoy sağ əlim qurusun.

⁶Ey Yerusəlim,

Səni anmasam, ən böyük sevincim olmasan,

Qoy dilim damağıma yapışsın.

⁷Ya Rəbb, Edomluları bir yada sal,

Məğlubiyyət günü Yerusəlimdən danışırdılar,

Deyirdilər: «Gəlin oranı uçuraq, təməlindən dağıdaq!»

⁸Ey Babil qızı, xaraba qalacaqsan. Bizə etdiyinin əvəzini sənə verən qoy bəxtiyar olsun!

⁹Körpələrini daşa çırpıb öldürən bəxtiyar olsun!

Zəbur 138

Məzmur 138

Davudun məzmuru.

¹Bütün qəlbimlə Sənə şükür edirəm,

«Allahlar»ın önündə Səni tərənnüm edirəm.

²Müqəddəs məbədinə tərəf səcdə edirəm,

Məhəbbətin, sədaqətin naminə isminə şükür edirəm.

Çünki ismini, kəlamını hər şeydən üstün tutmusan.

³Səni çağıranda mənə cavab vermisən,

Canıma taqət verib məni ürəkləndirmisən.

⁴Ya Rəbb, bütün dünya padşahları Sənə şükür edəcəklər,

Çünki ağzından çıxan kəlamları eşidiblər.

⁵Rəbbin yollarını tərənnüm edəcəklər,

Çünki Rəbbin ehtişamı böyükdür.

⁶Rəbb ucalarda olsa da, yazıqlara nəzər salar,

Amma lovğaları uzaqdan tanıyar.

⁷Sıxıntı içində gəzsəm də,

Mənə həyat verirsən.

Düşmənin qəzəbinə qarşı əl qaldırırsan,

Məni sağ əlinlə qurtarırsan.

⁸Rəbb mənə verdiyi vədə əməl edir.

Ya Rəbb, məhəbbətin əbədidir.

Öz əlinin işini tərk etmə!

Zəbur 139

Məzmur 139

Musiqi rəhbəri üçün. Davudun məzmuru.

¹Ya Rəbb, məni yoxlayaraq tanıdın,

²Oturuşumu-duruşumu Özün bilirsən,

Fikirlərimi uzaqdan duyursan.

³Getməyimə, yatmağıma nəzarət edirsən,

Nə yollardan keçdiyimi bilirsən.

⁴Sözlərimi dilə gətirməmişdən əvvəl,

Ya Rəbb, hamısını tamamilə bilirsən.

⁵Hər yandan məni əhatə etmisən,

Öz əlini üzərimə qoymusan.

⁶Bu bilik əsrarəngizdir, məndən yüksəkdir,

Bunu dərk edə bilmərəm.

⁷Hara gedim ki, Ruhun orada olmasın?

Hara qaçım ki, hüzurunda olmayım?

⁸Əgər göylərə çıxsam, Sən oradasan,

Ölülər diyarında yatsam, Sən oradasan.

⁹Qanad alıb gündoğana uçsam belə,

Dənizi keçib günbatana qonsam belə,

¹⁰Sənin sağ əlin bələdçim olacaq,

Sağ əlin məni qoruyacaq.

¹¹Desəm də: «Qoy zülmət məni bürüsün,

İşıq batsın, ətrafım gecəyə dönsün»,

¹²Sənin qarşında zülmət batar,

Önündə gecə də gündüz kimi nur saçar.

Nurun, zülmətin Sənin üçün nə fərqi var?

¹³Sən mənim daxili üzvlərimi yaratmısan,

Mənə ana bətnində quruluş vermisən.

¹⁴Sən məni ecazkar, əsrarəngiz yolla yaratmısan,

Ona görə şükür edirəm.

Nə qədər xariqəli işlər görmüsən!

Bunu ürəkdən yaxşı dərk edirəm.

¹⁵Mən gizli bir yerdə yaranarkən,

Dünyanın dərin yerində yaranarkən

Bədənim Səndən gizli qalmadı.

¹⁶Dünyaya gəlməzdən əvvəl

Sənin gözlərin məni gördü.

