Paulun Filimona Məktubu

Filimona 1

¹Məsih İsa uğrunda həbs olunan mən Pauldan və Timotey qardaşdan sevimli əməkdaşımız Filimona,  ²bacımız Apfiyaya, birlikdə mübarizə apardığımız Arxipə və Filimonun evində toplaşan imanlılar cəmiyyətinə salam!  ³Atamız Allahdan və Rəbb İsa Məsihdən sizə lütf və sülh olsun!

Şükür və dua

⁴Dualarımda səni yada salıram və Allaha daima şükür edirəm.  ⁵Çünki Rəbb İsaya olan imanını və bütün müqəddəslərə bəslədiyin məhəbbəti eşidirəm.  ⁶Sən Məsihdə malik olduğumuz hər xeyirli şeyi dərk etdikcə imanını başqaları ilə paylaşmaqda fəal olmağın üçün dua edirəm.  ⁷Qardaşım, sənin məhəbbətin mənim üçün böyük sevinc və təsəlli qaynağı oldu. Çünki müqəddəslərin ürəyi sənin sayəndə təravətləndi.

Paulun Onisim üçün xahişi

⁸Buna görə münasib olanı sənə buyurmağa Məsihdə böyük cəsarətim olsa da,  ⁹indi Məsih İsa uğrunda həbsdə olan mən – yaşlı Paul sənə məhəbbətlə yalvarıram.  ¹⁰Həbsdə ikən ruhani atası olduğum oğlum Onisimlə bağlı səndən bir xahişim var.  ¹¹O bir vaxtlar sənə yararsız idi, amma indi həm sənə, həm də mənə yararlıdır.  ¹²Onun özünü, yəni can-ciyərimi sənin yanına göndərirəm.  ¹³Müjdə uğrunda həbsdə olduğum müddətdə sənin əvəzinə mənə xidmət etməsi üçün onu yanımda saxlamaq istəyirdim.  ¹⁴Amma sənin razılığın olmadan heç bir iş görmək istəmədim. İstədim ki, etdiyin yaxşılıq məcburi deyil, könüllü olsun.  ¹⁵Onisimin bir müddət səndən ayrılması bəlkə də bundan ötrü oldu ki, sən onu həmişəlik,  ¹⁶artıq qul kimi deyil, quldan üstün, sevimli bir qardaş kimi qəbul edəsən. O, xüsusilə, mənim üçün çox sevimlidir. Lakin həm cismən, həm də Rəbdə olaraq sənin üçün daha artıq sevimli qardaşdır.  ¹⁷İndi məni özünə şərik sayırsansa, onu da məni qəbul edəcəyin kimi qəbul et.  ¹⁸Əgər sənə hər hansı bir haqsızlıq etmişsə yaxud borcludursa, bunu mənim hesabıma yaz.  ¹⁹Mən Paul bunu öz əlimlə yazıram ki, əvəzini mən ödəyəcəyəm. Sənin öz həyatın üçün mənə borclu olduğunu demək istəmirəm.  ²⁰Bəli, qardaş, Rəbdə mənə bir yardımın olsun. Ürəyimi Məsihdə təravətləndir.  ²¹İtaətkar olduğuna əmin olaraq bunu sənə yazıram. Bilirəm ki, istədiklərimi artıqlaması ilə yerinə yetirəcəksən.  ²²Bununla yanaşı, mənə bir qonaq otağı hazırla. Ümidvaram ki, dualarınız vasitəsilə sizə bəxş olunacağam.

Xudahafizləşmə

²³Məsih İsada olub mənimlə birgə həbs olunan Epafra,  ²⁴əməkdaşlarım Mark, Aristarx, Dima, Luka da sənə salam göndərir.  ²⁵Rəbb İsa Məsihin lütfü sizin ruhunuza yar olsun!