Ömrüm başlamazdan əvvəl

Mənə təyin etdiyin hər bir günü kitabına yazmısan.

¹⁷Ey Allah, mənim üçün fikirlərinin qiyməti çoxdur,

Onların sayı-hesabı yoxdur!

¹⁸Saysaydım onları, qum dənələrindən çox olardı,

Oyananda yenə mən Səninləyəm.

¹⁹Ey Allah, kaş ki pisləri qıraydın,

Qantökənlərin hamısı məndən uzaq olaydı,

²⁰Onlar Sənə qarşı pis niyyətlə danışır,

Düşmənlərin adına küfr edirlər!

²¹Ya Rəbb, Sənə nifrət edənlərə nifrət etmərəmmi?

Əleyhdarlarından ikrah etmərəmmi?

²²Onlara tamamilə nifrət edirəm,

Onları özümə düşmən sayıram.

²³Ey Allah, məni yoxla, qəlbimi öyrən,

Sən məni sınaqdan keçirib bütün fikirlərimi bil.

²⁴Gör qəlbimdə pisliyə yol verirəmmi?

Əbədi yolda mənə rəhbər ol!

Zəbur 140

Məzmur 140

Musiqi rəhbəri üçün. Davudun məzmuru.

¹Ya Rəbb, məni şər adamlardan xilas et,

Məni qəddar insanlardan hifz et.

²Ürəklərində pis niyyətləri var,

Hər gün dava yaradırlar.

³ Kəskin dilləri ilan tək çalar,

Sanki dodaqlarında gürzə zəhəri var.

Sela

⁴Ya Rəbb, şər insanın əlindən,

Qəddar insanlardan məni qoru.

İstəyirlər ki, ayağımı büdrətsinlər.

⁵Bu təkəbbürlü insanlar mənə tələ qurublar,

Tor atıblar, cələlərini yolumun üstünə qoyublar.

Sela

⁶Rəbbə dedim: «Allahım Sənsən,

Ya Rəbb, yalvarıram, Sən məni eşit!

⁷Ey Xudavənd Rəbb, Sən qüvvətli Xilaskarımsan,

Döyüş günündə başıma dəbilqə qoymusan.

⁸Ya Rəbb, qoy pis adam muradına çatmasın,

Pis niyyətinə imkan vermə, qoy lovğalanmasın».

Sela

⁹Ətrafımdakıların ağzından çıxan pis sözlər

Qoy öz başlarına tökülsün!

¹⁰Qoy onların üstünə yanar közlər tökülsün,

Onlar quyuya düşüb, çıxa bilməsin!

¹¹Qoyma ki bu ölkədə iftiraçı uğur qazansın,

Bəlalar qəddarı vursun, onu ovlasın!

¹²Bilirəm ki, Rəbb məzlumların məhkəmə işinə baxır,

Fəqirlərə haqq qazandırır.

¹³Bəli, salehlər Sənin isminə şükür oxuyacaq,

Əməlisalehlər hüzurunda yaşayacaq.

Zəbur 141

Məzmur 141

Davudun məzmuru.

¹Ya Rəbb, Səni çağırıram, tez imdadıma yetiş,

Fəryad edərkən səsimi eşit!

² Qoy hüzurunda dualarım buxur kimi,

Açılan əllərim axşam qurbanı kimi qəbul olunsun!

³Ya Rəbb, ağzıma nəzarətçi qoy,

Dodağımın qapısını qoru.

⁴Qoyma qəlbim şərə meyl etsin,

Şər iş görənlərə qoşulub mən də pis iş görməyim,

Pislərlə birgə onların ləziz yeməklərindən yeməyim.

⁵Saleh insan məni vursa, məhəbbətinə görə tənbeh edər,

Bundan imtina etmərəm, sanki başıma çəkilən yağdır.

Daim pislərin şərinə qarşı dua edərəm.

⁶Hakimləri yarğandan atılarkən

Qoy xalq sözlərimi eşitsin, şirinliyini bilsin.

⁷Şumlanan yerdə şırımlara narın torpaq töküldüyü kimi

Sümüklərimiz ölülər diyarının qapısına səpilib.

⁸Ey Xudavənd Rəbb, gözlərimi Sənə dikmişəm,

Məni təhlükədə qoyma, Sənə pənah gətirmişəm.

⁹Şər iş görənlərin tələsindən,

Onların qurduğu cələdən məni qoru.

¹⁰Qoy pislər öz torlarına düşsün,

Mən də yolumu salamat keçib-gedim.

Zəbur 142

Məzmur 142

Davudun məzmuru.

Maskil.

Mağarada olanda etdiyi dua.

¹Rəbbə fəryad qoparıb haray salıram,

Rəbbə yalvararaq haray salıram.

²Hüzuruna şikayətimi tökürəm,

Qarşısında əziyyətimi söyləyirəm.

³Ruhdan düşəndə hansı yolda olduğumu bildin,

Yolumda gizli tələ qurublar.

⁴Sağıma bax, Özün gör, heç kim məni saymır,

Pənah yerim yoxdur,

Heç kim qayğıma qalmır.

⁵Ya Rəbb, Sənə fəryad edərək dedim:

«Pənahım Sənsən,

Dirilər arasında Sən mənim nəsibimsən».

⁶Qulaq as fəryadıma,

Nə qədər alçaldılmışam!

Məni təqib edənlərdən qurtar,

Çünki onlar məndən güclüdür.

⁷Canımı zindandan qurtar,

Qoy isminə şükür edim!

Onda salehlər məni əhatə edəcək,

Çünki mənə comərdlik etdin!

Zəbur 143

Məzmur 143

Davudun məzmuru.

¹Ya Rəbb, eşit duamı, yalvararkən məni dinlə,

Mənə sədaqətin, salehliyin naminə cavab söylə.

² Qulunu məhkəməyə çəkmə,

Bu bəşəriyyət içindən kimsə qarşında saleh çıxmaz.

³Məni düşmən təqib etdi,

Yerə vurdu, həyatım əldən getdi.

Sanki lap çoxdan ölənlərin biriyəm,

Bu düşmən məni zülmətə saldı.

⁴Ona görə ruhdan düşmüşəm,

Bu dəhşət qəlbimi sarsıtdı.

⁵Qədim dövrlər yadıma düşür,

Sənin bütün işlərini dərindən düşünürəm,

Əməllərin barədə hey fikirləşirəm.

⁶Sənə sarı əllərimi açmışam,

Bir quraq torpaq kimi Sənin üçün susamışam.

Sela

⁷Ya Rəbb, mənə tez cavab ver,

Çünki ürəyim çəkilir.

Üzünü məndən gizlətmə,

Qoyma qəbirə düşən insanlara bənzəyim.

⁸Hər səhər məhəbbətini mənə hiss etdir,

Çünki Sənə güvənirəm.

Gedəcəyim yolu mənə öyrət,

Çünki varlığımı Sənə verirəm.

⁹Ya Rəbb, məni düşmənlərdən qurtar,

Sənə pənah gətirirəm.

¹⁰Mənə Sənin iradənə əməl etməyi öyrət,

Çünki mənim Allahım Sənsən.

Sənin Ruhun yaxşıdır,

Düz yer üçün mənə yol göstər.

¹¹Ya Rəbb, mənə ismin naminə həyat ver,

Salehliyin naminə canımı dardan qurtar.

¹²Məhəbbətin naminə yağılarımı məhv et,

Canıma düşmən olanları qır, çünki mən Sənin qulunam.

Zəbur 144

Məzmur 144

Davudun məzmuru.

¹Alqış olsun Rəbbə, Qayama!

Əllərimə döyüş təlimi,

Barmaqlarıma müharibə təlimi verən Odur.

²Mənə Məhəbbət göstərən, mənim Qalam,

Qülləm, Xilaskarım,

Qalxanım, Pənahgahım,

Xalqımı mənə itaət etdirən Odur.

³ Ya Rəbb, insan kimdir ki, qayğısına qalırsan,

Bəşər övladı kimdir ki, onu düşünürsən?

⁴İnsan bir nəfəsə bənzər,

Ömrü kölgə kimi keçib-gedər.

⁵Ya Rəbb, göyləri yar, aşağı en,

Dağlara toxun, qoy tüstülənsin.

⁶Şimşəyini çaxdır, düşmənləri dağıt,

Oxlarını yağdır, yağıları darmadağın et.

⁷Göylərdən əl uzadıb dərin sulardan məni xilas et,

Məni yadellilərin əlindən azad et.

⁸Onların dili yalan danışar,

Sağ əlləri yalandan and etmək üçün qalxar.

⁹Ey Allah, Sənə yeni bir ilahi ilə şükür edəcəyəm,

Səni ontelli çənglə tərənnüm edəcəyəm.

¹⁰Sənsən padşahlara zəfər qazandıran,

Qulun Davudu amansız qılıncdan qurtaran.

¹¹Məni yadellilərin əlindən xilas et,

Sən məni azad et!

Onların dili yalan danışar,

Sağ əlləri yalandan and etmək üçün qalxar.

¹²Qoy yeniyetmə oğullarımız sağlam fidan kimi boy atsın,

Qızlarımız oyulmuş saray sütunları kimi gümrah olsun.

¹³Anbarlarımız müxtəlif nemətlərlə dolub-daşsın,

Otlaqda qoyunlarımız minlərlə, on minlərlə çoxalsın.

¹⁴Naxırlarımız çoxlu balalar versin,

Hasarlarımız dəlmə-deşiksiz olsun.

İnsanlarımız əsir düşməsin,

Meydanlarımız şivən səsinə bir daha bürünməsin.

¹⁵Nə bəxtiyardır belə xeyir-dua alan xalq!

Nə bəxtiyardır Allahı Rəbb olan xalq!

Zəbur 145

Məzmur 145

Davudun həmd nəğməsi.

¹Ey Padşahım olan Allahım, Səni yüksəldəcəyəm,

İsminə sonsuza qədər alqış edəcəyəm.

²Sənə hər gün alqış edəcəyəm,

İsminə əbədilik həmd edəcəyəm.

³Rəbb əzəmətlidir, bol həmdə layiqdir,

Onun əzəməti insan ağlına sığmaz.

⁴Əməllərin nəsildən-nəslə qədər mədh ediləcək,

Qüdrətli işlərin bəyan ediləcək.

⁵Əzəmətindən, izzətindən, şərəfindən deyiləcək,

Xariqəli işlərini dərindən düşünəcəyəm.

⁶İnsanlar zəhmli işlərinin qüdrətindən danışacaq,

Sənin əzəmətini elan edəcəyəm.

⁷İnsanlar Sənin bol xeyirxahlığını bəyan edəcəklər,

Salehliyini mədh edəcəklər.

⁸ Rəbb lütfkar və rəhmlidir,

Hədsiz səbirli və bol məhəbbətlidir.

⁹Rəbb hamıya xeyirxahlıq edər,

Yaratdıqlarının hər birinə mərhəmət göstərər.

¹⁰Ya Rəbb, bütün yaratdıqların Sənə şükür edəcək,

Möminlərin Sənə alqış edəcək.

¹¹Padşahlığının əzəmətindən deyəcəklər,

Qüdrətindən danışacaqlar.

¹²Qoy bəşər övladları Sənin qüdrətini,

Padşahlığının izzətini, əzəmətini bilsin.

¹³Sənin padşahlığın əbədi padşahlıqdır,

Səltənətin nəsildən-nəslə qədər uzanır.

¹⁴Rəbb yıxılanların hamısına dayaqdır,

Qəddi əyilənlərin hamısını qaldırır.

¹⁵Ya Rəbb, hamının gözü Sənə baxır,

Vaxtlı-vaxtında onlara azuqə verirsən.

¹⁶Əlini açırsan,

Bütün canlıları doyunca yedirirsən.

¹⁷Rəbb bütün yollarında adildir,

Hər işində sadiqdir.

¹⁸Rəbb Onu çağıran bütün insanlara,

Onu sidq ürəkdən çağıran bütün insanlara yaxındır.

¹⁹Ondan qorxanları murada çatdırar,

Fəryadlarına qulaq asıb onları qurtarar.

²⁰Rəbb Onu sevənlərin hamısını hifz edər,

Bütün pis adamlarınsa kökünü kəsər.

²¹Mənim dilim Rəbbə həmd oxuyacaq,

Qoy Onun müqəddəs isminə bütün bəşəriyyət əbədilik alqış etsin!

Zəbur 146

Məzmur 146

¹Rəbbə həmd edin!

Ey könlüm, Rəbbə həmd et!

²Ömür boyu Rəbbə həmdlər söyləyəcəyəm,

Allahımı nə qədər varam, tərənnüm edəcəyəm!

³Əsilzadələrə,

Sizi qurtara bilməyən bəşər oğluna güvənməyin.

⁴Onlar canı çıxan kimi torpağa düşər,

Niyyətləri bircə anda yox olar.

⁵Nə bəxtiyardır Yaqubun Allahından kömək alan,

Yalnız Allahı Rəbbə ümid bağlayan insan!

⁶Odur göyləri, yeri, dənizi, dənizdəkiləri yaradan,

Odur əbədi sadiq qalan.

⁷O, miskinlərə haqq qazandırır,

O, acları azuqə ilə doydurur.

Rəbb əsirləri azad edir,

⁸Rəbb kor gözləri açır.

Rəbb qəddi əyilənləri düzəldir,

Rəbb salehləri sevir.

⁹Rəbb qəriblərə dayaq olur,

Yetimi, dul qadını ayağa qaldırır,

Pislərinsə yollarını dolaşdırır.

¹⁰Rəbb əbədi hökmranlıq edir,

Ey Sion, Allahın nəsillər boyu hökm verir!

Rəbbə həmd edin!

Zəbur 147

Məzmur 147

¹Rəbbə həmd edin!

Allahımızı tərənnüm etmək nə qədər yaxşıdır!

O buna layiqdir, Ona həmdlər söyləmək xoşdur!

²Rəbb Yerusəlimi bərpa edər,

İsrailin əsarətdə olanlarını yığıb-gətirər.

³O, sınıq qəlblərə şəfa verər,

Yaralarını sarıyar.

⁴Ulduzların sayını hesablar, Hər birini öz adı ilə çağırar.

⁵Xudavəndimiz əzəmətlidir,

Qüvvəti çoxdur, dərrakəsi hədsizdir!

⁶Rəbb məzlumları ayağa qaldırar,

Pisləri isə toz-torpaq içinə atar.

⁷Rəbbə şükür nəğməsi söyləyin,

Allahımızı lira ilə tərənnüm edin!

⁸O, göyləri buludlarla bürüyər,

Yer üzünü yağışla təmin edər,

Dağlarda ot bitirər.

⁹O, heyvanlara yem verər,

Çığırışan quzğun balalarını yemlər.

¹⁰O, güclü atlardan zövq almaz,

Qüvvətli addımlardan razı qalmaz.

¹¹Amma Rəbb Ondan qorxanlardan,

Onun məhəbbətinə ümid bağlayanlardan razı qalar.

¹²Ey Yerusəlim, Rəbbi mədh et!

Ey Sion, Allahına həmd et!

¹³Çünki darvazalarının cəftələrini bərkidər,

Sənin əhalinə bərəkət verər.

¹⁴Sərhədinə əmin-amanlıq,

Sənə doyunca əla taxıl yetirər.

¹⁵Kəlamını yer üzünə yollar,

Onun sözü tez yayılar.

¹⁶Ağ yun kimi qar yağdırar,

Kül kimi qırov salar.

¹⁷Parça-parça dolu tökər.

Onun soyuğuna kim dözə bilər?

¹⁸Buyruq verəndə buz əriyər,

Külək əsdirəndə sular sel tək axar.

¹⁹O, Yaqub nəslinə sözlərini,

İsraillilərə qanun və hökmlərini bildirir.

²⁰Başqa millətlər üçün belə etməyib,

Heç birinə hökmlərini bildirməyib.

Rəbbə həmd edin!

Zəbur 148

Məzmur 148

¹Rəbbə həmd edin!

Göylərdən Rəbbə həmd edin,

Yüksəklərdən Ona həmd edin!

²Ey Onun bütün mələkləri, Ona həmd edin!

Ey Onun bütün orduları, Ona həmd edin!

³Ey günəş, ey ay, Ona həmd edin!

Ey parlayan bütün ulduzlar, Ona həmd edin!

⁴Ey göylərin ən uca qatları, Ona həmd edin!

Ey göy üzərindəki sular, Ona həmd edin!

⁵Rəbbin isminə həmd etsinlər!

Çünki Onun əmri ilə yaranıblar.

⁶Rəbb onları həmişəlik, əbədi olaraq yerinə qoyub,

Bunun üçün pozulmaz qayda qoyub.

⁷Rəbbə həmd edin, ey yer üzündəkilər,

Ey dəniz əjdahaları, ey bütün dərinliklər,

⁸Ey şimşək, dolu, qar, buludlar,

Ey Onun əmrinə tabe olan qasırğalar,

⁹Ey dağlar, bütün təpələr,

Ey bəhərli ağaclar, bütün sidr ağacları,

¹⁰Ey çöl və ev heyvanları,

Ey sürünənlər və uçan quşlar,

¹¹Ey dünya padşahları və bütün ümmətlər,

Ey başçılar və dünyada olan bütün hakimlər,

¹²Ey gənc oğlanlar və qızlar,

Ey qocalar, cavanlar!

¹³Hamınız Rəbbin isminə həmd edin!

Çünki yalnız Onun ismi ucadır.

Əzəməti göylərin, yerin üstündədir,

¹⁴O, xalqına böyük qüvvət verib.

Buna görə Ona həmd etsin Onun bütün möminləri,

Əziz xalqı olan İsrail övladları!

Rəbbə həmd edin!

Zəbur 149

Məzmur 149

¹Rəbbə həmd edin!

Rəbbə yeni bir ilahi oxuyun,

Möminlər camaatı arasında Ona həmd edin!

²İsrail nəsli Yaradanına görə sevinsin,

Sion övladları Padşahına görə şad olsun!

³Rəqslərlə isminə həmd edin,

Dəflə, lira ilə ismini tərənnüm edin!

⁴Çünki Rəbb Öz xalqından zövq alar,

Zəfəri ilə itaətkarların üstünə yaraşıq salar.

⁵Bu şərəfə görə qoy möminlər sevinsinlər,

Yataqlarında belə, Onu tərənnüm etsinlər.

⁶Dilləri ilə Allahı ucaltsınlar,

Əllərində ikiağızlı qılınc tutsunlar.

⁷Millətləri qıraraq qisas alsınlar,

Ümmətləri cəzalandırsınlar.

⁸Padşahlarına zəncir vursunlar,

Sərkərdələrini dəmir buxovlara salsınlar.

⁹Onlar üçün yazılan hökmü yerinə yetirsinlər,

Rəbbin bütün möminləri bununla şərəflənsinlər.

Rəbbə həmd edin!

Zəbur 150

Məzmur 150

¹Rəbbə həmd edin!

Müqəddəs məskənində Allaha həmd edin!

Möhtəşəm göy qübbəsində Ona həmd edin!

²Qüdrətli işləri üçün Ona həmd edin!

Bol əzəmətinə görə Ona həmd edin!

³Şeypur səsi ilə Ona həmd edin!

Çənglə, lira ilə Ona həmd edin!

⁴Dəflə, rəqslərlə Ona həmd edin!

Sazla, tütəklə Ona həmd edin!

⁵Xoş səsli sinclərlə Ona həmd edin!

Cingildəyən sinclərlə Ona həmd edin!

⁶Ey bütün canlı varlıqlar, Rəbbə həmd edin!

Rəbbə həmd edin!

Fəsillər

GİRİŞ

Birinci hissə

İkinci hissə

Üçüncü hissə

Dördüncü hissə

Beşinci hissə

ZƏBUR

MÜNDƏRİCAT

You May Also Like

Nəğmələr Nəğməsi Fəsillər

Əyyub